Ki jan lavi te kòmanse?

“Se [Bondye] ki sous lavi a.” (Sòm 36:9). Èske w kwè sa? Gen moun ki panse se pa kreye yo kreye yo. Si se konsa, sa vle di nou pa gen okenn rezon ki fè nou egziste. Men, si se Jewova Dye ki te kreye nou, sa vle di nou gen yon rezon ki fè nou egzistea. Annou egzamine sa Bib la di sou ki kote lavi soti e annou wè poukisa nou gen bonjan rezon pou nou kwè sa Bib la di sou sa se laverite.

1. Ki jan linivè fè egziste?

Men sa Bib la di: “Okòmansman, Bondye te kreye syèl la ak tè a.” (Jenèz 1:1). Pifò syantifik yo dakò linivè gen yon kòmansman. Ki jan Bondye te kreye l? Li te sèvi ak lespri sen l, sètadi “fòs [li] ki t ap aji” pou l kreye tout sa ki gen nan linivè, sa gen ladan l zetwal yo ak planèt yo. — Jenèz 1:2.

2. Poukisa Bondye te kreye tè a?

Jewova “pa t annik kreye [tè a] pou granmesi [...], men [li] te fè l pou moun rete sou li”. (Ezayi 45:18.) Li te fè planèt nou an pou lèzòm viv alèz sou li pou toutan. (Li Ezayi 40:28; 42:5.) Lasyans fè konnen pa gen okenn lòt planèt ki menm jan ak tè a. Yo pa jwenn okenn lòt planèt ki gen tout sa yon moun bezwen pou l viv.

3. Sa k fè moun ak bèt diferan?

Apre Jewova te fin fè tè a, li te kreye plant ak bèt. Apre sa, “Bondye te vin kreye lòm pòtre ak li”. (Li Jenèz 1:27.) Sa k fè pa gen okenn lòt kreyati sou tè a ki menm jan ak lèzòm? Kòm nou fèt pòtre ak Bondye, nou kapab gen menm kalite avè l tankou lanmou ak jistis. Li te kreye nou tou ak kapasite pou nou aprann lòt lang, pou nou renmen bèl bagay e pou nou pran plezi nan mizik. E nou kapab adore Kreyatè nou an, yon bagay okenn bèt pa kapab fè.

FOUYE PLIS

Egzamine rezon ki fè li lojik pou nou kwè se yon moun ki te kreye tout sa ki vivan e pou nou kwè tout sa Bib la di sou kreyasyon an se laverite. Gade pou w wè ki sa kalite lèzòm yo aprann nou sou Bondye.

4. Se Bondye ki te kreye tout sa ki vivan

Moun fè lwanj pou yon seri moun ki kopye sou lanati pou yo fè yon seri lòt bagay. Men, kiyès ki merite louwanj pou sa k nan lanati yo? Gade VIDEYO a, epi reponn kesyon ki vin apre a.

VIDEYO: Kwè nan Bondye (2:43)

• Bay kèk bagay kèk moun kopye sou lanati.

Tout kay se yon moun ki fè plan l e ki konstwi l. Men, kiyès ki te reflechi pou l te fè tout sa ki nan lanati yo? Li Ebre 3:4, epi reponn kesyon sa yo:

• Ki sa w pi renmen nan tout sa k gen nan kreyasyon an?

• Èske li lojik pou nou kwè gen yon moun ki te kreye linivè ak tout sa ki ladan l? Poukisa?

Èske w te konnen?

Nou ka jwenn atik ak videyo sou sijè sa a sou jw.org nan ribrik ki gen tit “Ki kote mèvèy sa a soti?” ak “Kèk opinyon sou fason lavi te kòmanse”.

“Natirèlman, chak kay gen yon moun ki fè l men moun ki fè tout bagay se Bondye.”

5. Nou gen bonjan rezon pou nou kwè sa Bib la di sou kreyasyon an se laverite

VIDEYO: Èske se kreye yo te kreye linivè? — Yon pati nan videyo a (3:51)

• Èske Bib la anseye yo te kreye tè a ak tout sa k ap viv sou li nan sis jou e yo chak te dire 24 èdtan?

• Èske w panse sa Bib la anseye sou kreyasyon an lojik e li fè sans? Sa k fè se konsa w reponn?

Li Jenèz 1:1, epi reponn kesyon sa a:

• Syantifik yo fè konnen linivè te gen yon kòmansman. Ki jan sa yo di a ale nan menm sans ak sa w fèk sot li nan Bib la?

Gen moun ki panse Bondye te fè yon bagay ki te evolye oswa chanje pou l vin tounen tout sa ki egziste jodi a. Li Jenèz 1:21, 25, 27, epi reponn kesyon sa yo:

• Èske Bib la anseye Bondye te kreye yon fòm lavi ki senp e apre sa, fòm lavi sa a te vin evolye oswa chanje pou l vin tounen bèt ak moun? Oubyen èske li te kreye tout sa ki egziste selon “gwoup” yo ye a?

6. Lèzòm pa menm jan ak bèt yo

Nou pa menm jan ak bèt yo. Li Jenèz 1:26, epi reponn kesyon sa a:

• Etandone nou fèt avèk kapasite pou nou demontre lanmou ak konpasyon, e nou fèt pòtre ak Bondye, ki sa sa aprann nou sou pèsonalite Bondye?

SA W TE APRANN

Jewova kreye linivè ak tout sa ki vivan.

Revizyon

• Ki sa Bib la di sou fason linivè te kòmanse?

• Èske Bib la anseye Bondye te kreye yon fòm lavi ki senp, e apre sa, fòm lavi sa a te vin evolye oswa chanje pou l vin tounen bèt ak moun, oubyen èske li te kreye tout sa ki egziste selon gwoup yo ye a?

• Sa k fè pa gen okenn lòt kreyati sou tè a ki menm jan ak lèzòm?

APRANN PLIS

Egzamine kèk bagay nan lanati ki pwouve gen yon Kreyatè.

“Ki sa lanati aprann nou?” (Reveye n! septanm 2006)

Gade ki jan yon papa ap esplike pitit gason l sa Bib la di sou kreyasyon an.

‘Jewova kreye tout bagay’ (2:37)

Reflechi sou rezon ki fè evolisyon depaman ak sa Bib la di.

“Èske Bondye te sèvi ak evolisyon pou l kreye lavi?” (Atik sou Entènèt)

Egzamine pou w wè si zosman yo jwenn yo oswa rezilta eksperyans syantifik yo pwouve si se kreye Bondye te kreye tout sa ki vivan oswa si yo te vin egziste konsa konsa.

Cinq questions à se poser sur l’origine de la vie (Bwochi)

1. Poukisa nou dwe apresye lavi?

Nou dwe apresye lavi paske se yon kado Jewova, Papa nou ki renmen nou an, ban nou. Li se “sous lavi a”, sa vle di se li ki kreye tout sa ki vivan (Sòm 36:9). “Se li menm ki bay tout moun lavi ak souf ak tout bagay.” (Travay 17:25, 28). Jewova ban nou sa nou bezwen pou nou kontinye viv. Men, anplis de sa, li ban nou posiblite pou nou pran plezi nan lavi a. — Li Travay 14:17.