Jezi Kris se kle konesans Bondye a — BIBLIYOTÈK SOU ENTÈNÈT Watchtower

Chapit 4

Jezi Kris se kle konesans Bondye a

1, 2. Kouman relijyon nan monn jodi a kolboso kle konesans Bondye a ?

OU nan papòt lakay ou, w ap tatonnen chèche kle w. Li fè frèt e li fè nwa. Ou anvi antre anndan, men kle a refize ouvè pòt la. Sanble se bon kle a, poutan lang seri a pa fè yon pa. Ala de traka ! Ou fè yon gade kle yo ankò. Èske w foure bon kle a ? Èske yon moun te kolboso l ?

² Sitiyasyon sa a se menm pòtre ak efè konfizyon relijyon nan monn jodi a bay sou konesans Bondye a. Toutbonvre, bonkou moun kolboso kle ki pou bay moun bon konprann nan : Jezi Kris. Sèten relijyon disparèt kle a paske Jezi Kris pa nan pwogram yo ditou. Gen lòt ki tòde wòl Jezi Kris la paske se li yo adore kòm Bondye Toupisan. Antouka, nou pa ka rive konnen Bondye si nou pa byen konprann wòl Jezi Kris, pèsonaj enpòtan sa a.

3. Poukisa nou ka di se Jezi ki kle konesans Bondye a ?

³ Petèt ou sonje Jezi te di : “ Men sa lavi etènèl la siyifi : se pou yo aprann konnen w, ou menm, sèl vrè Bondye a, ak moun ou te voye a, Jezi Kris. ” (Jan 17:3). Lè Jezi te di sa, se pa gam li t ap fè. Plizyè fwa, Bib la repete nesesite pou moun chèche gen konesans egzak sou Kris (Efezyen 4:13 ; Kolosyen 2:2 ; 2 Pyè 1:8 ; 2:20). Apot Pyè fè nou remake “ tout pwofèt yo bay temwayaj sou li [Jezi Kris]. ” (Travay 10:43). E apot Pòl te ekri : “ Tout trezò sajès ak konesans sere nan li [Jezi] ak anpil swen. ” (Kolosyen 2:3). Pòl te menm di se grasa Jezi tout pwomès Jewova yo vin reyalite (2 Korentyen 1:20). Konsa se Jezi Kris ki bonjan kle konesans Bondye a. Konesans nou sou Jezi pa dwe gen anyen ki pa sa, kit se konsènan ki moun li ye, kit se konsènan wòl li jwe nan pwogram Bondye. Men, poukisa disip Jezi yo te konsidere l kòm eleman prensipal nan pwogram Bondye ?

MESI BONDYE TE PWOMÈT LA

4, 5. Ki espwa moun te genyen sou Mesi a, e kouman disip Jezi yo te konsidere li ?

⁴ Depi nan tan Abèl, ki te yon nonm fidèl, se ak enpasyans sèvitè Bondye yo t ap tann Semans Jewova Dye li menm te pwomèt la (Jenèz 3:15 ; 4:1-8 ; Ebre 11:4). Dapre sa ki te revele, Semans la ta sèvi nan pwogram Bondye kòm Mesi, ki vle di “ Wen ”. Li ta “ elimine peche ”. E Sòm yo te anonse glwa Wayòm li an (Danyèl 9:24-26 ; Sòm 72:1-20). Ki moun ki t apral demontre se li menm ki Mesi a ?

⁵ Imajine nan ki eksitasyon yon jèn gason Jwif yo rele Andre te ye lè l te tande pawòl nan bouch Jezi Nazarèt. Andre kouri al rele frè li, Simon Pyè, epi li di l : “ Nou jwenn Mesi a. ” (Jan 1:41). Disip Jezi yo te gen asirans se li menm ki Mesi Bondye te pwomèt la (Matye 16:16). E vrè kretyen yo te dispoze sakrifye lavi yo, paske yo te gen konviksyon se Jezi ki Mesi a oswa Kris Bondye te pwomèt la. Ki prèv yo te genyen ? Ann egzamine twa kalite prèv.

PRÈV KI DEMONTRE JEZI TE MESI A

6. a) Nan ki ras moun Semans Bondye te pwomèt la te dwe soti, e ki jan nou fè konnen Jezi te soti nan liy fanmi sa a ? b) Poukisa li te enposib pou yon moun ki te vivan apre ane 70 epòk nou an, te bay prèv li se Mesi a ?

⁶ Liy ras moun Jezi te soti a se premye prèv ki demontre li se Mesi Bondye te pwomèt la. Jewova te di Abraram sèvitè li a, Semans li pwomèt la ta soti nan fanmi li. Izarak pitit Abraram, Jakòb pitit Izarak, Jida pitit Jakòb, yo chak te resevwa menm pwomès la (Jenèz 22:18 ; 26:2-5 ; 28:12-15 ; 49:10). Plizyè syèk apre, ras moun ki t apral bay Mesi a te vin pi klè lè wa David te aprann se nan liy fanmi pa l li ta soti (Sòm 132:11 ; Izayi 11:1, 10). Evanjil Matye ansanm ak pa Lik la pwouve se nan liy fanmi sa a Jezi te soti (Matye 1:1-16 ; Lik 3:23-38). Jezi te gen yon pil lènmi jire, men pa gen youn nan yo ki te ka demanti se pa t nan liy zansèt sa yo li te soti. Dayè moun te konn pale de sa anpil (Matye 21:9, 15). Sa te klè yo pa t ka atake l nan branch zansèt li te soti a. Sepandan, lè Women yo te ravaje Jerizalèm nan ane 70 epòk nou an, tout rejis fanmi jwif yo te detwi. Apre dat sa a, pèsonn pa t ka bay prèv se li menm ki Mesi Jewova te pwomèt la.

7. a) Ki dezyèm kalite prèv ki montre se Jezi ki te Mesi a ? b) Kouman Mika 5:2 te akonpli sou Jezi ?

⁷ Akonplisman pwofesi yo se yon dezyèm kalite prèv. Anpil anpil pwofesi nan Ekriti ann ebre yo bay bonjan detay sou divès aspè lavi Mesi a. Nan uityèm syèk anvan epòk nou an, pwofèt Mika te anonse gran chèf sa a ta fèt nan yon vil ki pa gen gwo enpòtans yo te rele Betleyèm. Te gen de vil ann Izrayèl ki te pote non sa a, men pwofesi a te vize youn dirèkteman : Betleyèm Efrata, kote wa David te fèt la (Mika 5:2). Paran Jezi yo, Jozèf ak Mari, t ap viv Nazarèt apeprè 150 kilomèt nan nò vil Betleyèm. Pandan Mari te ansent, anperè women an, Seza Ogis, te bay lòd pou tout moun nan peyi a al nan resansman nan vil lakay yoa. Se konsa Jozèf te mennen madanm ni Betleyèm tou ansent, e se la Jezi fèt. — Lik 2:1-7.

8. a) Ki lè 69 “ semèn ” yo te kòmanse, e ak ki evènman yo te kòmanse ? b) Konbyen tan 69 “ semèn yo ” te dire, e ki sa ki te pase lè yo te fini ?

⁸ Nan sizyèm syèk anvan epòk nou an, pwofèt Danyèl te anonse “ Lidè a, Mesi a ”, ta parèt 69 “ semèn ” apre yo te fin bay lòd pou remete Jerizalèm kanpe e pou rebati li (Danyèl 9:24, 25). Chak “ semèn ” sa yo ta dire setanb. Dapre Labib ak Listwa, yo te bay lòd pou rebati Jerizalèm an 455 anvan epòk nou an (Neyemya 2:1-8). Mesi a te dwe parèt 483 an (69 fwa 7) apre 455 anvan epòk nou an. Sa mennen nou nan ane 29 epòk nou an, ane egzak Jewova te sèvi ak lespri sen pou li wenn Jezi. Se konsa Jezi te vin “ Kris ” (ki vle di “ Wen ”) oubyen Mesi. — Lik 3:15, 16, 21, 22.

9. a) Kouman Sòm 2:2 te akonpli ? b) Èske w ka site kèk lòt pwofesi ki te akonpli sou Jezi ? (Gade tablo a).

⁹ Natirèlman, se pa tout moun ki te asepte Jezi kòm Mesi Bondye te pwomèt la, e Bib la te deja anonse sa. Nan Sòm 2:2 men sa Bondye te enspire wa David pou l predi : “ Wa latè yo leve kanpe, gwo chèf yo mete tèt yo ansanm kont Jewova ak wen li a. ” Pwofesi sa a te fè konprann dirijan plizyè peyi ta fè yon sèl feso kont wen oswa Mesi Jewova a. E se sa ki te pase. Lidè relijye jwif yo, wa Ewòd, gouvènè women an Pons Pilat, yo tout te jwe yon wòl nan lanmò Jezi. Ewòd ak Pilat, de ansyen lènmi, te vin bon zanmi depi lè a (Matye 27:1, 2 ; Lik 23:10-12 ; Travay 4:25-28). Pou plis prèv ki demontre se Jezi ki Mesi a, nou mèt al gade tablo “ Kèk bèl pwofesi mesyanik ” la.

10. Ki jan Jewova te sètifye se Jezi ki Wen li te pwomèt la ?

¹⁰ Temwayaj pa Jewova Dye se twazyèm kalite prèv ki sètifye Jezi se Mesi a. Jewova te voye anj fè pèp la konnen se Jezi ki Mesi li te pwomèt la (Lik 2:10-14). Anfèt, pandan Jezi t ap viv sou tè a, Jewova li menm te pale detan nan syèl pou montre li apwouve Jezi (Matye 3:16, 17 ; 17:1-5). Jewova te bay Jezi pisans pou l akonpli mirak. E yo chak se te yon prèv anplis pou Bondye sètifye se Jezi ki te Mesi a, paske Bondye pa t ap janm ba yon blofè pouvwa pou l fè sa. Jewova te sèvi ak lespri sen tou pou l te enspire pawòl Evanjil yo. Konsa, prèv ki demontre se Jezi ki Mesi a te ekri nan Bib la, liv yo tradui nan pi plis lang, yo simaye piplis diran tout istwa lèzòm. — Jan 4:25, 26.

11. Ki valè prèv ki montre se Jezi ki te Mesi a ?

¹¹ Tout seri prèv sa yo gen ladan yo plizyè santèn evènman reyèl ki idantifye Jezi kòm Mesi Bondye te pwomèt la. Vrè kretyen yo gen rezon konsidere li kòm ‘ moun tout pwofèt yo bay temwayaj de li ’ e kòm kle konesans Bondye a (Travay 10:43). Men sa pa sifi pou nou konnen senpman Jezi se Mesi a. Gen lòt bagay pou nou aprann sou li ankò. Ki kote l te soti ? Ak ki moun li te sanble ?

LAVI JEZI ANVAN LI TE VIN YON ÒM

12, 13. a) Kouman nou fè konnen Jezi t ap viv nan syèl anvan li te vin sou tè a ? b) Kilès ki “ Pawòl la ”, e ki sa li t ap fè anvan li te vin yon òm ?

¹² Nou ka divize lavi Jezi an twa etap. Premye etap la te kòmanse lontan lontan anvan nesans li isiba. Mika 5:2 te di lavi Mesi a derape “ depi ansyen tan yo, depi nan jou tan endefini yo ”. E Jezi pa t pè fè konnen se “ nan zòn anwo ” li te soti, nan syèl la (Jan 8:23 ; 16:28). Konbyen tan li te viv nan syèl anvan li te vin sou tè a ?

¹³ Yo te rele Jezi ‘ sèl Pitit Bondye fè ’, paske se Jewova ki te kreye li dirèkteman (Jan 3:16). Kòm Jezi se “ premye nan tout kreyasyon ”, Bondye te sèvi avè l pou kreye tout lòt bagay (Kolosyen 1:15 ; Revelasyon 3:14). Jan 1:1 di : “ Pawòl la ” (Jezi anvan li te vin òm) te avèk Bondye “ okòmansman ”. Kidonk Pawòl la te avèk Jewova lè l te kreye “ syèl la ak tè a ”. Se ak Pawòl la Bondye t ap pale lè l te di : “ Annou fè lòm pòtre ak nou. ” (Jenèz 1:1, 26). Pa gen dout, se Pawòl la ki te “ ouvriye abil ”, byenneme yo prezante nan Pwovèb 8:22-31 kòm lasajès an pèsòn ki t ap travay bò kote Jewova pou fè tout bagay. Apre Jewova te fin kreye Pawòl la, li te viv anpil tan bò kote Bondye nan syèl la, anvan li te vin yon òm isiba.

14. Poukisa yo rele Jezi “ pòtre Bondye envizib la ” ?

¹⁴ Se pa etonan si Kolosyen 1:15 rele Jezi “ pòtre Bondye envizib la ” ! Apre yo fin pase yon bon valè tan nan entimite youn bò kote lòt, Pitit obeyisan an te vin sanble ak Papa l, Jewova. Se yon lòt rezon ki fè Jezi se kle konesans Bondye a, konesans ki bay lavi a. Tou sa Jezi te fè sou tè a se egzakteman sa Jewova ta fè. Se sa k fè, chèche konnen Jezi vle di tou chèche konnen Jewova pi byen (Jan 8:28 ; 14:8-10). Kidonk, li esansyèl pou moun aprann konnen Jezi Kris piplis.

LAVI JEZI ISIBA

15. Kouman Jezi te fè fèt pafè ?

¹⁵ Dezyèm etap lavi Jezi se isiba li te pase l. Li te asepte pou bongre pa l pou Jewova te transfere lavi li soti nan syèl vin nan matris yon vyèj, yon jèn fi Jwif fidèl yo te rele Mari. Lespri sen Jewova a, oubyen fòs aktif pisan li a, ‘ te kouvri Mari anba lonbray li ’. E se konsa Mari vin ansent, e finalman li fè yon tibebe pafè (Lik 1:34, 35). Jezi pa t eritye tras peche a paske lavi li soti nan yon sous pafè. Jezi te leve nan yon kay kote yo pa t gen gwo mwayen, kòm pitit gason adoptif Jozèf, yon bòs chapant. Li te premye nan yon fanmi ki te gen plizyè pitit. — Izayi 7:14 ; Matye 1:22, 23 ; Mak 6:3.

16, 17. a) Kote pouvwa Jezi te genyen pou l fè mirak la te soti, e èske w ka bay kèk nan mirak sa yo ? b) Site kèk nan bon kalite Jezi te demontre li genyen.

¹⁶ A 12 an, Jezi te deja demontre men longè atachman l pou Jewova Dye (Lik 2:41-49). Lè Jezi te vin gran e li te kòmanse ministè li a 30 an, li te demontre tou yon kokenn amou pou lèzòm. Lè lespri sen Bondye te ba l pouvwa pou l fè mirak, se ak konpasyon li te geri malad, moun k ap bwete, moun enfim, moun avèg, moun soud, moun ki gen lèp (Matye 8:2-4 ; 15:30). Jezi te bay plizyè milye moun grangou manje (Matye 15:35-38). Li te kalme yon tanpèt van ki te mete lavi zanmi l yo an danje (Mak 4:37-39). Li te menm resisite moun mouri (Jan 11:43, 44). Mirak sa yo se evènman reyèl listwa rapòte. Menm advèsè Jezi yo te oblije rekonèt li ‘ te akonpli anpil siy ’. — Jan 11:47, 48.

¹⁷ Jezi te pwonmennen nan tout peyi a pou l anseye moun yo Wayòm Bondye a (Matye 4:17). Li te kite tou yon bèl egzanp pasyans ak moderasyon. Menm lè disip yo te gen mankman, avèk byenveyans li te di yo : “ Se vre, lespri a chofe, men lachè a fèb. ” (Mak 14:37, 38). Poutan, Jezi te gen kouray. Li te kare ak moun ki t ap meprize laverite e ki t ap toupizi pi piti yo (Matye 23:27-33). Sou tèt tou sa, li te imite modèl lanmou Papa a san fay. Jezi te menm rive asepte mouri, pou bongre pa l, pou lèzòm ki fèt nan peche te ka jwenn yon espwa pou lavni. Se sa ki fè, se pa etonan pou nou pale de Jezi kòm kle konesans Bondye a ! Wi, li se kle vivan an ! Men, poukisa nou di se yon kle vivan ? Sa mennen nou nan twazyèm etap lavi li.

JEZI JODI A

18. Kouman nou ta dwe anvizaje Jezi Kris jodi a ?

¹⁸ Kwak Bib la pale de lanmò Jezi, kounye a li vivan ! Laprèv, nan premye syèk epòk nou an, plizyè santèn moun te temwen rezirèksyon li ak je yo (1 Korentyen 15:3-8). Tankou pwofesi a te anonse sa, li te chita adwat Papa l pandan li t ap tann pou l resevwa pouvwa wayal la nan syèl (Sòm 110:1 ; Ebre 10:12, 13). Ki jan nou ta dwe anvizaje Jezi jounen jodi a ? Èske nou ta dwe imajine li tankou yon tibebe san defans nan yon krèch ? Oubyen èske nou ta dwe wè li tankou yon nonm yo fin egzekite k ap agoni ? Non. Li se yon Wa pisan, yon Wa an fonksyon ! Talè konsa, li pral demontre dominasyon li sou planèt nou an ki chaje ak pwoblèm nan.

19. Ki aksyon Jezi pral fè talè konsa ?

¹⁹ Revelasyon 19:11-15 dekri Jezi Kris, Wa a, defason eklatan, k ap vini ak anpil pisans pou detwi mechan yo. Chèf selès ki gen anpil lanmou sa a, se pa ti anvi li anvi mete fen nan soufrans ki lage plizyè milyon moun nan lapenn jodi a ! E li enpasyan tou pou l vin ede moun k ap fè efò pou imite egzanp pafè li te kite lè l te sou tè a (1 Pyè 2:21). Dezi li se pou l pwoteje yo pandan “ lagè gran jou Bondye Toupisan an ”, gè souvan yo rele Amagedòn e ki pa lwen vini an. Sa pral pèmèt yo viv pou tout tan sou tè a kòm moun ki soumèt anba Wayòm Bondye nan syèl la. — Revelasyon 7:9, 14 ; 16:14, 16.

20. Ki sa Jezi pral fè anfavè lèzòm pandan Rèy mil an li a ?

²⁰ Pandan rèy lapè mil an Jezi yo te predi a, li pral akonpli yon seri mirak anfavè lèzòm (Izayi 9:6, 7 ; 11:1-10 ; Revelasyon 20:6). Jezi pral geri tout maladi, li pral disparèt lanmò. Li pral resisite plizyè milya moun pou yo menm tou yo ka jwenn yon okazyon pou viv etènèlman isiba (Jan 5:28, 29). Se sèten, w ap byen kontan pou w konnen plis sou Wayòm Mesi a nan yon chapit pi devan. Asire sou sa, lavi anba dominasyon Wayòm nan pral yon mèvèy ou pa menm ka imajine. Ala enpòtan sa enpòtan pou moun chèche konnen Jezi Kris pi byen ! Wi, li esansyèl pou nou pa janm sispann fikse je sou Jezi, kle vivan konesans Bondye a, konesans k ap mennen nan lavi etènèl la.

[Nòt anba paj]

a Resansman sa a te pèmèt Lanpi women an ranmase enpo pi fasil. Seza Ogis, san li pa t konnen, te patisipe nan akonplisman pwofesi ki te anonse gen yon chèf ‘ ki ta fè yon pèseptè pase nan wayòm nan ’. Menm pwofesi a te anonse yo ta “ kraze Lidè kontra a ” oswa Mesi a sou rèy moun ki t ap vin apre chèf sa a. Yo te egzekite Jezi sou rèy Tibè ki te vin apre Ogis. — Danyèl 11:20-22.

b An jeneral, Jwif lontan yo te abitye ak lide semèn ane a. Paregzanp menm jan chak setyèm jou te yon saba, chak setyèm ane te yon ane saba. — Egzòd 20:8-11 ; 23:10, 11.

TESTE KONESANS OU

Kouman liy ras moun Jezi te soti a pwouve se li ki Mesi a ?

Èske w ka site kèk pwofesi mesyanik ki te akonpli sou Jezi ?

Ki fason dirèk Bondye te demontre se Jezi ki Wen li a ?

Poukisa Jezi se kle vivan konesans Bondye a ?

[Tablo nan paj 37]

KÈK BÈL PWOFESI MESYANIK

PWOFESI

EVÈNMAN

AKONPLISMAN

PREMYE PERYÒD LAVI LI

Izayi 7:14