Referans pou Pwogram reyinyon Lavi nou ak travay nou fè a

13-19 JEN

TREZÒ KI NAN PAWÒL BONDYE A | SÒM 38-44

“Jewova ap ede moun ki malad yo”

w91-F 1/10 14 § 6

Se pou bra Jewova ki la pou toutan yo soutni nou

Yon moun ki gen sousi pou lòt moun ap ede moun ki nan bezwen yo. “Jou malè a” ka reprezante yon malè ki rive yon moun oswa yon peryòd long kote l te jwenn difikilte ki febli l. Li gen konfyans Bondye ap ede l lè l malad, e lòt moun “sou tè a ap fè konnen li gen kè kontan”, lefètke yo pral fè tout moun konnen fason Jewova te fè l mizèrikòd. Bondye te soutni David “pandan l kouche sou kabann li tou malad” petèt nan peryòd nan lavi David kote Absalon pitit li te eseye mete men sou twòn Izrayèl la. — 2 Samyèl 15:1-6.

20-26 JEN

TREZÒ KI NAN PAWÒL BONDYE A | SÒM 45-51

“Jewova pap rejte moun ki gen kè yo ap fann”

w93-F 15/3 10-11 § 9-13

Mizèrikòd Jewova delivre nou anba dezespwa

David ak Batcheba te dwe rann Jewova kont pou peche yo te fè a. Byenke yo te ka touye yo pou peche yo te fè yo, Bondye te fè yo mizèrikòd. Rezon ki fè l te plis gen mizèrikòd pou David se te poutèt alyans Wayòm nan (2 Samyèl 7:11-16). Nou ka wè fason David te repanti pou peche l te fè anrapò ak Batcheba yo nan Sòm 51 an. Sòm touchan sa a, se wa David ki te ekri l pandan l te gen remò. Li te ekri l apre pwofèt Natan te fin pale ak konsyans li pou l te fè l wè nan ki pwen peche l te fè yo te grav. Natan te bezwen anpil kouraj pou l te atire atansyon David sou peche l te fè yo, se konsa tou, ansyen yo nan kongregasyon kretyen an bezwen demontre anpil kouraj pou yo fè yon bagay konsa. Apre sa, wa a pa t diskite ak Natan kòmkwa li pa t koupab e li pa t fè touye Natan, men depreferans, li te demontre imilite e li te konfese peche l la (2 Samyèl 12:1-14). Sòm 51 fè nou konnen sa l te di Bondye nan yon priyè konsènan peche l yo e se yon Sòm nou ka medite sou li toutpandan n ap priye sitou si nou te fè yon peche e nou swaf pou Jewova fè nou mizèrikòd.

Nou responsab devan Bondye

David pa t chèche defann tèt li pou peche l te fè a, okontrè men ki siplikasyon li te fè Bondye: “Fè m favè, o Bondye, akoz lanmou fidèl ou genyen an. Efase sa m fè ki mal yo, paske, ou gen anpil mizèrikòd.” (Sòm 51:1). Lefètke David te peche a, se kòmsi li te travèse limit Lalwa Bondye a te fikse. Sepandan, li te ka espere pou l retounen gen bon relasyon ak Bondye si Bondye te fè l favè ann amoni ak bonte ki plen lanmou Bondye genyen oubyen lanmou fidèl li. Lefètke Bondye te konn demontre anpil mizèrikòd anvan sa, sa te fè Wa a ki te repanti gen asirans Moun ki fè l la ap efase peche l te fè yo.

Tout sakrifis yo te konn fè nan jou Pirifikasyon an se te yon lonbray Jewova te bay pou l te ka montre li gen yon mwayen pou l pirifye moun ki repanti yo anba peche yo fè yo. Kounye a nou konnen nou ka benefisye mizèrikòd li ak padon l grasa lafwa nou gen nan sakrifis ranson Jezi Kris la. Si David, pa mwayen lonbray li te genyen konsènan sakrifis sa a sèlman, li te ka gen konfyans nan bonte Jewova ki gen lanmou ak nan mizèrikòd Jewova, alewè pou sèvitè Bondye yo jodi a, yo bezwen gen lafwa nan sakrifis ranson Jewova fè yo jwenn pou l delivre yo! — Women 5:8; Ebre 10:1.

Men yon lòt bagay David te mande Bondye nan siplikasyon l t ap fè a: “Lave m byen lave akoz erè m nan, Netwaye m pou w efase peche m nan. Paske, mwen byen konnen sa m te fè ki mal yo, E se toutan peche m nan devan m.” (Sòm 51:2, 3). Nou peche dèske nou pa rive atenn nivo prensip Jewova yo. Se sa k te rive David. Sepandan, li pa t tankou yon asasen oubyen yon moun k ap fè adiltè ki pa bay tèt li pwoblèm pou sa l fè yo, ni tou li pa t annik gen pwoblèm poutèt li konnen li pral pran yon pinisyon oubyen l ap pran nan yon maladi. Lefètke David te renmen Jewova, li te rayi sa ki mal (Sòm 97:10). Li te gen degoutans pou peche l te fè a e l te vle pou Bondye lave l pou peche a sot nan li nèt. David te konnen sa l te fè yo e li te vrèman regrèt li te kite move dezi l te genyen yo pran pye sou li konsa pou l fè l peche. Se toutan peche l la te devan l, paske lè konsyans yon moun ki gen lakrentif pou Bondye ap kale l, li pap sispann toutotan moun nan pa repanti, li konfese e li jwenn padon nan men Jewova.

David te rekonèt li te koupab devan Jewova, se sa k fè l te di: “Se kont ou menm, se sitou kont ou menm, mwen te peche. Mwen fè sa ki mal nan je w. Konsa, ou jis lè w pale E jijman w fè a bon.” (Sòm 51:4). David te vyole lwa Bondye yo, li te dezonore travay li antanke wa, e li pa t ‘montre l gen okenn respè pou Jewova nan ka sa a’ paske sa te ka lakòz yo pale Jewova mal (2 Samyèl 12:14; Egzòd 20:13, 14, 17). Sa David te fè yo te yon peche kont Izrayelit yo ak manm fanmi l yo tou, menm jan an tou, yon moun ki batize ki peche jodi a fè kongregasyon kretyen an ak moun ki pwòch li yo lapenn e li ka menm fè yo soufri. Byenke wa a ki te repanti te konnen li te peche kont pwochen l yo tankou Ouri, li te rekonèt moun li te plis koupab devan l lan se te Jewova. (Konpare ak Jenèz 39:7-9.) David te rekonèt jijman Jewova fè a t ap jis (Women 3:4). Kretyen ki peche yo bezwen gen menm pwennvi a.

w93-F 15/3 12-13 § 18-20

Mizèrikòd Jewova sove nou anba dezespwa

Siplikasyon pou retablisman

Kèlkeswa kretyen ki te gen move konsyans lan ka konprann pawòl David te di lè l te di: “[Jewova] Fè m tande vwa moun ki kontan e k ap rejwi pou mwen ka rejwi menmsi w fin kraze zo m.” (Sòm 51:8). Anvan David te repanti e anvan l te konfese peche l yo, move konsyans li te genyen an te kraze l nèt. Li pa t menm pran plezi lè bon chantè ak gwo mizisyen te konn jwe mizik ki rejwi kè moun. David te tèlman ap soufri lefètke l te pèdi apwobasyon Bondye sa te fè l santi l tankou yon moun yo te kraze zo l. Li te swaf jwenn padon, li te swaf retounen gen bon relasyon ak Bondye e li te swaf pou l retounen gen kè kontan li te genyen anvan an. Jodi a tou, yon moun ki te peche ki repanti bezwen jwenn padon nan men Jewova pou l retounen gen kè kontan li te genyen anvan l te fè sa ki mal la, ki te mete relasyon l gen ak Bondye an danje a. Lè yon moun ki repanti retounen gen “yon kè kontan [...] grasa lespri sen” sa montre Jewova padone l e li renmen l “yon kè kontan nou genyen grasa lespri sen”. (1 Tesalonisyen 1:6.) Sa vrèman rekonfòte nou.

Men yon lòt bagay David te mande Bondye: “Vire figi w pou w pa gade peche m yo epi efase tout erè m yo.” (Sòm 51:9). Jewova pa t ap janm gade peche yon fason ki favorab. Se sa k fè David te mande l pou l vire figi l pou l pa gade peche David yo. Mete sou sa, wa a te sipliye Bondye pou l efase tout erè l yo, pou l efase bagay mal li te fè. David t ap tèlman kontan si Jewova te fè sa! Sa t ap fè l gen kè kontan, sa t ap fè konsyans li sispann kale l, konsa, wa a ki te repanti t ap konnen Bondye l la ki plen lanmou an padone l.

E si ou menm ou te peche?

Sòm 51 montre nou nenpòt sèvitè Jewova ki fè yon peche grav men ki repanti toutbon pa bezwen pè mande l fè l favè epi netwaye l anba peche l fè a. Si w se yon kretyen ki te peche konsa, sa w panse si w ta priye Papa w ki nan syèl la avèk imilite pou w mande l padon. Fè l konnen ou rekonèt ou bezwen l ede w pou w retounen gen apwobasyon l, epi mande l ede w retounen gen kè kontan ou te gen anvan an. Yon kretyen ki repanti dwe pwoche kot Jewova san l pa pè, pou l priye l konsa, “paske l ap padone l nèt”. (Ezayi 55:7; Sòm 103:10-14.) Natirèlman, li dwe rele ansyen yo yon fason pou yo ka ba l èd li bezwen nan domèn espirityèl. — Jak 5:13-15.

w93-F 15/3 14-17 § 4-16

Jewova pap meprize yon kè k ap fann

Nou bezwen gen yon kè ki pwòp

Si yon kretyen nan yon move eta nan domèn espirityèl poutèt li peche, ki sa l ka bezwen apre mizèrikòd Jewova ak padon l? Men sa David te mande: “Fè kè m vin pwòp, o Bondye. Ban m yon lòt espri, yon espri k ap fè m fidèl.” (Sòm 51:10). Sanble David te mande sa paske l te remake tandans pou l fè peche grav la te nan kè l toujou. Petèt nou pa t janm tonbe nan peche ki sanble ak sa David te fè anrapò ak Batcheba ak Ouri yo, men nou bezwen èd Jewova pou nou pa tonbe nan tantasyon pou nou fè peche ki grav. Se pou sa nou bezwen èd Bondye pou nou retire move panchan nan kè nou tankou avidite ak lahèn, yon seri peche ki parèy ak vòlè ak touye moun. — Kolosyen 3:5, 6; 1 Jan 3:15.

⁵ Jewova mande pou sèvitè l yo gen yon ‘kè ki pwòp’ sa vle di pou yo gen bon mobil oswa bon entansyon. David te remake li pa t demontre li gen yon kè ki pwòp konsa se sa k fè li te mande Bondye pou l pwòpte kè l e pou l fè l vin ann amoni ak prensip Bondye yo. David, ki te ekri sòm nan, te vle gen yon lòt espri tou, sa vle di yon lòt mantalite. Li te bezwen gen yon espri ki t ap ede l kenbe pou l pa tonbe nan tantasyon e ki t ap ede l rete atache ak lwa ak prensip Jewova yo.

Lespri sen enpòtan anpil

Lè nou dekouraje poutèt erè nou fè oubyen peche nou fè, nou ka santi Bondye pral jete nou oubyen retire lespri sen l oubyen fòs li genyen k ap aji a sou nou. Se konsa David te santi l, paske li te priye Jewova konsa: “Pa voye m jete. Pa retire lespri sen w sou mwen.” (Sòm 51:11). David te repanti e li te ba anpil. Li te santi peche l yo fè l pa diy pou l sèvi Jewova. Si Bondye ta voye l jete, li t ap pèdi favè l, konsolasyon l bay ak benediksyon l. Pou David retounen gen bon relasyon ak Bondye, li te bezwen gen lespri sen Jewova. Kòm lespri sen an t ap sou li, li t ap ka chèche direksyon Jewova pa mwayen lapriyè pou l konnen ki jan pou l fè l plezi, li t ap ka kouri pou peche e li t ap ka dirije avèk sajès. David te konnen li te peche kont moun ki bay lespri sen an, se sa k fè li te gen rezon sipliye Jewova pou l pa retire l sou li.

E nou menm? Nou dwe priye pou n gen lespri sen e nou dwe fè atansyon pou nou pa sispann suiv direksyon l ban nou sa ki t ap fè l lapenn (Lik 11:13; Efezyen 4:30). Sinon nou ka pèdi lespri sen, e nou pap ka demontre fwi lespri a bay la, ki soti nan Bondye anpalan de lanmou, lajwa, lapè, pasyans, byenveyans, bonte, lafwa, dousè ak metriz. Prensipal rezon k ap fè Jewova Dye retire lespri sen l sou nou se si nou kontinye peche kont li san nou pa repanti.

Kè kontan yon moun jwenn lè yo sove l

Yon moun ki te peche ki retounen gen bon relasyon ak Bondye ka retounen benefisye dispozisyon Jewova pran pou l sove moun nan. David te swaf sa, se sa k fè l te sipliye Bondye konsa: “Fè m retounen gen kè kontan mwen te genyen lè w te sove m nan. Fè m anvi obeyi w.” (Sòm 51:12). Sa te estrawòdinè pou l gen kè kontan grasa esperans pou l jwenn delivrans nan men Jewova Dye, yon esperans ki sèten (Sòm 3:8). Apre David te fin peche kont Bondye, li te chèche retounen gen kè kontan li te genyen lè Bondye te sove l la. Annapre, Jewova te bay delivrans pa mwayen sakrifis ranson Jezi Kris, Pitit li a. Antanke sèvitè Bondye, si nou ta fè yon peche grav men nou ta renmen gen kè kontan lefètke Jewova sove nou, nou dwe montre nou regrèt sa nou te fè yon fason pou n pa peche kont lespri sen. — Matye 12:31, 32; Ebre 6:4-6.

David te mande Jewova pou Jewova ede l lè l te di: “Fè m anvi obeyi w.” Sanble sa David te mande a pa t fè referans ak dispozisyon Bondye genyen pou l ede oswa ak lespri sen Bondye. Li te fè referans pito ak dispozisyon mantal David. David te vle pou Bondye fè l anvi obeyi l pou l fè sa ki bon epi pou l pa tonbe nan peche ankò. Jewova pa janm sispann ede sèvitè l yo e li leve sèvitè l yo k ap pase anba divès eprèv (Sòm 145:14). Sa vrèman ankourajan pou nou konn sa, sitou si nou te fè yon erè e nou vrèman regrèt sa nou te fè a, epi nou anvi sèvi Jewova fidèlman pi plis toujou!

Ki sa pou n anseye moun k ap fè peche?

Si Bondye ta pèmèt sa, David te vle fè yon bagay ak tout kè l ki t ap nonsèlman montre jan l rekonesan anvè Jewova pou mizèrikòd li men tou ki t ap ede lòt moun. Men sa l te di Jewova ak tout kè l “M ap fè moun k ap fè sa ki mal yo konnen chemen w yo Yon fason pou moun k ap fè peche yo ka tounen vin jwenn ou.” (Sòm 51:13). Men etandone David te deja yon pechè pou tèt li, ki jan l t ap fè anseye moun k ap fè peche kont Lalwa Bondye a? Ki sa li t ap di yo? Epi nan ki sans sa t ap ede?

Montre David t ap montre Izrayelit k ap fè peche yo chemen Jewova yo nan espwa pou l ta ede yo sispann fè sa ki mal, te ka ede yo wè tou jis nan ki pwen li pa bon pou yon moun peche, ki sa sa vle di pou yon moun regrèt yon bagay epi jwenn padon nan men Bondye. Etandone David te viv sa sa vle di pou yon moun pèdi favè Jewova toutpandan konsyans li ap kale l, se sèten li t ap kapab anseye moun ki te peche ki gen kè yo k ap fann men ki repanti yo avèk konpasyon. Nòmalman, se sèlman apre David te fin aksepte prensip Jewova yo ak padon Jewova, li t ap kapab pran tèt li kòm egzanp, paske moun ki refize fè sa Bondye mande pa gen okenn dwa pou yo ‘fè moun konnen lwa Bondye yo’. — Sòm 50:16, 17.

David te fè konnen entansyon l yon lòt fason ankò lè l te di: “Pa fè m peye pou san ki te koule a, o Bondye, Bondye delivrans mwen an, pou m ka kontan sèvi ak lang mwen pou m fè konnen jan w jis.” (Sòm 51:14). Bondye mande moun ki fè san koule regleman (Jenèz 9:5, 6). Kidonk, lefètke David te konnen Bondye l la ki konn sove moun nan, te delivre l pou l pa t peye pou san Ouri ki te koule, sa t ap ede David santi l anpè nan kè l ak nan lespri l. Li te kapab sèvi ak lang li pou l chante ak kè kontan pou jistis Bondye, men pa pou pwòp jistis li (Eklezyas 7:20; Women 3:10). David pa t ka efase peche l te fè a, ni l pa t ka fè Ouri soti nan tonm kote l te ye a, e menm jan an tou jodi a, okenn moun pa ka fè yon moun vin pwòp ankò nan domèn moral apre l fin sedui l, oswa rebay yon moun li fin touye lavi ankò. Èske nou pa ta dwe panse ak sa lè n devan yon tantasyon? E nou ta dwe gen plis rekonesans toujou anvè Jewova pou mizèrikòd li anvè nou paske li se yon Bondye ki jis. Anfèt, rekonesans nou genyen ta dwe pouse nou ede lòt moun vin nan Sous sa a kote lajistis ak padon ap koule a.

Okenn moun k ap fè peche pa ka louvri bouch li kòmsadwa pou l louwe Jewova, amwenske Bondye nan mizèrikòd li, nan yon sans, ta louvri bouch moun sa a pou l pale konsènan verite L yo. Se sa k fè David te di nan yon chante: “O Jewova, louvri bouch mwen pou m ka fè louwanj pou ou.” (Sòm 51:15). Bondye te padone David, e piske konsyans li te vin klè, sa t ap pouse l montre lòt moun k ap fè peche yo chemen Jewova yo epi apre sa, li t ap ka louwe Bondye ak tout kè l. Tout moun Bondye padone fot yo menm jan li te fè sa pou David, yo tout ta dwe montre yo rekonesan pou mizèrikòd Bondye fè yo, e yo dwe pwofite tout okazyon yo jwenn pou yo pale konsènan verite Bondye yo epi “fè louwanj pou li.” — Sòm 43:3.

Sakrifis ki fè Bondye plezi

David te vin gen bon konprann, se sa k fè l te ka di: “Paske, se pa yon sakrifis ou vle, si se te sa, mwen ta ba w youn. Ou pa pran plezi nan ofrann yo boule nèt pou ou.” (Sòm 51:16). Alyans Lalwa a te mande pou yo fè sakrifis bèt pou Bondye. Men se lanmò David te merite pou peche l te fè yo anpalan de adiltè ak touye l te touye moun nan, sa vle di, li pa t ka bay sakrifis pou l jwenn padon pou peche sa yo. Sinon li pa t ap pè depanse pou l ofri Jewova sakrifis sa yo. Si yon moun pa repanti toutbon, sakrifis li yo pa gen okenn valè. Kidonk li pa t ap bon pou nou panse nou ka fè bon bagay pou kouvri pou bagay mal nou kontinye ap fè.

Men sa David te di ankò: “Sakrifis ki fè Bondye plezi a se yon espri ki toumante. O Bondye, ou pap rejte yon kè k ap fann.” (Sòm 51:17). Lè yon moun ki te peche repanti toutbon, “Sakrifis ki fè Bondye plezi a se yon espri ki toumante”. Yon moun konsa pap gen yon atitid belijeran. Lè yon moun gen yon espri ki toumante, kè moun sa a ap fann poutèt peche l fè a, li ba paske li santi l pa gen apwobasyon Bondye, e li dispoze fè nenpòt sa l ka fè pou l retounen jwenn favè Bondye. Nou pap ka ofri Bondye anyen ki gen valè si nou pa repanti pou peche nou fè e si nou pa ba l tout kè nou. — Nawoum 1:2.

Yon kè k ap fann se yon sakrifis Bondye pap meprize. Kidonk, antanke pèp Bondye, nou pa dwe dekouraje menmsi nou ta jwenn kèlkeswa difikilte a. Si nou te bite pandan nou sou wout lavi a, e sa fè n ap mande Bondye fè nou mizèrikòd, pa pèdi espwa. Menmsi nou te fè yon peche grav, si nou repanti, Jewova pap meprize kè nou k ap fann. L ap padone nou sou baz sakrifis ranson Kris la, e l ap fè nou retounen gen favè l (Ezayi 57:15; Ebre 4:16; 1 Jan 2:1). Men, menm jan ak priyè David yo, nou ta dwe fè priyè n ap fè yo pou nou chèche retounen gen favè Bondye, nou pa ta dwe ap priye pou nou pa jwenn reprimann oubyen pou nou pa jwenn koreksyon. Bondye te padone David, men li te pini l tou. — 2 Samyèl 12:11-14.

27 JEN–3 JIYÈ

TREZÒ KI NAN PAWÒL BONDYE A | SÒM 52–59

“Lage chay ou sou Jewova”

w96-F 1/4 27 § 2

Toujou lage chay ou sou Jewova

Te gen yon moman kote Wa David, wa Izrayèl la te santi presyon l te gen sou li a te tèlman anpil, li pa t ka sipòte l ankò. Selon Sòm 55, enkyetid li te genyen te panike l tèlman ènmi l yo t ap fè presyon sou li e tèlman yo te rayi l. Kè l t ap fann e li te pè anpil. Se plenn sèlman li te ka plenn poutèt lapenn li te genyen (Sòm 55:2, 5, 17). Men, malgre tout pwoblèm li yo, li te jwenn yon mwayen pou l fè fas ak sitiyasyon an. Ki jan? Lefètke l te chèche èd nan men Bondye l la. Men ki konsèy li te bay lòt moun ki gendwa te santi yo jan l te santi l la: “Lage chay ou sou Jewova.” — Sòm 55:22.

w96-F 1/4 30 § 1

Toujou lage chay ou sou Jewova

Fè fas ak trayizon

Kounye a nou rive nan sitiyasyon ki te fè David ekri Sòm 55 lan. Li te nan gwo lapenn. Li te ekri pawòl sa yo: “Kè m ap rache. Mwen wè lanmò e gen yon sèl laperèz ki anvayi m.” (Sòm 55:4). Ki sa k te fè l ap soufri konsa? Pitit gason David la, Absalon te fè konplo pou l bay David koudeta (2 Samyèl 15:1-6). Nonsèlman sa te di pou David wè pwòp pitit li trayi l men sa k te pi di toujou se paske konseye David te plis fè konfyans lan, yon mesye ki te rele Ayitofèl, te nan koudeta a tou. Se de Ayitofèl sa a David t ap pale nan Sòm 55:12-14. Akoz konspirasyon sa a ak trayizon an, David te oblije sove kite Jerizalèm (2 Samyèl 15:13, 14). Sandout sa te lage l nan gwo kè sote.

w99-F 15/3 22-23

Pa kite enkyetid pote w ale

Sa klè, Moyiz te gen plizyè bagay ki t ap trakase l. Men sa l te mande Jewova: “Ann sipoze m al kot Izrayelit yo, mwen di yo: ‘Bondye zansèt nou an voye m kote nou’ e yo mande m: ‘Ki jan l rele?’, ki sa m ap reponn yo?” Jewova te ba l repons lan (Egzòd 3:13, 14). Gen yon lòt bagay ki te trakase Moyiz: e si Farawon pa t vle kwè l. Yon lòt fwa ankò, Jewova te reponn pwofèt la. Yon dènye bagay te ba l pwoblèm: Moyiz te admèt “pale pa yon bagay ki fasil” pou li. Ki sa k te ka fèt? Jewova te ba l Arawon pou l pale pou li. — Egzòd 4:1-5, 10-16.

Kòm Moyiz te jwenn repons kesyon l yo e li te gen lafwa nan Bondye, li te santi l prè e li te kòmanse fè sa Jewova te ba l lòd pou l fè a. Olye Moyiz t ap plede trakase tèt li ak yon seri panse ki pou fè l pè sou sa k t ap rive lè l ap rankontre ak Farawon, li te fè sa yo te mande l la “egzakteman”. (Egzòd 7:6.) Si l te kite enkyetid yo pran pye sou li, sa t ap fè l manke lafwa ak kouraj pou l ranpli asiyasyon l lan.

Fason Moyiz te montre l gen ekilib lè yo te ba l asiyasyon l lan, se yon egzanp ki koresponn ak sa apot Pòl te rele “bonsans” lan (2 Timote 1:7; Tit 2:2-6). Si Moyiz pa t gen bonsans, byen fasil, li te ka vin santi asiyasyon l lan twòp pou li e petèt li pa t ap aksepte l.

Pran kontwòl sou panse w

Ki jan w reyaji lè w jwenn eprèv pou lafwa w oubyen lè w jwenn eprèv nan lavi w? Èske w gen tandans kouri panike, èske w konsantre sou obstak oswa difikilte k ap tann ou pi devan? Oubyen èske w wè yo yon fason ki ekilibre? Gen kèk moun ki konn di: ‘Pa travèse pon an anvan w rive sou li.’ Petèt ou pap janm bezwen travèse pon an! Kidonk, poukisa pou w kite yon bagay ki pap janm rive toumante w? Men sa Bib la di: “Tètchaje yon moun genyen fè kè l vin lou.” (Pwovèb 12:25). Yon moun ki kite sa rive l ap pran tan pou l pran yon desizyon, l ap toujou di l a gentan jis li twò ta.

Sa ki pi grav sèke lè nou enkyete san rezon sa ka yon danje pou relasyon nou ak Jewova. Jezi Kris te fè konnen pouvwa richès genyen pou l twonpe moun nan ak “tètchaje ki gen nan sistèm sa a” ka toufe apresyasyon yon moun gen pou “mesaj Wayòm nan” nèt (Matye 13:19, 22). Menm jan pikan ka anpeche yon ti plant grandi jis li donnen se konsa lè nou enkyete san kontwòl sa ka anpeche nou fè pwogrè nan domèn espirityèl epi pwodui fwi pou glorifye Bondye. Gen kèk moun ki menm pa vwe tèt yo bay Jewova paske yo kraze tèt yo paske yo enkyete yo epi y ap toumante lespri yo. Y ap di tèt yo ‘E si m pa rive respekte ve m fè a?’

Apot Pòl di nou nan lit n ap mennen nan domèn espirityèl la, n ap fè efò pou nou “mete nenpòt ki lide sou kontwòl, pou nou fè l obeyi Kris”. (2 Korentyen 10:5.) Satan Ledyab, pi gwo ènmi nou an, t ap kontan sèvi ak enkyetid nou yo, pou l dekouraje nou e pou l febli nou nan domèn fizik, emosyonèl ak espirityèl. Li fò nan sèvi ak dout pou l pran moun ki pap veye nan pyèj. Se pou rezon sa a tou Pòl te avèti kretyen yo pou yo pa “kite jwen pou Dyab la”. (Efezyen 4:27.) Antanke “dye sistèm sa a”, Satan reyisi “bouche lespri moun ki pa kwayan yo”. (2 Korentyen 4:4.) Pinga nou janm kite l gen kontwòl sou lespri nou!

Li posib pou nou jwenn èd

Lè yon timoun gen pwoblèm, li ka al jwenn yon papa ki plen lanmou pou l jwenn èd ak konsolasyon. Menm jan an tou, nou ka al jwenn Jewova, Papa nou ki nan syèl la, pou n jwenn èd pou pwoblèm nou yo. Anfèt, Jewova envite nou pou n lage chay nou yo ak enkyetid nou yo sou li (Sòm 55:22). Menm jan yon timoun pa enkyete ankò lè l fin jwenn rekonfò nan men papa l, se konsa tou, nonsèlman nou bezwen lage chay nou sou Jewova men tou nou dwe kite yo nan men l. — Jak 1:6.

Ki jan nou ka lage enkyetid nou sou Jewova? Nou jwenn repons lan nan Filipyen 4:6, 7. Li di: “Pa enkyete nou pou anyen, men fè Bondye konnen demann nou yo nan tout bagay, pa mwayen lapriyè ak siplikasyon toutpandan n ap di l mèsi. E lapè Bondye, ki depase tout sa moun ka konprann, ap pwoteje kè nou ak lespri nou pa mwayen Kris Jezi.” Se toutbon, lè nou priye Jewova san rete, li ka fè nou santi nou anpè, yon lapè k ap pwoteje lespri nou pou enkyetid ki pa nesesè pa ban nou pwoblèm. — Jeremi 17:7, 8; Matye 6:25-34.

Men, si nou vle aji ann amoni ak priyè nou yo, nou pa dwe mete kò nou apa, kit se nan domèn fizik kit se nan lespri nou (Pwovèb 18:1). Okontrè, li t ap bon pou nou reflechi sou prensip ki nan Bib la, e sou enstriksyon ki gen rapò ak pwoblèm nou an, konsa, nou pap konte sou entèlijans nou (Pwovèb 3:5, 6). Kit nou jèn, kit nou granmoun, nou ka fouye nan Bib la ak nan piblikasyon sosyete Watch Tower yo pou nou ka jwenn yon pakèt enfòmasyon pou fason pou nou pran desizyon ak fason pou nou fè fas ak pwoblèm yo. Mete sou sa, nan kongregasyon kretyen an, nou gen yon seri ansyen ki saj e ki gen eksperyans, ak yon seri lòt kretyen ki gen matirite, ki toujou dispoze pale avèk nou, yo tout se benediksyon yo ye pou nou (Pwovèb 11:14; 15:22). Byen souvan, yon moun ki pa gen anyen pou l wè nan pwoblèm nan e ki gen menm pwennvi ak Bondye sou sijè a, ka ede nou gen yon lòt vizyon sou pwoblèm nou yo. Byenke yo pap pran desizyon pou nou, yo ka ankouraje nou anpil e yo ka ede nou anpil.

“Ret tann Bondye”

Tout moun ap dakò nou jwenn ase strès akoz pwoblèm nou gen chak jou yo pou n ta ajoute sou sa lè n ap kraze kò nou pou pwoblèm ki pa menm egziste, ki nan tèt nou sèlman. Si nou enkyè pou sa k ka rive, si sa fè nou santi nou pè, nou pa alèz, se pou nou priye Jewova, e se pou nou sipliye l. Fouye nan Pawòl li ak nan òganizasyon l lan pou nou ka jwenn enstriksyon, sajès ak bonsans. Lè sa a, n ap wè kèlkeswa sikonstans ki rive a, li posib pou nou jwenn èd pou nou fè fas ak yo.

Men ki chante yon moun ki te ekri yon Sòm te ekri paske li te santi kè l lou e li te ajite: “Poukisa m dekouraje konsa a? Poukisa m boulvèse konsa a? Se pou m ret tann Bondye. Paske, mwen gen pou m fè louwanj pou li kòm Sovè m e kòm Bondye m.” (Sòm 42:11). Se pou nou fè efò pou nou santi nou menm jan an tou.

Donk, fè planifikasyon pou sa nou ka prevwa, epi kite sa nou pa ka prevwa yo nan men Jewova. “Lage tout tètchaje nou genyen sou li, paske li gen sousi pou nou.” — 1 Pyè 5:7.

Fouye pou n ka jwenn trezò espirityèl

w09-F 1/6 28 § 5

Èske gen yon moun ki gen sousi pou mwen toutbon?

Nan liv Sòm nan, nou jwenn anpil pawòl touchan moun ki te ekri Sòm yo, tankou David, te ekri ki esplike jan Jewova renmen sèvitè l yo e jan l pran swen yo. David te sipliye Bondye nan Sòm 56:8 la, li te di l: “Se pou w mete tout dlo ki sot nan je m yo nan bidon an po w la. Èske w pa ekri tout move bagay ki rive m yo nan liv ou a?” Nan pawòl David te di yo, nou ka wè David te konprann nonsèlman Jewova te konnen l t ap soufri, men tou li te konnen sa te gen efè sou santiman l tou. Jewova te konnen ki jan David t ap soufri e li te sonje jan sa te gen efè sou santiman David ki fè l t ap kriye. Vrèmanvre, Kreyatè nou an ap veye sou tout moun k ap fè efò pou yo fè volonte l, sa vle di “moun k ap sèvi l ak tout kè yo”.

w08-F 1/10 26 § 3

Dlo nan je nan yon bidon an po

Pawòl touchan David te di konsènan bidon an po a ka gen sans pou nou tou. Ki jan? Ebyen, Bib la esplike Satan ap kontwole monn sa a e li “an kòlè anpil” nan epòk pa nou an. Sa vin lakòz gen anpil malè ki tonbe sou tè a (Revelasyon 12:12). Se sa k fè gen anpil moun k ap soufri nan domèn emosyonèl, mantal oubyen fizik. Sitou moun k ap fè efò pou yo fè Bondye plezi. Èske w santi se pwoblèm pa w tou? Moun ki fidèl konsa yo mete kouraj sou yo, “menmsi y ap kriye” pou yo kontinye viv avèk fidelite (Sòm 126:6). Yo mèt gen asirans nonsèlman Papa yo ki nan syèl la wè eprèv y ap sibi yo men tou li wè ki efè eprèv sa yo ka gen sou yo nan domèn emosyonèl. Li byen konprann rezon ki fè sèvitè fidèl li yo ap soufri, e li gen konpasyon li sonje dlo k ap koule nan je moun ak soufrans yo, e li konnen ki efè sa ka gen sou nou.