Konesans k ap ede n pwoche kot Bondye e vin zanmi l
Kreyatè nou an pa jis gen anpil pisans. Li gen anpil bèl kalite tou. E li vle nou aprann konnen l pou n vin pwòch avè l (Jan 17:3; Jak 4:8). Se sa k fè li di nou anpil bagay sou li.
Kreyatè nou an gen yon non
“Se pou moun konnen ou menm, ki rele Jewova, ou se Sila a ki nan pi gwo pozisyon an e ki gen pouvwa sou tout tè a.” — SÒM 83:18.
Bib la anseye nou Jewova se sèl vrè Dye a. Se li ki kreye linivè ak tout sa ki vivan. Se li sèl ki merite pou nou adore l. — Revelasyon 4:11.
Jewova se yon Bondye lanmou
“Bondye se lanmou.” — 1 JAN 4:8.
Pa mwayen Bib la avèk lanati, Jewova fè nou konnen anpil nan kalite l yo. Lanmou se kalite ki pi bèl li genyen. Kalite sa a montre kiyès Bondye ye toutbon. Plis nou aprann sou Jewova, se plis n ap vin renmen l.
Jewova se yon Bondye ki konn padone
“Ou se yon Bondye ki dispoze padone.” — NEYEMI 9:17.
Jewova konnen nou pa pafè. Donk li “dispoze padone” nou. Lè nou mande l padon e nou fè gwo efò pou nou sispann fè sa ki mal, l ap padone nou e li pap sèvi ak peche nou yo kont nou ankò. — Sòm 103:12, 13.
Jewova kontan koute priyè nou yo
“Jewova toupre tout moun ki rele l [...] Li tande lè y ap rele l pou yo mande l èd.” — SÒM 145:18, 19.
Jewova pa mande nou fè okenn seremoni espesyal ni pou n sèvi ak imaj relijye oswa lòt bagay nan adorasyon n ap ba li a. Li koute priyè nou yo menm jan yon paran ki gen lanmou koute pitit li renmen.