LESON 56
Travay pou nou rete ini nan kongregasyon an
Lè nou ansanm ak lòt sèvitè Jewova yo, nou santi nou menm jan avèk wa David, ki te di: “Ala bon sa bon e ala sa bay kè kontan lè frè abite ansanm e yo gen tèt ansanm!” (Sòm 133:1). Inite nou an se pa konsa konsa nou genyen l. Nou chak jwe yon wòl pou kongregasyon an toujou ini.
1. Gen yon bagay ki bèl anpil nan pèp Jewova a, ki sa l ye?
Si w asiste yon reyinyon nan yon lòt peyi, ou ka pa konprann lang nan, men gen anpil bagay k ap fè w santi w lakay ou. Sa k fè sa? Se paske, pou nou etidye Bib la, nou sèvi ak menm piblikasyon yo, kèlkeswa kote nou ye. Epitou, nou fè efò pou n demontre lanmou youn pou lòt. Kèlkeswa kote n ap viv, nou tout nou ‘louwe non Jewova e nou adore l nan tèt ansanm’.— Sofoni 3:9, nòt.
2. Ki sa w ka fè pou toujou gen inite nan kongregasyon an?
“Se pou nou youn renmen lòt anpil ak tout kè nou.” (1 Pyè 1:22). Ki jan w ka suiv konsèy sa a? Chèche wè bèl kalite lòt moun gen lakay yo, olye w konsantre w sou defo yo. Aprann konnen frè ak sè ki diferan avè w yo, olye w toujou ap pase tan ak moun ki enterese nan menm bagay avè w sèlman. Anplis de sa, nou kapab fè efò pou nou derasinen prejije nou ta ka genyen.— Li 1 Pyè 2:17a.
3. Ki sa w ka fè lè w gen pwoblèm ak yon moun nan kongregasyon an?
Se vre nou ini, men nou enpafè. Pafwa, nou ka di oswa fè yon bagay ki pa fè yon lòt moun plezi e pafwa nou ka menm di oswa fè yon bagay ki fè yon lòt moun mal. Se sa k fè, Pawòl Bondye a di nou: “Se pou youn kontinye padone lòt.” Mete sou sa, li di nou: “Menm jan Jewova padone nou ak tout kè l, nou menm tou, nou dwe fè menm jan an.” (Li Kolosyen 3:13.) Se pa ni de ni twa fwa nou fè yon seri bagay ki fè Jewova mal, epoutan, li padone nou. Se poutèt sa li atann pou nou padone frè nou yo. Si w rann ou kont ou di oswa ou fè yon bagay ki fè yon lòt moun mal, pran inisyativ pou w rezoud pwoblèm nan.— Li Matye 5:23, 24b.
FOUYE PLIS
Chèche kèk bagay ou ka fè ki kapab ede kongregasyon an rete ini e ki kapab fè gen lapè ladan l.
Ki sa w ap fè pou w fè lapè?
4. Derasinen prejije ou gen lakay ou
Nou vle renmen tout frè ak sè nou yo. Men, li gendwa pa fasil pou n aksepte yon moun ki parèt diferan ak nou. Ki sa k ka ede nou? Li Travay 10:34, 35, epi reponn kesyon sa yo:
Jewova aksepte tout kalite moun vin Temwen l. Lè nou gade egzanp Jewova bay, ki jan n ta dwe konsidere moun ki diferan avèk nou?
Ki kalite prejije ki gen nan zòn kote w ap viv la w ap lite pou w pa genyen?
Li 2 Korentyen 6:11-13, epi reponn kesyon sa a:
Ki jan w ka aprann renmen tout frè ak sè yo pi plis chak jou?
5. Padone lòt moun ak tout kè w epi fè lapè
Jewova padone nou ak tout kè l, alòske nou pap janm bezwen padone l. Li Sòm 86:5, epi reponn kesyon sa yo:
Ki sa vèsè sa a aprann nou sou fason Jewova padone moun?
Poukisa w gen rekonesans dèske Jewova padone nou?
Ki sitiyasyon ki ka fè l difisil pou nou antann nou ak lòt moun?
Ki jan lè nou imite Jewova sa ap ede nou rete ini ak frè ak sè nou yo? Li Pwovèb 19:11, epi reponn kesyon sa a:
Lè yon moun fè oswa di yon bagay ki deranje w oubyen ki fè w mal, ki sa w ka fè pou w amelyore sitiyasyon an?
Pafwa, nou di oubyen nou fè kèk bagay ki fè lòt moun mal. Lè sa rive, ki sa nou ta dwe fè? Gade VIDEYO a, epi reponn kesyon ki vin apre a.
Ki sa sè ki nan videyo a te fè pou l fè lapè?
6. Chèche sa ki bon lakay frè ak sè yo
Tank n ap vin pi pwòch ak frè ak sè yo, nou vin konnen bèl kalite yo genyen, men anmenmtan tou, nou vin konnen feblès yo. Ki jan nou ka konsantre sou bèl kalite yo? Gade VIDEYO a, epi reponn kesyon ki vin apre a.
Ki sa k ka ede w wè bèl kalite frè ak sè yo genyen?
Jewova konsantre sou bèl kalite nou genyen yo. Li 2 Kwonik 16:9a, epi reponn kesyon sa a:
Ki jan w santi w lè w konnen se sou bèl kalite w genyen Jewova konsantre?
Menm yon bèl dyaman gen defo, epoutan, li toujou gen anpil valè. Se konsa tou, tout frè ak sè nou yo enpafè, men yo gen anpil valè nan je Jewova.
GEN MOUN KI DI: “Anvan pou m padone yon moun, li dwe merite sa.”
Poukisa nou ta dwe dispoze padone lòt moun?
SA W TE APRANN
Ou ka ede kongregasyon an rete ini lè w dispoze padone frè ak sè yo e lè w gen lanmou pou yo tout.
Revizyon
Ki sa w ka fè pou w derasinen prejije w gen lakay ou?
Ki sa w ap fè si w gen yon pwoblèm ak yon lòt kretyen?
Poukisa w vle imite egzanp Jewova bay nan fason l padone moun?
APRANN PLIS
Aprann ki jan youn nan egzanp Jezi te bay yo kapab ede nou pa jije lòt moun.
Èske nou oblije mande padon si n santi nou pa t fè anyen ki mal?
“Mande eskiz: yon mwayen esansyèl pou fè lapè” (Toudegad 1ye novanm 2002)
Gade ki jan de mesye ki te grandi nan yon zòn kote moun yo rasis anpil te aprann renmen youn lòt.
Johny ak Gideon: Lontan yo te ènmi, kounye a yo se frè (6:42)
Gade ki jan ou ka regle pwoblèm ou gen ak yon lòt moun anvan sa gen efè sou lapè ki gen nan kongregasyon an.
“Demontre lanmou nan fason w rezoud pwoblèm ak lòt moun” (Toudegad me 2016)