“ Mwen renmen Papa a ”

1, 2. Ki sa apot Jan te revele anrapò ak dènye sware apot yo te pase ansanm avèk Jezi ?

YON mesye aje plonje plim li nan lank, l ap sonje yon pakèt bagay. Mesye sa a rele Jan, e li se dènye apot Jezi Kris ki vivan. Kounye a, Jan, ki gen anviwon 100 an, ap raple l yon sware ki grave nan memwa l, yon sware ki te pase sa gen anviwon 70 an : dènye nuit li menm ansanm ak lòt apot yo te pase avèk Jezi anvan lanmò Li. Jan gen posiblite sonje evènman yo an detay, e li gen posiblite ekri yo tou, grasa lespri sen Bondye k ap gide l.

² Nan nuit sa a, Jezi fè konnen aklè yo pral touye l talè konsa. Se sèl Jan ki revele rezon ki fè Jezi te di li t apral aksepte sibi lanmò terib sa a. Men sa l te di : “ Pou monn nan ka konnen mwen renmen Papa a, jan Papa a ban m lòd pou m fè, se konsa m fè. Leve, ann sot la a. ” — Jan 14:31.

 3. Ki jan Jezi te demontre li renmen Papa l ?

³ “ Mwen renmen Papa a. ” Pa t gen anyen ki te gen plis enpòtans pou Jezi pase sa. Sa pa vle di toutan toutan li t ap repete fraz sa a. Anfèt, nan Bib la, se sèl nan Jan 14:31 yo pale de Jezi k ap eksprime lanmou li pou Papa l yon fason dirèk konsa. Poutan, Jezi te viv ann amoni ak pawòl sa yo. Lanmou li pou Jewova te parèt aklè chak jou. Kouraj Jezi, obeyisans li ak andirans li, tousa se te prèv lanmou li pou Bondye. Se lanmou sa a ki te motive tout ministè li.

4, 5. Ki kalite lanmou Bib la ankouraje moun pou yo chèche genyen, e ki sa nou ka di konsènan lanmou Jezi te genyen pou Jewova ?

⁴ Jodi a, gen moun ki panse moun ki demontre lanmou se moun ki fèb. Petèt, yo ka ap panse ak powèm lanmou, chanson damou, petèt menm ak aspè fantezis pafwa ki akonpaye lanmou womantik. Bib la pale de lanmou womantik, men li fè sa yon fason ki pi diy pase jan yo pale de sa jodi a (Pwovèb 5:15-21). Sepandan, Pawòl Bondye a bay plis enfòmasyon lontan sou yon lòt kalite lanmou. Lanmou sa a pa yon senp pasyon oswa yon santiman k ap pase, ni nonplis se pa yon filozofi ki frèt, ki entèlektyèl. Se yon lanmou kote ni kè a ni lespri a enplike. Yon lanmou konsa soti pa anndan yon moun, se prensip elve ki gouvène l e li ann amoni ak prensip sa yo, e se aksyon ki pozitif ki demontre l. Sètènman se pa yon lanmou ki frivòl. Pawòl Bondye a di : “ Lanmou pa janm fayi. ” — 1 Korentyen 13:8.

⁵ Pami tout moun ki pase sou tè a, Jezi se moun ki te renmen Jewova pi plis. Pa gen pèsonn ki depase Jezi nan fason l te akonpli pawòl li te site kòm pi gwo kòmandman Bondye bay la : “ Ou dwe renmen Jewova Bondye w la ak tout kè w e ak tout nanm ou e ak tout lespri w e ak tout fòs ou. ” ​(Mak 12:30). Kòman Jezi te rive devlope yon lanmou konsa ? Ki jan l te fè kenbe lanmou li pou Bondye byen djanm pandan moman li t ap pase sou tè a ? E kòman nou ka imite l ?

6, 7. Ki jan nou fè konnen Pwovèb 8:22-31 ap pale de Pitit Gason Bondye a e non pa sèlman de sajès antanke kalite ?

⁶ Èske sa deja rive w pou w travay sou yon pwojè ak yon zanmi, epi w rann ou kont kòm rezilta, nou toule de vin pi bon zanmi, nou vin pi pwòch ? Eksperyans agreyab sa a kapab ede nou konprann lanmou ki te devlope ant Jewova ak sèl Pitit Gason li te fè a. Plizyè fwa, nou te fè referans ak Pwovèb 8:30, men annou pi byen egzamine vèsè sa a nan kontèks li. Nan vèsè 22 rive nan vèsè 31, nou jwenn yon deskripsyon enspire sou sajès la yo dekri tankou yon moun. Ki jan nou fè konnen pawòl sa yo fè referans ak Pitit Gason Bondye a ?

⁷ Nan vèsè 22 a, sajès la di : “ Jewova li menm te fè m antanke kòmansman travay li, pi ansyen nan reyalizasyon l yo nan tan lontan. ” Se pa sajès sèlman ki konsène la a paske yo pa t janm “ fè ” kalite sa a. Li pa t janm kòmanse egziste, paske Jewova te toujou egziste e li te toujou saj (Sòm 90:2). Sepandan, Pitit Gason Bondye a te “ fèt an premye nan tout kreyasyon an ”. Se fè yo te fè l, se kreye yo te kreye l, li te premye pami tout sa Jewova akonpli (Kolosyen 1:15). Pitit Gason an te egziste anvan tè a ak syèl la, jan liv Pwovèb la fè konn sa. E antanke Pawòl la, pwòp Pòtpawòl Bondye, li te eksprime sajès Jewova yon fason pafè. — Jan 1:1.

 8. Ki sa Pitit Gason an t ap fè anvan l te vin sou tè a, e ak ki sa nou ka panse lè n ap admire kreyasyon an ?

⁸ Ki sa Pitit Gason an t ap fè pandan tout tan li te pase anvan l te vin sou tè a ? Vèsè 30 lan fè nou konnen li te bò kote Bondye antanke “ yon ouvriye abil ”. Ki sa sa vle di ? Kolosyen 1:16 esplike : “ Pa mwayen l tout lòt bagay yo te kreye ni nan syèl la ni sou tè a [...]. Se pa mwayen l tout lòt bagay yo te kreye e se pou li yo te kreye. ” Donk, Jewova, Kreyatè a, te sèvi ak Pitit Gason l lan, Ouvriye abil la, pou l fè tout lòt kreyasyon yo vin egziste, soti nan kreyati espirityèl yo ki nan syèl la, pase nan kokenn inivè fizik la, tè a avèk pakèt varyete plant ak bèt k ap viv sou li yo, pou rive nan pi wo nivo kreyasyon terès la : lòm. Sou kèk rapò, nou ta ka konpare kowoperasyon sa a ki genyen ant Papa a ak Pitit Gason an avèk yon achitèk ki abil k ap travay kòtakòt ak yon kontremèt ki espesyalize nan reyalize sa achitèk la konsevwa. Lè nou enpresyone devan nenpòt aspè nan kreyasyon an, se glwa n ap bay Gran Achitèk la (Sòm 19:1). Sepandan, sa ka raple nou tou kolaborasyon ki la lontan e ki fèt ak kè kontan ant Kreyatè a avèk “ ouvriye abil ” li a.

9, 10. a) Ki sa ki te fòtifye lyen ki genyen ant Jewova ak Pitit Gason l lan ? b) Ki sa ki ka fòtifye lyen ki genyen ant ou menm ak Papa w ki nan syèl la ?

⁹ Lè de moun ki enpafè ap travay ansanm kòtakòt, pafwa yo gen pwoblèm pou yo antann yo. Se pa t menm bagay la pou Jewova ak Pitit Gason l lan ! Pitit Gason an te travay ansanm ak Papa a depi yon kantite tan moun pa ka konte, e li “ t ap rejwi devan l toutan ”. (Pwovèb 8:30.) Wi, li te pran plezi dèske l te ansanm avèk Papa l, e Papa a te pran plezi dèske l te ansanm avè l tou. Natirèlman, ofiramezi, Pitit Gason an te vin plis sanble ak Papa l, li te aprann imite kalite Bondye yo. Konsa, li pa etonan pou lyen ki te egziste ant Papa a ak Pitit Gason an te vin djanm konsa ! Avèk rezon, nou ka pale de lyen sa a kòm lyen lanmou ki pi ansyen e ki pi pisan nan tout linivè.

¹⁰ Sepandan, ki sa sa vle di pou nou ? Petèt ou kapab gen santiman ou pap janm ka bati yon lyen konsa avèk Jewova. Se vre, nanpwen youn nan nou ki gen pozisyon elve Pitit Gason an. Sepandan, nou vrèman gen yon opòtinite ki remakab. Pa bliye, Jezi te vin pwoche pi pre Papa l pandan l t ap travay avèk Li. Avèk amou, Jewova ofri nou posiblite pou nou vin “ konpayon travay ” li (1 Korentyen 3:9). Pandan n ap suiv egzanp Jezi kite nan ministè a, l ap bon pou nou toujou kenbe nan lespri nou nou se konpayon travay Bondye. Konsa, lyen lanmou ki gen ant nou menm avèk Jewova ap ogmante pou l vin pi djanm de jou an jou. Èske ta ka gen yon pi gran privilèj pase sa ?

11-13. a) Poukisa li itil pou nou reflechi sou lanmou antanke yon bagay ki vivan, e ki jan Jezi te kenbe lanmou l pou Jewova byen djanm lè l te yon tigason ? b) Ki jan Pitit Gason Bondye a te montre li enterese aprann nan men Jewova, ni anvan l te vin sou tè a antanke òm, ni annapre ?

¹¹ Gen plizyè rezon ki fè li bon pou nou konsidere lanmou ki nan kè nou kòm yon bagay ki vivan. Menm jan ak yon plant ki pou anndan kay, lanmou bezwen yo nouri l e li bezwen yo pran swen l pou l ka grandi e pou l byen devlope. Lè yo neglije l e yo pa nouri l, li febli e li mouri. Jezi pa t pran lanmou li genyen pou Jewova a alalejè. Li te kenbe l byen djanm e byen vivan pandan l te sou tè a. Annou gade ki jan l te fè sa.

¹² Reflechi ankò sou sa ki te rive lè Jezi, ki te yon tigason, te pale avèk franchiz nan tanp lan nan Jerizalèm. Sonje pawòl li te di paran l yo ki te gen kè kase : “ Poukisa nou te oblije ap chèche m ? Nou pa t konnen fòk se lakay Papa m pou m ye ? ” ​(Lik 2:49). Antanke yon jèn tigason, li evidan Jezi potko sonje anyen konsènan lavi li t ap mennen anvan l te vin sou tè a. Sepandan, lanmou li pou Papa l, Jewova, te deja fò anpil. Li te konnen fason nòmal pou yon moun eksprime lanmou sa a se pa mwayen adorasyon. Kidonk pa t gen okenn kote sou tè a ki te pi atiran pou Jezi pase mezon Papa l la ki la pou soutni adorasyon ki pa kontamine a. Li te swaf pou l la, e lè l te la, li pa t vle ale. Plis toujou, li pa t yon senp obsèvatè. Li te chofe pou l aprann konsènan Jewova, e pou l pataje sa l te konnen. Santiman sa yo pa t kòmanse lè l te gen 12 an, ni yo pa t fini nan laj sa a.

¹³ Pandan Pitit Gason an te nan syèl la, anvan l te vin sou tè a, li te chofe pou l aprann nan men Papa l. Yon pwofesi nan Izayi 50:4-6 fè konnen Jewova te bay Pitit Gason l lan yon fòmasyon espesyalize anrapò ak wòl li antanke Mesi a. Menmsi fòmasyon sa a te gen ladan l aprann konnen kèk nan difikilte ki t apral tonbe sou li antanke Wen Jewova, Pitit Gason an te chofe pou l aprann. Annapre, apre Jezi te vin sou tè a e li te grandi pou l vin yon adilt, li te toujou chofe pou l ale nan mezon Papa l la e pou l patisipe nan adorasyon e nan ansèyman Jewova te vle yo bay nan mezon l lan. Se sa k fè Labib fè nou konnen Jezi te konn al nan tanp lan e nan sinagòg la fidèlman (Lik 4:16 ; 19:47). Si nou vle pou lanmou nou pou Jewova rete vivan e pou l kontinye devlope, nou dwe asiste reyinyon yo avèk dilijans, piske nan reyinyon sa yo n ap adore Jewova e n ap apwofondi konesans nou ak apresyasyon nou pou li.

14, 15. a) Poukisa Jezi te konn chèche ret poukont li ? b) Ki jan priyè Jezi yo te revele entimite ak respè li gen pou Papa l ?

¹⁴ Jezi te kenbe lanmou l pou Jewova byen djanm tou lè l te priye regilyèman. Malgre Jezi te yon moun ki amikal, ki renmen konpayi lòt moun, li enteresan pou nou note li te wè enpòtans pafwa pou l rete poukont li. Pa egzanp, Lik 5:16 di : “ Li te kontinye ret apa nan dezè yo e li te kontinye priye. ” Menm jan an tou, Matye 14:23 di : “ Finalman, li ranvwaye foul moun yo, li monte poukont li nan mòn nan pou l priye. Aktout li te vin ap ta, li te la poukont li. ” Jezi te chèche ret poukont li nan okazyon sa yo ak nan lòt okazyon ankò, pa paske li te yon moun ki viv apa oswa yon moun ki rayi konpayi lòt moun, men paske li te vle poukont li avèk Jewova, pou l pale lib e libè avèk Papa l nan lapriyè.

¹⁵ Pafwa lè Jezi t ap priye, li te konn sèvi ak ekspresyon sa a : “ Abba, Papa. ” ​(Mak 14:36). Nan epòk Jezi te sou tè a, mo “ Abba ” a se te yon mo entim pou deziyen “ papa ”, e yo te konn itilize l anndan fanmi. Byen souvan, mo sa a te pami premye mo yon timoun aprann. Malgre tou, se te yon mo ki te gen respè ladan l. Byenke mo a te revele entimite Pitit Gason an k ap pale ansanm avèk Papa l li renmen, li te endike tou yon pwofon respè pou otorite Jewova genyen antanke Papa. Nou jwenn ni entimite sa a ni respè sa a nan priyè Jezi ki rapòte nan Bib la. Pa egzanp, nan Jan chapit 17, apot Jan rapòte priyè ki long Jezi te fè ak tout kè l nan dènye nuit li t ap pase sou tè a. Se vrèman touchan pou nou etidye priyè sa a e li enpòtan anpil pou nou kopye sou li. Natirèlman, se pa lè nou repete pawòl Jezi yo n ap fè sa, men se lè nou chèche fason pou nou pale ak tout kè nou ak Papa nou ki nan syèl la otan nou kapab. Lè nou fè sa, sa ap fè lanmou nou pou li ret vivan e sa ap fè l ret djanm.

16, 17. a) Ki jan Jezi te dekri lanmou li genyen pou Papa l ? b) Ki jan Jezi te dekri fason Papa l donan ?

¹⁶ Jan nou te note sa anvan, Jezi pa t ap plede repete pawòl ki di : “ Mwen renmen Papa a. ” Sepandan, plizyè fwa, li te pale de lanmou li genyen pou Papa l. Kòman sa ? Jezi li menm te di : “ Mwen louwe w piblikman, Papa, Seyè syèl la ak tè a. ” ​(Matye 11:25). Lè nou t ap etidye seksyon 2 nan liv sa a, nou te wè Jezi te renmen louwe Papa l lè li ede moun yo aprann konnen L. Pa egzanp, li te konpare Jewova ak yon papa ki te tèlman chofe pou l padone pitit gason l lan ki te rebele, li ret ap tann jennonm ki repanti a retounen. Li gentan wè l depi byen lwen, li kouri al rankontre l e li anbrase l (Lik 15:20). Kiyès ki ka li pasaj sa a san l pa santi l touche devan fason Jezi dekri lanmou Jewova ak padon li gen lakay li ?

¹⁷ Byen souvan, Jezi te konn louwe Papa l dèske Li donan. Li te sèvi ak egzanp paran enpafè pou l montre ki jan nou mèt gen asirans Papa nou ap ban nou mezi lespri sen nou bezwen (Lik 11:13). Epitou, Jezi te pale konsènan esperans Papa a bay ak tout kè l la. Jezi te dekri, avèk yon gwo anvi, pwòp esperans pa l pou l rejwenn plas li nan syèl la bò kot Papa l (Jan 14:28 ; 17:5). Li te pale ansanm ak moun k ap suiv li yo konsènan espwa Jewova bay “ ti twoupo ” Kris la — espwa pou yo abite nan syèl la e pou yo patisipe nan dominasyon Wa mesyanik la (Lik 12:32 ; Jan 14:2). E li te sèvi ak esperans lavi nan Paradi a pou l rekonfòte yon malfektè ki t apral mouri (Lik 23:43). Lefètke Jezi te pale konsa sou jan Papa l donan anpil, siman sa te ede l kenbe lanmou li pou Jewova byen djanm. Anpil nan moun k ap suiv Kris yo remake pa gen anyen ki fòtifye lanmou yo gen pou Jewova oswa lafwa yo gen nan Li plis pase lè yo pale de li e de espwa li bay moun ki renmen l yo.

18. Ki fason ki pi enpòtan nou bezwen suiv Jezi, e poukisa ?

¹⁸ Pami tout fason ki genyen pou nou suiv Jezi, pa gen youn ki pi enpòtan pase sa a : Nou dwe renmen Jewova ak tout kè nou, ak tout nanm nou, ak tout lespri nou e ak tout fòs nou (Lik 10:27). N ap mezire lanmou sa a, pa sèlman nan entansite santiman nou, men tou nan aksyon reyèl n ap poze. Jezi pa t kontante l senpleman pou l santi li renmen Papa l ni li pa t kontante l pou l di : “ Mwen renmen Papa a. ” Li te di : “ Pou monn nan ka konnen mwen renmen Papa a, jan Papa a ban m lòd pou m fè, se konsa m fè. ” ​(Jan 14:31). Satan te lanse akizasyon kòmkwa pa gen moun k ap sèvi Jewova paske yo renmen l san se pa yon enterè y ap defann (Jòb 2:4, 5). Pou Jezi te bay medizans mechan Satan an pi bon repons posib la, avèk kouraj, li te aji, e li te montre monn nan jis nan ki pwen li renmen Papa l. Li te obeyi l, menm nan pwen pou l rive bay lavi l. Èske w ap suiv Jezi ? Èske monn nan ap konstate ou vrèman renmen Jewova Dye ?

19, 20. a) Pou ki rezon enpòtan nou vle asiste reyinyon yo regilyèman ? b) Kòman nou ka konsidere etid pèsonèl n ap fè, meditasyon ak lapriyè ?

¹⁹ Nou gen yon gwo bezwen espirityèl pou nou demontre yon lanmou konsa. Kidonk, Jewova te pran dispozisyon pou nou adore l yon fason pou nou nouri e pou nou fòtifye lanmou nou pou Papa nou. Lè w ap asiste reyinyon yo, eseye sonje ou la pou w adore Bondye w la. Adorasyon sa a gen plizyè aspè ladan l tankou priye ak tout kè w, chante chan louwanj, koute avèk atansyon e patisipe lè sa posib. Reyinyon konsa ba w posiblite tou pou w ankouraje kretyen parèy ou yo (Ebre 10:24, 25). Lè w adore Jewova regilyèman nan reyinyon yo, sa ap ede w vin gen yon lanmou pou Bondye ki pi djanm toujou.

²⁰ Lanmou w pou Bondye ogmante tou pa mwayen etid pèsonèl, meditasyon ak lapriyè. Konsidere bagay sa yo kòm posiblite w genyen pou w poukont ou ak Jewova. Lè w ap etidye Pawòl Bondye te fè ekri a e lè w ap medite sou li, se transmèt Jewova ap transmèt ou panse l. Lè w ap priye, se ouvri w ap ouvri kè w ba li. Pa bliye sa, lapriyè vle di plis pase annik mande Bondye kèk bagay. Lapriyè se yon posiblite tou pou w remèsye Jewova pou benediksyon w jwenn nan men l e se yon posiblite tou pou w louwe l pou kokenn travay li fè (Sòm 146:1). Anplis de sa, lè nou louwe Jewova piblikman avèk jwa ak antouzyas se meyè fason pou nou remèsye Jewova e pou nou demontre nou renmen l.

21. Ki enpòtans lanmou pou Jewova genyen, e ki sa nou pral egzamine nan chapit ki vin apre yo ?

²¹ Lanmou pou Bondye se kle bonè etènèl nou. Se tousa Adan ak Èv te bezwen pou yo ka reyisi, e se sa menm yo pa t rive devlope lakay yo. E se bagay ki pi enpòtan nou bezwen pou n pase nenpòt eprèv lafwa nou ta ka rankontre, pou n rejte nenpòt tantasyon, pou n andire nenpòt eprèv. Se esansyèlman sa suiv Jezi vle di. Natirèlman, lanmou pou Bondye konekte ak lanmou pou sanblab nou (1 Jan 4:20). Nan chapit ki vin apre yo, nou pral egzamine kòman Jezi te demontre lanmou li pou moun. Nan chapit 14 la, nou pral reflechi sou rezon ki fè anpil moun te wè Jezi se yon moun ki abòdab.