Èske w rekonesan dèske Jewova toujou ap voye je sou ou?

1, 2. Ki diferans ki genyen ant fason Jewova ap voye je sou nou an ak kamera siveyans yo?

NAN anpil peyi, yo kontinye ap sèvi ak plis kamera siveyans toujou, yon fason pou yo siveye sikilasyon machin yo epi pou yo pran foto aksidan machin ki fèt yo. Grasa anrejistreman kamera sa yo fè yo, otorite yo ka rive jwenn yon chofè ki te fè yon aksidan e ki te kouri kite zòn nan yon fason pou yo pa arete l. Sa klè, grasa aparèy elektwonik sa yo ki toupatou, li vin pi difisil pou yon moun rive chape poul li san l pa peye pou move aksyon l fè.

² Sepandan, èske fason yo sèvi ak kamera siveyans yo prèske tout kote a ta dwe fè n sonje Jewova, Papa nou ki renmen nou an? Se vre, Bib la fè konnen je Jewova “toupatou”. (Pwo. 15:3.) Men, èske sa vle di li toujou ap veye tout ti bagay n ap fè? Èske Bondye ap voye je sou nou senpleman pou l ka pini nou lè n pa respekte lwa l yo (Jer. 16:17; Ebre 4:13)? Non, li pa fè sa! Jewova ap voye je sou nou toudabò paske l renmen nou chak epi l enterese nan byennèt nou. — 1 Pyè 3:12.

 3. Bay senk fason Bondye montre l ap voye je sou nou paske l renmen nou.

³ Ki sa k ap ede n montre nou rekonesan anvè Bondye dèske l ap voye je sou nou paske l renmen nou? Ann wè kòman Jewova montre l ap voye je sou nou. Li montre sa 1) lè l ban nou avètisman kont move tandans nou demontre yo, 2) lè l disipline nou pou yon move bagay nou fè, 3) lè l ban nou konsèy pa mwayen prensip ki nan Pawòl li a, 4) lè l ede nou fè fas ak tout kalite eprèv, epi 5) lè l rekonpanse nou pou bon bagay nou fè.

 4. Ki entansyon Jewova te genyen lè l te di Kayen peche te ‘kouche ap tann li nan papòt la’?

⁴ Toudabò, ann wè ki fason Bondye ban nou avètisman lè n gen move tandans k ap devlope lakay nou (1 Kwo. 28:9). Pou n ka montre nou rekonesan pou fason sa a Bondye ap voye je sou nou an, ann konsidere fason l te aji ak Kayen ki te vin “fache anpil” lefètke Bondye pa t apwouve l. (Li Jenèz 4:3-7.) Jewova te ankouraje Kayen pou l te “fè sa ki byen”. Jewova te fè l konnen si l pa fè sa, peche t ap ‘kouche tann li nan papòt la’. Bondye te mande l: “Èske w ap rive gen kontwòl li?” Jewova te vle pou Kayen byen reyaji devan avètisman l te ba li yo yon fason pou l vin “apresye” Kayen ankò. Si Kayen te gen apwobasyon Bondye, sa t ap pèmèt li kontinye gen yon bon relasyon avè l.

 5. Ki fason Jewova ban nou avètisman kont move tandans nou gendwa gen lakay nou?

⁵ Ki sa n ka di konsènan nou menm jodi a? Je Jewova wè sa k ap pase nan kè nou, nou pa ka anpeche l wè panse nou genyen toutbon yo, e nou pa ka anpeche l wè sa k motive nou toutbon. Papa ki renmen nou an vle nou fè sa ki jis, sepandan, li pap fòse nou chanje fason n ap viv la. Pa mwayen Pawòl li a, Labib, li ban nou avètisman lè n sou wout pou n pran yon move direksyon. Ki jan l fè sa? Nan lekti nou fè nan Bib la chak jou, byen souvan, nou konn jwenn vèsè ki ede n venk kèk move tandans ansanm ak kèk move panse nou genyen. Anplis de sa, nan piblikasyon nou yo, nou ka jwenn kèk detay sou yon pwoblèm nou gendwa ap fè fas, e yo ka montre n fason nou ka venk pwoblèm sa a. Mete sou sa, nan reyinyon kongregasyon an, nou tout jwenn konsèy ki vini egzakteman nan bon moman.

6, 7. a) Ki sa k fè n kapab di piblikasyon yo ekri pou plizyè milyon moun yo se yon prèv ki montre Bondye ap pran swen nou paske l renmen nou? b) Ki jan w ka jwenn byenfè nan avètisman Jewova ap ba ou?

⁶ Tout avètisman sa yo se bonjan prèv ki montre Jewova ap voye je sou nou pèsonèlman paske l renmen nou. Sa gen plizyè syèk depi yo ekri Bib la, mete sou sa, òganizasyon Bondye a ekri piblikasyon yo pou plizyè milyon moun, e se pou tout kongregasyon an yo bay konsèy nou jwenn nan reyinyon yo. Sepandan, nan tout ka sa yo, Jewova atire atansyon w sou Pawòl li a yon fason pou w ka korije fason w panse. Konsa, nou kapab di konsèy sa yo se prèv ki montre Jewova ap pran swen nou chak paske l renmen nou.

⁷ Pou nou ka jwenn byenfè nan avètisman Bondye ap ban nou yo, toudabò, nou bezwen rekonèt Bondye vrèman gen sousi pou nou. Apre sa, nou dwe byen reyaji devan Pawòl li a, e nou dwe fè tout sa n kapab pou n elimine kèlkeswa panse nou kapab genyen ki pap fè Bondye plezi. (Li Izayi 55:6, 7.) Si nou koute avètisman Bondye ban nou yo, n ap evite yon pakèt pwoblèm. Sepandan, ann sipoze nou ta kite move tandans nou yo pran pye sou nou. Nan ka sa a, ki èd nou t ap jwenn nan men Papa nou an ki renmen nou?

8, 9. Ki jan konsèy Jewova ban nou pa mwayen sèvitè l yo montre jis nan ki pwen Jewova gen sousi pou nou? Bay yon egzanp.

⁸ Se lè Jewova disipline nou n ap plis konprann jan l gen sousi pou nou. (Li Ebre 12:5, 6.) Se vre, nou pa toujou kontan lè yo ban nou konsèy oswa lè yo disipline nou (Ebre 12:11). Men, fè yon ti reflechi sou tout sa moun k ap bay konsèy la dwe pran an konsiderasyon. Li bezwen konn sa n ap fè ki ka gen efè sou relasyon nou gen ak Jewova, li bezwen gen konsiderasyon pou sa n santi, e l dwe dispoze pran tan epi fè efò sa mande pou l montre n, grasa Labib, kòman nou ka fè chanjman nan lavi n yon fason pou n fè Bondye plezi. Pa gen dout nan sa, se Jewova ki ban nou konsèy sa yo.

⁹ Ann pran yon egzanp pou n montre kòman moun k ap bay konsèy yo kapab imite fason Bondye montre l gen sousi pou nou. Gen yon frè ki te konn gade pònografi regilyèman anvan l te aksepte laverite, e ki te rive venk move abitid sa a. Sepandan, tandans li te genyen an te toujou la, li t ap limen tikras pa tikras menm jan ak chabon dife. Move dezi l yo te vin pi fò toujou lè l te vin gen yon lòt telefòn selilè (Jak 1:14, 15). Li te sèvi ak telefòn nan pou l al sou kèk sit pònografi. Yon jou, pandan l t ap bay temwayaj nan telefòn, li te prete yon ansyen telefòn nan yon fason pou ansyen an te ka chèche kèk adrès. Lè ansyen an te kòmanse sèvi ak telefòn nan, gen kèk move sit ki te kòmanse parèt. Sa k te rive a te tounen yon benediksyon pou frè nou an ki te sou yon move pant nan domèn espirityèl. Li te jwenn konsèy nan bon moman, li te jwenn byenfè grasa disiplin li te resevwa yo epi, finalman, li te rive venk move tandans li yo. Se pa ti rekonesan nou rekonesan dèske Papa nou ki nan syèl la ki gen sousi pou nou wè menm peche nou fè ki kache yo, epi l disipline nou anvan nou rive twò lwen nan peche sa yo!

10, 11. a) Ki jan w ka chèche konsèy nan men Bondye? b) Ki jan yon fanmi te rann yo kont jan li saj pou yon moun koute konsèy Jewova yo?

¹⁰ Men sa yon salmis te di Jewova nan yon chante: “Avèk konsèy ou w ap dirije m.” ​(Sòm 73:24, NW). Chak fwa n bezwen konsèy, nou kapab montre n “sonje” Jewova lè n egzamine Pawòl li a pou n wè ki pwennvi l genyen sou bagay yo. Lè n aplike prensip ki nan Bib la, nonsèlman n ap jwenn byenfè nan domèn espirityèl, men tou, pafwa, n ap jwenn sa n bezwen nan domèn materyèl. — Pwo. 3:6, NW.

¹¹ Egzanp yon frè ki konn travay tè k ap viv nan yon zòn ki chaje mòn ki rele Masbate, nan peyi Filipin, se yon egzanp ki montre fason Jewova konn bay kèk moun konsèy. Frè sa a ak madanm li t ap sèvi kòm pyonye pèmanan e yo te gen anpil timoun. Yon jou, yo te sezi anpil lè yo te resevwa yon nòt mèt tè a te voye ki mande pou yo kite tè a. Pou ki rezon? Se paske yo te bay manti sou yo kòmkwa yo se moun ki gen move konduit. Byenke frè a t ap mande tèt li ki kote li menm ak fanmi l t apral abite, li te di: “Jewova ap pran swen nou. Li toujou fè n jwenn sa n bezwen kèlkeswa jan sa ye.” Frè a te met konfyans li nan yon bon moun. Kèk jou apre, fanmi an te santi l soulaje lè yo te aprann yo pap gen pou yo kite tè a ankò. Ki sa k te pase? Mèt tè a te wè jan fanmi sa a, ki te Temwen e k ap aplike prensip ki nan Bib la, te kontinye demontre respè e yo te kontinye viv nan lapè malgre akizasyon yo te lage sou do yo. Sa te tèlman fè efè sou mèt tè a, nonsèlman li te kite fanmi an kontinye viv sou tè a, men tou, li te ba yo plis tè pou yo travay. (Li 1 Pyè 2:12.) Vrèmanvre, Jewova ban nou konsèy, pa mwayen Pawòl li a, ki kapab ede nou fè fas ak difikilte lavi a.

12, 13. Ki sitiyasyon ki ka fè kèk moun ap mande si Bondye wè soufrans yo?

¹² Sepandan, pafwa, yon sitiyasyon difisil kapab pran anpil tan. Nou kapab ap goumen ak yon maladi ki pa gen tretman, nou kapab ap fè fas ak opozisyon n ap jwenn depi yon bon bout tan nan men manm fanmi nou ki pwòch avè n, oswa nou kapab ap fè fas ak pèsekisyon. E ki sa n ka di konsènan gwo pwoblèm nou konn gen ak yon moun nan kongregasyon an paske nou pa gen menm pèsonalite avè l?

¹³ Pa egzanp, ou kapab vin fache paske yon frè te di w yon pawòl ou panse l pa t dwe di w. Ou kapab ap di tèt ou: ‘Sa pa dwe fèt nan òganizasyon Bondye a.’ Annapre, frè ki te di w pawòl la vin resevwa plis privilèj nan kongregasyon an, epi, sanble lòt moun nan kongregasyon an pale an byen de li. Ou kapab ap mande tèt ou: ‘Ki jan sa fè fèt? Jewova genlè pa wè? M ap wè si l pap aji.’ — Sòm 13:1, 2; Aba. 1:2, 3.

14. Bay youn nan rezon ki fè Bondye gendwa pa fè anyen pou l rezoud pwoblèm nou genyen yo.

¹⁴ Jewova kapab gen yon bon rezon ki fè l pa retire nou nan sitiyasyon nou ye a. Pa egzanp, toutpandan w ka santi se lòt moun nan ki gen plis tò, Bondye li menm gendwa wè bagay yo yon lòt jan. Pou li menm, ou gendwa wè w gen plis tò pase sa w panse. An reyalite, ou kapab wè pawòl yo te di w ki te fè w mal la gendwa se yon bon konsèy ou bezwen pran an konsiderasyon. Nan byografi frè Karl Klein, yon frè ki te sèvi antanke manm Kolèj santral, li te pale konsènan yon lè kote frè J. F. Rutherford te reprimande l yon fason ki di. Annapre, avèk jantiyès, frè Rutherford te salye frè Klein e l te di l: “Bonjou Karl!” Men, etandone frè Klein te toujou fache akoz reprimann li te resevwa a, li te reponn frè Rutherford nan dan. Piske frè Rutherford te rann li kont frè Klein te kenbe l nan kè, li te di l fè atansyon pou l pa tonbe nan pyèj Dyab la. Men sa frè Klein te ekri annapre: “Lè nou kenbe yon frè n nan kè, sitou si se paske l te di n yon bagay li gen tout dwa l pou l di nou akoz responsablite li genyen yo, lè sa a se kite nou kite jwen pou Dyab laa.”

15. Ki sa k kapab ede w pou w pa vin enpasyan lè w ap tann pou Jewova ede w fè fas ak yon sitiyasyon ki difisil?

¹⁵ Mete sou sa, si nou gen lontan depi n ap fè fas ak yon eprèv nou kapab vin enpasyan. Ki jan nou ka fè fas ak sa? Ann sipoze w ap kondui yon machin sou yon gran wout epi w vin pran nan blokis. Ou pa konn pou konbyen tan w la. Si w fache epi w eseye pran yon lòt wout, ou gendwa pèdi. Konsa, sa kapab fè w pran plis tan pou w rive kote w vle ale a pase si w te ret tann nan blokis la avèk pasyans. Menm jan an tou, si w ret sou wout Pawòl Bondye a trase pou ou a, w ap rive kote w prale a nan lè w dwe rive a.

16. Bay yon lòt rezon ki fè Jewova gendwa chwazi pa retire n nan eprèv n ap sibi yo.

¹⁶ Jewova kapab chwazi pa retire n nan eprèv n ap sibi yo paske l vle pou eprèv sa yo ban nou bonjan fòmasyon. (Li 1 Pyè 5:6-10.) Se pa Bondye ki lakòz eprèv n ap sibi yo (Jak 1:13). Se “advèsè nou an, Dyab la” ki lakòz pifò pwoblèm nou jwenn yo. Sepandan, Bondye ka sèvi ak yon sitiyasyon ki difisil pou l ede nou vin pi djanm nan domèn espirityèl. Li wè soufrans nou yo, e piske l “gen sousi” pou nou, l ap asire l soufrans sa yo ap la “pou yon ti tan” sèlman. Èske w rekonesan dèske Jewova toujou ap voye je sou ou lè w ap fè fas ak eprèv toutpandan w gen konfyans l ap ouvè yon chemen pou ou? — 2 Kor. 4:7-9.

17. Ki kalite moun Jewova ap chèche, e poukisa?

¹⁷ Pou fini, gen yon pi gwo rezon ankò ki fè Bondye ap egzamine lavi nou. Men sa Bondye te di wa Aza pa mwayen pwofèt Anani: “Paske, kanta pou Jewova, je l ap pwonmennen sou tout tè a pou l ka montre fòs li an favè moun kè yo konplè pou li.” ​(2 Kwo. 16:9, NW). Se vre, Bondye te wè Aza pa t ap sèvi l ak yon kè konplè, sepandan, l ap “montre fòs li an favè” w si w kontinye fè sa ki dwat.

18. Lè n santi pa gen pèsonn ki apresye bon bagay nou fè, ki sa n ta dwe sonje konsènan Jewova? (Gade foto ki nan kòmansman atik la.)

¹⁸ Bondye vle pou nou ‘chèche sa ki byen’, pou nou “renmen sa ki bon”, e pou nou “fè sa ki byen” yon fason pou nou ka jwenn “favè” l (Amòs 5:14, 15, NW; 1 Pyè 3:11, 12). Jewova wè sa moun ki jis yo ap fè, e li beni yo (Sòm 34:15). Pa egzanp, ann fè yon ti reflechi sou sa k te rive Chifra ak Pouwa, de fanmsaj izrayelit. Nan epòk Izrayelit yo te ann esklavaj nan peyi Ejip, de medam sa yo te montre yo gen plis lakrentif pou Bondye pase Farawon. Farawon te ba yo lòd pou yo touye tout ti gason Izrayelit yo lè yo fèk fèt. Nòmalman, etandone yo te gen lakrentif pou Bondye, konsyans yo pa t pèmèt yo touye tibebe sa yo. Annapre, Chifra ak Pouwa te vin gen “anpil pitit”. (Egz. 1:15-17, 20, 21.) Bèl aksyon yo te fè yo pa t pase inapèsi nan je Jewova. Pafwa, nou ka santi pèsonn pa wè bon bagay n ap fè yo. Men, Jewova wè yo. Li wè tout bèl aksyon nou fè yo, e l ap rekonpanse nou pou sa. — Mat. 6:4, 6; 1 Tim. 5:25; Ebre 6:10.

19. Ki jan yon sè te aprann jan bon aksyon l fè yo pa t pase inapèsi nan je Bondye?

¹⁹ Gen yon sè nan peyi Otrich ki te vin aprann jan travay di l ap fè yo pa pase inapèsi nan je Bondye. Piske l te soti nan yon fanmi ongwa, yo te ba l adrès yon moun ki pale ongwa yon fason pou l te ka kontakte moun nan. Li pa t pran tan pou l al nan kay la, men, pa t gen pèsonn. Li te retounen plizyè fwa. Pafwa, li te konn santi gen yon moun nan kay la, men, pèsonn pa t janm reponn. Li te konn kite piblikasyon, li te konn voye lèt, e li menm kite enfòmasyon pou yo kontakte l, eksetera. Apre sè a te fin pase ennan edmi ap vizite kay sa a, yo te resi ouvè pòt la pou li! Gen yon dam byen janti ki te salye sè a, e ki te di l: “Tanpri, ou mèt antre. Mwen te li tout sa w te kite pou mwen yo e mwen t ap tann ou.” Dam nan t ap suiv yon tretman chimyoterapi, e li pa t ka resevwa moun. Yo te kòmanse yon etid biblik. Vrèmanvre, Bondye te rekonpanse sè a pou tout efò l te fè yo!

20. Ki jan w santi w lefètke w konnen Jewova ap voye je sou ou?

²⁰ Jewova wè kèlkeswa sa w ap fè, e l ap rekonpanse w. Etandone w vin konnen Bondye ap voye je sou ou, ou pa bezwen santi se kòmsi w te gen yon kamera siveyans k ap veye tout ti bagay w ap fè. Okontrè, se pou w santi w pi pwòch Bondye ki konn pran ka moun nan e ki gen sousi pou ou toutbonvre a!