Referans pou Pwogram reyinyon Lavi nou ak travay nou fè a
7-13 NOVANM
TREZÒ KI NAN PAWÒL BONDYE A | PWOVÈB 27-31
“Labib di ki jan yon bon madanm ye”
w00-F 1/2 31 § 2
Konsèy saj yon manman bay
Anrapò ak yon madanm ki kapab, yo te di Lemwèl: “Se nan li mèt li mete konfyans li.” (Vèsè 11). Sa ta vle di, mèt li pap ensiste pou li jwenn pèmisyon l nan tout sitiyasyon. Sa klè, de moun marye ta dwe pale youn ak lòt anvan yo pran gwo desizyon tankou sa ki konsène gwo depans oubyen kesyon leve timoun. Bon kominikasyon nan domèn sa yo pèmèt yo vin pi pwòch.
it-1-F 873-876
Madanm
Lalwa te pwoteje madanm yo. Etandone mari a te jwe wòl chèf nan maryaj la, Bondye te atann pou l te pote tout sa ki nesesè epi pran swen fanmi an ni nan domèn materyèl, ni nan domèn espirityèl. Epitou, nenpòt move konpòtman fanmi l te genyen te gen efè sou li; sa te fè li vin gen yon gwo reponsablite. Se vre, li te gen pi gwo privilèj pase madanm nan, men Lwa Bondye a te pwoteje madanm nan e li te ba li kèk privilèj espesyal, konsa, li te ka gen kè kontan e li te ka santi l itil.
Gen kèk egzanp sou kèk dispozisyon ki te gen nan Lalwa ki konsène madanm nan. Yo te ka touye kèlkeswa mari oubyen madanm ki te fè adiltè. Si mari a te vin sispèk madanm li t ap fè adiltè an sekrè, li te ka mennen l devan prèt la pou Jewova Dye te jije ka a. Depi madanm nan te koupab, ògán ki pèmèt li fè pitit yo t ap dejenere. Men, si madanm nan te inosan, yo te egzije mari a pou l te ansent madanm li, konsa li t ap montre tout moun li aksepte madanm nan inosan (Nb 5:12-31). Yon mari te ka divòse ak madanm li si li te jwenn yon bagay ki te chokan lakay li. Sa te ka gen ladan l yon atitid ki montre li pa gen respè pou mari l, oswa yon konpòtman ki ta pote gwo dezonè sou kay li oubyen sou kay papa l. Sepandan, selon Lalwa, madanm nan te dwe jwenn yon sètifika divòs nan men mari l, yon dispozisyon ki te la pou pwoteje l. Konsa, li te lib pou l te remarye ak yon lòt gason (Dt 24:1, 2). Si mari a te vin konnen madanm li te fè yon ve li panse ki pa saj oubyen ki te ka afekte byennèt fanmi an, li te ka anile l (Nb 30:10-15). Sepandan, dispozisyon sa a te pwoteje madanm nan kont nenpòt desizyon li te pran san reflechi, yon sitiyasyon ki te ka mete l nan pwoblèm.
Lalwa Bondye te bay pa mwayen Moyiz la te pèmèt yon gason gen plizyè madanm, men, te gen règ pou madanm nan jwenn pwoteksyon. Mari a pa t gen dwa chanje dwa li genyen antanke premye pitit gason an pou l bay pitit gason li genyen ak madanm li pi renmen an, alòske dwa sa a se pou pitit gason yon lòt madanm li genyen li dwe ye (Dt 21:15-17). Si yon papa izrayelit te vann pitit fi l kòm sèvant, e mèt li ta pran l kòm madanm sou kote, epi sa ta rive li pa renmen l ankò, ebyen, li pa t dwe vann li bay yon pèp etranje, men li te dwe ba l libète l (Eg 21:7, 8). Si mèt la oubyen pitit li ta pran fi sa a kòm madanm sou kote epi l ta vin marye ak yon lòt fi, ebyen, fi sa a te dwe jwenn manje, rad ak yon kote pou l rete, e li te dwe kontinye gen relasyon mari ak madanm avè l. — Eg 21:9-11.
Si yon mari vin mechan ak madanm li e li akize l kòmkwa li te bay manti lè l te deklare li vyèj nan moman li te marye avè l la, men akizasyon l lan pa vre, mari a te dwe peye de fwa sa l ta dwe peye pou yon fi vyèj, epi li pa t ap gen dwa divòse ak madanm sa a pou tout rès vi l (Dt 22:13-19). Si yon gason te al fè sèks avèk yon fi vyèj ki pa t fiyanse, li te dwe peye papa fi vyèj la pri maryaj la, e si papa fi vyèj la te dakò, gason an te ka marye avèk fi a. Men, li pa t ap gen dwa divòse avè l pou tout rès vi l. — Dt 22:28, 29; Eg 22:16, 17.
Byenke pozisyon madanm ki t ap viv nan sosyete ebre a te yon ti jan diferan ak pa madanm k ap viv nan peyi Oksidan yo, yon madanm fidèl ki te ebre te kontan pou pozisyon ak travay li te genyen. Li te ede mari l, li te pran swen fanmi an, li te jere kay li e l te jwenn anpil bagay ki te ka ba li kè kontan ak satisfaksyon, toutpandan li te ka itilize kalite ak kapasite l genyen totalman antanke fi.
Ki jan Labib dekri yon bon madanm. Pwovèb 31 montre fason yon fi fidèl jwenn kè kontan e ki aktivite li fè. Yo di li gen plis valè pou mari l pase koray. Mari a ka mete konfyans li nan madanm sa a. Li travay di, li fè triko, li fè rad pou fanmi l, li fè acha pou kay la, li travay nan jaden rezen, li jere kay la ak moun k ap travay nan kay la, li ede moun ki nan bezwen, li abiye fanmi l ak bèl rad, li menm mennen kòb nan kay la grasa travay li fè ak men l, li ekipe fanmi l pou ijans ki ka vini, li di sa l panse avèk sajès epi li demontre afeksyon pou moun. Lefètke li gen lakrentif pou Jewova e li fè bon travay, li resevwa lwanj nan men mari l ak pitit li yo. Epi, li onore mari l ak fanmi l nan peyi a. Vrèmanvre, moun ki jwenn yon bon madanm jwenn yon bon bagay e li jwenn favè Jewova. — Pw 18:22.
Nan kongregasyon kretyen an. Men yon prensip kongregasyon kretyen an genyen: Yon mari dwe gen yon sèl madanm ki vivan (1Ko 7:2; 1Ti 3:2). Madanm nan dwe soumèt devan mari l, kit mari a kretyen, kit li pa kretyen (Ef 5:22-24). Madanm nan dwe bay mari l sa l dwe l la, se menm bagay la tou pou mari a. Anfèt, se pa li “ki gen pouvwa sou pwòp kò l”. (1Ko 7:3, 4.) Madanm nan ta dwe demontre an premye bèl abiman li se moun li ye nan fon kè l la, e piske l kiltive fwi lespri a, li ka genyen mari l ki pa kretyen. Grasa konduit li sèlman, li ka fè l vin kretyen. — 1P 3:1-6.
Sans senbolik. Nan yon sans senbolik, Jewova te pale de nasyon Izrayèl la tankou se te madanm li, paske l te fè yon alyans avè l (Eza 54:6). Apot Pòl rele Jewova, Papa kretyen ki vin pitit li yo grasa lespri sen, e li rele “Jerizalèm anwo a” manman yo. Se kòmsi Jewova te marye avèk madanm sa a nan objektif pou l fè kretyen sa yo vin fèt ankò grasa lespri sen (Ga 4:6, 7, 26). Yo fè nou konnen kongregasyon kretyen an se madan marye Jezi Kris. — Ef 5:23, 25; Re 19:7; 21:2, 9.
w00-F 1/2 31 § 3-4
Konsèy saj yon manman bay
Li klè, yon bon madanm gen yon pakèt bagay pou l fè. Nan vèsè 13 pou rive nan vèsè 27 la, nou jwenn yon lis konsèy ak prensip yon madanm ka suiv pou byen fanmi l, kèlkeswa laj li genyen an. Pa egzanp, kòm rad ak ekipman pou kay vin chè, yon bon madanm ka aprann fè travay pratik ak men l epi pa gaspiye sa l genyen, konsa, fanmi l ka byen abiye epi yo ka gen bon aparans (vèsè 13, 19, 21, 22). Pou redui depans manje kay la, li plante sa l kapab e li veye sou sa l ap achte. — Vèsè 14, 16.
Li evidan, yon madanm konsa “pa parese menm”. Li travay di epi li jere aktivite kay li yon fason efikas (vèsè 27). Li “mare senti li” avèk fòs ak detèminasyon, sa vle di li prepare l pou l travay di ak men l (vèsè 17). Li leve anvan solèy la leve, epi li travay di jis lannuit rive. Se ta kòmsi li pa janm etenn lanp ki klere travay l ap fè. — Vèsè 15, 18.
w00-F 1/2 31 § 5
Konsèy saj yon manman bay
Sa ki pi enpòtan, bon madanm nan se yon moun ki espirityèl. Li gen lakrentif pou Bondye, li adore l avèk yon gwo respè e li gen admirasyon pou li (vèsè 30). Anplis, li ede mari l fòme pitit yo pou yo fè menm bagay la tou. Vèsè 26 la di: “Li gen sajès”, sa vle di li enstwi timoun yo e “li pale ak bonte”.
w00-F 1/2 31 § 8
Konsèy saj yon manman bay
Pa gen dout, manman Lemwèl te baze sou eksperyans pèsonèl li pou l te raple pitit gason lan enpòtans sa genyen pou li montre li apresye moun ki t ap vin madanm li an. Pa gen moun sou tè a li ta dwe cheri plis pase l. Kidonk, imajine emosyon ki te gen nan vwa l, lè l t ap di devan tout moun: “Gen anpil bon fi, men ou menm, ou pi bon pase yo tout.” — Pwovèb 31:29.
Fouye pou n ka jwenn trezò espiritiyèl
w11-F 1/8 29 § 1
Yon jou ki bay gwo espwa ak kè kontan
Dezyèmman, Frè Morris li Pwovèb 27:21 ki di: “Gen veso ki fèt pou fonn ajan e gen fou ki fèt pou fonn lò, konsa tou, se konpliman yo fè yon moun ki fè wè kiyès li ye.” Li esplike menm jan yo bezwen pirifye lò ak ajan, se konsa tou, nou ka bezwen amelyore tèt nou, selon lwanj yo fè pou nou. Ki jan? Elòj yo fè pou yon moun ka pèmèt li egzamine ki moun li ye. Li ka mennen moun nan vin gen twòp fyète e li ka fè l tonbe nan domèn espirityèl, oubyen li ka pouse l admèt tout bagay li genyen se Jewova ki ba li yo, epi li ka fè l vin pi detèmine pou l pa janm sispann suiv prensip li yo. Konsa, Frè Morris te ankouraje etidyan yo pou yo pran tout elòj yo ta resevwa nan bon sans lan, sa vle di kòm yon bagay ki ba yo opòtinite pou yo montre yo gen bonjan “lakrentif pou Jewova”.
w06-F 15/9 19 § 12
Pwen enteresan ki nan liv Pwovèb la
27:21. Elòj yo fè pou nou ka montre nou ki moun nou ye. Nou ka wè si nou gen imilite, si elòj yo fè pou nou an fè nou admèt tout bagay nou genyen se Jewova ki ban nou yo e l ankouraje nou kontinye sèvi l. Si yon moun pa gen imilite, sa parèt klè lè elòj yo fè pou li fè l santi l siperyè lòt moun.
21-27 NOVANM
TREZÒ KI NAN PAWÒL BONDYE A | EKLEZYAS 7-12
“Sonje Gran kreyatè w la, pandan w jèn nan”
w11-F 1/11 21 § 1-6
Pwoche bò kote Bondye
Lè n fè sa nou dwe fè pou Bondye
ÈSKE W janm mande tèt ou: ‘Ki bi lavi a?’ Jewova ban nou kapasite pou n poze tèt nou kesyon sa a, men tou, li fè nou gen gwo anvi pou n jwenn repons lan. Erezman, Bondye nou an ki chaje ak lanmou pa kite nou nan fènwa. Repons sa a nou swaf pou n jwenn nan nan Labib, Pawòl li a. Ann egzamine pawòl wa Salomon te di nou jwenn nan Eklezyas 12:13.
Salomon te nan yon pozisyon espesyal. Li te ka di byen ki jan pou n jwenn kè kontan e ki bi lavi a. Li te gen yon sajès ki estrawòdinè ak yon pakèt richès, li te wa, epi li te ka fè bonjan rechèch sou sa lèzòm ap chèche nan lavi a, tankou richès ak gwo pozisyon (Eklezyas 2:4-9; 4:4). Se sa k fè, anba enspirasyon Bondye, li rezime sa l te jwenn yo konsa: “Apre tout sa m fin di la yo, men sa k pi enpòtan an: Gen lakrentif pou vrè Dye a epi obeyi kòmandman l yo, se tout sa yon moun dwe fè.” Pawòl sa yo montre sa ki pi bon pou yon moun chèche fè e sa k ap fè l jwenn plis byenfè.
“Gen lakrentif pou vrè Dye a.” Toudabò, lide pou yon moun gen lakrentif pou Bondye a se pa yon bagay ki parèt atiran. Men, yon moun ap fè byen pou l gen bon dispozisyon sa a nan kè l. Nou pa ta dwe panse nou se yon esklav ki pè mèt li ki mechan anpil, men pito, nou se yon timoun ki anvi fè papa l plezi, papa l li renmen anpil. Gen yon liv referans ki fè konnen lakrentif pou Bondye se “gwo respè ak admirasyon pèp li a gen pou li poutèt yo renmen l epi yo respekte pouvwa ak glwa li genyen”. Yon atitid konsa ap fè nou soumèt nou pou n fè volonte Bondye paske nou renmen l e nou konnen li renmen nou tou. Lakrentif sa a, ki fè moun jwenn byenfè, pa yon senp santiman, men li parèt nan aksyon nou tou. Ki jan?
“Obeyi kòmandman l yo.” Lakrentif pou Jewova pouse nou obeyi l. E li toutafè nòmal pou n obeyi Jewova. Kòm se li ki fè nou, li konn pi bon fason pou n viv, menm jan yon moun ki fè yon pwodui konn pi bon fason pou yo itilize l. Anplis, Jewova vle sa ki pi bon pou nou. Li vle pou n kontan epi kòmandman l yo la pou byennèt nou (Ezayi 48:17). Men ki jan apot Jan te di sa: “Men sa lanmou pou Bondye vle di: se pou nou obeyi kòmandman l yo. Epoutan, kòmandman l yo pa lou.” (1 Jan 5:3). Obeyisans nou demontre lanmou nou gen pou Bondye, e kòmandman l yo montre li gen lanmou pou nou.
“Se tout sa yon moun dwe fè.” Pawòl sa yo montre yon gwo rezon nou genyen pou n gen lakrentif pou Bondye e pou n obeyi l. Fè sa se yon obligasyon e se yon devwa pou nou. Jewova se Kreyatè nou, donk, se li ki ban nou lavi nou genyen an (Sòm 36:9). Nou dwe obeyi l tou. Lè n viv jan li vle nou viv la, nou fè sa nou dwe fè a.
Donk, ki bi lavi a? Ebyen, yon fason senp, nou ka di nou egziste pou n fè volonte Bondye. Pa gen yon pi bon fason pou n bay lavi nou sans. Poukisa w pa chèche konn plis sou volonte Jewova epi wè ki jan w ka fè pou w viv ann amoni ak volonte l? Temwen Jewova yo ap kontan ede w fè sa.