Ki sa “kreyati vivan ki te gen kat figi yo” reprezante?

1, 2. Poukisa pafwa Jewova te sèvi ak bagay moun ka wè pou l bay sèvitè l ki sou tè a yon seri verite?

IMAJINE yon fanmi ki gen timoun piti ki chita bò yon tab k ap etidye Labib. Pou papa a ede timoun yo konprann yon verite ki nan Bib la, li montre yo kèk imaj. Fason timoun yo souri ak fason yo reponn byen chofe montre papa a reyisi fè pwen an pase. Lefètke li sèvi ak imaj pou l bay esplikasyon yo, sa ede timoun yo konprann yon seri bagay sou Jewova yo pa t ap ka konprann pou laj yo.

² Menm jan an tou, Jewova sèvi ak bagay moun ka wè pou l ede lèzòm, antanke pitit li, konprann yon seri bagay yo pa t ap ka konprann si yo pa t wè yo. Pa egzanp, pou Jewova esplike n yon seri verite pwofon sou li, li te fè Ezekyèl wè yon vizyon ki chaje ak imaj ki frapan. Nan chapit ki vin anvan an, nou te pale sou youn nan imaj sa yo. Kounye a, ann konsantre n sou yon pati byen presi nan vizyon estrawòdinè sa a, epi ann wè lè nou konprann sans li ki jan sa ka ede nou vin pi pwòch Jewova.

 3. a) Selon Ezekyèl 1:4, 5, ki sa Ezekyèl te wè nan vizyon an? (Gade foto ki nan kòmansman chapit la.) b) Ki sa w remake konsènan fason Ezekyèl te ekri sa l te panse yo?

³ Li Ezekyèl 1:4, 5. Ezekyèl fè konnen li te wè “kat bagay ki sanble ak kat kreyati vivan” ki te sanble ak zanj, ak moun e ak bèt. N ap remake jan Ezekyèl te presi lè l t ap esplike sa l panse, li fè konnen li te wè “kat bagay ki sanble ak kat kreyati vivan”. Pandan n ap li tout vizyon an ki nan Ezekyèl chapit 1 an, n ap remake pwofèt la sèvi ak ekspresyon “sanble ak” ansanm ak “tankou” plizyè fwa (Eze. 1:13, 24, 26). Li klè, Ezekyèl te rann li kont sa l te wè yo se sèlman imaj ki te reprezante yon seri bagay reyèl, men ki envizib, ki egziste nan syèl la.

 4. a) Ki efè vizyon an te gen sou Ezekyèl? b) Ki sa n sèten Ezekyèl te konnen sou cheriben yo?

⁴ Siman, sa Ezekyèl te wè ak sa l te tande nan vizyon an te fè l ret bouch ouvè. Kreyati vivan yo te sanble ak “chabon dife ki tou limen”. Mouvman yo fè yo te rapid tankou “kout zèklè”. Zèl yo te fè yon bri “tankou bri yon gwo dlo k ap desann” e bri yo te fè lè y ap deplase te “tankou bri yon lame”. (Eze. 1:13, 14, 24-28; gade kare ki gen tit: “Pandan m t ap gade kreyati vivan yo.”) Nan yon lòt vizyon Ezekyèl te fè annapre, li te fè konnen kat kreyati vivan sa yo se “cheriben”, yon seri zanj ki gen anpil fòs (Eze. 10:2). Lefètke Ezekyèl te grandi nan yon fanmi prèt, se sèten li te konnen cheriben yo se zanj k ap sèvi Bondye e yo toupre l. — 1 Kwo. 28:18; Sòm 18:10.

 5. a) Nan ki sans cheriben yo ak kat figi yo montre jan Jewova gen anpil pisans ak anpil glwa? b) Poukisa pati sa a nan vizyon an fè n sonje siyifikasyon non Bondye? (Gade nòt la.)

⁵ Li Ezekyèl 1:6, 10. Ezekyèl te remake tou chak cheriben te gen kat figi: yon figi moun, yon figi lyon, yon figi towo bèf ak yon figi èg. Siman kat figi sa yo Ezekyèl te wè yo te aprann li anpil bagay konsènan fòs ak glwa Jewova genyen ki san parèy. Sa k fè sa? Yon bagay ki enpòtan sèke chak figi yo se figi yon kreyati ki reprezante yon bagay ki enpresyonan, ki gen fòs e ki gen pisans. Lyon an se yon bèt sovaj ki enpresyonan, towo bèf la se yon bèt ki gwo anpil, èg la se yon zwazo ki gen pisans e lòm se kreyasyon Jewova sou tè a ki pi estrawòdinè, li se chèf tout lòt kreyati yo sou tè a (Sòm 8:4-6). Sepandan, nan vizyon sa a, Ezekyèl te wè toule kat kreyati yo ki reprezante kreyasyon an, jan toule kat figi chak cheriben te montre sa, anba twòn Jewova a, li menm ki se pi gwo Souvren an. Se yon bon fason pou montre Jewova kapab sèvi ak kreyasyon l lan pou l fè l fè volonte l!a Vrèmanvre, jan youn nan moun ki te ekri sòm yo te di sa, Jewova “gen plis glwa lontan pase tè a ak syèl la”. — Sòm 148:13.

 6. Ki sa petèt ki te ede Ezekyèl konprann sa kat figi yo reprezante tou?

⁶ Apre kèk tan te fin pase e apre Ezekyèl te fin reflechi sou sa l te wè yo, petèt li te ka sonje sèvitè Bondye yo ki te viv anvan epòk li a te konn sèvi ak bèt pou yo fè konparezon. Pa egzanp, Jakòb te konpare Jida, youn nan pitit gason l yo, ak yon lyon e l te konpare Benjamen, yon lòt pitit gason l, ak yon lou (Jen. 49:9, 27). Poukisa? Se paske mesye sa yo t ap vin gen yon seri kalite oswa tandans nou jwenn lakay lyon ak lou. Donk, lè Ezekyèl te sonje egzanp sa yo ki te nan pawòl Bondye te enspire Moyiz pou l ekri yo, petèt sa te fè l konprann figi cheriben yo reprezante yon seri bèl kalite tou. Men, ki kalite konsa?

7, 8. Byen souvan, ki kalite kat figi cheriben yo reprezante?

⁷ Anvan epòk Ezekyèl la, gen moun ki te ekri nan Bib la ki te fè konnen lyon, èg ak towo bèf gen yon seri kalite. Ki kalite konsa? Remake pawòl ki vin annapre yo nou jwenn nan Bib la: “Mesye ki gen kouraj tankou lyon yo.” (2 Sam. 17:10; Pwo. 28:1). “Èg [...] vole byen wo” e “je l wè jis byen lwen”. (Jòb 39:27, 29.) “Fòs towo bèf yo fè rekòt la anpil.” (Pwo. 14:4). Sou baz vèsè sa yo, byen souvan, piblikasyon nou yo te konn fè konnen figi lyon an te reprezante jistis ak kouraj, figi èg la te reprezante sajès ki wè lwen e figi towo a te reprezante fòs estrawòdinè.

⁸ E ki sa n ka di konsènan “figi moun” nan (Eze. 10:14)? Se sèten li fè referans ak yon kalite okenn bèt pa ka demontre, men li fè referans ak yon kalite moun ka demontre, yo menm Bondye te fè pòtre ak li (Jen. 1:27). Sou tè a, se sèl lèzòm ki gen kalite sa a e sa parèt aklè nan kòmandman Bondye te bay ki di: “Nou dwe renmen Jewova, Bondye nou an, ak tout kè nou” e “nou dwe renmen pwochen nou menm jan nou renmen tèt nou”. (Det. 6:5; Lev. 19:18.) Lè n obeyi kòmandman sa yo, sa vle di lè n demontre yon lanmou ki pa egoyis, nou imite lanmou Jewova genyen an. Jan apot Jan te ekri sa, “nou demontre lanmou, paske li te demontre lanmou pou nou an premye”. (1 Jan 4:8, 19.) Se sa k fè, “figi moun” nan reprezante lanmou.

 9. Nan kiyès kalite figi cheriben yo reprezante yo soti?

⁹ Nan kiyès kalite sa yo soti? Piske figi yo se figi cheriben yo, kalite sa yo se pou tout moun cheriben yo reprezante nan vizyon an, sètadi kreyati espirityèl ki fidèl yo ki fè pati fanmi Jewova ki nan syèl la (Rev. 5:11). Mete sou sa, piske se nan Jewova lavi cheriben yo genyen an soti, se nan li menm tou kalite yo genyen yo soti (Sòm 36:9). Kidonk, figi cheriben yo reprezante yon seri kalite ki soti nan Jewova (Jòb 37:23; Sòm 99:4; Pwo. 2:6; Miche 7:18). Ann wè kèk fason Jewova demontre kalite estrawòdinè sa yo.

10, 11. Bay kèk fason nou jwenn byenfè nan fason Jewova demontre kat kalite estrawòdinè l yo.

¹⁰ Jistis. Antanke yon Bondye ki “renmen jistis”, Jewova “pa gen patipri”. (Sòm 37:28; Det. 10:17.) Kidonk, kèlkeswa pozisyon nou nan sosyete a e kèlkeswa kote n soti, nou tout gen posiblite pou n sèvi Jewova, pou n kontinye sèvi l e pou n jwenn benediksyon pou toutan. Sajès. Antanke yon Bondye ki “gen sajès”, Jewova ban nou yon liv ki chaje ak “sajès”. (Jòb 9:4; Pwo. 2:7.) Lè n suiv konsèy ki gen sajès nou jwenn nan Bib la, sa ede n fè fas ak difikilte nou rankontre chak jou e sa fè lavi nou gen sans. Pisans. Antanke yon Bondye ki “gen anpil pisans”, Jewova sèvi ak lespri sen l pou l ban nou “pisans ki depase yon pisans nòmal”. Sa ban nou fòs pou n fè fas ak kèlkeswa gwo eprèv nou ka rankontre e ki ka fè n soufri. — Naw. 1:3; 2 Kor. 4:7; Sòm 46:1.

¹¹ Lanmou. Antanke yon Bondye ki “gen anpil lanmou ki fidèl”, Jewova pa janm abandone adoratè ki fidèl li yo (Sòm 103:8; 2 Sam. 22:26). Kidonk, si n tris paske pwoblèm sante oswa laj anpeche n fè anpil bagay nan sèvis Jewova a jan n te konn fè sa anvan, n ap jwenn konsolasyon lefètke n konnen Jewova pap bliye travay nou te fè ak lanmou nou demontre pou li (Ebre 6:10). Li klè, nou deja jwenn anpil byenfè nan fason Jewova demontre jistis, sajès, pisans ak lanmou, e pi devan, n ap kontinye jwenn byenfè nan kat kalite prensipal sa yo.

12. Ki sa n dwe sonje konsènan kapasite n genyen pou n konprann kalite Jewova yo?

¹² Natirèlman, nou dwe sonje nou menm antanke moun se “sèlman yon ti bagay nan sa [Jewova] fè yo” nou ka rive konprann konsènan kalite l yo (Jòb 26:14). “Nou pa ka rive konprann Toupisan an”, paske “pèsonn pa ka konnen nan ki pwen li gran”. (Jòb 37:23; Sòm 145:3.) Konsa, nou vin konprann nou pa ka konte kalite Jewova yo oswa n pa ka separe yo youn ak lòt. (Li Women 11:33, 34.) Anfèt, vizyon an li menm montre Bondye pa gen yon kantite kalite ki fiks oswa youn pa separe ak lòt (Sòm 139:17, 18). Ki pati nan vizyon an ki met aksan sou verite enpòtan sa a?

13, 14. Ki sa kat figi cheriben yo reprezante, e sa k fè n ka di sa?

¹³ Nan vizyon Ezekyèl te fè a, li pa t wè chak cheriben gen yon figi, men pito, li te wè yo chak gen kat figi. Ki sa sa montre? Sonje, nan Pawòl Bondye a, souvan yo itilize chif kat la pou reprezante yon bagay ki konplè (Eza. 11:12; Mat. 24:31; Rev. 7:1). Yon bagay ki sitou enpòtan nan vizyon sa a sèke Ezekyèl site chif kat la pou pi piti 9 fwa (Eze. 1:5-18). Ki sa n rive konprann? Menm jan kat cheriben yo reprezante tout lòt kreyati espirityèl ki fidèl yo, se menm jan an lè n konsidere toule kat figi cheriben yo ansanm, yo reprezante tout kalite Jewova genyen yo.b

¹⁴ Pou n montre nan ki sans kat figi cheriben yo ka reprezante plis pase kat kalite, ann fè yon konparezon ak sa k rive kat wou yo nan vizyon an. Chak wou gwo anpil, men lè n konsidere toule kat wou yo ansanm, yo fòme yon bagay ki pi estrawòdinè pase chak grenn wou poukont yo, yo vin fòme baz cha a. Nan menm sans lan, lè n konsidere toule kat figi yo ansanm, yo reprezante plis pase kat kalite estrawòdinè, yo vin tounen yon pati fondamantal nan pèsonalite Jewova, yon pèsonalite ki fè moun gen lakrentif pou li.

15. Ki verite ki ankourajan Ezekyèl te aprann nan premye vizyon l te fè a?

¹⁵ Nan premye vizyon sa a, Ezekyèl te aprann yon verite ki enpòtan e ki ankourajan sou relasyon l ak Jewova. Ki sa l te ye? Verite sa a parèt nan pawòl entwodiksyon pwofèt la te ekri nan liv ki pote non l lan. Apre Ezekyèl fin di li te “nan peyi moun Kalde yo”, men sa l te ajoute konsènan eksperyans li te fè: “Pandan m te la, pisans Jewova te vin sou mwen.” (Eze. 1:3). N ap remake Ezekyèl pa di li te resevwa vizyon an nan vil Jerizalèm, men li di pandan li te la, sètadi nan vil Babilòn.c Donk, ki sa sa montre Ezekyèl? Byenke li te yon senp moun ki ann egzil ki te lwen Jerizalèm ak tanp lan, li pa t separe ak Jewova ni ak adorasyon li t ap bay Jewova a. Lefètke Jewova te pale ak Ezekyèl nan vil Babilòn, sa montre vrè adorasyon an pa t depann de yon zòn oswa pozisyon yon moun nan sosyete a. Men, li te depann de kondisyon kè Ezekyèl ak dezi l te genyen pou l sèvi Jewova.

16. a) Ki asirans ki ban nou konsolasyon nou ka jwenn nan vizyon Ezekyèl la? b) Ki sa k pouse w sèvi Jewova ak tout kè w?

¹⁶ Ki sa k fè verite Ezekyèl te aprann nan ban nou anpil konsolasyon jodi a? Se paske li ban nou asirans depi n ap sèvi Jewova ak tout kè n, li toujou toupre nou kèlkeswa kote n ap viv la, kèlkeswa jan n ta santi nou dekouraje, oswa kèlkeswa sitiyasyon nou ta twouve nou (Sòm 25:14; Tra. 17:27). Piske Jewova gen anpil lanmou fidèl pou chak sèvitè l, sa fè l pa kouri abandone n (Egz. 34:6). Kidonk, nou pa janm twò lwen pou Jewova demontre lanmou fidèl pou nou (Sòm 100:5; Wom. 8:35-39). Anplis de sa, gwo vizyon sa a ki montre jan Jewova sen ak jan l gen yon pisans ki estrawòdinè fè n sonje li merite pou n adore l (Rev. 4:9-11). Vrèmanvre, se pa ti rekonesans nou genyen dèske Jewova sèvi ak vizyon sa yo pou l ede nou konprann kèk verite enpòtan sou li e sou kalite l yo! Plis nou konprann bèl kalite Jewova genyen yo se plis n ap vin pi pwòch avè l e sa ap pouse n ba l louwanj epi sèvi l ak tout kè n e ak tout fòs nou. — Lik 10:27.

17. Ki kesyon nou pral egzamine nan chapit ki vin apre yo?

¹⁷ Men, malerezman, nan epòk Ezekyèl la, adorasyon ki pwòp la te vin kontamine. Ki jan sa te fè rive? Ki jan Jewova te reyaji? Epitou, ki sa bagay sa yo ki te rive nan tan lontan vle di pou nou jodi a? N ap egzamine kesyon sa yo nan chapit ki vin apre yo.