Referans pou Pwogram reyinyon Lavi nou ak travay nou fè a
2-8 OKTÒB
TREZÒ KI NAN PAWÒL BONDYE A | DÀNYÈL 7-9
“Pwofesi Dànyèl la te gentan fè konnen Mesi a te gen pou l vini”
it-2-F 998 § 1
Swasanndis semèn
Sa ki mal ak peche fini. Lanmò Jezi, rezirèksyon l ak parèt li te parèt nan syèl la pèmèt ‘sa ki mal ak peche fini e sa pèmèt sa ki dwat kontinye fèt nètale’. (Dn 9:24.) Alyans Lalwa a te montre aklè Juif yo se pechè, konsa li te kondane yo e sa te vin fè yo vin anba malediksyon piske yo pa t respekte alyans sa a. Men kit se parèt peche yo te parèt “vin anpil” kit se Lalwa Bondye te bay pa mwayen Moyiz la ki montre sa, mizèrikòd Bondye ak favè l te parèt pi plis toujou pa mwayen Mesi a (Wm 5:20). Grasa sakrifis Mesi a, Bondye kapab elimine sa yon moun fè ki mal ak peche moun sa a si l repanti e konsa moun nan pap gen pou l sibi santans lanmò.
it-2-F 996 § 6
Swasanndis semèn
Mesi a rive apre ‘swasant nèf semèn’. “Swasannde semèn yo” (Dn 9:25) fè pati 70 sèmèn yo e piske yo pale de yo an dezyèm pozisyon, yo t ap kontinye apre “7 semèn yo” fin pase. Kidonk, soti “depi lè pawòl la pale” pou yo repare Jerizalèm epi rebati l, sa vle di ane 455 anvan epòk nou an, pou rive “lè Mesi a, Gid la” vini, sa vle di ane 29 epòk nou an, t ap gen 7 “semèn” plis 62 “semèn, oswa 69 “semèn”, ki pase, sa ki egal a 483 an. Jan nou te di sa a okòmansman an, nan sezon otòn ane 29 epòk nou an, Jezi te batize nan dlo, Bondye te chwazi l pa mwayen lespri sen l, e Jezi te kòmanse travay predikasyon an antanke “Mesi a, Gid la”. — Lk 3:1, 2, 21, 22.
it-2-F 997 § 1
Swasanndis semèn
“Retire” l nan mitan semèn nan. Zanj Gabriyèl te kontinye pale ak Dànyèl, li di l: “Apre 62 semèn yo, y ap retire Mesi a, e pap ret anyen pou li.” (Dn 9:26). Kèk tan apre fen ‘7 semèn plis 62 semèn’ yo, sa vle di anviwon twazan edmi annapre, yo te retire Kris la lè yo te touye l sou yon poto soufrans, konsa, li te bay tèt li kòm ranson pou lèzòm (Eza 53:8). Gen prèv ki montre Jezi te pase premye mitan “semèn” nan nan travay predikasyon an. Yon lè, sanble se te nan otòn ane 32 epòk nou an, Jezi te bay yon egzanp. Sanble li te konpare nasyon juif la ak yon pye fig frans (konpare ak Mt 17:15-20; 21:18, 19, 43) ki pa bay fwi depi “twazan”. Moun ki t ap travay jaden rezen an di mèt jaden an: “Mèt, kite l pou yon lòt ane ankò. Pandan tan sa a, m ap fouye toutotou l, m ap met fimye. Si l bay fwi, se byen. Men si l pa bay anyen, lè sa a ou mèt koupe l.” (Lk 13:6-9). Petèt, la a, li te vle pale de peryòd li te fè ap preche nasyon ki pa t vle tande yo, yon travay li te gentan gen plis pase twazan depi l ap fè l e ki t ap kouri sou katran.
it-2-F 997 § 4
Swasanndis semèn
“Mitan semèn nan” t ap tonbe nan mwatye 7 ane yo, sa vle di twazan edmi “semèn” ane a. Piske 70yèm “semèn” yo te kòmanse ozanviwon otòn ane 29 epòk nou an lè Jezi t ap batize e Bondye te chwazi l kòm Kris, mwatye semèn sa a (twazan edmi) t ap kontinye jiska prentan ane 33 epòk nou an, sa vle di nan fèt Pak (14 Nizan) menm ane a. Dapre kalandriye Gregoryen an, jou sa a koresponn ak 1ye avril ane 33 epòk nou an. (Gade SOUPE SEYÈ A [Lè yo te etabli l].) Apot Pòl di nou Jezi ‘te vin sou tè a pou l fè volonte Bondye’ ki se “elimine premye yo [sakrifis yo bay selon Lalwa] pou l ka tabli dezyèm nan”. Li te fè sa lè li te ofri tèt li kòm sakrifis. — Eb 10:1-10.
Fouye pou n ka jwenn trezò espirityèl
w01-F 15/5 27
Kesyon lektè yo poze
Ki lè yo te mete “Kote ki pi sen an” apa jan yo te anonse sa nan Dànyèl 9:24?
Dànyèl 9:24-27 anonse yon pwofesi anrapò ak moman kote Kris ki se “Mesi a, Gid la” t ap gen pou l vini. Kidonk, “Kote ki pi sen an” yo mete apa pwofèt la te anonse a, pa gen anyen pou l wè ak Kote ki pi sen yo te met apa nan tanp Jerizalèm nan. Okontrè, ekspresyon “Kote ki pi sen” an gen rapò ak tanp Bondye a ki nan syèl la, anpalan de Kote ki pi sen ki nan gran tanp espirityèl la. — Ebre 8:1-5; 9:2-10, 23.
Ki lè tanp espiriyèl Bondye a te kòmanse egziste! Ann wè sa k te pase lè Jezi te batize nan ane 29 epòk nou an. Depi lè sa a Jezi te reyalize pawòl nou jwenn nan Sòm 40:6-8 yo. Annapre, apot Pòl te fè konnen Jezi te priye Bondye. Men sa Jezi te di nan priyè a: “Se pa sakrifis ak ofrann ou te vle, men ou te prepare yon kò pou mwen.” (Ebre 10:5). Jezi te konnen Bondye ‘pa t vle’ yo kontinye ofri l bèt kòm sakrifis nan tanp Jerizalèm nan. Olye de sa, Jewova te prepare kò pafè li te genyen antanke moun nan pou l te ofri l kòm sakrifis. Men sa Jezi te di pou l montre jan l te vle sa ak tout kè l: “Gade! Mwen vini (se sa ki ekri nan yon pati nan liv la konsènan mwen) pou m fè volonte w, o Bondye.” (Ebre 10:7). E ki repons Jewova te bay? Men sa Evanjil Matye a di: “Apre Jezi fin batize, tousuit li monte sot anba dlo a, epi gade, syèl la ouvri, e Jan wè lespri Bondye k ap desann vin sou Jezi sou fòm yon pijon. Epitou, gen yon vwa ki soti nan syèl la ki di: ‘Men Pitit Gason m nan, pitit mwen renmen anpil la, li menm mwen apwouve a.’” — Matye 3:16, 17.
Lefètke Jewova te aksepte kò Jezi lè Jezi te prezante l ba li kòm sakrifis, sa te anonse t ap gen yon lotèl ki t ap pi enpòtan toujou pase lotèl ki te nan tanp Jerizalèm nan. Lotèl sa a te reprezante ‘volonte’ Bondye, oswa dispozisyon li te pran pou l aksepte lavi Jezi t ap genyen antanke moun nan kòm sakrifis (Ebre 10:10). Tanp espirityèl la te vin egziste lè Bondye te chwazi Jezi pa mwayen lespri sen. Kidonk, nan moman Jezi te batize a se lè sa a Bondye te mete syèl la apa kòm “Kote ki pi sen” gran tanp esprityèl la.
9-15 OKTÒB
TREZÒ KI NAN PAWÒL BONDYE A | DÀNYÈL 10-12
“Jewova te gentan wè avni wa yo”
dp-F 212-213 § 5-6
De wa ki te dozado
Twa premye wa yo te Siris Legran, Kanbiz II ak Dariyis Iye (Istaspès). Piske Badiya (petèt yon moun ki te fè dapiyanp sou pouvwa a e ki te rele Gomata) te fè sèt mwa sèlman ap dirije, pwofesi yo pa t bay tan li te fè ap dirije a enpòtans. Nan ane 490 anvan epòk nou an, Dariyis Iye twazyèm wa a, te eseye pran peyi Lagrès yon dezyèm fwa. Men, yo te pèdi batay la nan Maraton e yo t al Azi Minè. Wa Dariyis te byen prepare l pou l atake peyi Lagrès yon lòt fwa ankò, men li pa t gentan reyalize pwojè l te genyen an piske li te gentan mouri katran apre. Pwojè sa a te vin nan tonbe nan men wa Zèksès Iye, yon pitit gason l ki te ranplase l. Se li menm ki te wa Asyeris ki te marye ak Estè a e li te “katriyèm” wa a. — Estè 1:1; 2:15-17.
Pa gen dout Zèksès Iye te “fè tout moun leve kont wayòm peyi Lagrès la”, sa vle di tout eta peyi Lagrès ki te endepandan yo. Men sa yon liv (The Medes and Persians — Conquerors and Diplomats) di: “Anbisyon gwo potanta ki t ap sèvi nan lakou wa a te pouse Zèksès pase ni sou tè ni sou lanmè pou l atake.” Ewodòt, yon istoryen grèk ki te viv nan senkyèm syèk anvan epòk nou an te fè konnen “pa gen okenn lòt lame ki te tankou lame l la”. Men sa li fè konnen ankò: “Lame ki sou dlo a te gen anviwon 517 610 gason, sa ki te apye yo te gen anviwon 1 700 000 e sa ki te sou cheval yo te anviwon 80 000, san konte plizyè arab ki te sou chamo ak plizyè moun ki te sot Libi ki te konn batay sou charyo e mwen panse ki te 20 000 antou. Donk, tout lame a antou, kit se te sou tè kit se te sou lanmè, te rive 2 317 610 gason.”
dp-F 214 § 8
De wa ki te dozado
Men sa yon zanj te di: “Gen yon wa ki pisan ki pral parèt, l ap gen anpil pouvwa e l ap fè sa l vle.” (Dànyèl 11:3). Aleksann te gen 20 an lè l te “parèt” kòm wa Masedwàn nan ane 336 anvan epòk nou an. Vrèmanvre, Aleksann Legran te vin “yon wa ki pisan”. Li te suiv yon plan papa l, Filip II, te fè e li te rive pran zòn peyi Pès yo ak zòn Mwayenn Oryan yo. Lame l la ki te gen 47 000 moun te travèse Rivyè Efrat ak Rivyè Tig, e yo te fè 250 000 sòlda ki te ak Dariyis yo gaye pasipala nan Gogamèlès. Se sa k fè, Dariyis te chape poul li men yo te touye l, e se sa ki te mete fen ak Anpi Pès la. Lagrès te vin pisans mondyal e se Aleksann ki te vin ‘wa ki pisan ki te vin parèt la, ki te gen anpil pouvwa e ki te fè sa l vle a’.
dp-F 215 § 11
De wa ki te dozado
Apre lanmò Aleksann, wayòm li an te “gaye nan kat kwen tè a”. Jeneral lame li yo t ap fè gwo diskisyon pou yo konnen kiyès k ap pran tèritwa yo. Jeneral Antigonis Iye ki te gen yon je l ki pete te eseye mete tout Anpi Aleksann nan sou kontwòl li. Men yo te touye l nan yon batay ki te fèt Ipsi nan Friji. Nan ane 301 anvan epòk nou an, kat nan jeneral Aleksann yo t ap dirije gwo tèritwa Aleksann te deja pran yo. Kasann t ap dirije Masedwàn ak Lagrès. Lizimak te rive pran kontwòl Azi Minè ak Tras. Selekis Iye Nikatò te gen kontwòl Mezopotami ak Siri. E Toleme Lagis te pran Ejip ak Palestin. Jan pwofesi yo montre sa, gwo Anpi Aleksann nan te divize an kat gwo wayòm.
Fouye pou n ka jwenn trezò espirityèl
dp-F 315 § 18
Jewova te pwomèt Dànyèl yon bèl rekonpans
Liv Dànyèl la fini ak youn nan pi bèl pwomès Bondye fè lèzòm. Men sa zanj Jewova a te di Dànyèl: “Ou pral leve kanpe pou w jwenn pòsyon pa w la nan fen jou yo.” Ki sa zanj lan te vle di? Bon, kòm mo “repoze” zanj lan te fèk di l la gen rapò ak lanmò, pwomès pou Dànyèl “leve kanpe” yon lè a te ka sèlman vle di l ap resisite! Dayè, gen kèk biblis ki vle fè konprann se nan Dànyèl chapit 12 yo premye pale aklè de rezirèksyon nan Liv ki te ekri ann ebre yo (Dànyèl 12:2). Nan sans sa a, yo pa gen rezon. Dànyèl te byen konnen espwa rezirèksyon an.
16-22 OKTÒB
TREZÒ KI NAN PAWÒL BONDYE A | OZE 1-7
“Jewova pran plezi nan lanmou fidèl: E ou menm?”
w07-F 15/9 16 § 8
Pwen enteresan ki nan liv Oze a
6:6. Lè yon moun kontinye pratike peche se yon siy ki montre li manke lanmou ki fidèl, e pa gen okenn kantite sakrifis li ka fè ki ka ranplase mank lanmou sa a.
Fouye pou n ka jwenn trezò espirityèl
w07-F 15/9 14 § 7
Pwen enteresan ki nan liv Oze a
1:7 — Ki lè Jewova te fè moun Jida yo mizèrikòd e ki lè l te sove yo? Sa te fèt nan ane 732 anvan epòk nou an sou rèy wa Ezekyas. Lè sa a, Jewova te fè yon sèl zanj touye 185 000 sòlda asiryen nan yon sèl nuit apre pil menas Asiryen yo t ap fè Jerizalèm nan (2 Wa 19:34, 35). Konsa, Jewova pa t sove Jida “ni ak banza, ni ak epe, ni ak lagè, ni ak cheval, ni ak kavalye” men li te fè sa avèk yon zanj.
g05-F 8/9 12 § 2
Lè pral gen tèt ansanm tout kote sou tè a
Anfèt, nou pral vin konn yon nouvo fason pou n viv nan tèt ansanm paske Bondye pral aprann lèzòm fason pou yo byen pran swen tè a, kote li ba yo pou yo abite a. Nan yon sans, l ap menm “fè yon alyans” ak tout bèt nan bwa yo, l ap fè yo viv anpè avèk lèzòm ki pral gen pouvwa sou yo. — Oze 2:18; Jenèz 1:26-28; Ezayi 11:6-8.
23-29 OKTÒB
TREZÒ KI NAN PAWÒL BONDYE A| OZE 8-14
“Bay Jewova sa w genyen ki pi bon an”
w07-F 1/4 19 § 2
Annou bay Bondye sakrifis ki fè l plezi
Anplis de sa, Bib la fè konnen Jewova ka konsidere louwanj nou fè ak bouch nou kòm sakrifis nou ba li. Pwofèt Oze te sèvi ak ekspresyon “louwanj ak bouch [...] tankou [...] sakrifis towo bèf” la pou l montre Bondye konsidere sakrifis nou fè ak bouch nou kòm youn nan pi bèl sakrifis nou ka ba li (Oze 14:2). Men ki ankourajman apot Pòl te bay kretyen ebre yo: “Bay Bondye louwanj kòm sakrifis, sa vle di, annou fè deklarasyon piblik pou non l ak pawòl k ap sot nan bouch nou.” (Ebre 13:15). Jodi a, Temwen Jewova yo vrèman okipe nan travay preche bon nouvèl la ak travay fè disip nan tout nasyon an (Matye 24:14; 28:19, 20). Lajounen kou lannuit, toupatou sou tè a, y ap bay Jewova sakrifis louwanj. — Revelasyon 7:15.
jd-F 87 § 11
Annou suiv prensip wo nivo Jewova yo pou nou ka sèvi l
Oze 14:9 montre nou tou byenfè yon moun jwenn lè l viv yon fason ki dwat. N ap jwenn anpil byenfè ak benediksyon si nou fè sa Bondye mande. Etandone se Bondye ki kreye nou, li konnen nou byen, donk, lè l mande nou fè yon bagay se pou byen nou. Pou n esplike relasyon ki genyen ant nou menm ak Bondye, n ap pran egzanp yon machin ak moun ki fè machin nan. Moun ki fè machin nan byen konnen jan li fè l. Li konnen li enpòtan pou yo chanje luil ladan l regilyèman. Ki sa k t ap rive si nou ta chwazi pase sou enstriksyon sa a, petèt, paske nou wè machin nan ap mache byen? Nou t ap sezi wè machin nan ban nou gwo pàn. Se menm bagay la pou lèzòm. Kreyatè nou an ban nou enstriksyon, e lè nou suiv yo sa ap bon pou nou (Ezayi 48:17, 18). Lè nou rekonèt sa ap bon pou nou, sa ban nou plis rezon toujou pou nou suiv prensip ak kòmandman li yo. — Sòm 112:1.
30 OKTÒB – 5 NOVANM
TREZÒ KI NAN PAWÒL BONDYE A | JOWÈL 1-3
“Pitit gason nou yo ak pitit fi nou yo ap pwofetize”
w02-F 1/8 15 § 4-5
“Bagay estrawòdinè Bondye fè” ankouraje nou
Apre disip ki te Jerizalèm yo te fin resevwa lespri sen, san pèdi tan, yo kòmanse preche bon nouvèl ki kapab sove lavi moun nan. Yo te kòmanse preche foul moun ki te la jou maten sa a. Travay predikasyon yo a te akonpli yon bèl pwofesi Jowèl, pitit gason Petwèl, te bay uit an anvan sa: ‘M ap vide lespri m sou tout kalite moun. Pitit gason nou yo ak pitit fi nou yo ap pwofetize, granmoun nou yo ap fè rèv, e jèn moun nou yo ap fè vizyon. Epi, nan jou sa yo, m ap vide lespri m ata sou esklav mwen yo, gason kou fi. Anvan gran jou Jewova a rive, yon jou ki bay laperèz.’ — Jowèl 1:1; 2:28, 29, 31; Travay 2:17, 18, 20.
Èske sa te vle di Bondye t ap fè yon bann gason ak fi vin pwofèt menm jan l te fè sa nan ka David, Jowèl ak Debora lè l te itilize yo pou yo anonse kèk bagay ki te gen pou rive alavni? Non, se pa sa. Kretyen yo, kit se ‘pitit gason ak pitit fi, kit se esklav gason ak esklav fi’, yo tout t ap pwofetize nan sans lespri sen Jewova t ap pouse yo pale konsènan “bagay estrawòdinè” Jewova fè e l ap kontinye fè. Kidonk, yo t ap sèvi kòm pòtpawòl Moun ki nan pi gwo pozisyon an. Men ki jan foul moun nan te reyaji? — Ebre 1:1, 2.
jd-F 167 § 4
“Men sa pou n anonse nan nasyon yo”
Ann analize bagay yo yon lòt jan. Jewova Dye te pale ak pwofèt Jowèl konsènan yon epòk kote nan yon sans, tout kalite moun t ap pwofetize: Men sa nou li: “Apre sa, m ap vide lespri m sou tout kalite moun. Pitit gason nou yo ak pitit fi nou yo ap pwofetize. Granmoun nou yo ap fè rèv, e jèn moun nou yo ap fè vizyon.” (Jowèl 2:28-32). Nan jou Pannkòt ane 33 epòk nou an, apot Pyè te aplike pawòl sa yo nan ka moun ki te reyini nan yon chanm aletaj nan Jerizalèm nan, lè yo te resevwa lespri sen e tousuit apre sa yote kòmanse pale de “bagay estrawòdinè Bondye fè”. (Travay 1:12-14; 2:1-4, 11, 14-21.) Kounye a, ann fè yon ti pale de epòk pa nou an. Pwofesi Jowèl te jwenn pi gwo akonplisman l byen bonè nan kòmansman 20yèm syèk la. Kretyen Bondye chwazi pou al nan syèl la, te kòmansa “pwofetize”. Gason kou fi, granmoun kou jèn te kòmanse pale de “bagay estrawòdinè Bondye fè” san wete bon nouvèl Wayòm nan, ki deja tabli nan syèl la.
w07-F 1/10 13 § 2
Pwen enteresan ki nan liv Jowèl ak Amòs
2:32 — Ki sa sa vle di pou nou ‘met konfyans nou nan non Jewova’? Met konfyans nou nan non Jewova mande pou n konnen non sa a, pou n gen yon gwo respè pou li, pou n konte sou moun ki gen non sa a epi met konfyans nou nan li. — Women 10:13, 14.
Fouye pou n ka jwennn trezò espirityèl
w07-F 1/10 13 § 5
Pwen enteresan ki nan liv Jowèl ak Amòs
2:12, 13. Se nan kè vrè repantans lan soti. Sa mande pou nou “dechire kè nou” olye nou “chire rad nou”.
w07-F 1/10 13 § 3
Pwen enteresan ki nan liv Jowèl ak Amòs
3:14 — Ki sa “plèn kote jijman an pral fèt la” ye? Se pa yon kote ki egziste vre, se yon fason pou pale de jijman Bondye gen pou l fè. Nan epòk wa Jozafa a, wa Jida a ki gen non l ki vle di “Jewova se jij”, Bondye te delivre Jida anba nasyon ki ozalantou yo lè l te lage lame nasyon sa yo nan konfizyon. Se sa k fè, yo rele kote sa a “Vale Jozafa” tou (Jowèl 3:2, 12). Nan epòk pa nou an, kote sa a reprezante kote Jewova pral pilonnen nasyon yo tankou rezen ki nan près diven. — Revelasyon 19:15.