Nanpwen zam yo fòje kont nou k ap reyisi

“ Nanpwen zam y ap fòje kont ou k ap reyisi. ” — IZAYI 54:17.

1, 2. Kòman sitiyasyon Temwen Jewova yo te viv ann Albani montre pawòl ki nan Izayi 54:17 la se verite ?

SA GEN plizyè dizèn ane, te gen yon ti gwoup kretyen ki gen anpil kouraj ki t ap viv nan yon ti vil ki chaje mòn, ki nan sidès Ewòp. Gen yon gouvènman kominis ate ki te fè tout sa l kapab pou l detwi yo. Men, anyen pa t ka stope yo, kit se move tretman, travo fòse nan kan oubyen kit se pwopagann medya yo fè kont yo. Ki ti gwoup moun sa a ? Se te Temwen Jewova ann Albani yo. Malgre li te ekstrèmman difisil pou yo reyini ansanm e pou yo preche, pèseverans yo te genyen pandan deseni sa yo te egzalte krisyanis lan, sa te onore l e sa te glorifye non Jewova. Ane pase, lè yo t ap inogire nouvo filyal nan peyi sa a, men sa yon Temwen fidèl ki gen lontan nan laverite te di : “ Kèlkeswa efò Satan fè, l ap toujou pèdi e Jewova ap toujou genyen ! ”

² Tout bagay sa yo se prèv vivan ki montre pwomès Bondye fè pèp li a, jan sa rapòte nan Izayi 54:17 la, se verite : “ Nanpwen zam y ap fòje kont ou k ap reyisi, e depi se lang ki va leve kont ou nan jijman an, w ap kondane l. ” Listwa pwouve pa gen anyen monn Satan an ka fè pou l anpeche sèvitè Jewova yo adore Jewova.

Efò Satan yo pa reyisi

3, 4. a) Site kèk nan zam Satan itilize yo. b) Nan ki sans zam Dyab la itilize yo pa reyisi ?

³ Zam Satan itilize kont vrè adoratè Bondye yo gen ladan l entèdiksyon, vyolans foul moun fè sou yo, prizon ak ‘ dekrè gouvènman yo fè pou kreye pwoblèm ’. (Sòm 94:20.) Anfèt, nan kèk peyi, menm nan moman sa a kote Temwen Jewova yo ap etidye atik sa a, vrè kretyen yo ap ‘ jwenn eprèv ’ anrapò ak entegrite yo devan Bondye. — Revelasyon 2:10.

⁴ Pa egzanp, gen yon filyal Temwen Jewova ki rapòte, nan sèlman yon ane, gen 32 ka kote yo atake sèvitè Bondye yo fizikman pandan yo te nan predikasyon. Anplis de sa, gen 59 ka kote polisye te arete Temwen Jewova yo ki t ap preche, timoun kou granmoun, gason kou fi. Gen ladan yo yo pran anprent yo, yo fè foto yo e yo mete yo nan prizon kòm kriminèl. Gen lòt yo maltrete. Nan yon lòt peyi, aktyèlman gen plis pase 1 100 ka kote yo arete Temwen Jewova yo, yo fè yo peye amann e yo bat yo. Plis pase 200 nan ka sa yo te rive yon jou kote Temwen yo te reyini pou yo komemore lanmò Jezi. Sepandan, ni nan peyi sa yo, ni nan lòt peyi ankò, lespri sen Jewova te pèmèt Temwen yo chape malgre sitiyasyon an te rèd pou yo (Zekarya 4:6). Entansite raj ènmi yo pap fèmen bouch moun k ap bay Jewova louwanj yo. Wi, nou gen konfyans nanpwen zam ki ka fè objektif Jewova genyen echwe.

Yo kondane lang k ap bay manti

 5. Nan premye syèk la, ki manti yo te fè sou do kretyen yo ?

⁵ Pwofèt Izayi te pwofetize pèp Bondye a t ap gen pou l kondane nenpòt lang ki ta leve kont li. Nan premye syèk la, souvan, yo te lage vèni sou kretyen yo, moun yo te prezante yo kòm move moun. Pawòl nou jwen nan Travay 16:20, 21 an se yon egzanp ki montre aklè kalite akizasyon yo te lage sou do yo. Men sa vèsè sa yo di : “ Mesye sa yo ap boulvèse vil la anpil, [...] e y ap anonse yon seri koutim lalwa pa pèmèt nou ni aksepte ni pratike, piske nou se Women. ” Nan yon lòt okazyon, opozan relijye yo te eseye soulve kèk chèf vil pou yo fè yon seri aksyon kont disip Kris yo, opozan yo te di : “ Mesye sa yo ki ap boulvèse latè abite, men yo rive pa bò isit tou, [e yo] aji ann opozisyon ak dekrè Seza bay yo. ” ​(Travay 17:6, 7). Yo te met etikèt “ pès ” sou do apot Pòl, e yo te di li se chèf yon sèk k ap simen revòl “ sou tout latè abite ”. — Travay 24:2-5.

6, 7. Site yon fason vrè kretyen yo kondane atak vèbal yo fè kont yo.

⁶ Se sa k fè, sa pa etonan dèske jodi a moun yo lage gwo vèni sou vrè kretyen yo, yo fè medizans sou yo pou avili yo e yo fè pwopagann kont yo. Men, sa k fè nou ka di nou kondane atak vèbal sa yo ? — Izayi 54:17.

⁷ Temwen Jewova yo demanti ni akizasyon yo lage sou do yo ni pwopagann yo fè kont yo grasa bèl konduit yo genyen (1 Pyè 2:12). Lè kretyen yo demontre yo se sitwayen ki obeyi lalwa, yo se moun ki gen moralite, moun ki montre bonjan sousi pou byennèt pwochen yo, li vin parèt klè akizasyon yo fè kont yo se manti. Bèl konduit nou genyen montre aklè nou se moun ki dwat. Lè moun k ap obsève nou yo wè jan nou pèsevere nan fè bèl zèv, byen souvan, sa pouse yo glorifye Papa nou ki nan syèl la e sa pouse yo rekonèt fason sèvitè Jewova yo ap viv la se pi bon fason an. — Izayi 60:14 ; Matye 5:14-16.

 8. a) Dèfwa, ki sa k ka nesesè pou nou fè, yon fason pou nou defann pozisyon nou genyen ki baze sou Bib la ? b) Menm jan ak Kris, kòman nou ka kondane lang opozan yo ?

⁸ Anplis bèl konduit nou genyen, dèfwa li ka nesesè pou nou defann pozisyon nou genyen ki baze sou Bib la avèk kran. Yon fason nou ka fè sa, se lè nou fè apèl ak gouvènman yo oubyen n al nan tribinal pou nou ka jwenn pwoteksyon (Estè 8:3 ; Travay 22:25-29 ; 25:10-12). Lè Jezi te sou tè a, pafwa li te konn pale ouvètman ak moun ki t ap kritike l yo, li te rejte fo akizasyon yo te fè kont li (Matye 12:34-37 ; 15:1-11). Menm jan ak Kris, nou menm tou, nou pwofite okazyon ki prezante devan nou pou nou bay lòt moun yon esplikasyon klè sou bonjan konviksyon nou genyen (1 Pyè 3:15). Annou pa janm kite fawouch nou jwenn nan lekòl, nan travay oubyen nan men fanmi nou ki pa kwayan, anpeche nou fè konnen verite ki gen nan Pawòl Bondye a. — 2 Pyè 3:3, 4.

Jerizalèm : “ yon wòch ki lou ”

 9. “ Wòch ki lou ” yo mansyone nan Zekarya 12:3 a, ki Jerizalèm li senbolize e kiyès ki reprezante l sou tè a ?

⁹ Pwofesi Zekarya a bay rezon ki fè nasyon yo pran pozisyon kont vrè kretyen yo. Remake sa Zekarya 12:3 di : “ Li dwe rive nan jou sa a m ap fè Jerizalèm tounen yon wòch ki lou pou tout pèp. ” De ki Jerizalèm pwofesi sa a ap pale ? Pwofesi Zekarya sou Jerizalèm nan konsène “ Jerizalèm selès ” la, Wayòm selès kretyen wen yo resevwa apèl pou yo ladan l lan (Ebre 12:22). Gen yon ti rès nan kretyen sa yo, ki eritye Wayòm mesyanik lan, ki sou tè a toujou. Yo menm ansanm ak konpayon yo, “ lòt mouton ” yo, ap ankouraje moun pou yo pran pozisyon pou Wayòm Bondye a pandan gen tan toujou (Jan 10:16 ; Revelasyon 11:15). Kòman nasyon yo reyaji devan envitasyon sa a ? Ki jan Jewova soutni vrè adoratè l yo jodi a ? Ann al chèche repons kesyon sa yo pandan n ap kontinye egzamine sans Zekarya chapit 12 la. Lè nou fè sa, n ap ka gen asirans ‘ nanpwen zam k ap reyisi ’ ni kont wen Bondye yo ni kont konpayon devwe yo genyen yo.

10. a) Poukisa yo atake pèp Bondye a ? b) Ki sa k rive moun k ap fè efò pou yo leve “ wòch ki lou ” a nan wout la ?

¹⁰ Zekarya 12:3 di nasyon yo resevwa “ grafonyen grav ”. Ki jan sa fèt ? Bondye bay lòd pou yo preche bon nouvèl Wayòm nan. Temwen Jewova yo pran responsablite yo genyen pou yo preche a trèzoserye. Sepandan, pwoklamasyon bon nouvèl Wayòm nan kòm sèl espwa pou limanite tounen “ yon wòch ki lou ” pou nasyon yo. Nasyon sa yo fè tout sa yo kapab pou yo leve wòch la nan wout la, lè yo eseye bloke moun k ap preche Wayòm nan. Lefètke yo aji konsa, yo resevwa “ grafonyen grav ”, sa vle di, yo blese anpil. Menm repitasyon yo vin sal piske yon jwenn echèk imilyan. Yo pa ka anpeche vrè adoratè Bondye yo pale, yo menm ki apresye privilèj yo genyen an anpil, privilèj pou yo pwoklame “ bon nouvèl etènèl ” la, Wayòm mesyanik Bondye a, anvan lafen sistèm sa a (Revelasyon 14:6). Lè yon gad prizon te wè vyolans yo t ap fè sou sèvitè Jewova yo nan yon peyi ann Afrik, pandan l ap pale ak opozan yo li di yo : ‘ Se anven n ap fè efò pou nou pèsekite moun sa yo. Yo pap janm fè konpwomi. Se ogmante y ap ogmante pito. ’

11. Ki jan Bondye kenbe pwomès li te fè nan Zekarya 12:4 la ?

¹¹ Li Zekarya 12:4. Moun k ap konbat kont moun k ap preche mesaj Wayòm nan avèk kouraj, Jewova fè pwomès l ap fè yo vin avèg, e l ap lage yo nan “ konfizyon ” nan yon sans senbolik. Li kenbe pawòl li. Pa egzanp, nan yon peyi kote vrè adoratè Bondye yo te anba entèdiksyon, opozan yo pa t anmezi pou yo anpeche pèp Bondye a resevwa nouriti espirityèl. Gen yon jounal ki te menm deklare Temwen Jewova yo sèvi ak balon pou yo fè piblikasyon biblik rantre nan peyi a. Pwomès Bondye te fè sèvitè fidèl li yo se verite : “ M ap ouvri je m, e m ap fè tout cheval pèp yo vin avèg. ” Lènmi Wayòm nan pa konn ki direksyon pou yo pran paske kòlè fè yo vin avèg. Sepandan, nou gen asirans Jewova ap pwoteje pèp li a antanke gwoup e l ap sousye l de byennèt yo. — 2 Wa 6:15-19.

12. a) Nan ki sans Jezi te mete yon dife lè li te sou tè a ? b) Kòman rès wen an limen dife nan yon sans espirityèl, e ki rezilta sa bay ?

¹² Li Zekarya 12:5, 6. “ Chek Jida yo ” reprezante moun ki okipe yon fonksyon siveyan nan mitan pèp Bondye a. Jewova ranpli moun sa yo ak yon kokenn zèl pou yo defann enterè Wayòm nan ki sou tè a. Yon fwa, Jezi te di disip li yo : “ Mwen vin mete yon dife sou tè a. ” ​(Lik 12:49). Efektivman, Jezi te mete yon dife vre. Grasa zèl li te genyen pou l preche, li te fè Wayòm Bondye a vin sijè ki pi enpòtan pou moun yo. Sijè sa a te leve yon kokenn diskisyon nan mitan nasyon juif la (Matye 4:17, 25 ; 10:5-7, 17-20). “ Tankou yon bòl dife nan mitan pyebwa e tankou yon tòch dife nan yon ranje pye sereyal ki fèk koupe ”, jodi a tou, disip Kris yo k ap suiv tras li limen gwo dife nan yon sans espirityèl. Liv Le mystère de Dieu accompli aa, yon liv ki te parèt an 1917, revele ipokrizi ki gen nan lakretyente e li te fè sa yon fason kategorik. Sa te soulve kòlè manm klèje a. Tou dènyèman la a, Nouvèl Wayòm n^o 37 la, ki gen tit “ Lafen fo relijyon an toupre ! ”, te pouse anpil moun pran pozisyon swa pou Wayòm Bondye a swa kont li.

“ Jewova sove tant Jida yo ”

13. Ki sa ekspresyon “ tant Jida yo ” endike, e poukisa Jewova ap sove moun ki afekte yo ?

¹³ Li Zekarya 12:7, 8. Nan Izrayèl tan lontan an, tant te yon karakteristik peyi a, dèfwa bèje yo ak kiltivatè yo te konn itilize yo. Si lènmi nasyon an ta vin atake vil Jerizalèm, se moun sa yo ki t ap afekte an premye e se yo dabò ki t ap bezwen pwoteksyon. Ekspresyon “ tant Jida yo ” endike nan epòk nou an rès wen an deyò nan yon zòn ki san miray, sa vle di, yo pa nan vil fòtifye. Kote yo ye a y ap defann enterè Wayòm nan avèk kran. Jewova, Chèf lame yo, ap sove “ tant Jida yo dabò ” paske se yo ki prensipal sib Satan.

14. Kòman Jewova defann moun ki nan “ tant Jida yo ” e li fè yo pa kilbite ?

¹⁴ Vrèman, resi istorik la pwouve Jewova ap defann anbasadè wen Wayòm nan nan “ tant ” kote yo ye a, tant ki deyò nan yon zòn ki san miray.b Li fè yo pa “ kilbite ”, sa vle di, li fòtifye yo e li fè yo gen kouraj menm jan ak David, wa konbatan an.

15. Poukisa Jewova ap “ chèche aneyanti tout nasyon ”, e ki lè l ap fè sa ?

¹⁵ Li Zekarya 12:9. Poukisa Jewova ap “ chèche aneyanti tout nasyon ” ? Paske yo kontinye opoze ak Wayòm mesyanik lan. Piske nasyon yo irite kont pèp Bondye a e yo pèsekite yo, yo vin nan yon pozisyon kote yo kondane yo. Talè konsa, ajan Satan gen sou tè a pral lanse yon dènye atak kont vrè adoratè Bondye yo, atak ki pral mennen nan evènman Bib la rele Amagedòn nan (Revelasyon 16:13-16). Etandone se Jij Siprèm nan ki riposte devan atak sa a, li pral defann sèvitè l yo e l ap sangtifye non l pami nasyon yo. — Ezekyèl 38:14-18, 22, 23.

16, 17. a) Ki sa “ byen sèvitè Jewova yo eritye ” a ye ? b) Lè nou andire devan atak Satan yo, ki sa sa pwouve ?

¹⁶ Nanpwen zam Satan itilize ki ka febli lafwa pèp Bondye a ki nan lemonnantye, ni ki ka kase zèl yo. “ Byen sèvitè Jewova yo eritye ” a se lapè yo genyen nan domèn espirityèl e lapè sa a yo jwenn li lefètke yo konnen Jewova ap soutni yo grasa pisans li genyen pou l sove yo (Izayi 54:17). Pa gen okenn moun ki ka anpeche nou jwi lapè sa a ak pwosperite espirityèl sa a pa lafòs (Sòm 118:6). Satan ap kontinye leve dife opozisyon e l ap fè tout sa l kapab pou l pwovoke tribilasyon. Lè nou andire fidèlman malgre kritik, sa pwouve lespri sen Bondye poze sou nou (1 Pyè 4:14). Nan lemonnantye, yo preche bon nouvèl konsènan Wayòm Bondye a ki deja etabli. Menm jan ak boulèt kanon ki lage moun nan konfizyon, gen anpil “ wòch ” senbolik yo lanse kont pèp Bondye a. Sepandan, grasa fòs Jewova bay sèvitè l yo, yo rive venk wòch sa yo, yo anile efè yo (Zekarya 9:15). Pèsòn pa ka anpeche ni rès wen an ni konpayon l yo aji.

¹⁷ N ap tann avèk enpasyans pou nou delivre totalman anba atak Satan yo. Vrèmanvre, ‘ nanpwen zam y ap fòje kont nou k ap reyisi, e depi se lang ki va leve kont nou nan jijman an, n ap kondane l ’. Ala ankourajan garanti nou jwenn nan pwomès sa a ankourajan !

[Nòt anba paj]

Ki repons nou t ap bay ?

• Ki sa k montre zam Satan itilize yo pa reyisi ?

• Nan ki sans Jerizalèm selès la tounen “ yon wòch ki lou ” ?

• Nan ki sans Jewova sove “ tant Jida yo ” ?

• Toutpandan Amagedòn ap pwoche, ki asirans nou genyen ?

[Foto nan paj 23]

Ann Albani, sèvitè Jewova yo rete fidèl malgre atak Satan.

[Foto nan paj 25]

Jezi te rejte fo akizasyon yo te fè kont li.

[Foto nan paj 26]

Nanpwen zam yo fòje kont moun k ap pwoklame bon nouvèl la k ap reyisi.