“ Men sa ki ekri ”

1-3. Ki konklizyon esansyèl Jezi vle moun Nazarèt yo tire, e ki prèv li bay ?

NOU nan kòmansman ministè Jezi. Kris retounen Nazarèt, vil kote l te leve a. Objektif li se pou l ede moun yo tire yon konklizyon ki esansyèl : Se li menm ki Mesi yo te predi depi lontan an ! Ki prèv li bay ?

² Sandout, anpil moun t ap atann li fè yon mirak. Yo tande pale de travay enpresyonan Jezi akonpli. Sepandan, li pa ba yo siy konsa. Olye de sa, li ale nan sinagòg la jan l abitye fè. Li kanpe pou l li, e yo lonje woulo Izayi a ba li. Se yon woulo ki long, e sandout, li woule sou de moso bwa. Avèk swen, Jezi woule l sot nan yon bò al nan lòt bò a, jiskaske li jwenn pasaj l ap chèche a. Apre sa, awotvwa, li li pòsyon nou jwenn jodi a nan Izayi 61:1-3. — Lik 4:16-19.

³ Se sèten oditwa a konn pasaj sa a. Se yon pwofesi ki gen rapò avèk Mesi a. Je tout moun ki nan sinagòg la fikse sou Jezi. Gen yon sèl silans ki fèt. Apre sa, Jezi kòmanse bay esplikasyon, petèt an detay. Men sa l di : “ Jodi a, ekriti sa a nou sot tande a akonpli. ” Moun ki t ap tande yo sezi devan bèl pawòl li yo, men aparamman, anpil ladan yo toujou vle wè yon siy estrawòdinè. Olye de sa, avèk kran, Jezi sèvi avèk yon egzanp biblik pou l devwale mank lafwa yo. Tousuit apre, pèp Nazarèt la eseye touye l ! — Lik 4:20-30.

 4. Ki modèl Jezi te tabli nan ministè l, e ki sa nou pral egzamine nan chapit sa a ?

⁴ La a, Jezi te tabli yon modèl li te kenbe pandan tout ministè l. Li te apiye anpil sou Pawòl enspire Bondye a. Se vre, mirak li yo te jwe yon wòl enpòtan pou demontre lespri Bondye te sou li. Sepandan, nanpwen anyen ki te gen plis enpòtans pou Jezi pase Ekriti sakre yo. Annou egzamine egzanp li kite anrapò avèk pwen sa a. Nou pral analize ki jan Mèt nou an te konn site Pawòl Bondye a, ki jan li te konn defann Pawòl Bondye a, e ki jan li te konn esplike Pawòl Bondye a.

 5. Ki sa Jezi te detèmine pou l fè moun k ap koute l yo konnen, e ki jan li te demontre pawòl li te di yo se verite ?

⁵ Jezi te vle moun yo konnen ki sous mesaj li a. Li te di : “ Sa m ap anseye a pa soti nan mwen, men li soti nan moun ki voye m nan. ” ​(Jan 7:16). Nan yon lòt okazyon, li te di : “ Mwen pa fè anyen selon inisyativ pa m, men se jan Papa a anseye m mwen di bagay sa yo. ” ​(Jan 8:28). Pi lwen, li di : “ Bagay m ap di nou yo, mwen pa di yo selon mwen menm, men se Papa a ki rete ann inyon avè m k ap fè travay li. ” ​(Jan 14:10). Yon fason Jezi te pwouve pawòl li di la yo se verite, se site li te toujou site Pawòl Bondye fè ekri a.

6, 7. a) Jis nan ki pwen Jezi te konn site Ekriti ebrayik yo, e poukisa se yon bagay ki enpresyonan ? b) Nan ki sans ansèyman Jezi a pa t menm avèk ansèyman eskrib yo ?

⁶ Lè nou byen etidye pawòl Jezi ki rapòte nan Bib la, nou vin jwenn li site dirèkteman, oubyen li fè referans endirèkteman ak plis pase mwatye nan liv ki fòme kanon Ekriti ebrayik la. Kòm premye reyaksyon, ou gendwa panse sa pa enpresyonan. Ou gendwa ap mande tèt ou poukisa, nan twazan edmi Jezi fè ap preche ap anseye an piblik, li pa t fè sitasyon ki soti nan tout liv enspire ki te disponib yo. Alaverite, li gendwa byen te fè sa. Pa bliye, se sèlman yon ti kantite nan pawòl ak nan aksyon Jezi yo ki rapòte nan Bib la (Jan 21:25). Anfèt, li pwobab ou ta kapab li awotvwa tout pawòl Jezi yo ki rapòte nan Bib la nan kèk èdtan sèlman. Kounye a, imajine ou menm k ap pale konsènan Bondye ak Wayòm Bondye a pou apèn kèk èdtan, e w ap eseye site referans nan plis pase mwatye nan liv ki nan Ekriti ebrayik yo ! Anplis de sa, nan pifò ka yo, Jezi pa t gen woulo ki gen Ekriti ebrayik yo toupre l. Lè li t ap bay Sèmon sou montay la, yon sèmon ki selèb, li te fè referans yon pakèt fwa ak Ekriti ebrayik yo, swa yon fason dirèk, swa yon fason endirèk, e se de tèt li te site yo tout !

⁷ Sitasyon Jezi yo montre pwofon respè li genyen pou Pawòl Bondye a. Moun ki t ap koute l yo “ te rete bouch ouvè devan fason li te anseye, paske li te anseye yo antanke moun ki gen otorite, se pa t menm jan ak eskrib yo ”. (Mak 1:22.) Lè eskrib yo t ap anseye, yo te renmen fè referans ak swadizan lwa oral, kote yo te konn site raben nan tan lontan yo. Pa menm yon fwa, Jezi pa t site lwa oral oswa kèk raben kòm otorite. Okontrè, li te konsidere Pawòl Bondye a kòm pi gwo otorite ki genyen. Byen souvan, li te konn di : “ Men sa ki ekri. ” Se pa ni de ni twa fwa li te sèvi ak pawòl sa yo oswa ak pawòl ki sanble avèk yo lè l ap anseye disip li yo e lè l ap korije move lide.

8, 9. a) Ki jan Jezi te soutni otorite Pawòl Bondye a lè l t ap pwòpte tanp lan ? b) Nan ki sans chèf relijye yo nan tanp lan te demontre yon gwo mank respè pou Pawòl Bondye a ?

⁸ Lè Jezi t ap pwòpte tanp lan nan Jerizalèm, li te di : “ Men sa ki ekri : ‘ Y ap rele mezon m nan yon mezon priyè, ’ men nou menm, nou fè l tounen yon gwòt vòlè. ” ​(Matye 21:12, 13 ; Izayi 56:7 ; Jeremi 7:11). Nan lavèy, li te fè anpil travay enpresyonan nan zòn sa a. Gen yon seri jèn tigason ki enpresyone anpil, ki kòmanse fè louwanj pou li. Sepandan, chèf relijye yo vekse e yo mande Jezi si l te tande sa timoun sa yo t ap di. Li reponn yo : “ Wi. Nou pa t janm li sa : ‘ Se nan bouch tibebe ak nan bouch timoun ki nan tete ou fè louwanj soti ’ ? ” ​(Matye 21:16 ; Sòm 8:2). Jezi te vle pou mesye sa yo konnen Pawòl Bondye a otorize sa k te rive a.

⁹ Annapre, chèf relijye sa yo reyini ansanm e yo vin fè fas ak Jezi, yo mande l : “ Pa mwayen ki pouvwa ou fè bagay sa yo ? ” ​(Matye 21:23). Jezi te deja klarifye byen klarifye Sous pouvwa l la. Li pa t vin ak lide ki tounèf, kòmkwa pou l ta envante nouvo doktrin. Li te senpleman ap aplike sa Pawòl enspire Papa l la te di. Kidonk, an reyalite, prèt sa yo ak eskrib sa yo pa t demontre okenn respè ni pou Jewova ni pou Pawòl li a. Yo te vrèman merite kondanasyon Jezi a pandan li t ap devwale mechanste entansyon yo. — Matye 21:23-46.

10. Ki jan nou ka imite Jezi nan fason nou itilize Pawòl Bondye a, e ki zouti nou genyen ki pa t disponib pou Jezi ?

¹⁰ Menm jan ak Jezi, vrè kretyen yo jodi a apiye sou Pawòl Bondye a nan ministè a. Nan lemonnantye, yo rekonèt Temwen Jewova yo kòm moun ki chofe pou yo pataje mesaj ki sot nan Bib la ak lòt moun. Piblikasyon nou yo site e yo mansyone Bib la anpil anpil. E nan ministè nou, nou fè menm jan an, nou fè efò pou nou atire atansyon moun yo sou Labib chak fwa nou pale avèk yo (2 Timote 3:16). Ala sa fè nou plezi lè yon moun kite nou li nan Bib la pou li e lè n ap pale sou enpòtans ak siyifikasyon Pawòl Bondye a ! Nou pa gen memwa pafè Jezi te genyen an, men se sèten nou gen anpil zouti a dispozisyon nou ki pa t disponib pou Jezi. Nonsèlman nou gen Bib la ann antye ki enprime nan yon kantite lang k ap ogmante pi plis chak jou, men tou, nou gen anpil piblikasyon ki prepare pou ede nou jwenn nenpòt vèsè biblik nou ta ka ap chèche. Annou pran rezolisyon pou nou kontinye site Bib la e pou nou dirije moun yo ladan l chak fwa nou jwenn opòtinite !

11. Poukisa, byen souvan, Jezi te oblije defann Pawòl Bondye a ?

¹¹ Jezi te konstate yo te konn atake Pawòl Bondye a souvan, men se sèten sa pa t etone l. Jezi te di Papa l nan yon priyè : “ Pawòl ou se verite. ” ​(Jan 17:17). E Jezi te byen konn sa : Satan, “ chèf monn nan ”, “ se yon mantè e li se papa manti ”. (Jan 8:44 ; 14:30.) Pandan Jezi t ap rejte tantasyon Satan yo, li te site Ekriti yo twa fwa. Satan te site yon vèsè nan Sòm yo, e li te fè espre li mal aplike l, e kòm reyaksyon, Jezi te defann Pawòl Bondye a kont move aplikasyon sa a. — Matye 4:6, 7.

12-14. a) Ki jan chèf relijye yo te demontre yo pa t respekte Lwa Moyiz la ? b) Ki jan Jezi te defann Pawòl Bondye a ?

¹² Byen souvan, Jezi te konn defann Ekriti sakre yo kont move aplikasyon e kont move entèpretasyon. Anseyan relijye nan epòk li a te konn tòde Pawòl Bondye a. Yo te konn ensiste anpil sou kesyon obsève kèk pati nan Lwa Moyiz la nan mwenn ti detay, men yo te prèske pa t konn ensiste pou yo aplike prensip ki te baz lwa sa yo. Konsa, yo te konn ankouraje yon adorasyon pou lafòm, ki te plis sousye l de aparans olye l sousye l de egzijans ki pi enpòtan yo tankou jistis, mizèrikòd ak fidelite (Matye 23:23). Ki jan Jezi te defann Lwa Bondye a ?

¹³ Nan Sèmon Jezi te bay sou montay la, plizyè fwa, li te sèvi avèk fraz sa a : “ Nou tande yo te di ”, pou l kapab entwodui yon kòmandman ki nan Lwa Moyiz la. Li te kontinye avèk fraz sa a : “ Men mwen menm, mwen di nou ”, e lè sa a, li te konn esplike yon prensip ki te ale pi lwen pase obsève Lalwa pou lafòm. Èske se konbat li t ap konbat Lalwa ? Non, se defann li t ap defann li pito. Pa egzanp, moun yo te byen konnen lwa sa a ki di : “ Ou pa dwe asasinen. ” Men, Jezi te di yo si yon moun rayi yon lòt, li vyole espri lwa sa a. Menm jan an tou, yon moun ki nouri pasyon pou yon moun ki pa konjwen l, se vyole l vyole prensip ki dèyè lwa Bondye bay sou kesyon fè adiltè a. — Matye 5:17, 18, 21, 22, 27-39.

¹⁴ Finalman, Jezi te di : “ Nou tande yo te di : ‘ Nou dwe renmen pwochen nou e nou dwe rayi ènmi nou. ’ Sepandan, mwen di nou : Kontinye renmen ènmi nou yo e priye pou moun k ap pèsekite nou yo. ” ​(Matye 5:43, 44). Èske kòmandman ki mande pou nou “ rayi ènmi nou ” an soti nan Pawòl Bondye a ? Non, kòmandman sa a se chèf relijye yo ki te vini avèk li e ki te konn anseye l. Yo te konn sèvi avèk panse lèzòm pou yo febli fòs Lwa pafè Bondye a. San Jezi pa pè, li te konn defann Pawòl Bondye a kont move enfliyans tradisyon lèzòm yo. — Mak 7:9-13.

15. Ki jan Jezi te defann Lalwa Bondye a kont tantativ yo t ap fè pou yo fè l parèt twò strik oswa menm pou yo fè l parèt di ?

¹⁵ Yon lòt bò, chèf relijye yo te konn atake Lalwa Bondye a lè yo fè l parèt twò strik oswa menm lè yo fè l parèt di. Te gen yon lè, disip Jezi yo te keyi kèk grenn etan yo t ap pase nan yon jaden. Kèk Farizyen te pretann yo vyole saba a. Jezi te sèvi ak yon egzanp biblik pou l defann Pawòl Bondye a kont pwennvi sa a ki pa t ekilibre. Li te site sèl referans nan Ekriti yo ki trete kesyon itilizasyon pen prezantasyon tanp lan andeyò sangtyè a : lè David ak mesye l yo, ki te grangou, te manje l. Jezi te montre Farizyen sa yo pa t konprann objektif mizèrikòd ak konpasyon Jewova. — Mak 2:23-27.

16. Ki jan chèf relijye yo te kòwonp kòmandman Moyiz te bay anrapò avèk divòs la, e ki jan Jezi te reyaji ?

¹⁶ Chèf relijye yo t ap chèche pretèks legal tou pou yo febli fòs Lalwa Bondye a. Pa egzanp, Lalwa te pèmèt yon gason divòse avèk madanm li, si l te jwenn “ yon bagay ki endesan ” lakay madanm nan. Se ta dwe yon pwoblèm grav ki ta ka rale lawont sou tout kay la (Detewonòm 24:1). Sepandan, nan epòk Jezi a, chèf relijye yo te konn sèvi avèk konsesyon sa a kòm yon eskiz pou yo fè konnen yon gason gen dwa divòse avèk madanm li pou nenpòt ki rezon, menm nan ka kote soupe mari a ta boulea ! Jezi te montre yo se tòde yo te tòde pawòl Bondye te enspire Moyiz pou l ekri yo. Apre sa, li te retabli prensip Jewova te bay okòmansman anrapò ak maryaj la, prensip monogami an, sa vle di yon sèl madanm yon sèl mari, e li te fè konnen imoralite seksyèl se sèl motif ki valab pou moun divòse. — Matye 19:3-12.

17. Ki jan jodi a, kretyen yo kapab imite Jezi nan kesyon defann Pawòl Bondye a ?

¹⁷ Moun k ap suiv Jezi yo jodi a santi yo menm jan an tou, yo santi yo oblije defann Ekriti sakre yo k ap sibi atak. Lè chèf relijye yo fè konprann prensip moral ki nan Pawòl Bondye a pa alamòd ankò, se atake yo atake Bib la ! Epitou, lè relijyon yo ap anseye manti, epi y ap prezante manti sa yo kòm ansèyman biblik, se yon atak sa ye kont Bib la. Nou konsidere se yon privilèj pou nou vin defann Pawòl laverite Bondye a ki san tach, pa egzanp, lè nou montre Bondye pa fè pati yon Trinite (Detewonòm 4:39). Anmenmtan, nou prezante defans sa yo avèk tak, avèk bonjan dousè e avèk yon pwofon respè. — 1 Pyè 3:15.

18, 19. Ki egzanp ki montre Jezi te gen yon kapasite estrawòdinè pou l esplike Pawòl Bondye a ?

¹⁸ Jezi te vivan nan syèl la lè yo te ekri Ekriti ebrayik yo. Ala kontan l dwe te kontan opòtinite l te genyen pou l te vini sou tè a e pou l patisipe nan esplike moun yo Pawòl Bondye a ! Reflechi pa egzanp sou jou sa a moun pa ka bliye a, apre l fin resisite, lè l te rankontre de nan disip li yo sou wout Emayis. Anvan yo te rekonèt kiyès li ye, yo te di l ki jan yo te tris, ki jan yo te nan konfizyon poutèt Mèt byenneme yo a te mouri. Ki jan Jezi te reyaji ? “ Kòmanse sou Moyiz ak tout Pwofèt yo, li te entèprete pou yo bagay ki konsène l nan tout Ekriti yo. ” Ki enpak sa te gen sou yo ? Annapre, youn di lòt : “ Èske kè nou pa t chofe pandan li t ap pale avèk nou sou wout la, lè li t ap ouvri Ekriti yo ban nou nèt ? ” — Lik 24:15-32.

¹⁹ Pita nan menm jou sa a, Jezi te reyini avèk apot li yo ak lòt moun ankò. Note sa l te fè pou yo : “ Li ouvri lespri yo nèt pou yo kapte sans Ekriti yo. ” ​(Lik 24:45). Se sèten, okazyon kè kontan sa a te raple yo pakèt pakèt fwa Jezi te fè yon bagay menm jan an pou yo, e pou nenpòt moun ki t ap koute. Byen souvan, li te konn site pasaj moun deja byen konnen e l te konn esplike yo yon fason ki te vin fè gwo efè nan lespri moun ki t ap koute l yo : nonsèlman yo te vin gen yon nouvo konpreyansyon sou Pawòl Bondye a, men tou, konpreyansyon sa a te vin pi pwofon.

20, 21. Ki jan Jezi te esplike pawòl Jewova te di Moyiz nan ti touf raje ki t ap boule a ?

²⁰ Pa egzanp, nan yon okazyon, Jezi t ap pale avèk yon gwoup Sadiseyen. Sadiseyen yo se te yon sèk nan relijyon juif la ki te asosye ak klas prèt juif yo e ki pa t kwè nan rezirèksyon. Jezi te di yo : “ Anrapò ak rezirèksyon mò yo, èske nou pa t li sa Bondye te di nou, lè l te di : ‘ Mwen se Bondye Abraram ak Bondye Izarak ak Bondye Jakòb ’ ? Li se Bondye, non pa mò yo, men vivan yo. ” ​(Matye 22:31, 32). La a, li te site yon vèsè yo te byen konnen, e moun ki te ekri l la, Moyiz, se te yon moun Sadiseyen yo te admire. Èske nou wè ki jan esplikasyon Jezi a te pisan ?

²¹ Moyiz te gen konvèsasyon sa a avèk Jewova nan ti touf raje ki t ap boule a, apeprè nan ane 1514 anvan epòk nou an (Egzòd 3:2, 6). Nan moman sa a, Abraram te gentan mouri depi 329 an, Izarak depi 224 an, e Jakòb depi 197 an. Epoutan, Jewova te kanmenm di : “ Mwen se ” Bondye yo. Sadiseyen sa yo te konnen Jewova pa tankou yon fo dye pou mò yo, yon fo dye k ap dirije yon monn ki pa reyèl. Non, li se Bondye “ moun ki vivan ” jan Jezi te di sa. Ki sa sa dwe te vle di ? Konklizyon Jezi a te vrèman pisan : “ Pou li menm, yo tout vivan. ” ​(Lik 20:38). Sèvitè byenneme Jewova ki mouri yo, yo prezève an tout sekirite nan memwa Bondye, yon memwa ki san limit e ki san fay. Objektif Jewova genyen pou l resisite moun sa yo tèlman sèten, li pale de yo kòm moun ki vivan (Women 4:16, 17). Èske se pa yon esplikasyon ki trè bèl sou Pawòl Bondye a ? Se pa etonan pou foul moun “ yo te sezi ” ! — Matye 22:33.

22, 23. a) Ki jan nou ka imite Jezi lè n ap esplike Pawòl Bondye a ? b) Ki sa nou pral egzamine nan chapit ki vin apre a ?

²² Kretyen yo jodi a gen privilèj pou yo imite fason Jezi te konn esplike Pawòl Bondye a. Se vre, nou pa gen yon espri ki pafè. Sepandan, byen souvan, nou gen posiblite pataje yon vèsè biblik ak lòt moun, vèsè yo deja konnen, e nou gen posiblite esplike yo kèk aspè ladan l yo gendwa pa t janm reflechi sou yo. Pa egzanp, pandan tout vi yo, yo gendwa abitye repete : se pou ‘ non w sangtifye ’ e se pou ‘ wayòm ou vini ’, san yo pa janm aprann ki jan Bondye rele oswa ki sa Wayòm li an ye (Matye 6:9, 10, Ford Porter). Ala yon bèl opòtinite nou genyen lè yon moun pèmèt nou ba l kèk esplikasyon sou verite biblik konsa yon fason klè, yon fason senp !

²³ Prensipal fason pou nou imite jan Jezi te konn pataje laverite, se lè nou site Pawòl Bondye a, lè nou defann li e lè nou esplike l. Annou egzamine, nan chapit ki vin apre a, kèk nan metòd efikas Jezi te itilize pou l touche kè moun ki t ap koute l yo avèk verite ki nan Bib la.