“Ale, epi fè disip”

1-2. a) Selon lòd Jezi te bay nou jwenn nan Matye 28:18-20, ki prensipal misyon kongregasyon kretyen an genyen? b) Ki kesyon nou pral egzamine nan atik sa a?

APOT yo dwe te kontan anpil lè yo te rasanble sou mòn nan. Apre Jezi fin resisite, li te mande yo pou y al rankontre l nan zòn sa a (Mat. 28:16). Petèt se nan okazyon sa a “li te parèt devan plis pase 500 frè anmenmtan”. (1 Kor. 15:6.) Poukisa Jezi te envite disip li yo nan reyinyon sa a? Pou l te ba yo yon misyon ki estrawòdinè. Li te di yo: “Ale, epi fè disip pami moun tout nasyon.” — Li Matye 28:18-20.

² Disip ki te tande pawòl Jezi te di yo te vin fè pati kongregasyon premye syèk la. Prensipal misyon kongregasyon sa a se te fè plis disip pou Krisb. Jodi a, gen plizyè milye kongregasyon sou tè a ki gen vrè kretyen yo ladan yo, e prensipal misyon kongregasyon sa yo se toujou menm bagay la. Nan atik sa a, nou pral egzamine kat kesyon: Sa k fè travay fè disip la enpòtan konsa? Ki sa travay sa a gen ladan l? Èske tout kretyen yo patisipe nan travay fè disip la? E poukisa nou bezwen gen pasyans pou nou fè travay sa a?

 3. Selon Jan 14:6 ak Jan 17:3, sa k fè travay fè disip la enpòtan konsa?

³ Sa k fè travay fè disip la enpòtan konsa? Paske se sèl disip Kris yo ki kapab vin zanmi Bondye. Mete sou sa, moun ki suiv Kris yo mennen yon pi bon vi depi kounye a e yo gen espwa viv nètale. (Li Jan 14:6; 17:3.) Se sèten, Jezi konfye nou yon responsablite ki enpòtan, men se pa poukont nou n ap fè travay sa a. Men sa apot Pòl te ekri konsènan li menm ak kèk moun ki te travay bò kote l: “Nou se konpayon travay Bondye.” (1 Kor. 3:9). Ala yon gwo privilèj Jewova ak Kris bay moun ki enpafè!

 4. Ki sa nou ka aprann nan eksperyans Ivan ak Matilde te fè a?

⁴ Travay fè disip la ka fè nou gen anpil kè kontan. Ann pran egzanp Ivan ak madanm li, Matilde, k ap viv nan peyi Kolonbi. Yo te preche yon jèn gason ki rele Davier ki te di yo: “Mwen ta renmen chanje lavi m, men m pa kapab.” Davier se te yon boksè, li te konn pran dwòg, li te konn bwè anpil e li t ap viv ak yon fi ki rele Erika. Men sa Ivan esplike: “Nou te kòmanse etidye Labib avè l. Li t ap viv nan yon ti bouk ki izole, sa ki fè nou te konn pase plizyè èdtan ap kouri bisiklèt nan wout ki gen labou. Lè Erika te remake jan Davier te fè chanjman nan konpòtman l ak nan fason l panse, li te vin asiste etid la tou.” Rive yon lè, Davier te sispann pran dwòg, li te sispann bwè e li te kite zafè bòks la. Epitou, li te marye ak Erika. Men sa Matilde fè konnen: “Lè Davier ak Erika te batize nan ane 2016, nou sonje Davier te konn di: ‘Mwen ta renmen chanje lavi m, men m pa kapab.’ Nou te tèlman kontan, dlo te sot nan je nou.” Pa gen dout nan sa, nou santi nou kontan anpil lè nou ede lòt moun vin disip Kris.

 5. Ki premye bagay nou fè lè n ap fè disip?

⁵ Premye bagay nou fè lè n ap fè disip se “chèche” moun ki vle aprann konnen Jewova (Mat. 10:11). Nou montre nou se Temwen Jewova toutbonvre lè nou bay tout moun nou rankontre temwayaj. Nou montre nou se vrè kretyen lè nou suiv kòmandman Kris te bay pou nou preche a.

 6. Ki sa k ka ede n jwenn bon rezilta nan travay predikasyon an?

⁶ Gen moun ki swaf aprann verite ki nan Bib la, men anpil moun nou rankontre ka parèt pa enterese okòmansman. Nou ka pale avè yo yon fason k ap fè yo vin enterese. Pou nou ka jwenn bon rezilta nan travay predikasyon an, nou bezwen byen prepare. Chwazi sijè k ap enterese moun yo. Apre sa, reflechi sou fason pou w kòmanse yon konvèsasyon.

 7. Ki sa w ka di pou w kòmanse yon konvèsasyon ak yon moun, e poukisa w panse li enpòtan pou w koute moun nan e pou w respekte sa l di?

⁷ Pa egzanp, ou ka di moun ou rankontre a: “Gen yon kesyon n ap poze e nou ta renmen konnen sa w panse sou sa. Anpil pwoblèm nou jwenn jodi a se pwoblèm moun toupatou sou tè a genyen. Èske w panse dwe gen yon sèl gouvènman k ap dirije tout tè a pou rezoud pwoblèm ki gen nan monn nan?” Apre sa, pale sou Dànyèl 2:44. Oswa w ka mande moun nan: “Ki sa yon paran ka fè pou l byen leve pitit li? Sa w panse?” Apre sa, pale sou Detewonòm 6:6, 7. Kèlkeswa sijè w chwazi a, panse ak moun ki pral tande w la. Imajine jan sa ap ede l lè l vin aprann sa Bib la anseye toutbonvre. Lè w ap pale ak moun yo, li enpòtan pou w koute yo e pou w respekte sa yo di. Konsa, w ap pi byen konprann yo, e petèt y ap pi dispoze koute w.

 8. Poukisa nou bezwen retounen vizite moun yo plizyè fwa?

⁸ Anvan yon moun deside etidye Labib, nou ka bezwen retounen vizite l plizyè fwa, sa mande tan ak efò. Sa k fè sa? Paske moun yo ka pa disponib lè nou retounen vizite yo. Epitou, nou ka bezwen retounen plizyè fwa anvan moun nan santi l alèz avè n pou l aksepte yon etid biblik. Pa bliye, yon ti plant ap grandi pi fasil si nou wouze l regilyèman. Menm jan an tou, lanmou yon moun ki enterese gen pou Jewova ak Kris ap grandi pi fasil lè nou pale sou Pawòl Bondye a avè l regilyèman.

9-10. Poukisa nou ka di se tout kretyen yo ki patisipe nan chèche moun ki sensè?

⁹ Tout kretyen yo patisipe nan chèche moun ki sensè. Nou ka konpare travay sa a ak lè y ap chèche yon timoun ki pèdi. Nan ki sans? Ann pran egzanp yon tigason twazan ki te pèdi. Te gen anviwon 500 moun ki t ap chèche l. Finalman, anviwon 20 èdtan apre, gen youn nan moun yo ki jwenn li nan yon jaden mayi. Moun sa a pa t vle yo di se li ki jwenn timoun nan. Li te di: “Se plizyè santèn moun ki te met tèt yo ansanm pou yo chèche l.”

¹⁰ Anpil moun sanble ak timoun sa a. Yo santi yo pèdi, yo pa gen okenn espwa, men yo bezwen moun ede yo (Efe. 2:12). Plis pase uit milyon Temwen ap eseye chèche moun sa yo ki byen dispoze. Ou ka pa jwenn yon moun pou w etidye Labib avè l. Men, gen lòt pwoklamatè k ap travay nan menm tèritwa a ki jwenn moun ki vle aprann verite ki nan Pawòl Bondye a. Lè yon frè oswa yon sè jwenn yon moun ki vin yon disip Kris, tout moun ki te patisipe nan chèche moun sa a gen bonjan rezon pou yo kontan.

11. Menmsi w pa gen etid, ki lòt fason w ka ede nan travay fè disip la?

¹¹ Menmsi w pa gen etid kounye a, gen lòt fason w ka ede nan travay fè disip la. Pa egzanp ou ka akeyi moun ki fèk vin nan Sal Wayòm nan, e w ka pran ka yo. Konsa, lanmou nou demontre a ap ede yo wè nou se vrè kretyen (Jan 13:34, 35). Kòmantè w fè nan reyinyon yo, menm lè yo kout, ka montre moun ki fèk ap vini yo jan pou yo fè konn konviksyon yo genyen yon fason ki sensè e avèk respè. Ou ka al preche ak yon nouvo pwoklamatè pou w ede l itilize Bib la pou l rezone ak moun. Lè w fè sa, w ap aprann li imite Kris. — Lik 10:25-28.

12. Èske n bezwen gen gwo kapasite pou n fè disip? Esplike.

¹² Okenn nan nou pa dwe panse li bezwen gen gwo kapasite pou l anseye lòt moun vin disip Jezi. Poukisa? Ann pran egzanp Faustina k ap viv nan peyi Bolivi. Li pa t konn li lè l te kòmanse pran kontak ak Temwen Jewova yo. Kounye a, li vin konn li, men l pa twò fò. Li batize e li renmen anseye lòt moun. An jeneral, li kondui senk etid biblik chak semèn. Aktout pifò etidyan Faustina yo konn li pi byen pase l, li ede sis moun pwogrese jiskaske yo batize. — Lik 10:21.

13. Bay kèk nan benediksyon nou ka jwenn lè nou patisipe nan travay fè disip la menm lè nou okipe anpil.

¹³ Anpil kretyen okipe anpil akoz yo gen anpil bagay enpòtan pou yo fè. Men, malgre sa, yo pran tan pou yo kondui etid biblik, e sa ba yo anpil kè kontan. Ann pran egzanp Melanie ki t ap leve pitit fi l poukont li ann Alaska. Pitit fi l la te gen uitan. Melanie te gen yon travay ki te pran tout tan l epi li t ap pran swen yon paran l ki gen kansè. Se Melanie sèlman ki te Temwen nan ti vil izole li te abite a. Li te konn priye pou l jwenn fòs pou l al preche anba fredi paske li te vrèman vle jwenn yon moun pou l etidye Labib avè l. Finalman, li te rankontre Sara ki te kontan anpil lè l te aprann Bondye gen yon non. Kèk tan apre, Sara te aksepte yon etid Labib. Men sa Melanie di: “Chak vandredi swa, mwen te konn fatige anpil, men, mwen te konn soti al fè etid la ak pitit fi m nan e sa te bon pou nou anpil. Nou te kontan fè rechèch pou kesyon Sara te konn poze yo, e se pa ti kontan nou te kontan lè n wè li vin zanmi Jewova.” Sara te andire anba opozisyon avèk kouraj, li te kite legliz li te ye a e li te batize.

14. a) Nan ki sans travay fè disip la sanble ak peche pwason? b) Ki efè pawòl Pòl te di nou jwenn nan 2 Timote 4:1, 2 a gen sou ou?

¹⁴ Menmsi ta sanble ou pa jwenn rezilta nan travay predikasyon an, pa janm panse ou pap janm ka jwenn yon moun k ap vin yon disip. Sonje Jezi te konpare travay fè disip la ak peche pwason. Pechè pwason yo konn pase plizyè èdtan ap peche anvan yo pran pwason. Byen souvan, yo travay ta lannuit oswa byen bonè nan maten, e pafwa yo konn oblije al byen lwen nan lanmè a ak bato a (Lik 5:5). Se konsa tou, kèk nan moun k ap fè disip yo konn oblije pase plizyè èdtan ap preche avèk pasyans. Yo konn fè sa nan diferan moman nan jounen an ak divès kote. Poukisa yo konn fè sa? Pou yo ka gen plis posiblite pou yo jwenn moun yo. Byen souvan, moun ki fè tout efò sa yo konn jwenn bon rezilta lè yo rankontre moun ki enterese nan mesaj n ap bay la. Èske w ka eseye preche yon lòt lè nan jounen an nan moman l ap pi fasil pou w jwenn moun yo oswa kote l ap pi fasil pou w jwenn yo? — Li 2 Timote 4:1, 2.

15. Poukisa sa mande pasyans pou nou kondui etid biblik?

¹⁵ Poukisa sa mande pasyans pou nou kondui etid biblik? Youn nan rezon yo se paske nou bezwen fè plis pase ede etidyan yo konnen ansèyman ki nan Bib la epi renmen yo. Nou bezwen ede yo konnen Jewova, Sila a ki Mèt Bib la, epi renmen l. Nonsèlman nou bezwen aprann etidyan yo konn sa Jezi mande pou disip li yo fè, nou bezwen ede yo konn fason pou yo obeyi kòmandman sa yo nan lavi yo. Nou bezwen gen pasyans pou n ede yo pandan y ap fè efò pou yo suiv prensip ki nan Bib la. Gen kèk etidyan Labib ki rive chanje fason yo panse ak abitid yo genyen nan kèk mwa sèlman, tandiske gen lòt ki pran plis tan.

16. Ki sa nou aprann nan eksperyans Raúl la?

¹⁶ Gen yon misyonè nan peyi Pewou ki te fè yon eksperyans ki montre avantaj ki genyen lè nou gen pasyans. Men sa l di: “M te etidye de liv ak yon etidyan ki rele Raúl. Men, li te kontinye gen gwo difikilte nan lavi l. Li te gen gwo pwoblèm nan maryaj li, li te toujou ap di mo sal, e pitit li yo pa t respekte l. Li te konn vin nan reyinyon regilyèman, se sa k fè m te kontinye vizite l pou m ede li menm ak fanmi l. Plis pase twazan apre m te fin rankontre l, li te vin kalifye pou l batize.”

17. Ki sa nou pral egzamine nan atik ki vin apre a?

¹⁷ Jezi te di nou pou nou “ale, epi fè disip pami moun tout nasyon”. Pou nou akonpli misyon sa a, souvan nou oblije pale ak moun ki pa panse menm jan avè n ditou, san wete moun ki pa nan okenn relijyon oswa ki gendwa pa kwè Bondye egziste. Nan atik ki vin apre a, nou pral egzamine fason nou ka pataje bon nouvèl la ak tout kalite moun.