Talè konsa, Jewova pral sèvi ak Wayòm li an pou l retire tout pwoblèm nou yo. Se yon bon nouvèl e nou pa ka kenbe l pou nou sèl. Jezi vle pou moun k ap suiv li yo pataje mesaj sa a ak tout moun (Matye 28:19, 20). Ki jan Temwen Jewova yo obeyi kòmandman sa a Jezi te bay la?

1. Ki jan Matye 24:14 ap reyalize jodi a?

Jezi te fè konnen yo t ap “preche bon nouvèl sa a konsènan Wayòm nan sou tout tè a”. (Matye 24:14.) Temwen Jewova yo kontan patisipe nan travay enpòtan sa a. Nou preche bon nouvèl la toupatou sou tè a nan plis pase 1000 lang! Kokennchenn travay sa a mande anpil efò e l mande pou n byen òganize. Nou pa t ap ka fè l si Jewova pa t ede nou.

2. Ki efò nou fè pou nou rive preche moun yo?

Nou preche tout kote nou ka jwenn moun. Menm jan ak kretyen yo nan premye syèk la, nou preche “kay an kay”. (Travay 5:42.) Metòd sa a ban nou posiblite pou nou pale ak plizyè milyon moun chak ane. Kòm nou pa toujou jwenn moun yo lakay yo, nou preche anpil lòt kote nou ka jwenn moun. Nou toujou ap chèche okazyon pou n fè lòt moun konnen Jewova ak objektif li yo.

3. Kiyès ki gen responsablite pou yo preche bon nouvèl la?

Tout vrè kretyen yo gen responsablite pou yo fè lòt moun konnen bon nouvèl la. Nou bay responsablite sa a anpil valè. Nou fè tout sa nou kapab pou nou preche selon sitiyasyon nou, paske nou konnen lavi moun yo an danje. (Li 1 Timote 4:16.) Yo pa peye nou pou travay sa a paske Labib di: “Se gratis nou te resevwa, se gratis pou nou bay.” ​(Matye 10:7, 8). Se pa tout moun ki enterese nan mesaj nou an. Men, nou kontinye preche paske sa fè pati adorasyon n ap bay Jewova a e sa fè kè l kontan.

FOUYE PLIS

4. Nou fè anpil efò pou nou rive jwenn tout moun

VIDEYO: Y ap preche nan “zòn ki pi lwen sou tè a” (7:33)

• Ki sa k touche w nan efò Temwen Jewova yo ap fè pou yo preche?

Li Matye 22:39 ak Women 10:13-15, epi reponn kesyon sa yo:

• Ki jan travay predikasyon nou an montre nou renmen pwochen nou?

• Ki jan Jewova konsidere moun k ap preche bon nouvèl la? — Gade vèsè 15.

5. Nou se konpayon travay Bondye

Gen anpil eksperyans ki montre Jewova ap dirije travay nou an. Pa egzanp, nan Nouvèl Zelann, gen yon frè ki rele Paul ki te rankontre yon dam pandan l t ap preche kay an kay yon aprèmidi. Nan maten, dam nan te priye Bondye, li te sèvi ak non Bondye, Jewova, e l te mande l pou yon moun vizite l. Paul di: “Twazèdtan apre, mwen te devan pòt li a.”

Li 1 Korentyen 3:9, epi reponn kesyon sa a:

• Ki jan eksperyans tankou sa ki te pase nan Nouvèl Zelann nan montre Jewova ap dirije travay predikasyon an?

Li Travay 1:8, epi reponn kesyon sa a:

• Sa k fè nou bezwen Jewova ede nou pou n rive fè travay predikasyon an?

Èske w te konnen?

Nan reyinyon nou fè lasemèn nan, nou jwenn fòmasyon pou nou preche. Si w te deja asiste reyinyon sa a, ki sa w panse de fòmasyon sa a?

6. Nou obeyi kòmandman Bondye te bay pou nou preche a

Nan premye syèk la, opozan yo te eseye fè disip Jezi yo sispann preche. Premye kretyen yo te defann dwa yo genyen pou yo preche bon nouvèl la, lè yo te “fè rekonèt li devan lajistis”. (Filipyen 1:7.) Temwen Jewova yo fè menm bagay la jodi aa.

VIDEYO: Fason nou defann bon nouvèl la devan lajistis (2:28)

Li Travay 5:27-42, epi reponn kesyon sa a:

• Sa k fè nou pap sispann preche? — Gade vèsè 29, 38 ak 39.

SA W TE APRANN

Jezi te bay moun k ap suiv li lòd pou yo preche moun tout nasyon bon nouvèl la. Jewova ap ede pèp li a fè travay sa a.

Revizyon

• Ki fason nou preche bon nouvèl la nan lemonnantye?

• Ki jan travay predikasyon nou an montre nou renmen pwochen nou?

• Èske w panse travay predikasyon an ka fè nou gen kè kontan? Poukisa?

APRANN PLIS

Gade ki jan Temwen Jewova yo preche moun nan gwo vil yo.

Temwayaj an piblik espesyal nan gwo vil yo: Pari (5:11)

Ki efò Temwen Jewova yo fè pou yo peche refijye yo?

Yo satisfè bezwen refijye yo (5:59)

Tande ki jan yon moun ap esplike sa k fè l kontan lefètke l te pase tout vi l ap preche bon nouvèl la.

M kontan m te chwazi karyè sa a (6:29)

Gade desizyon kèk tribinal te pran ki fè l pi fasil pou nou preche.

“Pwoklamatè Wayòm nan prezante ka yo devan tribinal” (Wayòm Bondye a ap dirije!, chapit 13)

Jezi te anseye pou nou vin kretyen nou dwe batize. (Li Matye 28:19, 20.) Men, ki sa batèm nan ye? Ki sa yon moun dwe fè pou l batize?

1. Ki sa batèm nan ye?

Mo “batize” a soti nan yon mo grèk ki vle di “plonje” anba dlo. Lè yo t ap batize Jezi, yo te plonje l nan dlo rivyè Jouden an, epi li te monte “sot nan dlo a”. (Mak 1:9, 10.) Menm jan an tou, lè y ap batize vrè kretyen yo, yo plonje yo nèt anba dlo a.

2. Lè yon moun batize, ki sa sa montre?

Lè yon moun batize, li montre li te vwe lavi l bay Jewova. Ki jan yon moun kapab vwe lavi l bay Jewova? Anvan yon moun batize, li di Jewova li vle sèvi l pou toutan nan yon priyè pèsonèl li fè. Li pwomèt Jewova se sèl li menm l ap adore, e l ap bay volonte Bondye premye plas nan lavi l. Li deside pou l ‘nye tèt li, e pou l kontinye suiv’ ansèyman Jezi yo ak egzanp Jezi (Matye 16:24). Lè yon moun vwe lavi l bay Jewova e li batize, sa fè l posib pou l gen bon relasyon ak Jewova ansanm ak lòt moun k ap adore Jewova yo.

3. Ki sa yon moun dwe fè pou l batize?

Pou w ka prepare w pou w batize, ou bezwen aprann konnen Jewova e w bezwen fè efò pou w gen plis lafwa nan li. (Li Ebre 11:6.) Tank w ap gen plis konesans sou Jewova e w ap gen plis lafwa nan li, se tank w ap vin pi renmen l. Konsa, w ap santi w anvi pale de li e w ap viv selon prensip li yo (2 Timote 4:2; 1 Jan 5:3). Lè yon moun ap viv “yon fason ki diy devan Jewova, yon fason pou [l] fè l plezi nèt”, li ka pran desizyon pou l vwe lavi l bay Jewova e pou l batize. — Kolosyen 1:9, 10a.

FOUYE PLIS

4. Sa nou ka aprann nan batèm Jezi a

Li Matye 3:13-17 pou w ka jwenn plis enfòmasyon sou batèm Jezi, epi reponn kesyon sa yo:

• Èske Jezi te tibebe lè yo te batize l?

• Ki jan yo te batize l? Èske yo te annik vide yon ti dlo sou li?

Lè Jezi te batize, li te kòmanse travay espesyal Bondye te ba l fè sou tè a. Li Lik 3:21-23 ak Jan 6:38, epi reponn kesyon sa a:

• Apre Jezi fin batize, ki travay li te bay premye plas nan lavi l?

5. Ou kapab batize

Anfèt, li kapab parèt difisil pou yon moun vwe lavi l bay Bondye e pou l batize. Men, ou ka fè pwogrè nan pwen pou w pa pè pran gwo desizyon sa a. Pou w wè kèk moun ki pran desizyon sa a, gade VIDEYO a.

VIDEYO: Fason nou ka vin pi bon zanmi ak Jewova (1:11)

Li Jan 17:3 ak Jak 1:5, epi reponn kesyon sa a:

• Ki sa k kapab ede yon moun pare pou l batize?

1. Nou vwe lavi nou bay Jewova lè nou di l nou vle sèvi l pou toutan.

2. Lè nou batize, nou montre tout moun k ap gade nou nou vwe lavi nou bay Bondye.

6. Lè nou batize, nou vin fè pati fanmi Jewova a

Lè nou batize, nou fè pati yon fanmi ini ki sou tout tè a. Menm lè nou soti divès kote e nou pa gen menm kilti, nou tout gen menm kwayans e n ap suiv menm prensip moral. Li Sòm 25:14 ak 1 Pyè 2:17, epi reponn kesyon sa a:

• Lè yon moun batize, ki jan sa ede l gen bon relasyon avèk Jewova ansanm ak lòt moun k ap adore Jewova yo?

SA W TE APRANN

Jezi te anseye pou yon moun kretyen li dwe batize. Pou yon moun batize, li dwe chèche gen yon lafwa solid nan Jewova. Li dwe viv selon prensip Jewova yo e li dwe vwe lavi l ba Li.

Revizyon

• Ki sa batèm nan ye, e poukisa li enpòtan?

• Lè yon moun batize, ki sa sa montre l fè deja?

• Ki sa yon moun dwe fè pou l vwe lavi l bay Jewova e pou l batize?

APRANN PLIS

Chèche konnen ki sa batèm nan ye, ak ki sa l pa ye.

“Ki sa batèm nan ye?” (Atik sou Entènèt)

Gade ki sa yon moun ka fè pou l batize.

“Lanmou ak rekonesans nou gen pou Jewova pouse n batize” (Toudegad mas 2020)

Li fason yon mesye te pran desizyon pou batize, men l pa t annik fè sa sou kout tèt.

“Yo te vle m verifye sa Bib la anseye toutbonvre” (Toudegad 1^ye fevriye 2013)

Gade sa k fè yon moun ki batize ap jwenn anpil benediksyon, e fason w ka prepare w pou w batize.

“Èske m dwe batize?” (Bonjan repons pou kesyon jèn yo konn poze, volim 2, chapit 37)