Mesaj nou dwe preche a

BYEN lontan anvan epòk kretyen yo, Jewova te di Abraram, yon nonm ki te fidèl, li pran dispozisyon pou “tout nasyon sou tè a” beni tèt yo (Jen. 22:18). Li te enspire Salomon tou pou l te ekri konsènan yon responsablite fondamantal lèzòm genyen: “Krenn vrè Dye a epi obsève kòmandman l yo. Paske se sa ki tout obligasyon lòm.” ​(Ekl. 12:13). Men, ki jan moun k ap viv nan tout nasyon yo t ap ka aprann bagay sa yo?

Byenke te toujou gen moun ki kwè nan Labib, Pawòl Bondye a, Labib montre gwo travay bay temwayaj nan lemonnantye a, sètadi predikasyon bon nouvèl la, t ap touche tout nasyon nan “jou Seyè a”, ki te kòmanse nan ane 1914 (Rev. 1:10). Anrapò ak epòk sa a, Revelasyon 14:6, 7 te anonse gen yon travay predikasyon trèzenpòtan ki t ap gen pou fèt anba direksyon zanj yo nan “tout nasyon, tout tribi, tout lang ak tout pèp”. Yo t ap di moun yo: “Krenn Bondye epi ba li glwa, paske lè pou l fè jijman an rive. Epi, adore Moun ki fè syèl la, tè a, lanmè a ak sous dlo yo.” Se volonte Bondye pou yo anonse mesaj sa a. Nou gen privilèj pou nou patisipe nan travay sa a.

“Vrè Dye a.” Jewova te di: “Nou se temwen m” nan yon kontèks kote moun te bezwen konnen kiyès ki vrè Dye a (Iza. 43:10). Mesaj n ap preche a se pa di n ap di moun yo yo dwe gen yon relijyon oswa yo dwe kwè nan yon dye. Okontrè, se yon mesaj ki ba yo posiblite pou yo aprann konnen Kreyatè syèl la ak tè a se sèl vrè Dye a (Iza. 45:5, 18, 21, 22; Jan 17:3). Se sèl vrè Dye a ki ka anonse sa k pral rive alavni, e sa l anonse yo ap fèt kanmenm. Se yon privilèj nou genyen pou n ede moun yo konprann lefètke pwofesi Jewova te bay nan tan lontan yo te reyalize, sa se yon baz solid pou nou kwè tout sa l pwomèt pou lavni ap reyalize. — Joz. 23:14; Iza. 55:10, 11.

Natirèlman, anpil nan moun n ap preche yo ap adore lòt dye oswa yo pretann yo pa adore okenn dye ditou. Pou yo ka koute nou, nou ka bezwen kòmanse konvèsasyon an sou yon bagay ki enterese ni nou menm ni yo menm. Nou ka pran leson sou egzanp ki nan Travay 17:22-31 an. Gade pou w wè, byenke apot Pòl te montre l pridan lè l t ap pale ak moun yo, li te di yo byen klè tout moun gen kont pou yo rann Bondye ki Kreyatè syèl la ak tè a.

Fè moun yo konnen non Bondye. Fè yo konnen non vrè Dye a. Jewova renmen non l (Egz. 3:15; Iza. 42:8). Li vle moun yo konnen non sa a. Li te fè mete non l, yon non ki gen anpil glwa, plis pase 7 000 fwa nan Bib la. Nou gen responsablite pou nou fè moun yo konnen non Bondye. — Det. 4:35.

Pou lèzòm ka gen espwa viv pou toutan, yo dwe konnen Jewova e yo dwe envoke non l avèk lafwa (Yow. 2:32; Mal. 3:16; 2 Tes. 1:8). Epoutan, pifò moun pa konnen Jewova. Pami moun sa yo, gen yon bann moun ki pretann y ap adore Bondye Bib la pale de li a. Menmsi yo gen yon bib e yo li l, yo ka toujou pa konnen non Bondye paske, nan anpil tradiksyon Labib yo fè nan epòk nou an, yo retire non sa a. Sèl sa kèk moun konnen konsènan non Jewova, sèke chèf relijye yo di yo pou yo pa sèvi ak non sa a.

Ki jan nou ka fè moun yo konnen non Bondye? Pi bon fason nou ka fè sa, se montre yo l nan Bib la, nan bib pa yo si sa posib. Nan kèk tradiksyon Labib, non sa a parèt plizyè milye fwa. Gen lòt tradiksyon kote yo ka mete l sèlman nan Sòm 83:18, Egzòd 6:3-6 oswa nan Jenèz 22:14, oubyen yo ka mete l nan yon nòt anba paj yo bay sou Egzòd 3:14, 15 oswa sou Egzòd 6:3. Nan anpil tradiksyon Labib, yo mete lòt mo, tankou “Seyè” ak “Bondye”, pou ranplase l. Yo mete mo sa yo kote ki te gen non Bondye nan tèks ki nan lang orijinal la, e pafwa yo ekri yo an majiskil oswa nan yon lòt fòm ki diferan ak lòt lèt yo. Nan ka kote tradiksyon Labib nan epòk nou an retire non Bondye nèt, ou ka bezwen sèvi ak yon tradiksyon Labib ki la pi lontan pase yo pou w montre moun yo sa. Gen kèk zòn, ou ka montre moun yo yo itilize non Bondye nan yon seri chante nan relijyon yo oswa nan pawòl yo ekri sou kèk gwo kay moun konnen.

Ou kapab jwenn bon rezilta lè w itilize Jeremi 10:10-13 nan Traduction du monde nouveau a menm avèk moun k ap adore lòt dye yo. Nan vèsè sa yo, yo pa sèlman di non Bondye, men yo esplike kiyès li ye tou.

Pa ranplase non Jewova ak yon seri tit tankou “Bondye” ak “Seyè”, jan lakretyente fè l la. Sa pa vle di ou dwe itilize non Jewova nan kòmansman chak konvèsasyon w ap fè, paske gen moun, akoz prejije, ki ka kanpe konvèsasyon an. Men, apre w fin etabli yon bon baz pou pèmèt konvèsasyon an fèt, pa ezite itilize non Bondye.

Li enpòtan pou w remake Bib la itilize non Bondye pi souvan pase kantite fwa li itilize tit, tankou “Seyè” ak “Bondye” ansanm. Men, ekriven biblik yo pa t eseye mete non Bondye nan chak fraz yo t ap ekri. Yo te fè sa tou senpleman yon fason ki natirèl, san fòse e avèk respè. Sa se yon bon egzanp pou nou suiv!

Moun ki pote non sa a. Se vre, konnen Bondye gen yon non se yon verite ki enpòtan, men sa se sèlman premye pa yon moun fè lè l ap aprann konnen Bondye.

Pou moun yo renmen Jewova e pou yo envoke non l avèk lafwa, yo bezwen konnen kiyès li ye. Lè Jewova t ap fè Moyiz konnen non l sou mòn Sinayi, li pa t annik jis repete mo “Jewova” a pou li. Li te atire atansyon l sou kèk nan bèl kalite li genyen yo (Egz. 34:6, 7). Sa se yon egzanp pou nou imite!

Kit w ap bay yon moun ki fèk enterese temwayaj, kit w ap fè diskou nan kongregasyon an, si w ap pale sou benediksyon Wayòm nan ap pote, mete aksan sou sa bagay sa yo aprann nou sou Bondye ki fè pwomès sa yo. Lè w ap pale de kòmandman l yo, mete aksan sou sajès li ak lanmou li ki parèt ladan yo. Fè moun yo konprann byen klè kòmandman Bondye yo pa yon chay sou do nou, okontrè, yo la pou byen nou (Iza. 48:17, 18; Mika 6:8). Montre yo nou ka aprann kèk bagay sou pèsonalite Jewova, sou prensip li yo e sou objektif li lè nou egzamine divès fason li demontre pisans li. Atire atansyon yo sou ekilib Jewova montre l genyen nan fason li demontre kalite l yo. Fè moun yo konnen santiman pa w anvè Jewova. Lanmou w gen pou Jewova ka pouse lòt moun yo demontre lanmou pou li tou.

Nan mesaj ijan n ap preche nan epòk nou an, nou egzòte tout moun pou yo krenn Bondye. Nan sa n ap di, nou dwe chèche ede yo gen lakrentif pou Bondye. Lakrentif sa a se yon bon lakrentif, se yon gwo gwo respè yo bezwen genyen pou Jewova (Sòm 89:7). Sa mande pou yo rekonèt Jewova se pi gwo Jij la e pou yo chèche gen apwobasyon l, paske se sèl fason y ap ka gen espwa y ap jwenn lavi l ap bay alavni an (Lik 12:5; Wom. 14:12). Se sa k fè, pou nou gen lakrentif sa a, fòk nou gen yon gwo lanmou pou li, sa vle di fòk nou dispoze fè l plezi ak tout kè nou (Det. 10:12, 13). Si nou gen lakrentif pou Bondye, sa ap pouse nou tou pou nou rayi sa ki mal, pou nou obeyi kòmandman l yo e pou nou adore l ak yon kè ki konplè (Det. 5:29; 1 Kwo. 28:9; Pwo. 8:13). L ap ede nou pou nou pa chèche sèvi Bondye anmenmtan pou n renmen bagay ki nan monn nan. — 1 Jan 2:15-17.

Non Bondye se “yon fòtrès solid”. Moun ki aprann konnen Jewova toutbonvre yo jwenn yon gwo pwoteksyon. Se pa tou senpleman paske yo itilize non l oswa paske yo ka site kalite l yo, men paske yo mete konfyans yo nan li. Anrapò ak yo, men sa Pwovèb 18:10 di: “Non Jewova se yon fòtrès solid. Moun ki jis la kouri antre anndan l, e li jwenn pwoteksyon.”

Byen sèvi ak okazyon w genyen pou w ankouraje lòt moun mete konfyans yo nan Jewova (Sòm 37:3; Pwo. 3:5, 6). Yon moun ki gen yon konfyans konsa montre li gen lafwa nan Jewova ak nan pwomès li yo (Ebre 11:6). Lè moun yo “envoke non Jewova” paske yo konnen li se Souvren linivè a, lè yo renmen chemen l yo e yo kwè ak tout kè yo se li sèl ki ka bay vrè delivrans lan, Pawòl Bondye a ban nou garanti y ap sove (Wom. 10:13, 14). Lè w ap anseye lòt moun, ede yo pou yo devlope yon lafwa konsa nan tout aspè nan lavi yo.

Anpil moun ap rankontre gwo gwo pwoblèm jodi a. Yo ka pa wè kote yon solisyon ap soti. Ankouraje yo pou yo chèche konnen volonte Jewova, pou yo chèche fè l konfyans e pou yo aplike sa yo aprann nan (Sòm 25:5). Ankouraje yo priye Bondye ak tout fòs yo pou l ede yo e ankouraje yo di l mèsi pou benediksyon li ba yo (Fil. 4:6, 7). Lè yo aprann konnen Jewova, nonsèlman pa mwayen sa yo li nan Bib la, men tou, pa mwayen eksperyans yo fè kote yo wè pwomès Jewova reyalize nan lavi yo, y ap santi yo jwenn sekirite moun ka jwenn lè yo vrèman konprann sa non Jewova reprezante. — Sòm 34:8; Jer. 17:7, 8.

Byen sèvi ak tout okazyon w genyen pou w ede moun yo konprann li saj pou yo gen lakrentif pou Jewova, vrè Dye a, e pou yo obeyi kòmandman l yo.

APRE Jezi Kris te fin resisite e anvan li te monte nan syèl la, li te bay disip li yo yon enstriksyon, li te di: “Nou pral sèvi m temwen nan Jerizalèm [...] rive jis nan zòn ki pi lwen sou tè a.” ​(Tra. 1:8). Yo pale de sèvitè Bondye yo ki fidèl nan epòk nou an antanke moun ki “gen kòm travay pou yo bay temwayaj sou Jezi”. (Rev. 12:17.) Nan ki pwen ou zele nan travay bay temwayaj sa a?

Anpil moun ki di avèk senserite yo kwè nan Jezi pa konn anyen sou lavi l anvan li te vin yon imen sou tè a. Yo pa konprann si Jezi te yon moun toutbonvre lè l te sou tè a. Yo pa rive konprann sa sa vle di lè yo di li se Pitit Bondye. Yo pa konnen anpil bagay konsènan wòl li jwe nan akonplisman objektif Bondye. Yo pa konnen ki sa l ap fè kounye a e yo pa konprann ki efè sa l ap fè kounye a pral gen sou lavi yo. Yo ka menm fè erè pou yo panse Temwen Jewova yo pa kwè nan Jezi. Se yon privilèj nou genyen pou nou fè tout sa nou kapab pou nou fè moun yo konnen laverite sou pwen sa yo.

Gen moun menm ki pa kwè moun Bib la pale de li ki te rele Jezi a te egziste toutbonvre. Genyen ki konsidere Jezi senpleman kòm yon moun enpòtan. Anpil moun pa dakò li se Pitit Bondye. Pou nou “bay temwayaj sou Jezi” nan mitan moun sa yo, sa mande pou nou fè anpil efò e pou nou gen pasyans ak ladrès.

Kèlkeswa pwennvi moun k ap koute w yo genyen, yo bezwen aprann konnen Jezi si yo vle benefisye dispozisyon Bondye pran pou l bay lavi ki pap janm fini an (Jan 17:3). Bondye di aklè volonte l se pou tout moun k ap viv “rekonèt aklè Jezi Kris se Seyè” e pou yo soumèt anba otorite Jezi (Fil. 2:9-11). Donk, nou pa ka annik evite sijè sa a lè nou rankontre moun ki gen yon pwennvi fèm, men ki pa kòrèk sou Jezi, oubyen moun k ap di bagay mal sou Jezi san yo pa chèche konnen kiyès li ye. Se vre, gen kote nou ka pale sou Jezi Kris san pwoblèm, menm depi nan premye fwa nou rankontre ak yon moun, men nan lòt ka, avèk ladrès, nou ka bezwen di kèk ti bagay ki gen rapò ak Jezi pou nou ede moun k ap koute nou yo kòmanse gen yon pwennvi ki kòrèk sou li. Nou ka bezwen reflechi tou sou fason nou ka entwodui lòt enfòmasyon konsènan Jezi nan lòt vizit n ap fè yo. Sepandan, li ka pa posib pou nou pale sou tout bagay ki gen rapò ak sijè sa a toutotan nou pa kòmanse fè yon etid ak yon moun. — 1 Tim. 2:3-7.

Jezi jwe yon wòl ki trèzenpòtan nan objektif Bondye. Nou dwe ede moun yo konprann piske Jezi se “chemen an”, e ‘pèsonn pap vin jwenn Papa a si l pa pase pa li menm’, li enposib pou yo gen bon relasyon ak Bondye si yo pa gen lafwa nan Jezi Kris (Jan 14:6). Si yon moun pa konprann wòl trèzenpòtan Jewova bay premye Pitit li a jwe, li enposib pou l konprann Labib. Poukisa? Paske Jewova fè Pitit li a tounen yon enstriman trèzenpòtan nan akonplisman tout objektif li yo (Kol. 1:17-20). Pwofesi ki nan Bib la santre sou verite sa a (Rev. 19:10). Jezi Kris se moun Bondye itilize pou l rezoud tout pwoblèm rebelyon Satan ak peche Adan an mennen. — Ebre 2:5-9, 14, 15.

Pou yon moun konprann wòl Kris jwe a, li dwe rekonèt lèzòm nan yon sitiyasyon ki deplorab, yon sitiyasyon yo pa ka soti ladan l poukont yo. Nou tout fèt nan peche. Sa ka gen yon pakèt konsekans sou nou pandan tout vi nou. Finalman, sa ap lakòz nou mouri (Wom. 3:23; 5:12). Rezone sou pwen sa a ak moun w ap bay temwayaj yo. Apre sa, montre yo grasa sakrifis Jezi Kris te bay kòm ranson an, avèk amou, Jewova bay moun ki demontre yo gen lafwa nan dispozisyon sa a posiblite pou yo libere anba peche ak lanmò (Mak 10:45; Ebre 2:9). Sa ba yo posiblite pou yo gen lavi pou toutan e pou yo viv san yo pa gen okenn tras peche nan yo (Jan 3:16, 36). Pa gen okenn lòt fason yo kapab jwenn bagay sa yo (Tra. 4:12). Antanke anseyan, lè w ap anseye moun yo lakay yo e lè w ap anseye nan kongregasyon an, pa kontante w annik site verite sa yo. Avèk amou e avèk pasyans, ede moun k ap koute w yo gen rekonesans nan kè yo pou wòl Kris jwe antanke Rachtè nou. Lè yon moun gen rekonesans pou dispozisyon sa a, sa ka gen yon gwo efè sou etadespri l, sou konduit li e sou objektif li nan lavi a. — 2 Kor. 5:14, 15.

Anfèt, Jezi te bay lavi l yon sèl fwa (Ebre 9:28). Men, l ap sèvi antanke Gran Prèt yon fason aktif jodi a. Ede lòt moun konprann sa sa vle di. Èske yo strese, yo dekouraje, y ap soufri oswa yo gen pwoblèm akoz moun ki bò kote yo ap mal boule youn ak lòt? Lè Jezi te yon imen, li te rankontre tout bagay sa yo. Li konnen ki jan nou santi nou. Piske nou enpafè, èske nou pa santi nou bezwen mizèrikòd Bondye? Si nou priye Bondye pou nou mande l padon sou baz sakrifis Jezi a, Jezi ap aji antanke “yon èd bò kot Papa a” pou nou. Avèk konpasyon, ‘l ap sipliye Bondye pou nou’. (1 Jan 2:1, 2; Wom. 8:34.) Sou baz sakrifis Jezi a e grasa travay Jezi ap fè antanke Gran Prèt la, nou kapab pwoche bò kote “twòn favè san parèy” Jewova a pou nou jwenn èd li nan bon moman (Ebre 4:15, 16). Byenke nou enpafè, èd Jezi ban nou antanke Gran Prèt la ede nou sèvi Bondye avèk yon konsyans ki klè. — Ebre 9:13, 14.

Anplis, Jezi gen yon gwo otorite antanke moun Bondye chwazi kòm Chèf kongregasyon kretyen an (Mat. 28:18; Efe. 1:22, 23). Antanke Chèf kongregasyon an, li ban nou direksyon nou bezwen ann amoni ak volonte Bondye. Lè n ap anseye lòt moun, ede yo konprann se Jezi Kris ki Chèf kongregasyon an, se pa yon moun sou tè a (Mat. 23:10). Depi nan premye kontak nou avèk moun ki enterese nan laverite yo, envite yo nan reyinyon kongregasyon an, kote n ap etidye Labib pa mwayen piblikasyon “esklav fidèl ki prevwayan an” ban nou. Esplike yo kiyès ki “esklav” la e kiyès ki Mèt la, konsa y ap vin konnen otorite Jezi genyen sou kongregasyon an (Mat. 24:45-47). Fè yo fè konesans ak ansyen yo e esplike yo ki kondisyon frè sa yo dwe ranpli selon Labib (1 Tim. 3:1-7; Tit 1:5-9). Esplike yo kongregasyon an pa pou ansyen yo, men ansyen yo la pou ede nou suiv tras Jezi Kris (Tra. 20:28; Efe. 4:16; 1 Pyè 5:2, 3). Ede moun ki enterese yo konprann gen yon pèp ki byen òganize ki gaye kò l nan lemonnantye k ap travay anba otorite Kris.

Nan Evanjil yo, nou aprann lè Jezi t ap antre nan Jerizalèm yon ti tan anvan lanmò l, disip li yo t ap di li se “Sila a ki vini antanke Wa nan non Jewova”. (Lik 19:38.) Lè moun yo etidye Labib plis toujou, y ap aprann Jewova bay Jezi otorite pou l dirije moun nan tout nasyon (Dàn. 7:13, 14). Lè w ap fè diskou nan kongregasyon an oswa lè w ap kondui etid biblik, ede moun yo konprann ki sa otorite Jezi genyen an vle di pou nou e ede yo demontre rekonesans yo pou li.

Esplike yo fason nou viv montre si nou vrèman kwè Jezi Kris se Wa e si nou soumèt anba otorite l ak tout kè nou. Dirije atansyon yo sou travay Jezi te bay disip li yo fè apre Bondye te fin montre se li li chwazi pou vin Wa (Mat. 24:14; 28:18-20). Pale sou sa Jezi, Konseye estrawòdinè a, te di ki ta dwe pi enpòtan nan lavi a (Iza. 9:6, 7; Mat. 6:19-34). Dirije atansyon yo sou etadespri Prens lapè a te di disip li yo ta dwe genyen (Mat. 20:25-27; Jan 13:35). Veye pou w pa mete tèt ou kòm jij, pou w ap chèche wè si lòt moun fè tout sa yo dwe fè, men ankouraje yo pito pou yo egzamine ki sa aksyon yo fè montre konsènan soumisyon yo anba otorite Kris la. Tank w ap ankouraje yo fè sa, sonje li nesesè pou w fè menm jan an tou.

Poze Kris kòm fondasyon. Labib montre lè yon moun ap ede yon moun vin yon disip Kris, se bati l ap bati sou Jezi Kris antanke fondasyon an (1 Kor. 3:10-15). Pou w fè yon travay konsa, ede moun yo konnen Jezi jan Labib pale de li a. Pran prekosyon pou yo pa pran w kòm moun yo dwe suiv la (1 Kor. 3:4-7). Dirije atansyon yo sou Jezi Kris.

Si w byen poze fondasyon an, etidyan yo ap konprann Kris kite yon modèl pou nou “pou nou suiv tras li pye pou pye”. (1 Pyè 2:21.) Pou w bati sou fondasyon sa a, ankouraje etidyan yo li Evanjil yo. Yo pap annik li yo kòm istwa ki te pase, men pito, kòm yon gid nan lavi yo. Ede yo sonje atitid ak kalite Jezi te genyen e ede yo imite l. Ankouraje yo pou yo chèche wè santiman Jezi te genyen pou Papa l, fason li te andire anba tantasyon ak eprèv, fason li te montre li soumèt devan Bondye ak fason li te trete lòt moun nan divès sikonstans. Atire atansyon yo sou aktivite Jezi te bay plis enpòtans nan lavi l. Konsa, lè yo gen desizyon pou yo pran oswa lè yo devan eprèv nan lavi a, yo chak ap ka mande tèt yo: ‘Ki sa Jezi t ap fè nan sitiyasyon sa a? Èske fason m deside aji a ap montre mwen gen rekonesans pou sa l fè pou mwen?’

Lè w ap fè yon diskou devan kongregasyon an, pa mete nan tèt ou piske frè yo deja gen lafwa nan Jezi, li pa nesesè pou w atire atansyon yo sou li yon fason espesyal. Sa w di yo ap gen plis sans si w chèche ede yo konprann yon seri lòt bagay pou fòtifye lafwa sa a yo genyen an. Lè w ap pale de reyinyon yo, montre yo rapò ki genyen ant reyinyon yo ak wòl Jezi jwe antanke Chèf kongregasyon an. Lè w ap preche, atire atansyon moun yo sou etadespri Jezi te genyen lè l t ap preche e montre yo travay predikasyon an se mwayen Kris itilize, antanke Wa, pou l rasanble moun l ap pwoteje pou antre nan monn nouvo a.

Li klè moun yo bezwen aprann plis bagay toujou sou Jezi, yo pa dwe konnen sèlman kèk verite fondamantal. Pou yo vin vrè kretyen, yo dwe demontre yo gen lafwa nan li e yo dwe renmen l toutbonvre. Yon lanmou konsa ap pouse yo obeyi l e l ap pouse yo montre yo fidèl devan l (Jan 14:15, 21). L ap pèmèt yo kenbe lafwa yo fèm devan eprèv pou yo kontinye suiv Kris chak jou nan lavi yo e pou yo montre yo se kretyen ki gen matirite ki byen “anrasinen nan fondasyon an”. (Efe. 3:17.) Yon vi konsa ap fè Jewova, ki Bondye e ki Papa Jezi Kris la, jwenn glwa.

LÈ Jezi t ap bay enfòmasyon anrapò ak siy sou prezans li a ak fen sistèm nan, men sa l te anonse: “Yo pral preche bon nouvèl sa a konsènan wayòm nan sou tout tè a, kòm yon temwayaj pou tout nasyon. Apre sa, lafen an ap vini.” — Mat. 24:14.

Ki mesaj sa a yo ta dwe preche tout kote sou tè a? Se mesaj konsènan Wayòm Jezi te anseye nou pou nou priye Bondye pou li a, lè l te di: “Se pou wayòm ou an vini.” ​(Mat. 6:10). Revelasyon 11:15 pale de Wayòm sa a kòm “wayòm Seyè nou an [Jewova] ak Kris li a” paske se Jewova ki bay Kris otorite pou l dirije antanke Wa. Men, li bon pou nou note mesaj Jezi te di yo t ap preche nan epòk nou an ale pi lwen pase mesaj disip li yo te preche nan premye syèk la. Disip yo te di moun yo: “Wayòm Bondye a vin toupre nou.” ​(Lik 10:9). Paske lè sa a, Jezi, Moun yo te chwazi pou l vin Wa a, te nan mitan yo. Men, jan yo rapòte sa nan Matye 24:14 la, Jezi te predi yo t apral anonse yon lòt evènman enpòtan nan akonplisman objektif Bondye a nan lemonnantye.

Pwofèt Dànyèl te resevwa yon vizyon sou evènman sa a. Li te wè “yon moun ki sanble ak yon pitit gason lòm”, Jezi Kris, ki te resevwa nan men “Moun ki la pi lontan an”, Jewova Dye, “dominasyon, diyite ak wayòm, dekwa pou pèp, kominote nasyonal ak lang, yo tout sèvi l”. (Dàn. 7:13, 14.) Evènman sa a ki gen anpil enpòtans te fèt nan syèl la nan ane 1914. Apre sa, yo te pimpe Satan ak demon l yo sou tè a (Rev. 12:7-10). Dènye jou sistèm mechan sa a te kòmanse. Men, anvan yo detwi sistèm sa a totalman, gen yon mesaj sèvitè Bondye yo ap anonse nan lemonnantye kote y ap fè tout moun konnen Wa Jewova mete a, Mesi a, ap dirije depi nan twòn li nan syèl la. Fason moun yo reyaji devan mesaj sa a ap montre pwennvi yo genyen sou Trèwo a, li menm ki Chèf “nan wayòm lèzòm nan”. — Dàn. 4:32.

An reyalite, gen plis bagay toujou ki gen pou rive. Nou toujou priye “pou wayòm [Bondye a] vini”, men, sa pa vle di se panse nou panse se alavni Wayòm li an pral tabli. Nou fè priyè sa a nan objektif pou nou mande Bondye pou Wayòm nan ki nan syèl la vin aji yon fwa pou tout pou l akonpli pwofesi tankou Dànyèl 2:44 ak Revelasyon 21:2-4. Li pral fè tè a tounen yon paradi ki ranpli ak moun ki renmen Bondye e ki renmen moun parèy yo. Lè n ap preche “bon nouvèl sa a konsènan wayòm nan”, n ap atire atansyon moun yo sou bagay sa yo ki pral reyalize alavni. Men tou, avèk konfyans, n ap fè yo konnen Jewova deja bay Pitit li a otorite pou l dirije antanke Wa. Èske w mete aksan sou bon nouvèl sa a lè w ap bay temwayaj konsènan Wayòm nan?

Esplike sa Wayòm nan ye. Ki jan nou ka ranpli misyon nou genyen pou nou anonse mesaj Wayòm nan? Nou ka fè moun yo enterese nan Wayòm nan lè nou kòmanse konvèsasyon avèk yo sou divès sijè, men nou pa ta dwe pran tan pou nou fè yo konprann mesaj nou an konsène Wayòm Bondye a.

Yon lòt bagay ki enpòtan pou nou fè nan travay sa a se li vèsè ki anrapò ak Wayòm nan oswa site vèsè sa yo. Lè w ap pale de Wayòm nan, asire w moun w ap pale avèk yo a konprann sa l ye. Li ka nesesè pou w pa annik kontante w di moun yo Wayòm Bondye a se yon gouvènman. Gen moun ki twouve li difisil pou yo reflechi sou yon bagay moun pa ka wè kòm yon gouvènman. Ou ka rezone avèk yo plizyè fason. Pa egzanp, moun pa ka wè van an, men li gen yon efè ki pisan sou lavi nou. Nou pa ka wè Moun ki gen kontwòl sou van an, men li klè Moun sa a gen yon gwo pisans. Labib rele l “Wa letènite a”. (1 Tim. 1:17.) Oubyen ou ka rezone avèk yo pou w montre yo nan yon gwo peyi, anpil moun pa janm wè kapital la oswa moun k ap dirije a ak je yo. Yo aprann enfòmasyon sa yo grasa nouvèl yo bay. Menm jan an tou, Labib, yon liv ki pibliye nan plis pase 2 200 lang, pale sou Wayòm Bondye a. Li ede n konnen ki moun yo bay otorite pou dirije nan Wayòm nan e ki sa Wayòm nan ap fè kounye a. Toudegad se yon jounal ki pibliye nan plis lang pase tout lòt jounal, travay li se “anonse Wayòm Jewova a”, jan yo di sa sou po Toudegad la.

Pou w ede moun yo konprann sa Wayòm nan ye, ou ka mansyone kèk bagay yo ta renmen gouvènman yo fè: elimine pwoblèm ekonomik yo genyen, ba yo lapè, libere yo anba zak kriminèl, trete tout ras menm jan, bay edikasyon ak lasante, epi apre sa, montre yo se sèl Wayòm Bondye a ki pral fè bagay sa yo e ki pral satisfè tout lòt bon dezi lèzòm genyen yo nèt. — Sòm 145:16.

Fè efò pou w ede moun yo dispoze soumèt yo anba Wayòm nan, pou yo pami moun ki pral viv anba dominasyon Wayòm Jezi Kris ap dirije antanke Wa a. Atire atansyon yo sou mirak li te fè yo, ede yo konprann bagay sa yo se yon apèsi sou sa l pral fè antanke Wa nan syèl la. Pale ak yo souvan sou kalite l te demontre yo ki atiran (Mat. 8:2, 3; 11:28-30). Esplike yo li te bay lavi l pou nou e apre sa, Bondye te leve l e li ba l lavi imòtèl nan syèl la. Se detan nan syèl la Jezi ap dirije antanke Wa. — Tra. 2:29-35.

Ede yo byen konprann Wayòm Bondye a ap dirije nan syèl la kounye a. Men, ou dwe sonje, sitiyasyon pifò moun atann yo t ap wè kòm prèv ki montre Wayòm Bondye a ap dirije yo se pa sa yo wè an reyalite. Piske w konn sa, mande yo si yo konnen ki sa Jezi Kris te di ki t ap sèvi kòm prèv pou montre li kòmanse dirije antanke Wa. Montre yo kèk aspè nan siy ki gen plizyè pati nou jwenn nan Matye chapit 24, nan Mak chapit 13 oswa nan Lik chapit 21. Ansuit, mande yo poukisa se sitiyasyon sa yo ki vin gen sou tè a lè Kris monte sou twòn nan nan syèl la. Montre yo Revelasyon 12:7-10, 12.

Pou w ba yo yon prèv klè ki montre ki sa Wayòm Bondye a ap fè kounye a, li Matye 24:14 avèk yo epi pale sou pwogram ansèyman n ap fè sou Bib la nan lemonnantye jodi a (Iza. 54:13). Pale yo de divès lekòl Temwen Jewova yo genyen k ap ba yo fòmasyon sou Bib la, san yo pa peye pou sa. Esplike yo nou pa sèlman preche kay an kay, men tou, nou bay moun enstriksyon ki soti nan Bib la lakay yo nan plis pase 230 peyi. Yo ka resevwa enstriksyon sa a poukont yo oswa avèk fanmi yo. Ki gouvènman lèzòm ki anmezi pou l fè yon pwogram enstriksyon konsa nonsèlman pou moun l ap dirije yo, men tou, pou moun sou tout tè a? Envite yo nan Sal Wayòm nan, nan asanble ak nan kongrè Temwen Jewova yo pou yo wè ki jan enstriksyon sa a enfliyanse lavi moun. — Iza. 2:2-4; 32:1, 17; Jan 13:35.

Men, èske moun ou rankontre nan predikasyon yo ap rann yo kont sa konsène lavi pa yo tou? Avèk ladrès, ou ka montre yo objektif vizit ou a se pou w pale ak tout moun sou posiblite yo genyen pou yo viv anba dòminasyon Wayòm Bondye a. Ki jan yo ka chwazi viv anba dominasyon Wayòm nan? Se lè yo aprann sa Bondye vle yo fè e yo viv ann amoni ak sa li mande yo depi kounye a. — Det. 30:19, 20; Rev. 22:17.

Ede lòt moun mete Wayòm nan an premye nan lavi yo. Menm apre yon moun fin aksepte mesaj Wayòm nan, gen desizyon li dwe pran toujou. Ki enpòtans l ap bay Wayòm Bondye a nan lavi l? Jezi te egzòte disip li yo pou yo “kontinye chèche wayòm nan an premye”. (Mat. 6:33.) Ki jan nou kapab ede konpayon kretyen nou yo fè sa? Lè nou menm nou se bon egzanp e lè nou pale avèk yo sou posiblite nou tout gen devan nou pou nou fè sa. Pafwa, nou ka mande yon frè oswa yon sè si l te reflechi sou yon seri posiblite li gen devan l pou l sèvi e nou ka pataje kèk eksperyans avè l pou nou montre l sa lòt moun fè. Nou kapab ede frè ak sè nou yo fè sa tou lè nou egzamine avèk yo yon seri istwa nan Bib la yon fason ki fè lanmou yo genyen pou Jewova vin pi plis. Nou ka fè sa tou lè nou mete aksan sou Wayòm nan antanke yon gouvènman ki reyèl e lè nou mete aksan sou enpòtans travay predikasyon Wayòm nan genyen toutbonvre. Souvan, lè frè ak sè yo gen yon bagay pou yo fè, n ap jwenn pi bon rezilta si nou ede yo gen dezi pou yo fè l pase si nou di yo sa pou yo fè.

Pa gen dout nan sa, mesaj ki trèzenpòtan nou tout dwe preche a atire atansyon moun yo sitou sou Jewova Dye, sou Jezi Kris e sou Wayòm nan. Nou dwe mete aksan sou verite fondamantal ki konsène de moun sa yo e ki konsène Wayòm nan ni nan predikasyon, ni nan kongregasyon an, ni nan lavi nou. Lè nou fè sa, nou demontre nou vrèman byen pwofite fòmasyon Lekòl ministè teyokratik la ap bay la.