LESON 38
Montre nou apresye lavi ki se yon kado
Lefètke nou vivan, gen anpil bagay nou ka fè e gen anpil bagay nou ka pran plezi ladan yo. Menm lè nou gen pwoblèm, souvan, nou ka pran plezi nan kèk bagay nan lavi a. Ki jan nou ka montre nou apresye lavi ki se yon kado? E ki pi gwo rezon nou genyen pou nou apresye lavi?
1. Poukisa nou dwe apresye lavi?
Nou dwe apresye lavi paske se yon kado Jewova, Papa nou ki renmen nou an, ban nou. Li se “sous lavi a”, sa vle di se li ki kreye tout sa ki vivan (Sòm 36:9). “Se li menm ki bay tout moun lavi ak souf ak tout bagay.” (Travay 17:25, 28). Jewova ban nou sa nou bezwen pou nou kontinye viv. Men, anplis de sa, li ban nou posiblite pou nou pran plezi nan lavi a. — Li Travay 14:17.
2. Ki jan nou ka montre Jewova nou apresye lavi, ki se yon kado?
Depi lè w tonbe nan vant manman w, Jewova renmen w. Men sa youn nan sèvitè Jewova yo te di nan yon priyè nou jwenn nan Pawòl Bondye a: “Ou te wè m ak je w lè m te nan vant.” (Sòm 139:16). Jewova bay lavi w anpil valè. (Li Matye 10:29-31.) Sa t ap fè Jewova mal anpil si yon moun ta touye yon lòt moun, oubyen si l ta touye tèt lia (Egzòd 20:13). Sa t ap fè l mal tou si nou ta mete lavi nou an danje san nesesite oswa nou pa ta pran prekosyon pou n pwoteje lavi lòt moun. Lè nou pran swen tèt nou, e nou respekte lavi lòt moun, nou montre nou apresye lavi, ki se yon bèl kado.
FOUYE PLIS
Gade kèk fason w ka montre ou apresye lavi, ki se yon kado.
3. Pran swen sante w
Lefètke nou vwe lavi nou bay Jewova, nou ba l tout lavi nou pou nou sèvi l. Se kòmsi nou prezante kò nou kòm yon sakrifis ki fè Bondye plezi. Li Women 12:1, 2, epi reponn kesyon sa yo:
Ki sa k ta dwe ankouraje w pran swen sante w?
Bay kèk fason w ka fè sa.
4. Pran prekosyon pou w pa fè aksidan, pou w pa touye moun oswa pou w pa touye tèt ou
Bib la ankouraje nou pou n pa fè yon seri aksyon oswa pou n pa gen yon seri abitid ki ka reprezante yon danje. Gade VIDEYO a pou w aprann kèk bagay ou ka fè pou w pwoteje tèt ou ak lòt moun.
Li Pwovèb 22:3, epi fè yon ti pale sou fason ou menm ak lòt moun ka pwoteje tèt nou...
lè nou lakay nou.
lè nou nan travay nou.
lè n ap fè spò.
lè n ap kondui yon machin, yon moto oswa yon lòt bagay oubyen lè nou se pasaje.
5. Respekte lavi yon timoun ki nan vant manman l
David te esplike jan Jewova enterese ni nan lavi yon timoun ki nan vant manman l ni nan fason timoun nan ap devlope pandan l nan vant lan. Li Sòm 139:13-17, epi reponn kesyon sa a:
Nan je Jewova, ki lè lavi yon tibebe kòmanse, lè l tonbe nan vant manman l oswa lè l fèt?
Lwa Jewova te bay pou nasyon Izrayèl la te pwoteje manman yo ak tibebe ki nan vant yo. Li Egzòd 21:22, 23, epi reponn kesyon sa yo:
Ki jan Jewova konsidere yon moun ki touye yon tibebe ki nan vant san l pa fè espre?
Ki jan l t ap santi l si yon moun ta fè espre li touye yon tibebe nan vant manman lb?
Ki sa w panse de fason Bondye wè bagay yo?
Menm yon fi ansent ki rekonèt lavi gen anpil valè ka santi l devan yon sitiyasyon kote sèl chwa li genyen se jete timoun nan. Li Ezayi 41:10, epi reponn kesyon sa yo:
Si y ap fè presyon sou yon fi pou l jete yon timoun, nan men kiyès pou l chèche èd? Poukisa?
GEN MOUN KI DI: “Yon fi gen dwa pou l deside si wi ou non l ap jete yon pitit, paske kò l se pou li.”
Ki sa k fè w sèten Jewova bay lavi ni manman an ni tibebe ki nan vant lan valè?
SA W TE APRANN
Bib la aprann nou pou nou renmen lavi, ki se yon kado Jewova ban nou, pou nou respekte l e pou nou pwoteje l. Nonsèlman nou bezwen fè sa pou lavi pa nou, men tou, nou bezwen fè sa pou lavi pa lòt moun.
Revizyon
Poukisa lavi moun gen anpil valè pou Jewova?
Ki jan Jewova santi l lè yon moun fè espre li touye yon moun?
Poukisa w dwe montre w gen rekonesans pou lavi, ki se yon kado?
APRANN PLIS
Ki jan nou ka remèsye Jewova pou lavi ki se yon kado?
Èske Bondye ap padone yon fi ki te jete pitit? Chèche jwenn repons pou kesyon sa a.
Gade ki jan fason Bondye konsidere lavi ta dwe gen efè sou sa n ap chwazi fè pou nou detann nou yon fason pou n pa mete lavi nou an danje.
“Èske w ta dwe pratike ‘spò ki met lavi w an danje’?” (Reveye n! 8 oktòb 2000)
Gade ki jan Labib kapab ede yon moun ki anvi touye tèt li.
“Mwen vle mouri— Èske Bib la ka ede m lè m anvi touye tèt mwen?” (Atik sou Entènèt)
a Jewova gen anpil sousi pou moun kè yo ap fann (Sòm 34:18). Li konprann doulè yon moun genyen ki ka fè l santi l anvi touye tèt li, e li vle ede l. Pou w ka wè ki jan Bondye ka bay yon moun fòs pou l sispann anvi touye tèt li, gade atik ki gen tit: “Mwen vle mouri— Èske Bib la ka ede m lè m anvi touye tèt mwen?” ki nan seksyon Aprann plis nan leson sa a.
b Jewova ka padone moun ki te jete pitit, se sa k fè yo pa ta dwe santi yo koupab depase limit. Pou w jwenn plis enfòmasyon sou sa, gade atik ki gen tit “Ki sa Bib la di sou jete pitit?” ki nan seksyon Aprann plis nan leson sa a.