Egzanp travayè ki travay nan jaden rezen yo

Jezi fèk sot di moun ki t ap koute l Pere yo “anpil moun ki premye ap dènye, e moun ki dènye yo ap premye”. (Matye 19:30.) Li rakonte yon istwa sou travayè k ap travay nan yon jaden rezen pou l esplike sa l sot di a. Men sa l di:

“Wayòm syèl la sanble ak yon mèt kay ki soti granmmaten pou l al chèche moun vin travay nan yon jaden rezen li genyen. Lè l fin antann li ak travayè yo pou l peye yo yon denye pou jounen an, li voye yo nan jaden rezen l lan. Li soti ankò vè twazyèm èdtan nan jounen an, li wè lòt moun kanpe sou plas piblik la, yo pap fè anyen. Li di yo: ‘Nou menm tou, ale nan jaden rezen an, e m ap ban nou sa m dwe ban nou an.’ Konsa, yo ale nan jaden an. Li soti ankò vè sizyèm èdtan ak vè nevyèm èdtan nan jounen an, li fè menm bagay la. Finalman, vè 11^yèm èdtan nan jounen an, li soti e li jwenn lòt moun ki kanpe, li di yo: ‘Poukisa nou kanpe la a tout jounen an san nou pap fè anyen?’ Yo reponn: ‘Se paske pèsonn pa ban nou travay.’ Li di yo: ‘Nou menm tou, ale nan jaden rezen an.’” — Matye 20:1-7.

Petèt moun k ap koute Jezi yo ap panse ak Jewova lè yo tande Jezi pale de “Wayòm syèl la” ak ‘mèt kay la’. Ekriti yo pale de Jewova kòm mèt jaden rezen an ki reprezante nasyon Izrayèl la (Sòm 80:8, 9; Ezayi 5:3, 4). Yo konpare moun ki nan alyans Lalwa a ak travayè k ap travay nan jaden rezen an. Sepandan, Jezi t ap pale de yon sitiyasyon ki egziste nan epòk li a, men li pa t ap pale de yon bagay ki deja pase.

Chèf relijye yo, tankou Farizyen yo ki sot eseye teste l sou sijè divòs la, te dwe kontinye ap travay di nan sèvis Bondye a. Yo tankou travayè ki travay pandan tout jounen an k ap tann kòb jounen yo a. Yo te dwe peye yo yon denye pou jounen travay la.

Prèt yo ak lòt moun nan gwoup sa a konsidere Juif nan mas pèp la kòm moun ki pa fè anpil bagay nan sèvis y ap bay Bondye a, oubyen tankou travayè ki pa travay tout jounen nan jaden rezen Bondye a. Nan egzanp Jezi a, li montre gen mesye ki kòmanse travay “vè twazyèm èdtan nan jounen an” ​(9:00 a.m.) e genyen ki kòmanse travay ta nan jounen an nan sizyèm, nevyèm e finalman nan onzyèm èdtan nan jounen an (5:00 p.m.).

Yo konsidere gason ak fi k ap suiv Jezi yo kòm “moun modi”. (Jan 7:49.) Yo pase pifò tan nan lavi yo nan aktivite lapèch ak lòt aktivite. Donk nan otòn 29 epòk nou an, ‘mèt kay la’ te voye Jezi vin rele moun yo pa bay enpòtans yo pou yo vin travay pou Bondye kòm disip Kris. Yo tankou “dènye” gwoup moun Jezi te pale de li a, sa vle di travayè ki te vin travay nan jaden rezen an nan onzyèm èdtan an.

Pou Jezi fini ak egzanp li t ap bay la, li esplike sa k pase nan fen jounen travay la, li di: “Lè aswè rive, mèt jaden rezen an di mesye ki responsab travayè yo: ‘Rele travayè yo, epi peye yo lajan yo. Kòmanse sou moun ki te vin an dènye yo pou rive sou premye yo.’ Lè mesye yo te pran nan 11^yèm èdtan yo parèt, yo chak resevwa yon denye. Se sa k fè, lè sa k te la an premye yo parèt, yo te panse yo t ap jwenn plis, men yo peye yo yon denye tou. Lè yo resevwa kòb la, yo tonbe plenyen bay mèt jaden an, yo di: ‘Mesye sa yo ki vin an dènye travay inèdtan, epoutan, ou peye yo menm kantite lajan avèk nou, nou menm ki te fè tout jounen an ap travay di anba solèy cho a!’ Men, mèt jaden an reponn youn ladan yo, li di l: ‘Zanmi, mwen pa fè w anyen ki pa sa. Ou te antann avè m pou yon denye, se pa sa? Pran sa k pou ou a, epi ale. Se mwen ki vle bay moun sa a ki vin travay an dènye a menm kantite lajan avè w. Èske m pa gen dwa fè sa m vle ak sa ki pou mwen? Oswa, èske poutèt mwen bon an, sa fè w jalou?’ Se konsa dènye yo ap premye, e premye yo ap dènye.” — Matye 20:8-16.

Disip yo te ka ap poze tèt yo kesyon sou dènye pati nan egzanp Jezi bay la. Nan ki sans chèf relijye juif yo ki panse yo “premye” ap vin “dènye”? E nan ki sans disip Jezi yo ap vin “premye”?

Disip Jezi yo, Farizyen yo ak lòt moun konsidere kòm “dènye” yo te sou wout pou yo vin “premye” sa vle di pou yo peye yo tout jounen travay la. Lanmò Jezi t ap fè Bondye rejte Jerizalèm terès la pou l chwazi yon nouvo nasyon ki se “Izrayèl Bondye a”. (Galat 6:16; Matye 23:38.) Jan ki konn batize moun nan t ap pale de moun sa yo lè l te pale konsènan yon batèm ki gen pou vini anpalan de batèm lespri sen an. Moun ki te “dènye” yo t ap premye moun ki t ap resevwa batèm sa a e yo t ap gen privilèj pou yo bay temwayaj sou Jezi “jis nan zòn ki pi lwen sou tè a”. (Travay 1:5, 8; Matye 3:11.) Lè yo vin rive konprann chanjman senbolik Jezi ap pale a, petèt y ap gentan wè jan chèf relijye yo, k ap vin “dènye”, pap kontan ditou.