Yon lòt fwa ankò, apot yo ap chèche gen gwo pozisyon

Jezi ak disip li yo sot vwayaje nan sid Pere pou rive Jerizalèm epi yo travèse Rivyè Jouden an ki toupre Jeriko. Gen anpil lòt moun k ap vwayaje avèk yo pou y al nan fèt Pak ane 33 epòk nou an.

Jezi ap mache, li pran devan disip li yo e li detèmine pou li rive nan vil la atan pou fèt Pak la. Men, disip yo pè. Sa pa gen lontan depi Laza te mouri e Jezi t ap sot Pere pou l al Jide, Toma te di lòt disip yo: “Ann ale tou, pou nou ka mouri avè l.” ​(Jan 11:16, 47-53). Se sa k fè, li vrèman riske pou yo ale Jerizalèm e nou ka konprann sa k fè disip li yo dwe pè anpil.

Pou Jezi prepare yo pou sa k pral fèt la, li pran apot yo apa, li di yo: “N ap monte Jerizalèm. Yo pral livre Pitit lòm nan bay prèt an chèf yo ak espè nan Lalwa yo. Y ap kondane l amò e y ap livre l bay moun ki nan nasyon yo pou yo pase l nan rizib, pou yo bat li ak kout fwèt e pou yo kloure l sou yon poto pou li mouri, e sou twazyèm jou a Bondye ap leve l.” — Matye 20:18, 19.

Sa fè twazyèm fwa Jezi pale ak disip li yo konsènan lanmò l ak rezirèksyon l (Matye 16:21; 17:22, 23). Sepandan, nan moman sa a, li fè yo konnen yo pral touye l sou yon poto. Byenke yo tande sa l di a, yo pa rive konprann. Petèt se paske yo kwè li pral remete wayòm Izrayèl la sou pye ankò sou tè a, e y ap tann pou yo jwenn glwa ak onè ansanm ak Kris nan yon wayòm k ap sou tè a.

Pami moun k ap vwayaje ansanm pou al nan fèt Pak la, gen Salome, manman apot Jak ak Jan. Jezi te bay de apot sa yo yon non ki vle di “Pitit loray”, sandout paske yo gen gwo san (Mak 3:17; Lik 9:54). Depi kèk tan, de apot sa yo gen anbisyon pou yo nan gwo pozisyon nan Wayòm Kris la e yo fè manman yo konn sa. Kounye a, manman an al pale ak Jezi pou yo, li mete ajenou devan l e li mande l pou l fè yon bagay pou li. Men sa Jezi mande l: “Ki sa w vle?” Li di Jezi: “Bay lòd pou de pitit gason m yo chita bò kote w nan Wayòm ou an, youn adwat ou e lòt la agoch ou.” — Matye 20:20, 21.

Se Jak ak Jan ki te voye l al mande Jezi sa. Piske Jezi fèk sot di yo li gen pou l fè fas ak lawont e li gen pou l sibi imilyasyon, li di yo: “Mesye, nou pa konn sa n ap mande a. Èske nou ka bwè sa m pral bwè a?” Yo di l: “Nou kapab.” ​(Matye 20:22). Sanble, yo toujou pa vrèman konprann sa Jezi vle di yo.

Sepandan Jezi di yo: “Se vre, n ap bwè l, men kanta pou nou chita adwat mwen oswa agoch mwen, se pa mwen menm ki gen pou bay sa. Men, plas sa yo se pou moun Papa m te prepare yo yo ye.” — Matye 20:23.

Rive yon lè, dis lòt apot yo vin aprann sa Jak ak Jan te mande a, e yo fache. Petèt, sa pa gen twò lontan, se Jak ak Jan ki te pi cho lè apot yo t ap fè diskisyon pou yo konnen kiyès nan yo ki pi enpòtan (Lik 9:46-48). Demann yo fè kounye a montre douz apot yo pa koute konsèy Jezi te ba yo konsènan zafè konsidere tèt yo kòm moun ki gen mwens enpòtans lan. Yo toujou gen gwo anvi pou yo nan gwo pozisyon.

Donk, pou Jezi mete yon fen nan dènye diskisyon sa a ak nan divizyon sa ka lakòz, li rele douz apot yo ansanm. Li konseye yo avèk amou, li di: “Nou konnen moun yo rekonèt k ap dirije nasyon yo ap domine sou yo, e gwo zotobre yo ap dirije moun yo ak gwo ponyèt. Sa pa dwe fèt konsa nan mitan nou. Men, nenpòt moun ki vle vin enpòtan pami nou dwe vin sèvitè nou, e nenpòt moun ki vle premye pami nou dwe vin esklav nou tout.” — Mak 10:42-44.

Jezi bay egzanp yo ta dwe imite a anpalan de egzanp pa l, li di: “Pitit lòm nan pa t vini pou moun sèvi l, men li te vini pou l sèvi moun e pou l bay lavi l kòm ranson pou libere anpil moun.” ​(Matye 20:28). Jezi te sèvi lòt moun pandan anviwon twazan. E li t apral fè sa ankò jis nan pwen li bay lavi l pou limanite! Disip yo bezwen gen menm mantalite Kris te genyen ki te fè l vle sèvi lòt moun olye se lòt moun ki te sèvi l, e ki te fè l vle vin yon tipiti olye pou l nan yon gwo pozisyon.