“Nou pral sèvi m temwen”

1, 2. a) Ki moun ki pi gwo temwen Jewova? b) Ki sa non Jezi vle di, e ki fason Pitit Gason Bondye a te viv ann amoni ak siyifikasyon non sa a?

“MEN poukisa mwen fèt, e men poukisa mwen vini nan monn nan: pou m bay temwayaj sou laverite.” ​(Li Jan 18:33-37.) Se pawòl sa yo Jezi Kris te di gouvènè women ki t ap dirije Jide a nan moman yo t ap jije l la. Lè sa a, Jezi te fèk sot fè l konnen li se yon wa. Plizyè ane annapre, apot Pòl te pale konsènan kouraj Jezi te demontre a, lè l te di Jezi te “bay yon bèl temwayaj an piblik devan Pons Pilat”. (1 Tim. 6:13.) Vrèmanvre, pafwa, sa mande anpil kouraj pou yon moun vin yon ‘temwen ki fidèl e ki veridik’ nan monn sa a Satan ap dirije a ki chaje ak lahèn! — Rev. 3:14.

² Etandone Jezi te fè pati nasyon Juif la, li te yon temwen Jewova depi l fèt (Iza. 43:10). Sa klè, li te vin tounen pi gwo temwen Bondye te chwazi pou defann non L. Jezi te bay siyifikasyon non Bondye te ba li a anpil enpòtans. Lè yon zanj te fin di Jozèf, papa adoptif Jezi, Mari t apral vin ansent grasa lespri sen, men sa zanj lan te ajoute: “L ap fè yon pitit gason, e ou dwe rele l Jezi, paske li pral delivre pèp li a anba peche yo fè.” ​(Mat. 1:20, 21). An jeneral, moun k ap fè rechèch nan Bib la rekonèt non Jezi soti nan yon non ebre ki se Yechouwa, e non sa a, ki se yon fòm kout pou non Bondye, vle di: “Jewova se delivrans.” Ann amoni ak siyifikasyon non sa a, Jezi te ede “mouton ki pèdi ki fè pati pèp Izrayèl la” repanti pou peche yo yon fason pou yo te ka rejwenn favè Jewova (Mat. 10:6; 15:24; Lik 19:10). Konsa, Jezi te bay temwayaj konsènan Wayòm Bondye a avèk zèl. Men sa Mak, youn nan moun ki te ekri Evanjil yo, fè konnen: “Jezi al Galile, li t ap preche bon nouvèl Bondye a, li t ap di: ‘Tan ki te fikse a rive, e wayòm Bondye a vin pi pre. Se pou nou repanti, e se pou nou gen lafwa nan bon nouvèl la.’” ​(Mak 1:14, 15). Mete sou sa, avèk kouraj, Jezi te denonse chèf relijye Juif yo ki te kontribye pou yo te egzekite l sou yon poto. — Mak 11:17, 18; 15:1-15.

 3. Ki sa k te rive sou twazyèm jou apre yo te fin touye Jezi a?

³ Sou twazyèm jou apre yo te fin touye Jezi yon fason ki terib la, gen yon bagay estrawòdinè ki te rive! Jewova te resisite Jezi. Li pa t resisite l antanke moun, men, li te resisite l antanke yon kreyati espirityèl imòtèl (1 Pyè 3:18). Pou Seyè Jezi te bay prèv li retounen vivan ankò, li te pran fòm kò yon moun. Menm jou l te resisite a, li te parèt devan omwen senk nan disip li yo. — Mat. 28:8-10; Lik 24:13-16, 30-36; Jan 20:11-18.

 4. Ki reyinyon Jezi te fè jou l te resisite a, e ki responsablite li te fè disip li yo konnen ki t ap tann yo?

⁴ Senkyèm fwa Jezi te parèt devan moun se lè l te parèt devan apot li yo ansanm ak kèk lòt moun ki te reyini ansanm ak apot yo. Nan okazyon sa a moun pap janm bliye a, se kòmsi Jezi te etidye Pawòl Bondye a ak yo. Bib la di: “Li ouvri lespri yo nèt pou yo konprann Ekriti yo.” Konsa, yo te vin konprann Ekriti yo te gentan predi Jezi t ap gen pou l mouri anba men ènmi Bondye yo, e Bondye t ap fè yon mirak pou resisite l. Pou Jezi te fini reyinyon li te fè jou l te resisite a, li te fè moun ki t ap koute l yo konnen byen klè ki responsablite ki t ap tann yo. Li te di yo “grasa non l, yo gen pou yo preche yon mesaj repantans nan tout nasyon pou moun ka jwenn padon pou peche yo fè. Kòmanse depi Jerizalèm”. Men sa l te ajoute: “Nou gen pou nou bay temwayaj sou bagay sa yo.” — Lik 24:44-48.

5, 6. a) Poukisa Jezi te di “nou pral sèvi m temwen”? b) Ki bagay tounèf, ki gen rapò ak objektif Jewova, disip Jezi yo t ap gen pou yo anonse?

⁵ Kidonk, 40 jou annapre, sètadi dènye fwa Jezi te parèt devan apot li yo, apot yo te ka konprann ki sa l te vle di lè l te di yo pawòl sa yo ki senp, men, ki gen anpil fòs: “Nou pral sèvi m temwen nan Jerizalèm, nan tout Jide ak nan Samari, rive jis nan zòn ki pi lwen sou tè a.” ​(Tra. 1:8). Poukisa Jezi te di: “Nou pral sèvi m temwen”, olye l te di nou pral sèvi Jewova temwen? Jezi te kapab di yo pral sèvi Jewova temwen, men, moun li t ap pale avè yo a te Izrayelit, yon seri moun ki te deja temwen Jewova.

⁶ Kounye a, disip Jezi yo t apral gen pou yo anonse yon bagay tounèf ki gen rapò ak objektif Jewova, yon bagay ki pi enpòtan lontan pase delivrans Izrayelit yo te jwenn ni lè yo te esklav nan peyi Ejip la, ni lè yo te prizonye nan peyi Babilòn annapre a. Lanmò Jezi Kris ak rezirèksyon l te bay yon baz pou moun libere anba yon esklavaj ki pi mal lontan, anpalan de esklavaj peche ak lanmò. Nan Pannkòt ane 33 epòk nou an, disip Jezi Bondye te fèk chwazi pou al nan syèl yo te fè moun yo konnen “bagay estrawòdinè Bondye fè” yo, e anpil nan moun ki t ap koute yo te byen reyaji. Konsa, depi kote l te chita adwat Papa l nan syèl la, Jezi te kòmanse wè non l vin gen yon pi gwo siyifikasyon lè plizyè milye moun te repanti e yo te vin gen lafwa nan li kòm moun Jewova bay pou yo ka sove a. — Tra. 2:5, 11, 37-41.

 7. Ki sa evènman ki te rive nan jou Pannkòt ane 33 epòk nou an pwouve?

⁷ Evènman ki te rive nan jou Pannkòt ane 33 epòk nou an bay prèv ki montre Jewova te kontan aksepte sakrifis Jezi te bay antanke yon moun pafè a kòm yon reparasyon, oswa yon kouvèti pou peche nou (Ebre 9:11, 12, 24). Jan Jezi te fè konn sa a, li “pa t vini pou moun sèvi l, men li te vini pou l sèvi moun e pou l bay nanm li kòm ranson pou anpil moun”. (Mat. 20:28.) Se pa t Juif ki repanti yo sèlman ki t ap reprezante “anpil moun” ki t apral jwenn byenfè grasa ranson Jezi a. Olye de sa, volonte Bondye se pou “tout kalite moun sove” piske ranson an “retire peche monn nan!” — 1 Tim. 2:4-6; Jan 1:29.

 8. Jis nan ki pwen disip Jezi yo te bay temwayaj, e ki jan sa te fè posib?

⁸ Èske premye disip Jezi yo te gen ase kouraj pou yo te ka kontinye bay temwayaj konsènan Jezi? Se sèten yo te gen kouraj! Men, yo pa t fè sa ak pwòp fòs yo. Lespri sen Jewova ki pisan te motive yo e l te ba yo fòs pou yo te kontinye bay temwayaj. (Li Travay 5:30-32.) Anviwon 27 an apre Pannkòt ane 33 epòk nou an, yo te kapab di Juif ak moun lòt nasyon k ap viv “tout kote anba syèl la” te rive tande ‘mesaj verite konsènan bon nouvèl la’. — Kol. 1:5, 23.

 9. Jan yo te predi sa, ki sa k te rive kongregasyon kretyen an?

⁹ Malerezman, tikras pa tikras, kongregasyon kretyen an te kòmanse vin kòwonpi (Tra. 20:29, 30; 2 Pyè 2:2, 3; Jid 3, 4). Jan Jezi te fè konn sa, kalite apostazi sa a Satan, anpalan de “Mechan an”, t ap simaye a t ap gen pou l grandi e l t ap gen pou l toufe vrè Krisyanis la rive jis nan “fen sistèm nan”. (Mat. 13:37-43.) Apre sa, Jewova t ap gen pou l tabli Jezi Wa sou monn nan. Sa te rive nan mwa oktòb 1914, lè “dènye jou” sistèm mechan Satan an te kòmanse a. — 2 Tim. 3:1.

10. a) Konsènan ki dat enpòtan kretyen Bondye chwazi pou al nan syèl k ap vin nan epòk nou an te gentan pale? b) Ki sa k te rive nan mwa oktòb 1914, e ki jan sa te vin parèt aklè?

¹⁰ Kretyen Bondye chwazi pou al nan syèl k ap viv nan epòk nou an te gentan fè konnen mwa oktòb 1914 la t ap yon mwa ki enpòtan anpil. Yo te baze sa yo te di a sou pwofesi Dànyèl te bay konsènan yon gwo pyebwa yo te koupe e ki t ap gen pou grandi ankò apre “sèt tan”. (Dàn. 4:16, NW.) Nan pwofesi Jezi te bay konsènan moman prezans li ak “fen sistèm nan”, li te pale de menm peryòd sa yo tou e l te rele l “tan ki fikse pou nasyon yo”. Depi ane 1914 la, yon ane ki enpòtan anpil, ‘siy ki montre Kris prezan’ antanke nouvo Chèf tè a kontinye ap vin pi klè toujou pou tout moun ka wè (Mat. 24:3, 7, 14; Lik 21:24). Konsa, depi lè sa a, “bagay estrawòdinè Bondye fè” yo gen ladan l tabli Jewova te tabli Jezi kòm Wa sou monn nan.

11, 12. a) Ki sa nouvo Chèf tè a te kòmanse fè nan ane ki te vin apre gè a, anpalan de ane 1919 la? b) Ki lòt evènman ankò ki te kòmanse parèt aklè depi nan mitan ane 1930 yo? (Gade foto ki nan kòmansman atik la.)

¹¹ Antanke nouvo Chèf tè a, san pèdi tan, Jezi te kòmanse delivre disip li yo Bondye te chwazi pou al nan syèl la ki te nan kaptivite nan “Gran Babilòn nan”. (Rev. 18:2, 4.) Nan ane ki te vin apre gè a, anpalan de ane 1919 la, kretyen sa yo te jwenn posiblite pou yo bay yon temwayaj sou tout tè a konsènan mwayen Bondye bay pou moun jwenn delivrans lan e pou yo bay yon temwayaj konsènan bon nouvèl Wayòm nan ki te tabli a. Kretyen Bondye chwazi pou al nan syèl la te pwofite opòtinite sa a pou yo bay temwayaj. Kòm rezilta, gen plizyè milye lòt moun Bondye chwazi pou al nan syèl ki te vin rasanble pou yo vin eritye ak Kris.

¹² Depi mitan ane 1930 yo, yon fason klè, Kris te kòmanse rasanble plizyè milyon moun ki fè pati “lòt mouton” l yo ki t ap vin fòme yon “gwo foul moun” ki soti nan tout peyi. Anba direksyon kretyen Bondye chwazi pou al nan syèl yo, moun ki fè pati gwo foul moun sa a montre yo gen kouraj menm jan ak Jezi, e yo fè tout moun konnen se grasa Bondye ansanm ak Kris y ap sove. Lefètke moun sa yo kontinye andire nan travay bay temwayaj la epi yo kontinye egzèse lafwa nan ranson Kris la, yo pral gen privilèj pou yo chape vivan nan “gwo tribilasyon” an ki pral mete yon fen nan monn Satan an. — Jan 10:16; Rev. 7:9, 10, 14.

13. Antanke Temwen Jewova, ki detèminasyon nou pran, e ki sa k ka fè n gen asirans n ap reyisi?

¹³ Se pou nou kontinye ancheri privilèj nou genyen pou n bay temwayaj konsènan “bagay estrawòdinè” Jewova Dye ap fè yo ansanm ak pwomès li fè pou lavni yo. Vrèmanvre, li pa toujou fasil pou n rive bay yon temwayaj konsa. Gen anpil nan frè nou yo k ap preche nan tèritwa kote ki gen anpil moun ki pa renmen mesaj la, k ap pase yo nan rizib oswa k ap pèsekite yo anpil. Nou kapab annik fè sa apot Pòl ansanm ak konpayon travay li yo te fè a. Men sa Pòl te di: “Nou te mete kran sou nou grasa Bondye nou an, pou nou fè nou konnen bon nouvèl Bondye a nan mitan anpil opozisyon.” ​(1 Tes. 2:2). Kidonk, nou pa dwe janm bay legen. Olye de sa, nou dwe pran detèminasyon pou n rete fidèl ak ve nou te fè a jiskaske sistèm Satan an detwi nèt (Iza. 6:11). Nòmalman, nou pap ka rive fè sa ak pwòp fòs nou, men, menm jan ak premye kretyen yo, nou dwe priye Jewova pou l ban nou lespri sen l yon fason pou n gen “pisans ki depase yon pisans nòmal” la. — Li 2 Korentyen 4:1, 7; Lik 11:13.

14, 15. a) Ki jan yo te konsidere kretyen yo nan premye syèk epòk nou an, e ki sa apot Pyè te di yo? b) Ki santiman nou dwe genyen si n ap sibi move tretman poutèt nou se Temwen Jewova?

¹⁴ Jodi a, gen plizyè milyon moun di ki yo se kretyen, “men yo nye [Bondye] nan aksyon yo, paske moun sa yo detestab, yo dezobeyisan e yo pa kalifye pou okenn bon travay”. (Tit 1:16.) L ap bon pou n sonje nan premye syèk la, anpil moun, pou n pa di pifò moun, te rayi vrè kretyen yo. Se pou rezon sa a apot Pyè te ekri pawòl sa yo: “Si yo fè nou sibi move tretman pou non Kris, nou mèt kontan, paske [...] lespri Bondye, poze sou nou.” — 1 Pyè 4:14.

¹⁵ Èske nou ka aplike pawòl enspire sa yo pou Temwen Jewova yo jodi a? Wi. Rezon an se paske n ap bay temwayaj konsènan travay Jezi ap fè antanke Wa. Donk, lè yon moun rayi nou paske nou pote non Jewova, se kòmsi nou te “sibi move tretman pou non [Jezi] Kris”, li menm ki te di opozan l yo: “Mwen vini nan non Papa m, men nou pa resevwa m.” ​(Jan 5:43). Kidonk, pwochèn fwa w jwenn opozisyon nan travay bay temwayaj la, pa dekouraje! Lefètke yo trete nou konsa, sa bay prèv ki montre nou gen apwobasyon Bondye, e sa montre lespri sen Bondye “poze sou nou”.

16, 17. a) Ki eksperyans pèp Jewova a fè plizyè kote sou tè a? b) Ki sa w detèmine pou w fè?

¹⁶ Anmenmtan tou, nou dwe sonje gen yon bèl akwasman k ap fèt plizyè kote sou tè a. Menm nan tèritwa nou byen travay yo, nou toujou jwenn moun ki dispoze koute, yon seri moun nou ka pataje bèl mesaj k ap bay lavi a avèk yo. Se pou n chofe pou n retounen vizite moun ki enterese yo, e si sa posib, pou n kòmanse etidye Labib avèk yo, toutpandan n ap ede yo pwogrese jiskaske yo vwe lavi yo bay Bondye e yo batize. Konsa, ou kapab santi w menm jan ak Sarie k ap viv Afrik disid e ki te toujou aktif nan travay predikasyon an pandan plis pase 60 an. Men sa l di: “Mwen gen anpil rekonesans paske grasa sakrifis ranson Jezi a, mwen gen yon bon relasyon ak Jewova, Chèf linivè a, e m kontan dèske m ka fè moun konnen non l, yon non ki gen anpil glwa.” Li menm ak Martinus, mari l, te ede anpil moun vin sèvi Jewova, san wete twa timoun. Men sa Sarie di ankò: “Pa gen okenn lòt aktivite ki bay tout satisfaksyon sa yo, e Jewova ban nou fòs nou bezwen an, pa mwayen lespri sen l, pou n kontinye fè travay sa a k ap sove lavi moun.”

¹⁷ Kit nou batize, kit n ap travay pou n atenn objektif sa a, nou gen anpil rezon pou n rekonesan pou privilèj nou genyen pou n fè pati kongregasyon Temwen Jewova yo ki sou tout tè a. Kidonk, ann kontinye bay temwayaj toutpandan n ap fè tout sa n kapab pou n rete pwòp nan monn sa a Satan ap dirije a, yon monn ki pa pwòp. Lè nou fè sa, n ap onore Papa nou ki nan syèl la, li menm nou gen privilèj pote non l lan, yon non ki gen anpil glwa!