Onore maryaj: Yon dispozisyon Bondye pran

1, 2. Ki sa Ebre 13:4 dwe pouse nou fè?

ÈSKE W renmen onore Jewova? Se sèten ou renmen fè sa! Li merite pou w onore l e li pwomèt l ap onore w tou (1 Sam. 2:30; Pwo. 3:9; Rev. 4:11). Mete sou sa, li vle w onore lòt moun, tankou ofisyèl nan gouvènman yo (Wom. 12:10; 13:7). Men, gen yon domèn kote nou sitou bezwen demontre onè: Se nan maryaj.

² Men ki sa apot Pòl te ekri: “Se pou tout moun onore maryaj, e se pou kabann maryaj la san salte.” (Ebre 13:4). Se pa t yon senp deklarasyon Pòl te fè. Men, li te di pawòl ki nan vèsè a pou l ankouraje chak kretyen pou yo konsidere maryaj kòm yon bagay ki gen anpil valè. Èske se konsa w wè maryaj an jeneral oswa se konsa w wè maryaj pa w si w marye?

 3. Ki konsèy enpòtan Jezi te bay konsènan maryaj? (Gade foto ki nan kòmansman atik la.)

³ Si w onore maryaj, ebyen konnen ou suiv pi bon egzanp ki te ka genyen an. Jezi te onore maryaj. Lè Farizyen yo te poze Jezi kesyon sou divòs, li te fè referans ak sa Bondye te di konsènan premye maryaj la lè l te di: “Se poutèt sa, yon gason ap kite papa l ak manman l, e yo de a ap vin yon sèl chè.” Apre sa, li di: “Sa Bondye mete anba menm jouk, pinga lòm separe l.” — Li Mak 10:2-12; Jen. 2:24.

 4. Ki prensip Jewova te bay sou maryaj?

⁴ Donk, Jezi te dakò se Bondye ki vin ak maryaj e li te montre enpòtans pou maryaj la dire nètale. Bondye pa t di Adan ak Èv yo te ka divòse si yo vle. Prensip li te bay nan maryaj ki te fèt nan jaden Edenn nan se pou yon gason gen yon sèl madanm, e se pou “yo de a” ret ansanm nètale.

 5. Ki efè lanmò gen sou maryaj?

⁵ Nou konnen peche Adan an te vin lakòz kèk chanjman nan maryaj. Youn nan yo se lanmò, paske lanmò gen efè sou maryaj. Nou ka wè sa nan pawòl apot Pòl te ekri lè l te di kretyen yo pa anba Lalwa Moyiz la. Li te fè konnen lanmò met fen nan maryaj, e moun ki vivan an te ka remarye annapre. — Wom. 7:1-3.

 6. Ki jan Lalwa Moyiz la te montre pwennvi Bondye gen sou maryaj?

⁶ Lwa Bondye te bay nasyon Izrayèl la te bay yon seri detay sou maryaj. Li te pèmèt yon gason gen plizyè madanm. E pratik sa a te la depi anvan Bondye te bay Lalwa pou pèp Izrayèl la. Men, lefètke yo te bay règ sou sa, sa te anpeche moun fè abi. Pa egzanp, si yon Izrayelit te marye ak yon esklav, apre sa li te vin gen yon dezyèm madanm, li pa t dwe diminye sou sa l te konn bay premye madanm nan, tankou manje, rad ak afeksyon li te dwe ba li antanke mari. Bondye te mande pou l pwoteje madanm nan e pou l pran swen l (Egz. 21:9, 10). Nou pa anba Lalwa, men Lalwa fè nou wè jan Jewova bay maryaj enpòtans. Èske sa pa ede w gen anpil respè pou maryaj?

7, 8. a) Selon Detewonòm 24:1, ki sa Lalwa te di sou divòs? b) Ki jan Jewova wè divòs?

⁷ Ki sa Lalwa te di sou divòs? Bondye te toujou bay maryaj anpil valè, epoutan li te pèmèt moun divòse. (Li Detewonòm 24:1.) Yon gason Izrayelit te ka divòse ak madanm li si l te “jwenn yon bagay nan li ki pa kòrèk”. Lalwa pa t di ki sa bagay ki “pa kòrèk” la ye. Sandout se te yon bagay ki te fè moun wont oubyen ki te grav, se pa t yon ti bagay piti (Det. 23:14). Malerezman, rive nan epòk Jezi a, anpil Juif te konn divòse “pou nenpòt rezon”. (Mat. 19:3.) Se sèten, nou pa t ap renmen aji menm jan ak yo.

⁸ Pwofèt Malachi te fè konnen fason Bondye wè divòs. Li te fè sa nan yon epòk kote byen souvan gason yo te konn aji an trèt lè yo divòse ak ‘madanm yo te marye avè l depi yo jèn nan’. Petèt yo te fè sa pou y al marye ak yon fi payen ki pi jèn. Men sa Malachi te di sou fason Bondye wè bagay yo: “Mwen rayi divòs.” (Mal. 2:14-16). Sa te ann amoni ak sa Pawòl Bondye a te di sou premye maryaj la. Li te di: “[Yon gason] pral atache ak madanm li, e y ap vin yon sèl chè.” (Jen. 2:24). Jezi te soutni pwennvi Papa l gen sou maryaj la. Li te di: “Sa Bondye mete anba menm jouk, pinga lòm separe l.” — Mat. 19:6.

 9. Kòman nou ka konprann pawòl Jezi te di nan Mak 10:11, 12 yo?

⁹ Gen moun ki gendwa ap mande: ‘Èske gen yon rezon ki pèmèt yon kretyen divòse epi pou l remarye?’ Ebyen, Jezi te fè konnen pwennvi l gen sou divòs. Li te di: “Nenpòt moun ki divòse ak madanm li e k al marye ak yon lòt fi, moun sa a fè adiltè sou madanm li. Epi, si yon fi divòse ak mari l, l al marye ak yon lòt gason, fi sa a fè adiltè.” (Mak 10:11, 12; Lik 16:18). Sa klè, Jezi te onore maryaj e li vle pou lòt moun fè sa tou. Yon gason ki divòse ak madanm li ki fidèl (oubyen yon fi ki divòse ak mari l ki fidèl) pou yon rezon kèlkonk e k al marye ak yon lòt moun fè adiltè. Paske, lè yon moun annik divòse ak mari l oubyen ak madanm li, sa pa mete fen nan maryaj la. Nan je Bondye, de moun sa yo fè “yon sèl chè” toujou. Mete sou sa, Jezi te di si yon gason divòse ak madanm li ki fidèl, li ka lakòz madanm nan tonbe nan adiltè. Kòman sa? Nan epòk sa a, yon fi mari l te divòse avè l te ka santi li oblije remarye yon fason pou l ka jwenn sa l bezwen nan domèn materyèl. Nan yon ka konsa, si l remarye, li t ap fè adiltè.

10. Ki rezon ki ka pèmèt yon kretyen divòse e pou l lib pou l remarye?

¹⁰ Jezi te di ki sa k ka mete fen nan yon maryaj. Li te di: “M ap di nou sa: Nenpòt moun ki divòse ak madanm li, eksepte pou imoralite seksyèl [pòneya an grèk], e k al marye ak yon lòt fi, moun sa a fè adiltè.” (Mat. 19:9). Li te di menm bagay la nan Diskou li te bay sou mòn nan (Mat. 5:31, 32). Jezi te pale de “imoralite seksyèl” toule de fwa sa yo. Ekspresyon sa a fè referans ak yon pakèt peche ki gen rapò ak relasyon seksyèl ki pa fèt nan kad maryaj ant yon gason ak yon fi. Sa gen ladan l adiltè, pwostitisyon, relasyon seksyèl ant de moun ki pa marye, gason k ap kouche ak gason, fi k ap kouche ak fi, moun k ap fè sèks ak bèt. Si pa egzanp, yon gason ki marye ta fè imoralite seksyèl, madanm li ap deside si l ap divòse avè l oubyen si l pap divòse avè l. Si l divòse avè l, Bondye pap konsidere yo kòm de moun ki marye ankò.

11. Pou ki rezon yon kretyen ka deside li pap divòse menm lè Labib pèmèt li fè sa?

¹¹ N ap remake Jezi pa t di de moun marye dwe divòse si youn nan yo ta fè imoralite (pòneya). Pa egzanp, yon madan marye ka chwazi rete ak mari l menmsi mari a te fè imoralite. Li gendwa toujou renmen mari l, li gendwa vle padone l, epi met ansanm avè l pou yo amelyore maryaj yo. An reyalite, si l ta divòse epi l pa remarye, li gendwa fè fas ak kèk difikilte. Ki sa l ap fè pou l jwenn sa l bezwen pou l viv oubyen pou l satisfè dezi seksyèl li genyen? Èske li pap santi l poukò l? E si l gen pitit pou l okipe? Èske si l divòse sa ka fè l pi difisil l pou l leve yo nan laverite (1 Kor. 7:14)? Sa klè, moun ki inosan ki divòse a ka gen gwo pwoblèm.

12, 13. a) Ki sa k te vin pase nan maryaj Oze? b) Pou ki rezon Oze te retounen ak Gomè, e ki sa nou ka aprann jodi a nan sa k te rive a?

¹² Eksperyans pwofèt Oze te fè a aprann nou anpil bagay sou fason Bondye wè maryaj. Bondye te di Oze pou l marye ak yon fi (Gomè) ki t ap “gen pou l aji tankou yon pwostitye” e ki t ap fè pitit “lè l aji tankou pwostitye a”. Gomè “te vin ansent e li te fè yon pitit gason pou Oze”. (Oze 1:2, 3.) Annapre, li te vin gen yon pitit fi ak yon pitit gason li te fè pou yon lòt gason. Malgre Gomè te plede fè adiltè, Oze pa t kite l. Finalman, li te kite Oze e li te vin yon esklav. Aktout sa, Oze te tounen avè l (Oze 3:1, 2). Jewova te sèvi ak Oze pou l montre jan li pa t sispann padone Izrayelit yo ki pa t fidèl avè l. Ki sa nou ka aprann nan sa k te rive a?

¹³ Si mari oswa madanm yon kretyen ta fè imoralite, kretyen ki inosan an gen pou l pran yon desizyon. Jezi te di kretyen ki inosan an t ap gen yon rezon ki pèmèt li divòse e pou l lib pou l remarye. Yon lòt bò, mari oswa madanm ki kretyen an ka deside padone l. Se pa t ap yon peche. Oze te tounen ak Gomè. Yonfwa Gomè te tounen ak Oze, Gomè pa t gen dwa gen relasyon ak okenn lòt gason. Oze pa t “gen relasyon” ak Gomè pandan yon tan (Oze 3:3, nòt). Rive yon lè, petèt Oze te rekòmanse gen relasyon seksyèl ak madanm li. Sa te montre jan Bondye te vle repran pèp li a e jan li te vle retounen zanmi yo ankò (Oze 1:11; 3:3-5). Ki sa sa vle di pou moun ki marye jodi a? Si yon mari oswa yon madanm ki inosan ta rekòmanse gen relasyon seksyèl ak moun li marye a, sa t ap montre li padone l e li deside pwoteje maryaj la (1 Kor. 7:3, 5). Lè l aji konsa, li montre li anile rezon li te genyen pou l divòse a. Apre sa, yo de a ta dwe travay ansanm pou yo wè maryaj la menm jan ak Bondye.

14. Selon 1 Korentyen 7:10, 11, ki sa k ka rive nan yon maryaj?

¹⁴ Tout kretyen dwe fè efò pou yo respekte maryaj, jan Jezi ak Jewova fè sa. Men, gen kèk moun ki pa rive fè sa, paske lèzòm enpafè (Wom. 7:18-23). Donk, sa pa dwe fè n sezi lefètke kèk kretyen nan premye syèk la te jwenn pwoblèm nan maryaj yo. Selon sa Pòl te ekri, “yon madanm pa dwe separe ak mari l”. Aktout sa, gen kèk ka kote sa te rive. — Li 1 Korentyen 7:10, 11.

15, 16. a) Ki objektif moun ki marye yo ta dwe genyen menmsi yo jwenn pwoblèm nan maryaj yo, e poukisa? b) Ki sa k fè nou ta dwe gen menm objektif la menmsi moun nou marye avè l la pa kwayan?

¹⁵ Pòl pa t esplike ki sa k ka lakòz moun ki marye yo separe. Pwoblèm nan se pa paske mari a fè imoralite, sa ki ta bay madanm nan rezon pou l divòse epi pou l remarye. Selon sa Pòl te ekri, yon madanm ki separe ak mari l dwe “rete san l pa marye, oubyen se pou l rekonsilye ak mari l”. Konsa, yo toule de toujou rete ini nan je Bondye. Pòl te fè konnen kèlkeswa pwoblèm ki ta genyen an, depi se pa imoralite seksyèl, objektif yo se ta dwe rekonsilye. Yo toude kapab chèche konsèy ki baze sou Bib la nan men ansyen nan kongregasyon an. Toutpandan ansyen yo ap evite gen patipri, yo kapab ba yo konsèy ki baze sou Bib la.

¹⁶ Sitiyasyon an ka pi konplike si se sèlman youn nan moun yo ki kwayan e k ap chèche viv selon prensip Bondye yo. Nan ka sa a, èske separasyon se pi bon solisyon an? Jan nou te wè sa, Labib fè konnen imoralite seksyèl se yon rezon ki ka fè yon moun divòse, men li pa bay detay sou divès rezon ki ka fè yon moun separe. Men sa Pòl te ekri: “Si yon madanm gen mari l ki pa kwayan, e mari a dakò rete ak li, li pa dwe kite mari a.” (1 Kor. 7:12, 13). Sa aplikab tou nan epòk nou an.

17, 18. Poukisa gen kèk kretyen ki rete ak moun yo marye avè l la menm lè gen pwoblèm nan maryaj la?

¹⁷ Nou rekonèt gen kèk ka kote yon “mari ki pa kwayan” montre li pa “dakò rete ak” madanm nan. Mari a ka vyolan anpil e sa ka menm fè madanm nan santi lavi l an danje. Mari a ka refize pran swen fanmi an oswa li ka met relasyon madanm nan gen ak Bondye an danje. Nan ka sa yo, gen kèk kretyèn ki deside, kèlkeswa sa mari a ta di, fason l aji montre li pa “dakò rete” ak madanm nan e yo oblije separe. Men, gen lòt kretyèn ki nan menm sitiyasyon difisil sa a ki deside rete. Yo andire e yo eseye fè efò pou yo amelyore sitiyasyon an. Poukisa?

¹⁸ Menmsi yo separe, yo toujou mari ak madanm. Si yo pap viv menm kote, yo chak ka jwenn pwoblèm, jan sa parèt pi wo a. Apot Pòl te bay yon lòt rezon pou moun ki marye yo rete ansanm. Men sa l te ekri: “Mari ki pa kwayan an vin sen parapò ak madanm li, e madanm ki pa kwayan an vin sen parapò ak frè a. Si se pa t sa, pitit nou yo pa t ap pwòp, men kounye a, yo sen.” (1 Kor. 7:14). Anpil kretyen ki fidèl ret ansanm ak moun yo marye avè l la ki pa kwayan, menm lè sitiyasyon yo difisil anpil. Yo pa regrèt yo te fè sa sitou lè yo wè moun yo marye avè l la vin ap adore Jewova menm jan avè yo. — Li 1 Korentyen 7:16; 1 Pyè 3:1, 2.

19. Sa k fè gen anpil maryaj ki reyisi nan òganizasyon Bondye a?

¹⁹ Jezi te pale konsènan divòs e apot Pòl te bay konsèy ki soti nan Bondye sou separasyon. Yo toule de te vle pou moun k ap sèvi Bondye onore maryaj. Jodi a, sou tout tè a, chaje maryaj ki reyisi nan òganizasyon Bondye a. Sandout, gen anpil moun marye ki gen kè kontan nan kongregasyon an. Frè nan kongregasyon an se frè ki fidèl, yo renmen madanm yo e madanm yo ki fidèl renmen yo e yo respekte yo. Yo tout montre moun ka onore maryaj. Nou kontan paske gen plizyè milyon moun ki montre pawòl ki nan vèsè ki vin apre yo se laverite: “Se pou rezon sa a, yon gason ap kite papa l ak manman l e li pral atache ak madanm li, e yo de a ap vin yon sèl chè.” — Efe. 5:31, 33.