Poukisa disip Jezi yo pa fè jèn?

Kèk tan apre Jezi te fin asiste fèt Pak ane 30 epòk nou an, yo mete Jan ki konn batize moun nan nan prizon. Jan vle pou disip li yo vin disip Jezi, men, se pa yo tout ki vin disip Jezi pandan mwa Jan gentan pase nan prizon yo.

Kounye a, fèt Pak ane 31 epòk nou an ap pwoche, e gen kèk nan disip Jan yo ki vin kot Jezi epi yo mande l: “Poukisa nou menm ak Farizyen yo nou fè jèn, men disip pa w yo pa fè jèn?” ​(Matye 9:14). Farizyen yo te konsidere fè jèn kòm yon pratik relijye. Yon lè Jezi te menm pran egzanp yon Farizyen, ki jis nan je pa l, k ap priye konsa: “O Bondye, mwen di w mèsi dèske mwen pa tankou lòt moun yo [...]. Mwen fè jèn de fwa pa semèn.” ​(Lik 18:11, 12). Petèt, se menm koutim fè jèn nan disip Jan yo ap suiv. Li posib tou se paske Jan nan prizon ki fè yo fè jèn pou montre yo nan lapenn, e y ap mande tèt yo poukisa disip Jezi yo pa fè jèn, petèt pou montre yo nan lapenn pou sa k rive Jan an.

Jezi ba yo yon egzanp, li di: “Toutotan lemarye a la avèk zanmi l yo, yo pa gen okenn rezon pou yo nan lapenn, pa vre? Men, gen jou k ap vini kote y ap pran lemarye a nan men yo, lè sa a y ap fè jèn.” — Matye 9:15.

Jan li menm te pale de Jezi antanke Lemarye a (Jan 3:28, 29). Se sa k fè, pandan Jezi la avèk yo, disip Jezi yo pa wè li bon pou yo fè jèn. Men, apre Jezi mouri, disip li yo t apral nan lapenn e yo pa t ap anvi manje. Men, sa t ap chanje lè Bondye resisite Jezi! Kidonk, yo pa t ap gen okenn rezon ankò pou yo fè jèn pou montre yo nan lapenn.

Apre sa, Jezi bay de egzanp sa yo: “Pèsonn pap pyese yon vye rad ak yon moso twal nèf. Paske, moso twal nèf la ap pati ak moso nan vye rad la, e rad la ap vin chire plis toujou. Nitou, pèsonn pap mete diven ki fèk fèt nan vye bidon ki fèt ak po bèt. Si yo fè sa, bidon yo ap pete, diven an ap koule atè e bidon yo ap tou pa itil anyen ankò. Men, moun met diven ki fèk fèt nan bidon nèf ki fèt ak po bèt.” ​(Matye 9:16, 17). Ki sa Jezi vle di?

Jezi te bay egzanp sa yo pou l te ka ede disip Jan ki te konn batize moun nan konprann pèsonn pa ta dwe atann pou disip pa l yo konfòme yo ak ansyen koutim ki nan relijyon juif la, tankou koutim fè jèn nan. Jezi pa t vin pou l pyese ansyen koutim Juif yo t ap suiv nan fason yo adore Bondye, ni li pa t vin pou l kontinye kenbe koutim sa yo ki te rive nan moman pou yo rejte yo. Adorasyon Jezi t ap ankouraje a pa t gen pou l konfòme l ak relijyon Juif yo t ap pratike nan epòk la, yon relijyon ki chaje ak tradisyon lèzòm. Non, li pa t ap sanble ni ak yon moso twal nèf yo pyese sou yon vye rad, ni ak diven ki fèk fèt yo mete nan yon vye bidon an po ki vin di.