Pwofesi yo te anonse sou Mesi a

IZAYI ak lòt pwofèt yo te ekri yon seri pwofesi sou Mesi a, se sa k fè pandan anpil tan nasyon juif la t ap tann li vini. Anfèt, nan epòk Jezi a, te gen anpil Juif ki “ t’ap tann ” Mesi a parèt (Lik 3:15). Li enteresan pou n note pwofesi ki nan Bib la te bay yon seri enfòmasyon remakab sou lavi Mesi a. Pa gen moun sou tè a ki t ap kapab anonse evènman sa yo e ki t ap kapab fè yo reyalize sou Jezi.

Sa yo te anonse konsènan nesans Mesi a. Izayi te anonse se yon fi ki vyèj ki t ap manman Mesi a, Kris la. Men sa Matye te ekri apre l te fin dekri mirak ki te fè Jezi fèt la : “ Tou sa pase konsa pou pawòl Bondye te mete nan bouch pwofèt la te ka rive vre. Men sa l’ te di : Men li, jenn fi a pral ansent, li pral fè yon pitit gason. ” ​(Matye 1:22, 23 ; Izayi [Ezayi] 7:14). Izayi te anonse tou Kris la t ap yon desandan David, paske li te nonmen non Jese, papa David. E vrèman, Jezi se te yon desandan David (Matye 1:6, 16 ; Lik 3:23, 31, 32). Konsa, anvan Jezi te fèt, zanj Gabriyèl te di Mari, manman Jezi : “ Bondye nou, va fè l’ wa tankou David, gran granpapa li. ” — Lik 1:32, 33 ; Izayi 11:1-5, 10 ; Women 15:12.

Sa yo te anonse konsènan lavi Mesi a. Jezi te gentan yon granmoun lè l t al nan sinagòg Nazarèt la e li te li yon pòsyon nan pwofesi Izayi a awotvwa ki te gen pawòl ki vin apre yo ladan l : “ Lespri Bondye a sou mwen. Li chwazi m’ pou m’ anonse bon nouvèl la bay pòv yo. ” Apre sa, Jezi te aplike pwofesi sa a sou tèt li, li te di : “ Jòdi a, pandan n’ap tande pawòl ki ekri la a, li rive vre. ” ​(Lik 4:17-21 ; Izayi 61:1, 2). Izayi te anonse atitid Jezi t ap genyen parapò ak moun ki te bezwen gerizon yo. Li te montre li t ap janti avèk yo, li t ap dou avèk yo e li pa t ap atire atansyon sou li. E men sa Matye ekri anrapò ak sa : “ Yon gwo foul moun t’ap mache deyè li. Li geri tout moun malad yo. Men, li te pale sevè ak yo pou yo pa t’ di ki moun li te ye. Tou sa pase konsa, pou pawòl pwofèt Ezayi te di a te ka rive vre : [...] Li p’ap diskite ak pèsonn, li p’ap rele sou pèsonn. [...] Li p’ap fin kase pye wozo ki panche a. ” — Matye 8:16, 17 ; 12:10-21 ; Izayi 42:1-4 ; 53:4, 5.

Sa yo te anonse konsènan soufrans Mesi a t ap gen pou l sibi. Izayi te anonse pifò moun ann Izrayèl pa t ap aksepte Mesi a e li t ap vin “ yon wòch k’ap fè moun bite ”. (1 Pyè 2:6-8 ; Izayi 8:14, 15.) Vrèmanvre, malgre Jezi te fè anpil mirak, pèp la “ pa t’ kwè nan li. Se konsa, pawòl pwofèt Ezayi te di a te rive vre : Bondye, kilès ki te kwè mesaj nou te bay la ? ” ​(Jan 12:37, 38 ; Izayi 53:1). Yon bagay ki fè Juif yo pa t gen lafwa nan Jezi, se paske pifò nan yo te panse kou Mesi a vini, li t ap retire nasyon yo a anba dominasyon Women yo e li t ap retabli wayòm David la sou tè a, yon wayòm ki t ap endepandan. Yo pa t gen okenn rezon pou yo panse konsa. Anplis, piske Jezi te soufri e li te mouri, yo pa t ka aksepte l se Mesi a. An reyalite, Izayi te anonse Mesi a t ap soufri anvan l vin Wa.

Nan pwofesi Izayi a, men pawòl Mesi a di : “ Mwen pare do m’ bay moun k’ap bat mwen yo. [...] Mwen pa kache figi m’ lè y’ap joure m’, lè y’ap krache sou mwen. ” Matye esplike sa k te rive lè yo t ap jije Jezi. Li di : “ Yo pran krache nan figi l’, yo tonbe ba l’ kout pwen. Gen ladan yo ki ba l’ souflèt. ” ​(Izayi 50:6 ; Matye 26:67) Men sa Izayi te ekri : “ Yo te maltrete l’, men [...] li pa t’ janm louvri bouch li di krik. ” Se sa k fè lè Pilat te poze Jezi kesyon konsènan akizasyon Juif yo te mete sou do l, Jezi ‘ pa t ba l’ repons sou anyen. Sa te fè Pilat sezi anpil ’. — Izayi 53:7 ; Matye 27:12-14 ; Travay 8:28, 32-35.

Sa yo te anonse konsènan lanmò Mesi a. Pwofesi Izayi a te kontinye akonpli lè Jezi te mouri, e menm apre sa. Men sa Izayi te anonse : “ Yo antere l’ menm kote ak mechan yo. [...] Yo mete l’ nan yon kavo nan mitan tonm moun rich yo. ” ​(Izayi 53:9). Ki jan pwofesi sa a ki parèt gen kontradiksyon ladan l t apral rive akonpli ? Jezi te mouri sou yon poto nan mitan de vòlè (Matye 27:38). Men annapre, Jozèf, yon mesye ki te rich anpil ki te moun Arimate, te mete kò Jezi nan pwòp kav pa l, yon kav yo te fèk fouye nan yon mas wòch (Matye 27:57-60). Finalman, lanmò Jezi te reyalize youn nan aspè ki pi enpòtan nan pwofesi Izayi a. Men sa Izayi te di anrapò ak Mesi a : “ Li te sèvi Bondye yon jan ki kòrèk nèt. Li te pran chatiman anpil moun sou do l’. L’a fè Bondye fè yo gras. ” Vrèman, lanmò Jezi te sèvi kòm ranson pou retire peche ki tankou yon pwa lou sou do tout moun ki fidèl yo. — Izayi 53:8, 11 ; Women 4:25.

Nou gen asirans pwofesi yo ap reyalize

Ni apot yo ni Jezi te plis sèvi ak pwofesi Izayi a pase nenpòt lòt liv nan Ekriti ebrayik yo pou yo te ka bay prèv biblik konsènan idantite Mesi a. Malgre sa, se pa sèl liv Izayi a ki anonse sa k pral rive alavni. Gen yon pakèt lòt pwofesi nan Ekriti ebrayik yo ki te akonpli sou Jezi, sou Wayòm li an e sou bon bagay Wayòm sa a pral akonpli alavnia (Travay 28:23 ; Revelasyon 19:10). Ki sa k te bay garanti pwofesi sa yo t ap akonpli ? Men sa Jezi te di Juif ki t ap koute l yo : “ Pa panse, mwen vini pou mwen aboli oubyen lalwa oubyen pwofesi yo [sètadi Ekriti ebrayik yo]. Mwen pa vin aboli yo. Okontrè, mwen vin akonpli yo. Vrèmanvre m ap di nou sa franchman : Toutotan syèl la ak tè a pa disparèt, menm yon yota oubyen yon pwen pap disparèt nan lalwa pou jiskaske lalwa akonpli. ” — Matye 5:17, 18, Bib Kreyòl La : Nouvo Testaman.

Anplis, Jezi te montre te gen pwofesi ki t ap akonpli nan epòk pa l la e gen lòt pwofesi ki ta gen pou yo akonpli annapre (Dànyèl 9:27 ; Matye 15:7-9 ; 24:15). Jezi ak disip li yo te anonse evènman ki t ap gen pou rive apre epòk yo a, sa gen ladan l anpil pwofesi nou wè k ap reyalize jodi a. Atik ki vin apre a pral pale sou pwofesi sa yo ak lòt pwofesi nan Bib la ki poko akonpli.

[Nòt anba paj]

[Foto nan paj 12]

“ Jenn fi a pral [...] fè yon pitit gason. ”

[Foto nan paj 13]

‘ Mwen pa t kache figi m lè yo t ap joure m. ’