Yon chanjman pou mesye rich la ak Laza

Jezi te bay disip li yo bon konsèy konsènan fason pou yo byen sèvi ak richès. Men se pa sèlman disip li yo ki t ap koute. Farizyen yo te la tou e yo te dwe suiv konsèy Jezi a. Poukisa? Se paske yo se moun ki “renmen lajan”. Lè yo tande sa Jezi di, yo “kòmanse pase l nan rizib”. — Lik 15:2; 16:13, 14.

Men, Jezi pa t kite sa ba l pwoblèm. Men sa li di: “Nou se moun ki deklare tèt nou jis devan lèzòm, men Bondye konnen kè nou. Paske, bagay ki gen anpil valè nan je lèzòm yo se bagay ki repiyan nan je Bondye.” — Lik 16:15.

Sa fè lontan depi Farizyen yo “gen anpil valè nan je lèzòm”, men kounye a se moman pou bagay yo chanje nèt. Moun yo bay anpil valè yo, akoz richès yo gen nan monn nan, oswa akoz pouvwa politik ak enfliyans yo genyen nan domèn relijye, pral tonbe plat atè. Men, moun nan mas pèp la ki rekonèt yo bezwen Bondye yo, y ap leve yo byen wo. Jezi montre aklè gen yon gwo chanjman k ap fèt, li di:

“Lalwa ak pawòl pwofèt yo te ekri yo te la jiskaske Jan vini. Depi lè sa a, yo kòmanse fè moun konnen bon nouvèl Wayòm Bondye a, e tout kalite moun ap fè gwo efò pou yo antre ladan l. Anverite, li pi fasil pou syèl la ak tè a pase, pase pou yon ti moso nan yon lèt ki nan Lalwa pa ta akonpli.” ​(Lik 3:18; 16:16, 17). Ki jan pawòl Jezi di yo montre gen chanjman ki pral fèt?

Chèf relijye juif yo fyè pou yo fè konnen yo rete atache ak Lwa Moyiz la. Sonje lè Jezi te fè yon mesye nan Jerizalèm ki avèg retounen wè ankò, Farizyen yo te di avèk ògèy: “Nou menm, nou se disip Moyiz. Nou konnen Bondye te pale ak Moyiz.” ​(Jan 9:13, 28, 29). Youn nan objektif Lalwa Bondye te bay pa mwayen Moyiz la te genyen se mennen moun ki enb yo vin jwenn Mesi a, ki se Jezi. Jan ki konn batize moun nan te fè konnen aklè Jezi se Ti Mouton Bondye a (Jan 1:29-34). Juif ki enb yo, sitou moun ki pòv yo, te kòmanse tande pale de “Wayòm Bondye a” lè Jan te kòmanse aktivite l. Wi, gen “bon nouvèl” pou tout moun ki vle vin viv anba dominasyon Wayòm nan e ki vle jwenn byenfè li pral pote.

Lwa Moyiz la se pa yon lwa ki pap akonpli, olye de sa, li te mennen yo jwenn Mesi a. Donk, moun pa t oblije suiv li ankò. Pa egzanp, Lalwa te pèmèt yon moun divòse pou plizyè rezon, men kounye a Jezi fè konnen: “Nenpòt moun ki divòse ak madanm li e k al marye ak yon lòt moun fè adiltè. E nenpòt moun ki marye ak yon fi ki divòse ak mari l, moun sa a fè adiltè.” ​(Lik 16:18). Farizyen yo ki t ap fè règ pou tout ti bagay te fache anpil pou pawòl sa yo Jezi te di.

Kounye a, Jezi bay yon egzanp ki montre jis nan ki pwen chanjman sa a t ap fèt. Li pale konsènan de mesye sitiyasyon yo chak te vin chanje nèt. Toutpandan nou pral egzamine egzanp sa a, sonje Farizyen yo ki renmen lajan e moun bay anpil valè, te pami moun k ap koute l yo.

Men sa Jezi di: “Te gen yon mesye ki te rich ki te konn abiye ak rad wouj vyolèt ak len, e chak jou se plezi l li t ap pran an granpanpan. Men, te gen yon pòv yo te rele Laza ki te chaje ak maleng sou kò l yo te konn vin met devan pòt mesye a. Laza te anvi plen vant li ak manje ki t ap sot sou tab mesye rich la e ki t ap tonbe atè. Chen te menm konn vin niche maleng li yo.” — Lik 16:19-21.

Etandone Farizyen yo se moun ki renmen lajan, èske nou dwe gen dout se de yo Jezi t ap pale lè l te pale de “mesye ki [...] rich” la? Mete sou sa, chèf relijye juif sa yo te renmen abiye ak rad ki chè e ki atire atansyon moun. Anplis de tout byen yo te ka genyen, yo sanble rich nan sans yo jwi yon pakèt privilèj ansanm ak avantaj. Wi, lefètke Jezi pale de yo kòm yon moun ki abiye ak rad wouj vyolèt wa yo konn met sou yo, sa reprezante gwo pozisyon yo genyen. Len blan an montre yo se moun ki jis nan pwòp je pa yo. — Dànyèl 5:7.

Ki jan moun chèf sa yo ki rich e ki gen ògèy wè moun ki nan mas pèp la ki pòv? Yo meprize moun sa yo, yo rele yo am ha arèts oswa moun ki nan mas pèp la, ki pa ni konn Lalwa ni merite pou yo anseye yo Lalwa (Jan 7:49). Sitiyasyon moun sa yo sanble ak sitiyasyon “pòv yo te rele Laza” a ki anvi manje menm “manje ki t ap sot sou tab mesye rich la e ki t ap tonbe atè”. Menm jan yo te meprize Laza paske kò l te kouvri ak maleng, se konsa tou yo meprize moun ki nan mas pèp la, kòmsi yo malad nan domèn espirityèl.

Malerezman, sitiyasyon sa a te egziste pandan yon bon bout tan. Men, Jezi konnen moman an rive pou kondisyon moun ki tankou mesye ki rich la ak kondisyon moun ki tankou Laza yo chanje nèt.

Jezi esplike gwo chanjman sa a, li di: “Ebyen, sa k vin pase, pòv la vin mouri, e zanj yo pote l al mete bò kot Abraram. Epi, mesye rich la vin mouri tou, e yo antere l. Pandan li nan Tonm nan e li nan touman, li leve je l e li wè Abraram byen lwen ak Laza bò kote l.” — Lik 16:22, 23.

Moun ki t ap koute Jezi yo konnen sa fè lontan depi Abraram mouri e li nan Tonm. Ekriti yo fè konnen aklè pa gen moun ki nan Tonm oswa Cheyòl, ki ka wè e ki ka pale, Abraram ladan l tou (Eklezyas 9:5, 10). Donk, ki sa chèf relijye sa yo panse Jezi vle di lè l bay egzanp sa a? Ki sa Jezi vle montre konsènan moun ki nan mas pèp la e konsènan chèf relijye sa yo ki renmen lajan?

Jezi sot pale konsènan yon chanjman, lè l te fè konnen “Lalwa ak pawòl pwofèt yo te ekri yo te la jiskaske Jan vini. Depi lè sa a, yo kòmanse fè moun konnen bon nouvèl Wayòm Bondye a”. Donk, se grasa predikasyon Jan ak Jezi Kris la ki fè Laza ak mesye rich la mouri anrapò ak ansyen sitiyasyon oswa kondisyon yo te ye a pou yo vin nan yon nouvo pozisyon devan Bondye.

Se sitou moun ki enb oswa ki pòv yo ki gen lontan depi yo nan yon move kondisyon nan domèn espirityèl. Men, yo ede yo e yo byen reyaji devan mesaj Wayòm Jan ki konn batize moun nan te preche yo a e annapre, Jezi te preche a tou. Anvan sa, yo te kontante yo ak tikras ‘manje espirityèl ki t ap sot sou tab’ chèf relijye yo. Kounye a yo nouri yo ak verite fondamantal ki sot nan Ekriti yo, sitou bèl bagay Jezi te esplike yo. Se kòmsi finalman yo vin nan yon bon pozisyon nan je Jewova.

Yon lòt bò, chèf relijye yo ki rich e ki gen gwo enfliyans refize aksepte mesaj Wayòm Jan t ap preche a ak mesaj Jezi t ap preche nan tout peyi a (Matye 3:1, 2; 4:17). Anfèt, yo fache anpil oswa yo toumante akoz mesaj sa a, ki pale konsènan yon jijman Bondye pral fè ki tankou dife (Matye 3:7-12). Se t ap yon soulajman pou chèf relijye sa yo ki renmen lajan si Jezi ak disip li yo te sispann preche mesaj Bondye a. Chèf relijye sa yo tankou mesye rich nan egzanp lan k ap di: “Abraram, papa, gen pitye pou mwen, voye Laza tranpe pwent dwèt li nan dlo pou l ka rafrechi lang mwen, paske m ap soufri nan flanm dife sa a.” — Lik 16:24.

Men se pa sa k rive vre. Pifò nan chèf relijye yo pap chanje. Yo refize “koute sa ki nan liv Moyiz yo ak pawòl pwofèt yo”, sa ki t ap fè yo aksepte Jezi kòm Mesi e kòm Wa Bondye chwazi a (Lik 16:29, 31; Galat 3:24). Mete sou sa, nonsèlman yo pa t gen imilite men yo pa t kite moun pòv sa yo ki te aksepte Jezi e ki te gen favè Bondye enfliyanse yo. Yon lòt bò, disip Jezi yo pa kapab kache verite yo pou fè chèf relijye yo plezi oswa pou soulaje yo. Nan egzanp sa a, Jezi pale de reyalite sa a lè l te di pawòl sa yo “Abraram” voye di mesye rich la:

“Pitit mwen, sonje ou te jwenn tout bon bagay pa w yo deja lè w te vivan, tandiske Laza se move bagay li te jwenn. Kounye a, l ap jwenn konsolasyon isit la, men ou menm, w ap soufri. Epitou, gen yon twou san fon ki separe nou. Konsa, menmsi yon moun ta vle sot bò isit la al jwenn nou, li pap kapab, ni moun pa ka sot kote nou ye a pou l vin bò isit la.” — Lik 16:25, 26.

Se pa ti byen tonbe chanjman sa a byen tonbe! Chanjman sa a sanble ak gwo chanjman ki fèt ant pozisyon chèf relijye yo ki gen ògèy ak pozisyon moun ki gen imilite yo ki aksepte jouk Jezi a e finalman ki jwenn fòs ak manje nan domèn espirityèl (Matye 11:28-30). Chanjman sa a te vin parèt aklè kèk mwa annapre lè nouvo alyans lan te vin ranplase alyans Lalwa a (Jeremi 31:31-33; Kolosyen 2:14; Ebre 8:7-13). Lè Bondye te vide lespri sen l sou disip Jezi yo nan jou Pannkòt ane 33 epòk nou an, li te vin parèt aklè se disip Jezi yo ki te gen favè Bondye, men se pa t Farizyen yo ansanm ak moun ki te asosye avè yo.