Referans pou Pwogram reyinyon Lavi nou ak travay nou fè a

6-12 OUT

TREZÒ KI NAN PAWÒL BONDYE A | LIK 17-18

“Montre nou gen rekonesans”

nwtsty nòt etid pou Lk 17:12, 14

dis mesye ki te gen lèp: Nan epòk yo te ekri Bib la, li klè moun ki te gen lèp yo te konn reyini ansanm oswa viv menm kote, sa ki te fè l posib pou youn ede lòt (2Wa 7:3-5). Lalwa Bondye a te mande pou moun ki gen lèp yo viv apa. Mete sou sa, yon moun ki gen lèp te dwe avèti lòt moun li la lè l di: “Mwen pa pwòp! Mwen pa pwòp!” (Le 13:45, 46). Mesye ki te gen lèp yo te rete nan yon distans parapò ak Jezi yon fason pou yo te ka suiv sa Lalwa di. — Gade nòt etid pou Mt 8:2 ak Lis mo yo esplike yo: “Maladi lèp; Moun ki gen lèp”.

Al fè prèt yo wè nou: Jezi Kris te anba Lalwa pandan l te sou tè a, li te rekonèt otorite prèt yo ki soti nan fanmi Arawon, e li te mande moun li geri ki te gen lèp yo pou y al kot prèt yo (Mt 8:4; Mk 1:44). Ann amoni ak Lalwa Moyiz la, yon prèt te dwe gade si yon moun ki gen lèp geri. Moun ki te gen lèp e ki vin geri te dwe al nan tanp lan pou l pote kòm ofrann: de zwazo ki pwòp ki vivan, bwa sèd, twal wouj ak yon branch izòp. — Le 14:2-32.

w08-F 1/8 14-15 § 8-9

Poukisa nou dwe montre nou rekonesan?

Èske Jezi te mal wè lòt mesye yo ki te gen lèp ki pa t montre yo rekonesan? Men ki jan istwa a kontinye: “Lè sa a, Jezi di: ‘Se nou toule dis ki geri, pa vre? Men, kote nèf lòt yo? Yo youn pa t wè nesesite pou yo tounen vin bay Bondye glwa, eksepte mesye sa a ki soti nan yon lòt nasyon?’” — Lik 17:17, 18.

Lòt nèf mesye ki gen lèp yo pa t mechan. Yon ti tan anvan sa, yo te montre aklè yo gen lafwa nan Jezi e yo te dispoze suiv enstriksyon Jezi te ba yo pou yo deplase al Jerizalèm pou yo te fè prèt yo wè yo. Men, byenke se sèten yo te vrèman apresye anpil bèl jès Jezi te fè pou yo a, yo pa t sonje di Jezi mèsi. Fason yo te aji a te fè Jezi desi. E nou menm? Lè yon moun byen boule avèk nou, èske nou sonje di l mèsi, e si sa posib, ekri l pou nou di l jan nou apresye sa l te fè pou nou an?

Fouye pou n ka jwenn trezò espirityèl

nwtsty nòt etid pou Lk 17:10

ki pa vo anyen: Lit.: “ki pa itil; san valè”. Nan egzanp sa a, Jezi pa t vle montre esklav yo, sa vle di disip li yo, ta dwe konsidere tèt yo kòm moun ki pa itil oswa ki san valè. Selon kontèks la, ekspresyon “ki pa vo anyen” an bay ide esklav yo ta dwe rekonèt limit yo, yo pa ta dwe atann pou moun trete yo yon fason espesyal oswa fè louwanj pou yo. Gen kèk biblis ki panse, jan yo itilize ekspresyon an la a nan kontèks la se yon egzajerasyon (ipèbòl) e li vle di: “Nou se senp esklav ki pa merite pou yo trete nou yon fason espesyal.”

nwtsty nòt etid pou Lk 18:8

lafwa sa a: Oswa: “ki gen yon lafwa konsa”. Lit.: “lafwa”. Lefètke, nan lang grèk la, yo itilize mo “lafwa a” ansanm ak yon atik defini, sa montre Jezi pa t ap pale de lafwa nan sans jeneral, men li t ap pale de yon lafwa espesyal, tankou lafwa vèv nan egzanp li te bay la (Lk 18:1-8). Sa ta vle di gen lafwa nan pouvwa lapriyè genyen ak gen lafwa Bondye ap asire l moun li chwazi yo jwenn jistis. Sanble Jezi pa t reponn kesyon sou lafwa a yon fason pou disip li yo te ka reflechi sou kalite lafwa yo menm yo genyen. Egzanp sou lapriyè ak lafwa a byen tonbe paske Jezi te fèk pale sou eprèv disip li yo t ap gen pou fè fas. — Lk 17:22-37.

13-19 OUT

TREZÒ KI NAN PAWÒL BONDYE A | LIK 19-20

Fouye pou n ka jwenn trezò espirityèl

nwtsty nòt etid pou Lk 19:43

lantouray byen wo avèk gòl pwenti: Oswa “kloti ki fèt an bwa”. Se nan vèsè sa a sèlman nou jwenn mo grèk karaks la nan Liv ki te ekri an grèk yo. Yo dekri l kòm “yon lantouray yo fè ak gòl pwenti; bwa” epitou kòm “abitid sòlda yo te genyen pou yo sèvi ak bwa pou yo tabli kan yo; kloti ki fèt an bwa”. Pawòl Jezi te di yo te reyalize nan ane 70 epòk nou an lè Women yo, anba lòd Titis, te mete yon lantouray toutotou Jerizalèm. Objektif Titis la te gen twa aspè ladan l: anpeche Juif yo chape poul yo, ankouraje yo pou yo rann tèt yo epi anpeche moun ki Jerizalèm yo jwenn manje jiskaske yo vin rann tèt yo. Pou sòlda women yo te ka jwenn materyèl pou yo ka fè lantouray toutotou Jerizalèm, yo te koupe pyebwa ki nan bouk vil la.

nwtsty nòt etid pou Lk 20:38

paske pou li, yo tout vivan: Oswa “paske nan je l, yo tout vivan.” Bib la montre nan je Bondye moun ki vivan men ki vire do ba li mouri (Ef 2:1; 1Ti 5:6). Menm jan an tou, moun k ap sèvi Bondye fidèl men ki mouri yo vivan nan je Jewova paske objektif li genyen pou l resisite yo a ap reyalize kanmenm. — Wm 4:16, 17

20-26 OUT

TREZÒ KI NAN PAWÒL BONDYE A | LIK 21-22

Fouye pou n ka jwenn trezò espirityèl

nwtsty nòt etid pou Lk 21:33

Syèl la ak tè a ap pase: Gen lòt vèsè ki montre syèl la ak tè a ap rete pou toutan (Jen 9:16; Sm 104:5; Ekl 1:4). Donk, yo ta ka di pawòl Jezi te di la yo se yon egzajerasyon (ipèbòl), e li ka vle di menmsi sa ki parèt enposib la ta fèt kòmkwa pou syèl la ak tè a ta disparèt, pawòl Jezi yo ap reyalize kanmenm. (Konpare ak Mt 5:18.) Sepandan, la a, syèl la ak tè a byen ka fè referans ak syèl senbolik oswa tè senbolik yo pale de yo nan Re 21:1 an kòm “ansyen syèl la ak ansyen tè a”.

pawòl mwen yo pa gendwa janm pase: Oswa “se sèten pawòl mwen pap pase”. Nan lang grèk la, la a, lefètke yo itilize de mo negatif ansanm ak vèb la, sa montre jan yo rejte yon ide, donk, sa montre nan ki pwen pawòl Jezi yo ap toujou reyalize.

27 OUT–2 SEPTANM

TREZÒ KI NAN PAWÒL BONDYE A | LIK 23-24

“Se pou nou dispoze padone lòt moun”

g-F 2/08 11 § 5-6

Èske Bondye padone peche grav?

Jewova pa sèlman wè peche yon moun fè, men li wè atitid moun ki fè peche a tou (Ezayi 1:16-19). Ann fè yon ti reflechi pandan yon ti tan sou de bandi ki te bò kot Jezi sou poto a. Li klè, yo toule de te fè gwo krim paske gen youn nan mesye yo ki te admèt: “Nou resevwa egzakteman sa nou merite pou sa nou fè, men mesye sa a [Jezi] pa fè anyen ki mal.” Pawòl bandi a montre li te konnen kèk bagay sou Jezi. E konesans sa a sanble te jwe yon wòl nan bèl chanjman atitid li te vin genyen annapre. Nou ka wè sa nan sa li te di annapre a, men fwa sa a li t ap sipliye Jezi: “Sonje m lè w vin wa.” Ki jan Kris te reyaji devan bèl demann sa a? Li te di: “Anverite m ap di w sa jodi a: W ap avè m nan Paradi a.” — Lik 23:41-43.

Fè yon ti reflechi sou sa: Nan dènye pawòl Jezi te di anvan l mouri yo, nou jwenn youn ladan yo ki montre jan l te gen pitye pou yon mesye ki te admèt li te merite santans lanmò li te jwenn nan. Ala ankourajan sa ankourajan! Kidonk, nou mèt gen asirans ni Jezi Kris, ni Jewova, Papa l, pral montre konpasyon pou tout moun ki repanti toutbon, kèlkeswa sa yo te fè anvan. — Women 4:7.

Fouye pou n ka jwenn trezò espirityèl

nwtsty nòt etid pou Lk 23:31

lè pyebwa a vèt [...] lè l vin sèch: Sanble Jezi ap fè referans ak nasyon Juif la. Se tankou yon pyebwa ki t ap mouri men ki gen kèk ti pati ki bon toujou, paske Jezi te la e te gen yon bon kou Juif ki te kwè nan li. Men, nan yon ti tan ankò, yo t apral touye Jezi, e Bondye t apral chwazi Juif fidèl yo ak lespri sen l pou y al nan syèl epi vin fè pati Izrayèl espirityèl la (Wm 2:28, 29; Ga 6:16). Nan moman sa a, nasyon Izrayèl selon lachè a t ap gen pou mouri nan domèn espirityèl, konsa li sanble ak pyebwa ki te vin sèch la. — Mt 21:43.

nwtsty foto/videyo

Klou ki nan talon pye yon moun

Yon foto ki montre yon klou an fè, ki mezire 11,5 santimèt longè, ki antre nan talon pye yon moun. Yo te jwenn zo a ak tout klou a ladan l nan ane 1968 nan yon fouy yo t ap fè nan nò Jerizalèm. Yo panse zo sa a la depi sou epòk Women yo. Sa bay akeyològ yo bonjan prèv ki montre li pwobab pou yo te konn itilize klou pou yo mete moun sou poto an bwa pou touye yo. Petèt, klou sa a sanble ak klou sòlda women yo te itilize pou yo mete Jezi sou yon poto. Yo te jwenn zo a ak tout klou a nan yon bwat ki fèt ak wòch, kote yo te konn mete zo moun ki mouri apre kò yo fin dekonpoze. Sa montre lè yon moun te fin mouri sou yon poto, yo te konn mete l nan tonm.