Ann aji ann amoni ak priyè Jezi te fè a

1, 2. Esplike ki sa Jezi te fè pou apot fidèl li yo apre yo te fin selebre fèt Pak la nan ane 33 epòk nou an.

JOU ki te 14 Nizan ane 33 epòk nou an, li te gentan byen ta nan aswè lè Jezi ansanm ak konpayon l yo te fèk fin selebre fèt Pak la, yon fèt ki te fè yo sonje fason Bondye te delivre zansèt yo nan esklavaj ann Ejip. Sepandan, disip Jezi yo ki te fidèl t ap gen pou yo jwenn yon delivrans ki pi gwo lontan, anpalan de yon “delivrans etènèl”. Nan demen, Chèf yo a ki san peche, t ap gen pou mouri anba men ènmi l yo. Men, move aksyon sa a t ap tounen yon benediksyon paske san Jezi ki te koule a t apral sèvi kòm baz pou limanite delivre anba peche ak lanmò. — Ebre 9:12-14.

² Pou Jezi te asire l nou pap janm bliye dispozisyon sa a ki demontre lanmou li gen pou nou an, li te vin ak yon lòt fèt nou dwe selebre chak ane ki ranplase fèt Pak la. Li te fè sa lè l te pran yon moso pen san ledven, li kase l, li pase l bay 11 apot fidèl li yo, epi l di yo: “Sa a reprezante kò m mwen pral bay pou nou. Kontinye fè sa pou nou montre nou sonje m.” Li te fè menm jan an tou ak yon koup ki te gen diven wouj, epi l di yo: “Koup sa a reprezante nouvo alyans lan ki fèt grasa san m ki pral koule pou nou.” — Lik 22:19, 20.

 3. a) Ki gwo chanjman ki t apral genyen apre lanmò Jezi? b) Ki kesyon nou pral konsidere ki gen rapò ak priyè Jezi te fè nou jwenn nan Jan chapit 17 la?

³ Ansyen alyans lan, sa vle di alyans Lalwa Bondye te fè ak Izrayèl selon lachè a, te prèske rive nan bout li. Gen yon nouvo alyans ki t apral ranplase l, yon alyans Jewova t ap fè ak disip Jezi ki t ap gen pou al nan syèl la. Jezi te enkyete l anpil konsènan byennèt nouvo nasyon espirityèl sa a. Izrayelit selon lachè yo te divize nan domèn relijyon ak nan domèn sosyal, sa ki te fè yo sal non Bondye ki sen an (Jan 7:45-49; Tra. 23:6-9). Yon lòt bò, Jezi te vle pou disip li yo rete ini yon fason pou yo te ka byen travay nan tèt ansanm pou pèmèt non Bondye jwenn glwa. Kidonk, ki sa Jezi te fè? Li te fè pi bèl priyè yon moun te ka gen privilèj pou l li (Jan 17:1-26; gade foto ki nan kòmansman atik la). Ann fè yon ti gad dèyè epi ann poze kesyon sa a: “Èske Bondye te reponn priyè Jezi a?” Nou ta dwe egzamine tèt nou tou, epi poze tèt nou kesyon ki vin annapre a: “Èske m aji ann amoni ak priyè sa a?”

4, 5. a) Ki sa nou aprann nan kòmansman priyè Jezi a? b) Ki fason Jewova te reponn demann Jezi te fè konsènan avni l lan?

⁴ Jezi te ret byen ta nan aswè ap pale ak disip li yo konsènan konesans Bondye a ki gen anpil valè. Apre sa, li leve je l gade syèl la epi l di: “Papa, lè a rive. Fè pitit ou a jwenn glwa, pou pitit ou a ka ba w glwa, konsa, piske w ba l pouvwa sou tout moun, l ap ka bay tout moun ou ba li yo lavi ki pap janm fini an. [...] Mwen te ba w glwa sou tè a, mwen fini travay ou te ban m fè a. Kounye a, ou menm Papa, fè m jwenn glwa, fè m vin bò kote w pou m ka gen glwa mwen te genyen lè m te bò kote w anvan monn nan te egziste a.” — Jan 17:1-5.

⁵ Èske n wè ki sa Jezi te bay plis enpòtans nan kòmansman priyè l la? Toudabò, li te gen sousi pou glwa Papa l ki nan syèl la, e sa te ann amoni ak premye bagay Jezi te mande nan priyè modèl la, lè l te di: “Papa, se pou non w vin sen.” ​(Lik 11:2). Annapre, Jezi te enkyete l pou bezwen disip li yo lè l te mande Papa l pou l “bay tout moun [Papa a] ba li yo lavi ki pap janm fini an”. Apre sa, Jezi te mande Papa l yon bagay. Men sa l te di: “Papa, fè m jwenn glwa, fè m vin bò kote w pou m ka gen glwa mwen te genyen lè m te bò kote w anvan monn nan te egziste a.” Jewova te rekonpanse Pitit li a ki te fidèl lè l te ba l plis pase sa l te mande a, piske l te ba l “yon non ki pi bon lontan pase non” tout lòt zanj yo. — Ebre 1:4.

 6. Ki sa apot yo te dwe fè pou yo te ka jwenn lavi ki pap janm fini an, e ki jan nou fè konnen yo te rive fè sa?

⁶ Jezi te priye tou konsènan ki sa nou dwe fè, antanke pechè, pou n jwenn kado san parèy la ki se lavi ki pap janm fini an. (Li Jan 17:3.) Li te di nou dwe “aprann konnen” Bondye ak Kris. Yon fason nou ka fè sa, se lè n sèvi ak je nou ansanm ak zòrèy nou pou n aprann plis bagay konsènan Jewova ak Pitit gason l lan. Yon lòt fason enpòtan nou ka aprann konnen Bondye se lè n pwofite lajwa sa bay lè yon moun aplike sa l aprann konsènan Bondye yo. Apot yo te suiv metòd sa a ki bay lavi a piske Jezi te kontinye priyè l la konsa: “Se pawòl ou te di m yo mwen te di yo, e yo resevwa yo.” ​(Jan 17:8). Sepandan, pou yo te jwenn lavi ki pap janm fini an, yo te bezwen kontinye medite sou sa Bondye di yo epi aplike yo nan lavi yo chak jou. Èske apot fidèl yo te rive fè sa pandan tout tan yo te viv sou tè a? Wi, yo te fè sa. Nou konnen yo te fè sa piske yo gen non yo ekri pou toutan sou 12 wòch fondasyon Nouvo Jerizalèm ki nan syèl la. — Rev. 21:14.

 7. Ki sa “konnen” Bondye vle di, e poukisa sa enpòtan?

⁷ Dapre sa kèk espè nan lang grèk la fè konnen, ekspresyon grèk lè yo tradui l yo mete “aprann konnen” pou li a kapab vle di “ta dwe kontinye konnen” oswa “dwe kontinye konnen”. Toule de sans yo enpòtan, e youn konplete lòt. Nòt anba paj nou jwenn pou Jan 17:3 nan Bible avec notes et références lan bay posiblite pou yo tradui l konsa: “Lefètke yo konnen w.” Donk, ekspresyon “aprann konnen” an fè referans ak yon pwosesis nou dwe kontinye suiv jiskaske nou rive gen privilèj pou n “konnen” Bondye. Sepandan, konnen pi gwo Pèsonaj ki egziste nan linivè a vle di plis pase konnen kalite l yo ak objektif li. Konnen Jewova gen ladan l chèche gen yon relasyon sere sere ki baze sou lanmou ansanm avè l e ansanm ak kwayan parèy nou yo. Men sa Bib la fè konnen: “Yon moun ki pa gen lanmou pa rive konn Bondye.” ​(1 Jan 4:8). Konnen Bondye gen ladan l obeyi Bondye tou. (Li 1 Jan 2:3-5.) Ala yon gwo privilèj sa ye pou nou fè pati moun ki konnen Jewova yo! Sepandan, menm jan sa te rive Jida Iskaryòt, yon moun ka pèdi relasyon sa a ki gen anpil valè. Annou fè tout sa n kapab pou n kenbe relasyon sa a. Konsa, n ap rive kalifye pou n resevwa kado san parèy la ki se lavi ki pap janm fini an. — Mat. 24:13.

8, 9. Ki sa k te pi enpòtan pou Jezi pandan tout ministè l sou tè a, e ki tradisyon li te rejte?

⁸ Apre nou fin li priyè Jezi te fè nou jwenn nan Jan chapit 17 la, kiyès ki ka gen dout konsènan lanmou pwofon Jezi te demontre nonsèlman pou apot li yo ki te la lè sa a, men tou, pou disip li t apral genyen yo (Jan 17:20)? Anmenmtan tou, nou bezwen konprann se pa t delivrans nou ki te pi enpòtan pou Jezi. Depi nan kòmansman ministè Jezi sou tè a jiskaske l te fini ministè sa a, sa k te pi enpòtan pou li, se te travay pou sangtifikasyon non Papa l epi pou non sa a jwenn glwa. Pa egzanp, lè Jezi t ap fè konnen misyon l te vin ranpli a, men sa l te li nan woulo Izayi a pandan l te nan sinagòg Nazarèt la: “Lespri Jewova sou mwen, paske li deziyen mwen pou m anonse moun ki pòv yo bon nouvèl la.” Nou kapab gen asirans Jezi te pwononse non Bondye byen klè lè l t ap li rezon ki fè l te vin sou tè a. — Lik 4:16-21.

⁹ Byen lontan anvan Jezi te vin sou tè a, chèf relijye Juif yo pa t ankouraje moun sèvi ak non Bondye akoz yon tradisyon yo te genyen. Nou kapab gen asirans Jezi te rejte tradisyon sa a ki pa soti nan Ekriti yo yon fason ki byen fèm. Men sa l te di ènmi l yo: “Mwen vini nan non Papa m, men nou pa resevwa m. Si yon lòt moun te vini nan pwòp non pa l, nou t ap resevwa l.” ​(Jan 5:43). Apre sa, kèk tan anvan Jezi mouri, li te montre sa k te pi enpòtan nan lavi l lè l te priye konsa: “Papa, glorifye non w.” ​(Jan 12:28). Donk, nou pa dwe sezi dèske Jezi te enkyete l pou non Papa l nan priyè n ap egzamine kounye a.

10, 11. a) Ki sa sa te mande pou Jezi te fè disip li yo konn non Papa l? b) Pou ki objektif disip Jezi yo dwe travay?

¹⁰ Men ki jan Jezi te kontinye priyè l la: “Moun ou te retire nan mitan monn nan pou w ban mwen yo, mwen fè yo konnen non w. Yo te pou ou, ou ban mwen yo, e yo obeyi pawòl ou. Epitou, m ap kite monn nan, m ap vin jwenn ou, men yo menm, yo nan monn nan. Papa, ou menm ki sen, voye je sou yo poutèt non w ou ban mwen an, dekwa pou yo ka vin youn menm jan mwen menm avè w nou ye a.” — Jan 17:6, 11.

¹¹ Pou Jezi te fè disip li yo konn non Papa l, sa te mande pou l fè plis pase annik pwononse non sa a. Jezi te ede yo konnen ki sa non Bondye te reprezante tou, anpalan de bèl kalite Bondye genyen yo ansanm ak fason Bondye aji anvè nou (Egz. 34:5-7). Mete sou sa, depi kote Jezi ye nan glwa li gen nan syèl la, li kontinye ap ede disip li yo pou yo fè konnen non Jewova sou tout tè a. Nan ki objektif? Se yon fason pou yo kapab rasanble plis disip anvan sistèm mechan sa a rive nan bout li. Lè sa a, Jewova pral glorifye non l toutpandan l ap aji pou l delivre temwen fidèl li yo! — Eze. 36:23.

12. Bay twa bagay enpòtan k ap pèmèt nou reyisi nan travay nou an k ap sove lavi moun.

¹² Pandan Jezi te sou tè a, li te fè tout sa l kapab pou l ede disip li yo venk feblès yo te genyen yo. Sa te enpòtan anpil pou yo te ka fin fè travay Jezi te ba yo fè a. Men sa Jezi te di nan priyè a: “Menm jan w te voye m nan monn nan, mwen menm tou mwen voye yo nan monn nan.” Jezi te met aksan sou twa bagay enpòtan disip yo t ap gen bezwen pou yo te ka reyisi nan travay sa a k ap sove lavi moun nan. Premyèman, li te priye pou disip li yo pa fè pati monn Satan an ki sal. Dezyèmman, li te priye pou yo ka vin sen, oswa sangtifye, lè yo aplike Pawòl Bondye a nan lavi yo. Twazyèmman, Jezi pa t sispann mande pou disip li yo fè yon sèl nan lanmou menm jan sa ye ant li menm ak Papa a. Sa mande pou nou egzamine tèt nou. Nou chak ta dwe mande tèt nou: ‘Èske m aji ann amoni ak twa bagay Jezi te mande yo?’ Lefètke Jezi te bay bagay sa yo atansyon, li te montre l gen konfyans yo t ap pèmèt ‘monn nan kwè se Bondye ki voye l’. — Li Jan 17:15-21.

13. Nan premye syèk epòk nou an, ki fason Bondye te reponn priyè Jezi a?

¹³ Nou kapab wè Bondye te reponn priyè Jezi a lè nou etidye liv Travay Apot yo, yon liv ki vin apre kat Evanjil yo. Fè yon ti reflechi sou posiblite ki te genyen pou gen divizyon pami premye kretyen yo, piske nan mitan yo te gen Juif ak moun lòt nasyon, moun ki rich ak moun ki pòv, esklav ak moun ki posede esklav. Sepandan, yo te vin gen yon lyen ki te tèlman sere nan mitan yo opwen yo te ka konpare yo ak diferan pati ki konpoze kò yon moun kote se Jezi ki tèt la (Efe. 4:15, 16). Se yon mirak sèlman ki te ka pèmèt yon bagay konsa fèt nan monn Satan an ki chaje ak divizyon. Se Jewova ki merite tout louwanj lan piske se li menm ki fè sa posib grasa pouvwa lespri sen l. — 1 Kor. 3:5-7.

14. Ki fason Bondye te reponn priyè Jezi a nan epòk nou an?

¹⁴ Malerezman, inite sa a ki te vin posib grasa yon mirak pa t kontinye apre lanmò apot yo. Olye de sa, jan sa te predi, te vin gen yon gwo apostazi nan kongregasyon an ki te lakòz gen yon seri sèk nan mitan lakretyente (Tra. 20:29, 30). Men, nan ane 1919, Jezi te libere disip li yo Bondye chwazi pou al nan syèl la anba esklavaj fo relijyon, epi l te rasanble yo pou yo vin fè yon sèl nan “yon chenn ki ini moun yon fason ki san fay”. (Kol. 3:14.) Ki efè travay predikasyon yo a te genyen sou rès moun nan monn nan? Gen plis pase sèt milyon moun ki fè pati “lòt mouton” yo ki soti “nan tout nasyon, nan tout tribi, nan tout pèp ak nan tout lang” ki te vin met ansanm ak kretyen Bondye chwazi pou al nan syèl la pou yo fè yon sèl twoupo (Jan 10:16; Rev. 7:9). Ala yon bèl fason Bondye te reponn priyè Jezi te fè a lè l te di: “Pou monn nan ka konnen se ou [Jewova] ki te voye m, e pou l ka konnen ou renmen yo menm jan ou renmen m nan.” — Jan 17:23.

15. Ki demann espesyal Jezi te fè an favè disip li yo Bondye chwazi pou al nan syèl la?

¹⁵ Byen bonè nan sware 14 Nizan an, Jezi te fè apot li yo jwenn glwa, oswa onè, lè l te fè yon alyans avèk yo pou y al dirije avè l nan Wayòm li an (Lik 22:28-30; Jan 17:22). Pou rezon sa a, men ki jan Jezi te priye pou tout moun ki t ap vin fè pati disip li yo Bondye chwazi pou al nan syèl la: “Papa, mwen ta renmen pou kote mwen ye se la moun ou ban mwen yo ye avè m tou, yon fason pou yo wè glwa ou ban mwen an, paske w te renmen m depi anvan monn nan te fonde.” ​(Jan 17:24). Lòt mouton Jezi yo kontan pou sa, yo pa anvye sò moun sa yo, e sa bay yon lòt prèv ki montre inite ki egziste pami tout vrè kretyen yo sou tè a jodi a.

16, 17. a) Ki detèminasyon Jezi te pran nan fen priyè l la? b) Ki detèminasyon nou dwe pran?

¹⁶ Akoz enfliyans chèf relijye yo, pifò moun nan monn nan chwazi inyore bonjan prèv ki montre Jewova gen yon pèp ki ini ki konnen l toutbon. Se te menm bagay la tou nan epòk Jezi a. Se sa k fè, Jezi te fini priyè l la ak bèl pawòl sa yo: “Papa, ou menm ki jis, monn nan pa rive konnen w vre. Men mwen menm, mwen rive konnen w, e moun sa yo rive konnen se ou ki te voye m. Mwen fè yo konnen non w e m ap fè konnen l, dekwa pou lanmou w gen pou mwen an ka nan yo e mwen menm pou m ann inyon avèk yo.” — Jan 17:25, 26.

¹⁷ Ki moun ki ka di Jezi pa t aji ann amoni ak priyè l te fè a? Antanke Chèf kongregasyon an, li kontinye ap ede nou konnen non Papa l ansanm ak objektif Papa l. Ann kontinye soumèt nou devan direksyon l ap ban nou lè n montre nou zele nan fason n ap obeyi kòmandman l ban nou pou n preche epi fè disip la (Mat. 28:19, 20; Tra. 10:42). Ann fè tout sa n kapab tou pou n prezève inite nou an ki gen anpil valè. Lè n fè tout bagay sa yo, n ap aji ann amoni ak priyè Jezi te fè a yon fason pou non Jewova jwenn glwa, e pou n ka gen kè kontan nètale.