BIBLIYOTÈK SOU ENTÈNÈT Watchtower

‘Yo te gen anpil kè kontan e yo te ranpli ak lespri sen’

‘Bay yon temwayaj konplè sou Wayòm Bondye a’
- 5. Pou Banabas ak Sòl te rive preche sou zile Chip, ki sa sa te mande?
  
  ⁵ Apre Banabas ak Sòl fin mache rive Selesi, yon vil ki te gen yon waf e ki te toupre Antyòch, yo pran bato pou y ale sou zile Chip. Se yon vwayaj 200 kilomèt anviwond. Kòm Banabas te moun Chip, sandout, li te chofe pou l pote bon nouvèl la bay moun ki rete sou zile l te fèt la. Lè yo rive Salamin, yon vil ki te nan pati lès zile a, yo pa t ret ap pèdi tan. Rapidman, “yo kòmanse preche pawòl Bondye a nan sinagòg Juif yoe”. (Tra. 13:5.) Banabas ak Sòl te preche sot nan yon pwent Chip rive nan lòt pwent lan, siman yo te preche moun ki nan vil prensipal yo toutpandan yo t ap fè wout la. Selon wout misyonè sa yo te pase yo, yo gendwa te fè anviwon 160 kilomèt ap mache.
  
  NAN SINAGÒG JUIF YO
  
  Mo pou mo, “sinagòg” vle di “rasanble ansanm”. Okòmansman, li te fè referans ak yon asanble oubyen yon kongregasyon Juif, e finalman, li te vin gen sans kote oubyen kay kote yon asanble oubyen yon kongregasyon Juif reyini.
  
  Gen anpil moun ki kwè yo te kòmanse sèvi ak sinagòg yo swa pandan 70 an Juif yo te pase ann egzil nan Babilòn nan, swa tousuit apre egzil sa a. Sinagòg yo te la pou moun resevwa enstriksyon, pou yo adore Bondye, pou yo li Ekriti yo e pou yo jwenn konsèy ki sot ladan yo. Nan premye syèk epòk nou an, chak vil nan Palestin te gen sinagòg pa l. Gwo vil yo te gen plis pase yon sinagòg, e Jerizalèm li menm te chaje yo.
  
  Men, apre egzil la, se pa tout Juif yo ki te tounen Palestin. Anpil Juif te vwayaje al nan lòt peyi pou biznis. Depi nan senkyèm syèk anvan epòk nou an, te gentan gen Juif ki t ap viv toupatou nan 127 distri ki te anba dominasyon wayòm peyi Pès la (Estè 1:1; 3:8). Epitou, rive yon lè, te vin gen Juif ki te abite nan vil ki toutotou lanmè Meditèrane a. Yo te vin rele Juif sa yo ki te gaye divès kote nan epòk sa a Dyaspora, e yo menm tou yo te fè sinagòg kèlkeswa kote yo te ye.
  
  Yo te konn li Lalwa nan sinagòg yo chak saba, e yo te konn esplike l. Yo te konn fè lekti sa yo sou yon estrad ki gen ban pou moun chita anfas li, adwat li ak agoch li. Nenpòt gason juif ki te gen atachman pou Bondye te kapab fè lekti nan sinagòg yo, yo te ka preche e yo te ka bay esplikasyon sou Ekriti yo.

‘Yo te gen anpil kè kontan e yo te ranpli ak lespri sen’

‘Bay yon temwayaj konplè sou Wayòm Bondye a’
- d Nan premye syèk la, yon bato te ka fè anviwon 160 kilomèt ap vwayaje nan yon jounen depi van yo pa t bay pwoblèm. Men, si tan an te makawon, yon vwayaj konsa te ka pran plis tan toujou.