Preche bon nouvèl la avèk bonjan konviksyon

¹ Byen bonè nan premye syèk la, Jezi Kris te bay disip li yo misyon pou yo ‘ fè disip pami moun tout nasyon ’. (Mat. 24:14 ; 28:19, 20.) Temwen Jewova yo tèlman pran sa Jezi te di a oserye, nan fen 20^yèm syèk la, fanmi frè kretyen nou an ogmante rive 5 900 000 disip nan 234 peyi. Ala yon bèl kout louwanj nou bay Papa nou ki nan syèl la !

² Kounye a, nou antre nan 21^yèm syèk la. Lenmi nou an ap eseye antre kò l nan travay prensipal nou an, anpalan de preche Wayòm nan ak fè disip la, san nou pa rann nou kont. Li sèvi ak presyon sistèm nan pou l fè tèt chaje ak aktivite ki pa vrèman enpòtan fè nou pèdi tan. Se yon fason pou nou gaspiye tout fòs nou e pou l detounen atansyon nou. Olye nou kite sistèm sa a dikte nou sa ki enpòtan nan lavi a, grasa Pawòl Bondye a, nou montre sa ki pi enpòtan pou nou an se fè volonte Jewova (Wom. 12:2). Sa vle di pou nou obeyi egzòtasyon Bib la ban nou pou nou ‘ preche pawòl la nan tan favorab tankou nan tan difisil e pou nou akonpli ministè nou an nèt ’. — 2 Tim. 4:2, 5.

³ Devlope yon bonjan konviksyon lakay ou : Kretyen yo bezwen pou yo “ total, pou yo gen bonjan konviksyon konsènan tout volonte Bondye a ”. (Kol. 4:12.) Mo “ konviksyon ” an vle di : “ Yon kwayans ki fò lakay yon moun, eta yon moun ki konvenk tèt li ye ”. Antanke kretyen, nou bezwen konvenk tèt nou pawòl pwofetik Bondye a se yon bagay ki sèten epi nou rive byen lwen nan tan lafen an. Fòk kwayans nou yo fò nan nou menm, menm jan sa te ye pou lapot Pòl ki te di bon nouvèl la “ se pisans pou delivrans tout moun ki gen lafwa ”. — Wom. 1:16.

⁴ Dyab la sèvi ak mechan yo e ak yon bann blofè ki deja twonpe tèt yo, pou sedwi oubyen twonpe lòt moun (2 Tim. 3:13). Piske nou gentan konn sa, nou pran dispozisyon pou nou konvenk tèt nou pi plis dèske nou gen laverite a. Olye nou kite tèt chaje lavi a toufe zèl nou genyen an, n ap kontinye bay enterè Wayòm nan premye plas la (Mat. 6:33, 34). Nou pa ta renmen bliye nou nan yon tan ijan nonplis, kòmsi pou nou ta panse lafen sistèm nan lwen toujou. Chak jou li vin pi pre (1 Pyè 4:7). Menmsi nou ta santi bon nouvèl la pa tèlman pwogrese nan kèk peyi parapò ak vitès n ap preche a, fòk moun yo kontinye jwenn avètisman. — Ezek. 33:7-9.

⁵ Men kesyon enpòtan nou bezwen poze nan dènye tan sa a : ‘ Èske m pran misyon Jezi ban mwen pou m fè disip la oserye ? Lè m ap preche bon nouvèl la, èske m demontre mwen gen bonjan konviksyon Wayòm nan se yon reyalite ? Èske mwen detèmine pou m patisipe plis mwen kapab nan ministè sove lavi a ? ’ Piske nou reyalize nou byen lwen nan tan lafen an, nou dwe veye sou tèt nou, nou dwe veye sou misyon preche anseye a. Lè nou fè sa, n ap sove ni nou menm, ni moun ki koute nou yo (1 Tim. 4:16). Ki jan nou tout nou kapab ranfòse konviksyon nou antanke minis ?

⁶ Annou imite Tesalonisyen yo : Pandan lapòt Pòl t ap sonje travay di frè Tesalonik yo t ap fè, men sa li te di yo : “ Paske bon nouvèl n ap preche a pa t rive lakay nou nan bouch sèlman, men li te rive avèk pisans, avèk lespri sen epi avèk bonjan konviksyon menm jan nou konnen ki kalite gason nou te tounen pou nou menm poutèt nou menm. Epi nou tounen imitatè nou ak imitatè Seyè a, piske nou asepte pawòl la nan mitan yon pakèt tribilasyon avèk lajwa lespri sen an. ” ​(1 Tes. 1:5, 6). Wi, Pòl te felisite kongregasyon Tesalonik la poutèt frè yo te preche avèk zèl e ak bonjan konviksyon, malgre yo te nan tribilasyon. Ki sa ki te fè yo kapab kenbe ? Zèl ak konviksyon yo te wè lakay lapòt Pòl ak lòt disip ki te avèk li yo te fè yon pakèt efè sou yo. Sa k fè sa ?

⁷ Pòl ak tout konpayon vwayaj li yo te montre nan lavi yo yo te gen lespri sen Bondye sou yo e yo te kwè nan sa yo t ap preche a ak tout kè yo. Anvan Pòl ak Silas te vin Tesalonik, se pa ti maltrete yo te maltrete yo etan yo te Filip. Yo te bat yo, yo te mete yo nan prizon, yo te mete yo nan sèp san yo pa t jije yo. Yon eksperyans rèd konsa pa t toufe zèl yo genyen pou bon nouvèl la. Grasa entèvansyon Bondye, yo te lage, sa ki te fè gadyen prizon an ak tout kò kay li konvèti. Epi sa te ouvri chemen pou frè yo kontinye pou pi devan nan ministè yo a. — Travay 16:19-34.

⁸ Grasa fòs lespri Bondye a, Pòl te vin Tesalonik. Etan la, li te travay pou l te okipe tèt li epi li te bay tan l nèt pou l te anseye Tesalonisyen yo laverite a. Li pa t janm ezite preche bon nouvèl la chak fwa li te jwenn posiblite. (1 Tes. 2:9). Preche Pòl t ap preche ak bonjan konviksyon l lan te tèlman fè yon kokenn efè sou moun nan zòn nan, gen ladan yo ki te sispann adore zidòl pou vin sèvi Jewova kòm vrè Bondye a. — 1 Tes. 1:8-10.

⁹ Pèsekisyon pa t anpeche nouvo kwayan yo preche bon nouvèl la. Nouvo relijyon yo a met sou bonjan konviksyon y ap jwenn benediksyon etènèl, te fè yo santi yo oblije fè konnen laverite yo te twò kontan anbrase a. Kongregasyon sa a te vin tèlman zele, nouvèl konsènan lafwa ak zèl yo a te gaye lòt kote tankou Masedwàn rive jis Akayi. Kidonk, tout moun te gentan konnen bon travay Tesalonisyen yo te fè lè Pòl te ekri yo premye lèt li a (1 Tes. 1:7). Ala yon bèl egzanp yo te bay !

¹⁰ Se lanmou pou Bondye ak pou pwochen yo ki te motive yo : Ki jan nou kapab kenbe bonjan konviksyon nou genyen an menm jan ak Tesalonisyen yo lè n ap preche bon nouvèl la ? Men sa Pol te ekri sou yo : “ Se toutan n ap sonje travay fidèl nou ak pakèt efò nou ap fè grasa lanmou nou. ” ​(1 Tes. 1:3, nòt anba paj). Yo te gen yon lanmou nan fon kè yo pou Jewova ak pou moun yo t ap preche yo. Nou klè sou sa. Se menm lanmou sa a ki te motive Pòl ak konpayon l yo bay Tesalonisyen yo “ nonsèlman bon nouvèl Bondye a, men pwòp nanm yo tou ”. — 1 Tes. 2:8.

¹¹ Menm jan an tou, lanmou nou gen nan fon kè nou pou Jewova ak pou pwochen nou yo pouse nou patisipe nèt nan travay predikasyon Bondye ban nou fè a. Se lanmou sa a ki fè nou rekonèt se yon reskonsablite Bondye ban nou pèsonèlman pou nou simaye bon nouvèl la. Lè nou medite anbyen sou tout sa Jewova te fè pou dirije nou nan “ lavi toutbon an ”, sa motive nou pou n al di moun yo bèl verite yo nou kwè ak tout kè nou an. — 1 Tim. 6:19.

¹² Tank nou rete okipe nan travay predikasyon an, se tank lanmou nou genyen pou Jewova ak pou pwochen nou dwe kontinye grandi. Si se sa, sa dwe chofe nou pou nou patisipe plis nan predikasyon kay an kay la ak nan tout lòt fòm predikasyon ki ouvri devan nou. N ap pwofite itilize posiblite nou genyen pou nou preche fanmi nou, vwazen nou ak moun nou konnen, defason enfòmèl. Malgre pifò moun vire do bay bon nouvèl n ap preche a, malgre gen moun k ap eseye ban nou baryè pou nou pa preche Wayòm nan, nan nou menm nou santi jan nou kontan. Sa k fè sa ? Paske nou konnen nou fè tout sa nou kapab pou nou preche Wayòm nan e pou nou ede moun yo sove. Lèfini, Jewova ap beni efò nou fè pou nou jwenn moun ki gen bon kè yo. Menmsi lavi a ap toupizi nou, menmsi Satan ap chèche wonyen lajwa nou an, nou kapab kenbe bonjan konviksyon ak zèl nou genyen an lè nou preche lòt moun. Lè nou chak jwe wòl pou nou jwe a, kongregasyon yo ap vin djanm, y ap vin zele menm jan ak kongregasyon Tesalonik la.

¹³ Pa janm kite eprèv fè nou kite sa : Nou bezwen kenbe konviksyon nou tou lè nou jwenn diferan kalite eprèv (1 Pyè 1:6, 7). Jezi te klè ak disip li yo sou sa. Li te di yo si yo swiv li, y ap tounen “ moun tout nasyon yo ap rayi ”. (Mat. 24:9.) Pòl ak Silas te viv sa etan yo te Filip. Travay chapit 16 rapòte yo te mete Pòl ak Silas nan kacho, yo te mete yo nan sèp. Jeneralman, te gen prizon prensipal kote te gen yon pakèt ti pyès. Lè ak solèy te bat sou yo. Men, kacho yo te fènwa, se apèn si yon ti lè te ka antre. Kidonk, Pòl ak Silas t ap goumen ak yon fènwa, ak yon chalè ak yon michan movèz odè. Aprè yo te mete yo nan sèp yon pakèt tan, yo kale yo, san koule nan tout do yo ki deja fin rachonnen. Èske w ka imajine jan yo te soufri ?

¹⁴ Malgre yon eprèv rèd konsa, Pòl ak Silas te rete fidèl. Yo te demontre yon konviksyon ki te soti nan kè yo, sa ki te fòtifye yo pou yo sèvi Jewova malgre eprèv yo te jwenn. Nan Travay 16:25, konviksyon yo parèt aklè. Vèsè sa a di Pòl ak Silas t ap “ lapriyè e yo t ap louwe Bondye avèk chante ”. Anreyalite, malgre yo te nan kacho, yo te tèlman gen asirans Bondye apwouve yo, yo te chante byen fò, ata lòt prizonye te tande. Nou dwe gen menm konviksyon sa a tou jodi a lè lafwa nou jwenn eprèv.

¹⁵ Eprèv Satan ap fè nou sibi yo anpil. Gen moun ki jwenn pèsekisyon nan fanmi yo. Gen anpil nan frè nou yo, se pwoblèm jiridik yo rankontre. Pafwa, nou ka jwenn opozisyon nan men aposta yo. Gen pwoblèm lajan, ak pwoblèm pou jwenn bout lavi a. Jèn yo anba presyon ak brimad nan men kamarad yo. Ki jan nou kapab reyisi nan konbat n ap konbat ak eprèv sa yo ? Ki sa nou bezwen pou nou demontre konviksyon nou ?

¹⁶ Premye bagay la e sa ki pi enpòtan an, se kenbe yon relasyon sere kole avèk Jewova. Lè Pòl ak Silas te nan kacho a, yo pa t gaspiye tan yo nan plenyen sò yo, ni yo pa t regrèt sa ki te rive yo a. Menm kote a, yo te priye Bondye, yo te ba l louwanj. Sa k fè yo te fè sa ? Paske yo te genyen yon relasyon sere kole avèk Papa selès yo a. Yo te reyalize yo t ap soufri poutèt yo renmen jistis e yo te lage vi yo nan men Jewova. — Sòm 3:8.

¹⁷ Lè n ap konbat ak eprèv yo jodi a, nou menm tou nou bezwen fikse je nou sou Jewova. Pòl ankouraje nou pou nou ‘ fè Bondye konnen demann nou yo, e lapè Bondye a, ki monte pi wo pase tout panse, ap pwoteje kè nou ak kapasite mantal nou ’. (Fil. 4:6, 7.) Ala sa rekonfòtan pou nou konnen Jewova pa kite nou lite anba eprèv yo pou kont nou (Iza. 41:10) ! Li toujou avèk nou toutotan n ap sèvi l avèk bonjan konviksyon. — Sòm 46:7.

¹⁸ Yon lòt èd vital nou bezwen pou nou demontre konviksyon nou se pou nou toujou gen okipasyon nan sèvis Jewova a (1 Kor. 15:58). Yo te mete Pòl ak Silas nan prizon paske yo te okipe nan predikasyon bon nouvèl la. Èske eprèv yo te fè yo sispann preche ? Non, yo te kontinye preche nan prizon an, e lè yo te fin lage, yo te ale Tesalonik, yo te antre nan sinagòg Jwif yo pou yo ‘ te rezone avèk yo dapre Ekriti yo ’. (Travay 17:1-3.) Lè nou kwè nan Jewova pou toutbon, e lè nou gen konviksyon nou gen laverite a, anyen “ pap kapab separe nou ak lanmou Bondye ki nan Kris Jezi Seyè nou an ”. — Wom. 8:35-39.

¹⁹ Egzanp moun ki gen bonjan konviksyon nan epòk nou an : Jounen jodi a, nou gen bèl egzanp moun ki te demontre yo gen bonjan konviksyon, menm jan ak Pòl ak Silas. Yon sè ki te soti vivan nan kan konsantrasyon Ochvits la rakonte jan frè ak sè yo te demontre yo gen yon lafwa ak yon konviksyon ki pa ka brannen. Men sa l di : “ Yon jou, pandan nou t ap sibi yon entèwogatwa, yon ofisye pwoche bò kote m avèk pwen li tou mare, li di : ‘ Ki sa pou nou fè avèk nou ? Arete nou, sa pa di nou anyen. Mete nou nan prizon, sa pa deranje nou ditou. Voye nou nan kan konsantrasyon, sa pap briding nou menm. Kondane nou amò, n ap rete kèpòpòz. Kounye a, ki sa pou nou fè avèk nou ? ’ ” Ala sa fòtifye lafwa pa nou lè nou wè kokenn lafwa frè yo te genyen nan sitiyasyon rèd konsa ! Yo te toujou konte sou Jewova pou l ede yo andire.

²⁰ Siman nou sonje konviksyon anpil nan frè nou yo demontre anfas rayisman etnik ki jèmen nan dènyè ane sa yo. Malgre frè ak sè yo konn andanje, frè reskonsab yo degaje yo pou fè yo jwenn manje espirityèl. Yo tout kontinye kenbe bonjan konviksyon yo fidèlman dekwa pou ‘ okenn zam y ap fòje kont yo pa reyisi ’. — Iza. 54:17.

²¹ Anpil nan frè ak sè nou yo kote swa mari yo oubyen madanm yo enkwayan demontre yo gen lafwa solid ak andirans. Yon frè nan peyi Gwadloup te jwenn anpil opozisyon nan men madanm li ki te enkwayan. Pou l te ka dekouraje l e anpeche l asiste reyinyon, li pa t fè moso manje pou li. Li pa t ni lave pase, ni repare rad li pou li. Li fè yon bann tan li pa pale avè l. Men, piske frè a te demontre konviksyon ki sot nan kè l nan sèvi l ap sèvi Jewova a e li te priye l pou l mande l èd, li te kapab andire tout bagay sa yo. Men, se te pandan konbyen tan ? Se te pandan 20 tan, apresa, kè madanm li te kòmanse ap chanje ofiramezi. Anfennkont, frè sa a te kapab rejwi li paske madanm li te vin asepte espwa Wayòm Bondye a bay la.

²² Finalman, fòk nou pa bliye frè ak sè nou yo ki pral lekòl chak jou yo, k ap pran presyon ak tout kalite brimad nan men kamarad yo. Men ki sa yon jèn fi Temwen di anrapò ak presyon y ap jwenn pou yo fè menm jan ak tout moun : “ Nan lekòl la, toutan y ap pouse w pou w vin yon ti rebèl. Yo pi respekte w lè w gen menm konpòtman avèk yo. ” Se pa ti brimad jèn yo ap pran ! Yo pran yon rezolisyon fèm ak tout lespri yo ak tout kè yo pou yo reziste anba tantasyon yo.

²³ Anpil nan jèn yo byen mennen bak yo nan kenbe y ap kenbe entegrite yo malgre eprèv y ap jwenn. Ann pran egzanp yon sè k ap viv an Frans. Yon jou, apre yo fin manje, gen kèk nan ti mesye yo ki t ap eseye fòse l bo yo. Men, li te priye Jewova e li te reziste ak tout fòs li. Lè yo wè sa, yo kite l anrepo. Annapre, youn nan jènjan yo te vin di l jan l admire l pou kouraj li. Li te tou pwofite ba l yon bon temwayaj sou Wayòm nan epi li te eksplike l ki prensip yon moun ki ta vle jwenn nan benediksyon Wayòm nan dwe respekte. Nan kouran ane a, li te pale de kwayans li yo devan tout klas la.

²⁴ Ala yon privilèj presye nou genyen pou nou konte nan mitan moun Jewova byen kontan itilize pou pale avèk bonjan konviksyon sou volonte li (Kol. 4:12) ! Met sou sa, nou gen yon bèl posiblite pou nou pwouve entegrite nou anba atak lyon yo rele Satan Ledyab la (1 Pyè 5:8, 9). Pa janm bliye Jewova sèvi ak mesaj Wayòm nan pou bay ni nou menm, ni moun ki ap koute nou posiblite sove. Nou swete jan n ap pran desizyon ak fason n ap viv toulejou pwouve se Wayòm Bondye a nou bay premye plas la. Annou kontinye preche bon nouvèl la avèk bonjan konviksyon !