Chapit kat
Moun tout pwofèt yo rann temwayaj sou li a
1. Ki sa enfòmasyon nou genyen sou lavi Jezi anvan l te vin òm montre konsènan relasyon li te genyen avèk Jewova ?
“ PAPA a gen afeksyon pou Pitit Gason an e li montre l tout bagay li menm li fè. ” (Jan 5:20). Ala yon bèl relasyon ki genyen ant Pitit Gason an ak Papa l, Jewova ! Relasyon entim sa a te kòmanse depi nan epòk kreyasyon Pitit la, sa gen yon kantite milenè nou pa ka konte, anvan li te fèt antanke òm. Se li ki te sèl Pitit Bondye fè, li sèl Jewova li menm te kreye dirèkteman. Se pa mwayen premye Pitit byenneme sa a, tout lòt kreyati ki nan syèl la ansanm ak sa ki sou tè a te kreye (Kolosyen 1:15, 16). Li te sèvi tou antanke Pawòl Bondye, oswa Pòtpawòl li, pou l kominike volonte Bondye bay lòt kreyati yo. Sila a, Pitit Gason Bondye gen afeksyon espesyal pou li a, te vin yon òm, Jezi Kris. — Pwovèb 8:22-30 ; Jan 1:14, 18 ; 12:49, 50.
2. Jis nan ki pwen pwofesi biblik yo pale de Jezi ?
2 Anvan konsepsyon premye Pitit Bondye a antanke òm, konsepsyon ki te yon mirak, yo te deja ekri anpil pwofesi enspire ki pale de li. Apot Pyè te sètifye devan Kònèy : “ Tout pwofèt yo rann temwayaj sou li. ” (Travay 10:43). Bib la tèlman bay wòl Jezi jwe a enpòtans, yon zanj te di apot Jan : “ Rann temwayaj sou Jezi se sa ki enspire pwofesi yo. ” (Revelasyon 19:10). Pwofesi sa yo te idantifye Jezi aklè antanke Mesi. Yo te atire atansyon sou divès wòl li ta gen pou l jwe nan akonplisman objektif Bondye. Tout sa ta dwe enterese nou anpil jodi a.
Ki sa pwofesi yo te revele
3. a) Nan pwofesi Jenèz 3:15 lan, kiyès ki reprezante sèpan an, “ madanm nan ”, ak ‘ semans sèpan an ’ ? b) Pou ki rezon mètri y ap ‘ mètri tèt sèpan an ’ se yon bagay ki ta dwe enterese sèvitè Jewova yo anpil ?
3 Yo te bay premye nan pwofesi sa yo apre rebelyon ki te fèt ann Edenn nan. Jewova te di sèpan an : “ M ap mete yon rayisman ant ou menm ak madanm nan, ant semans pa w ak semans pa l. L ap mètri w nan tèt, e ou menm w ap mètri l nan talon. ” (Jenèz 3:15). Pwofesi sa a te konsène Satan, li menm sèpan an te reprezante a. “ Madanm nan ” se òganizasyon selès devwe Jewova a, ki tankou yon madanm fidèl anvè l. ‘ Semans sèpan an ’ gen ladan l tout zanj ak tout moun ki demontre yo gen lespri Satan an, yo menm ki opoze ni ak Jewova ni ak pèp Li a. Mètri y ap ‘ mètri tèt sèpan an ’ siyifi destriksyon definitif Satan, rebèl ki te fè manti sou Jewova a, e ki pote gwo chagren pou limanite. Men, pati prensipal semans lan ki ta gen pou mètri tèt Satan an, kiyès li ye ? Pandan plizyè syèk sa te rete yon “ sekrè ki sakre ”. — Women 16:20, 25, 26.
4. Kòman zansèt Jezi yo ede nou idantifye li kòm Semans Bondye te pwomèt la ?
4 Apre 2 000 an anviwon nan istwa limanite, Jewova te bay plis detay. Li te endike se nan liy fanmi Abraram Semans lan t ap parèt (Jenèz 22:15-18). Sepandan, liy fanmi ki t ap mennen nan Semans lan pa t ap depann de yon desandan selon lachè, men de chwa pa Bondye. Malgre lanmou Abraram te genyen pou Yichmayèl, pitit gason li te fè ak Aga a, Jewova di : “ Alyans mwen an m ap etabli l avèk Izarak, li menm Sara pral fè pou ou. ” (Jenèz 17:18-21). Annapre, alyans sa a te konfime, non pa ak premye gason Izarak la, Ezayi, men ak Jakòb ki te vin gen 12 tribi Izrayèl yo kòm desandan (Jenèz 28:10-14). Avèk letan, yo te fè konnen Semans lan ta fèt nan tribi Jida, nan fanmi David. — Jenèz 49:10 ; 1 Kwonik 17:3, 4, 11-14.
5. Lè Jezi te kòmanse ministè l sou tè a, ki sa k te fè wè aklè se li ki Mesi a ?
5 Ki lòt endis yo te bay pou idantifye Semans lan ? Plis pase 700 ane alavans, Bib la te pale de Betleyèm kòm kote Semans Bondye pwomèt la ta gen pou l fèt antanke òm. Anplis de sa, li te fè konnen : Semans lan te deja egziste “ depi nan jou tan endefini yo ”, depi lè Bondye te kreye l nan syèl la (Mika 5:2). Pwofèt Dànyèl te predi tou moman egzak li ta gen pou l parèt sou tè a antanke Mesi (Dànyèl 9:24-26). E lè lespri sen te wenn Jezi pou l vin Wen Jewova a, se pwòp vwa Bondye depi nan syèl la ki te idantifye l aklè kòm Pitit Gason Bondye a (Matye 3:16, 17). Semans lan te parèt aklè ! Konsa, Filip te ka di avèk konviksyon : “ Nou jwenn sila a, Moyiz, nan Lalwa, ak Pwofèt yo, te ekri sou li a, Jezi. ” — Jan 1:45.
6. a) Selon Lik 24:27, ki sa disip Jezi yo te vin rann yo kont ? b) Kiyès ki pati prensipal ‘ semans madanm nan ’, epi ki sa sa siyifi lefètke l ap mètri tèt sèpan an ?
6 Apre sa, disip Jezi yo te rann yo kont Ekriti enspire yo te chaje ak yon bann pwofesi ki fè referans ak Jezi (Lik 24:27). Li vin klè se Jezi ki pati prensipal ‘ semans madanm nan ’. Se li ki pral mètri tèt sèpan an, ki pral krabinen Satan pou l sispann egziste. Pa mwayen Jezi, tout pwomès Bondye fè limanite yo, tout bagay n ap tann avèk enpasyans depi lontan yo pral reyalize. — 2 Korentyen 1:20.
7. Yonfwa nou fin idantifye Moun pwofesi yo pale de li a, ki lòt bagay ankò ki nesesè pou nou konprann ?
7 Ki efè sa ta dwe fè sou nou lè nou aprann sa ? Bib la pale de yon enik Etyopyen ki t ap li kèk nan pwofesi konsènan Redanmtè a, Mesi ki t ap vini an. Kòm li pa t konprann sa l t ap li a, li te mande Filip, evanjelizatè a : “ Di mwen souple, konsènan kiyès pwofèt la di sa ? ” Men enik lan pa t kite kesyon an la lè l fin resevwa repons lan. Apre mesye a te fin koute ak anpil atansyon esplikasyon Filip t ap bay la, li te vin konprann rekonesans li pou akonplisman pwofesi sa a mande pou l aji. Li te konprann li nesesè pou l batize (Travay 8:32-38 ; Izayi 53:3-9). Èske nou reyaji menm jan an ?
8. a) Ki sa tantativ Abraram te fè pou l ofri Izarak la te prefigire ? b) Poukisa Jewova te di Abraram tout nasyon ta beni tèt yo grasa Semans lan, e ki jan sa konsène nou jodi a ?
8 Annou egzamine tou istwa touchan kote Abraram te fè tantativ pou l ofri Izarak, sèl pitit gason li te genyen ak Sara a (Jenèz 22:1-18). Istwa sa a te prefigire sa Jewova t apral fè lè li ta ofri sèl Pitit li fè a. Nou li : “ Bondye tèlman renmen monn nan, li bay sèl Pitit Gason li fè a, dekwa pou nenpòt moun ki egzèse lafwa nan li pa detwi, men pou l gen lavi etènèl. ” (Jan 3:16). Piske Jewova te bay sèl Pitit li fè a pou l reyalize objektif li, sa ban nou konfyans, ‘ avèk bonte, li pral ban nou tout lòt bagay yo ’. (Women 8:32.) Ki sa sa mande pou nou fè bò kote pa nou ? Dapre sa ki rapòte nan Jenèz 22:18, Jewova te di Abraram tout nasyon sou tè a ta beni tèt yo grasa Semans lan, “ paske [Abraram te] koute vwa [Bondye] ”. Nou menm tou nou bezwen koute ni Jewova ni Pitit li a ki di : “ Moun ki egzèse lafwa nan Pitit Gason an gen lavi etènèl. Moun ki dezobeyi Pitit Gason an pap wè lavi, men kòlè Bondye rete la sou li. ” — Jan 3:36.
9. Si nou rekonesan pou esperans lavi etènèl ki vin posib grasa sakrifis Jezi a, ki sa n ap fè ?
9 Si nou rekonesan pou esperans lavi etènèl ki vin posib grasa sakrifis Jezi a, n ap anvi fè sa Jewova mande nou pa mwayen Jezi. Bagay sa yo gen rapò etwat ak lanmou nou gen ni pou Bondye ni pou pwochen nou (Matye 22:37-39). Jezi te montre lanmou nou genyen pou Jewova ap motive nou pou nou anseye lòt moun “ pou yo obsève tout bagay [Jezi te] kòmande [nou] ” yo (Matye 28:19, 20). E n ap anvi pataje lanmou sa a ak sèvitè Jewova parèy nou yo lè nou la regilyèman nan ‘ reyinyon yo ansanm avèk yo ’. (Ebre 10:25 ; Galat 6:10.) Anplis de sa, pandan n ap koute Bondye ansanm ak Pitit li a, nou pa ta dwe panse yo egzije pèfeksyon lakay nou. Selon Ebre 4:15, Jezi, antanke Gran Prèt nou, kapab “ konprann feblès nou ”. Ala sa rekonfòtan, sitou lè n ap pwoche bò kote Bondye nan lapriyè pa mwayen Kris pou nou mande l èd pou nou venk feblès nou yo ! — Matye 6:12.
Demontre lafwa nan Kris
10. Apa Jezi Kris, poukisa pa gen delivrans nan okenn lòt moun ?
10 Apre apot Pyè te fin fè tribinal siprèm juif Jerizalèm nan konnen pwofesi ki nan Bib la akonpli sou Jezi, li fè yon konklizyon konvenkan. Li di : “ Pa gen delivrans nan okenn lòt moun, paske anba syèl la, pa gen okenn lòt non yo te bay pami lèzòm, pou se grasa non sa a nou dwe sove. ” (Travay 4:12). Piske tout desandan Adan yo se pechè, lanmò yo pa gen okenn valè ki ka sèvi ranson pou pyès moun. Men Jezi li menm te pafè, e lavi li gen yon valè sakrifisyèl (Sòm 49:6-9 ; Ebre 2:9). Li te ofri Bondye yon ranson e valè ranson an koresponn egzakteman ak lavi pafè Adan te pèdi a (1 Timote 2:5, 6). Sa ouvri chemen pou nou jwenn lavi etènèl nan monn nouvo Bondye a.
11. Esplike kòman nou ka jwenn gwo byenfè nan sakrifis Jezi a ?
11 Ranson an ouvri chemen tou pou nou resevwa lòt byenfè, menm depi kounye a. Pa egzanp, malgre nou se pechè, sakrifis Jezi a fè l posib pou nou gen yon konsyans ki pwòp paske peche nou padone. Sa depase lontan sa sakrifis zannimo Lalwa Moyiz te egzije yo te konn akonpli pou Izrayelit yo (Travay 13:38, 39 ; Ebre 9:13, 14 ; 10:22). Sepandan, pou nou jwenn padon sa a, sa mande pou nou rekonèt onètman nan ki pwen nou bezwen sakrifis Kris la. “ Si nou deklare : ‘ Nou pa gen peche ’, n ap twonpe tèt nou e laverite pa nan nou. Si nou konfese peche nou, li fidèl e li jis pou l padone peche nou yo e pou l pirifye nou anba tout enjistis. ” — 1 Jan 1:8, 9.
12. Poukisa batize nan dlo se yon etap enpòtan pou moun vin gen yon bon konsyans devan Bondye ?
12 Kòman lèzòm pechè ka demontre yo gen lafwa nan Kris e yo gen lafwa nan sakrifis li a ? Nan premye syèk la, lè moun te vin kwayan, yo te demontre sa piblikman. Ki jan ? Yo te batize. Poukisa ? Paske Jezi te bay lòd pou tout disip li yo batize (Matye 28:19, 20 ; Travay 8:12 ; 18:8). Yon moun pap ezite fè sa lè dispozisyon plen lanmou Jewova pran pa mwayen Jezi a touche kè l toutbonvre. L ap fè nenpòt chanjman ki nesesè nan lavi li. L ap vwe tèt li bay Bondye nan lapriyè epi l ap batize nan dlo pou l senbolize ve sa a. Se lè l demontre lafwa nan fason sa a li fè ‘ Bondye demann pou yon bon konsyans ’. — 1 Pyè 3:21.
13. Si nou rann nou kont nou fè yon peche, ki sa nou dwe fè, e poukisa ?
13 Natirèlman, menm apre sa, tandans peche a ap toujou parèt. Nan ka sa a, ki sa pou nou fè ? Apot Jan di : “ Mwen ekri nou bagay sa yo pou nou ka pa fè peche. Men, si yon moun rive fè yon peche, nou gen yon asistan bò kot Papa a, Jezi Kris, yon moun ki jis. E li se yon sakrifis pwopisyatwa pou peche nou. ” (1 Jan 2:1, 2). Èske sa vle di kèlkeswa sa nou fè, si nou priye Bondye pou nou mande l padon tout bagay ap mache byen ? Pa nesesèman ! Kle pou nou jwenn padon an se vrè repantans lan. Anplis de sa, li ka nesesè pou nou jwenn èd moun ki pi aje, moun ki gen plis eksperyans nan kongregasyon kretyen an. Nou dwe rekonèt fot nou fè a, e nou dwe santi yon regrè sensè pou sa, atèlpwen sa fè nou dispoze fè bonjan efò pou nou evite refè menm bagay la (Travay 3:19 ; Jak 5:13-16). Si nou fè sa, nou kapab asire nou Jezi ap ede nou e n ap rejwenn favè Jewova.
14. a) Esplike yon fason enpòtan sakrifis Jezi a pwofitab pou nou ? b) Si nou vrèman gen lafwa, ki sa n ap fè ?
14 Sakrifis Jezi a ouvri chemen pou lavi etènèl nan syèl pou yon “ ti twoupo ”, pati segondè semans Jenèz 3:15 lan (Lik 12:32 ; Galat 3:26-29). Men tou, li ouvri chemen pou plizyè milya lòt moun jwenn lavi etènèl nan Paradi sou tè a (Sòm 37:29 ; Revelasyon 20:11, 12 ; 21:3, 4). Lavi etènèl se “ kado Bondye bay [...] pa mwayen Kris Jezi, Seyè nou an ”. (Women 6:23 ; Efezyen 2:8-10.) Si nou gen lafwa nan kado sa a, e nou rekonesan pou sa k fè l posib la, n ap pwouve sa. Lè nou disène fason estrawòdinè Jewova sèvi ak Jezi pou l akonpli volonte l, e jan li enpòtan pou nou tout suiv tras Jezi pazapa, n ap fè ministè nou antanke kretyen tounen youn nan aktivite ki pi enpòtan nan lavi nou. Lafwa nou ap vizib nan konviksyon nou genyen pou nou pale ak lòt moun sou kado mayifik sa a Bondye bay la. — Travay 20:24.
15. Kòman lafwa nan Jezi Kris gen yon efè ki favorize inite ?
15 Se pa ti bèl efè yon fwa konsa ki favorize inite genyen ! Grasa li, nou vin pi pwòch ni Jewova, ni Pitit li a, e nou vin pi pwòch youn avèk lòt anndan kongregasyon kretyen an (1 Jan 3:23, 24). Sa fè nou kontan dèske, avèk bonte, Jewova bay Pitit li a “ non ki anlè tout lòt non an [eksepte non pa Bondye], yon fason pou tout jenou pliye nan non Jezi, kit se sa ki nan syèl la, kit se sa ki sou tè a, kit se sa ki anba tè a, e se pou tout lang rekonèt aklè Jezi Kris se Seyè, pou glwa Bondye Papa a ”. — Filipyen 2:9-11.
Revizyon
• Lè Mesi a te parèt, poukisa moun ki te kwè toutbonvre nan Pawòl Bondye a te ka idantifye l aklè ?
• Site kèk bagay nou ta dwe fè pou nou montre rekonesans nou pou sakrifis Jezi a ?
• Nan ki sans sakrifis Jezi a deja pwofitab pou nou ? Ki jan sa ede nou lè n ap priye Jewova pou l padone peche nou ?
[Foto nan paj 36]
Jezi te di disip li yo yo dwe anseye lòt moun pou yo obsève kòmandman Bondye yo.