Ranson an egzalte jistis Bondye
APRE rebelyon Adan ak Èv la, Jewova te fè konnen objektif li genyen pou l bay yon Semans yo t ava mètri nan talon (Jenèz 3:15). Sa te akonpli lè ènmi Bondye yo te touye Jezi Kris sou yon poto soufrans (Galat 3:13, 16). Etandone se pa mwayen yon mirak Jezi te devlope nan matris yon fi vyèj anba pouvwa lespri sen, li te fèt san peche. Kidonk, san l ki te koule a te ka sèvi kòm pri ki te dwe peye kòm ranson pou libere lèzòm, yo menm ki eritye peche ak lanmò nan Adan. — Women 5:12, 19.
Pa gen anyen ki ka stope Jewova, Bondye toupisan an, pou l pa reyalize objektif li. Se sa k fè, apre lòm te fin tonbe nan peche, Bondye te gentan konsidere pri ki te dwe peye kòm ranson an kòmsi li te deja peye, e li te ka gen relasyon avèk moun ki egzèse lafwa nan reyalizasyon pwomès li yo. Sa te pèmèt yon seri desandan Adan, tankou Enòk, Noye, Abraram, kwak yo te pechè, yo te ka mache avèk Bondye, yo te ka menm vin zanmi li, san sa pa afekte sentete l. — Jenèz 5:24 ; 6:9 ; Jak 2:23.
Gen kèk moun ki te gen fwa nan Jewova ki te komèt peche grav. Wa David se yon egzanp. Ou ka ap mande tèt ou : ‘ Ki jan Jewova te fè kontinye beni wa David apre li fin komèt adiltè avèk Batcheba e li lakòz mari Batcheba mouri, anpalan de Ouriya ? ’ Yon rezon enpòtan ki fè sa, se paske David te repanti ak tout kè l e li te gen lafwa (2 Samyèl 11:1-17 ; 12:1-14). Sou baz sakrifis Jezi Kris ki ta gen pou l fèt la, Bondye te anmezi pou l padone peche David yo, piske li te repanti, e sa pa t fè l pase sou prensip jistis li yo pou sa (Sòm 32:1, 2). Bib la pwouve sa lè li fè konnen sa ki pi estrawòdinè ranson Jezi a reyalize, sèke li “ montre pwòp jistis [Bondye], paske li te padone peche ki te fèt nan tan lontan yo ” ak peche ki fèt “ nan moman sa la a ”. — Women 3:25, 26.
Wi, limanite jwenn gwo byenfè grasa san Jezi ki gen anpil valè. Sou baz ranson an, imen enpafè ki repanti ka vin gen yon relasyon sere avèk Bondye. Anplis de sa, ranson an ouvri chemen pou moun ki mouri resisite nan monn nouvo Bondye a. Pami moun sa yo, gen sèvitè Bondye ki fidèl ki te gentan mouri anvan Jezi te peye ranson an, e menm gen anpil moun ki mouri nan inyorans, ki pa t ap adore Bondye, k ap resisite. Men sa Bib la di : “ Pral gen yon rezirèksyon ni pou moun ki jis ni pou moun ki enjis. ” (Travay 24:15). Nan moman sa a, sou baz ranson an, Jewova pral bay tout moun ki obeyisan yo lavi etènèl (Jan 3:36). Men sa Jezi li menm te di : “ Bondye tèlman renmen monn nan, li bay sèl Pitit Gason li fè a, dekwa pou nenpòt moun ki mete lafwa nan li pa detwi, men pou l gen lavi etènèl. ” (Jan 3:16). Se tout byenfè sa yo ki pral vide sou limanite grasa dispozisyon sa a Bondye pran pou l peye sakrifis ranson an.
Sepandan, aspè ki pi estrawòdinè anrapò ak ranson an, se pa byenfè li fè nou jwenn. Sa ranson Kris la fè pou non Jewova gen plis enpòtans pase sa nou resevwa. Li pwouve Jewova se yon Bondye ki gen yon jistis san fay, ki kapab gen relasyon avèk imen enpafè epoutan li rete san tach, li rete sen. Si Bondye pa t deside peye ranson an, pa gen yon desandan Adan ki t ap ka mache avèk Bondye oswa vin zanmi l, li mèt te Enòk, Noye, Abraram, yo youn pa t ap kapab. Yon salmis te konprann sa, men sa li te ekri : “ Si se te fot ou t ap chèche, o Ya, o Jewova, kiyès ki t ap ka kanpe ? ” (Sòm 130:3). Se pa ti rekonesan nou dwe rekonesan anvè Jewova, poutèt li te voye Pitit Gason li renmen anpil la sou tè a, e anvè Jezi, poutèt li te aksepte bay lavi l kòm ranson pou nou ! — Mak 10:45.