Nou libere grasa favè san parèy la

1, 2. Ki jan Women 5:12 kapab ede nou?

MEN sa Women 5:12 di: “Akoz yon sèl moun peche antre nan monn nan, e akoz peche lanmò antre, e konsa lanmò blayi sou tout moun paske yo tout te peche.” Vèsè sa a se youn nan vèsè nou pi byen konnen e nou itilize souvan lè n ap anseye moun yo Labib.

² Yo itilize vèsè sa a plizyè fwa nan liv Ki sa Labib anseye toutbonvre? a ak liv Ki sa Labib kapab anseye nou? an. Lè n ap etidye chapit 3, chapit 5 ak chapit 6 la ak pitit nou oswa ak lòt moun, petèt n ap li Women 5:12. Nou ka itilize vèsè sa a pou n ede yo konprann poukisa tè a pa yon paradi, rezon ki fè nou bezwen ranson an e poukisa moun mouri. Men, mete sou sa, vèsè sa a ka ede nou tout vin gen plis rekonesans dèske nou gen relasyon ak Jewova. Li ka ede n vin gen plis detèminasyon pou n fè l plezi e pou n kontinye ret tann sa l pwomèt nou yo.

 3. Ki sa n dwe sonje konsènan sitiyasyon nou?

³ Malerezman, nou tout se pechè. Se chak jou nou fè erè. Sepandan, Jewova gen mizèrikòd. Li konnen nou enpafè, e li dispoze padone nou (Sòm 103:13, 14). Jezi te di nou dwe mande Bondye pou l padone peche nou (Lik 11:2-4). Lè Jewova fin padone peche nou te fè nan tan lontan, nou pa dwe kontinye ap reflechi sou yo. Ann egzamine fason Jewova kapab padone nou.

4, 5. a) Ki sa k ede n konprann Women 5:12? b) Ki sa ekspresyon “favè san parèy” la vle di?

⁴ Liv Women an, sitou chapit 6 la, ede n konprann fason Jewova kapab padone peche nou. Nan chapit 3 a, nou aprann “tout moun peche”. Epi, men esplikasyon Pòl bay: “Bondye fè yo yon kado lè li deklare yo jis grasa favè san parèy li a e grasa liberasyon ki fèt sou baz ranson Kris Jezi te peye a.” (Women 3:23, 24). Nan vèsè sa a, mo grèk lè yo tradui l yo mete “favè san parèy” pou li a gen rapò ak yon aksyon ki janti anpil yon moun fè pou yon lòt moun san l pa atann anyen annapre, yon bagay lòt moun nan pa t travay pou li e li pa t merite l.

⁵ Gen yon biblis ki fè konnen mo grèk yo itilize a sitou gen rapò ak sa Bondye ak Kris te fè pou sove lèzòm anba peche ak lanmò. Se sa k fè Tradiksyon monn nouvo a mete “favè san parèy” pou tradui mo grèk sa a an kreyòl. Ann wè ki sa Bondye fè pou nou, ki byenfè nou jwenn depi kounye a grasa favè san parèy li a e ki espwa sa ban nou pou lavni.

 6. Kiyès ki ka jwenn byenfè grasa favè san parèy Bondye a, e ki jan?

⁶ Piske Adan te peche, peche ak lanmò gen efè sou tout moun enpafè ki pase sou tè a. Se sa k fè Bib la di: “Akoz fot yon sèl moun, lanmò vin domine antanke wa.” Men, Jewova te montre yon kokenn favè san parèy e l te bay yon mwayen pou delivre lèzòm grasa “yon sèl moun: Jezi Kris”. (Women 5:12, 15, 17.) “Grasa obeyisans yon sèl moun anpil moun ap vin jis.” Epi, yo kapab gen espwa y ap gen “lavi ki pap janm fini an grasa Jezi Kris”. — Women 5:19, 21.

 7. Poukisa ranson Bondye bay kòm kado a se yon aksyon ki demontre bonte e se yon favè?

⁷ Reflechi sou sa: Jewova pa t oblije bay Pitit Gason l lan kòm ranson. Men, li te demontre anpil bonte lè l te bay yon mwayen pou delivre nou anba peche ak lanmò. Nou youn pa merite sa Bondye ak Jezi te fè pou nou an. Se pa ti rekonesans nou genyen lefètke yo ban nou posiblite pou n jwenn padon e pou n viv pou toutan! Ann montre Bondye jan nou gen rekonesans nan fason n ap viv.

 8. Ki fason nou dwe evite panse?

⁸ Nou konnen Bondye dispoze padone peche nou, menm peche ki grav yo. Men, nou pa dwe janm pran favè san parèy Jewova a kòm eskiz pou n fè sa ki mal epi pou n panse ‘Jewova ap padone n’. Nan premye syèk la, byenke kèk nan apot yo te vivan toujou, te gen kretyen ki te konn panse konsa. (Li Jid 4.) Jodi a, nou bezwen pran prekosyon pou lòt moun pa detenn sou nou, e tikras pa tikras pou n pa kòmanse panse menm jan ak yo.

9, 10. Ki jan Pòl ak lòt kretyen yo te vin libere anba peche ak lanmò?

⁹ Pòl te di kretyen yo se t ap yon bagay ki mal pou yo ta panse si yo kontinye fè peche Bondye t ap toujou padone yo. Pòl te di yo dwe rejte panse sa a paske yo te “mouri anrapò ak peche”. (Li Women 6:1, 2.) Ki sa l te vle di?

¹⁰ Grasa ranson an, Bondye te padone peche Pòl yo ak peche lòt kretyen nan premye syèk la. Pa mwayen lespri sen, Jewova te chwazi yo pou yo vin pitit li. Si yo te ret fidèl, yo t ap gen pou y al viv nan syèl e yo t ap gen pou yo dirije ak Kris. Men, piske yo te toujou ap viv sou tè a, ki jan yo te fè “mouri anrapò ak peche”? Pòl te fè yon konparezon pou l montre fason yo t ap viv la te chanje nèt. Li te di lè Jezi te mouri, Bondye te resisite l antanke yon espri ki pa ka mouri. Se sa k fè lanmò “pap domine sou li ankò”. Nan menm sans lan, se kòmsi kretyen yo te mouri tou. Lavi yo te chanje nèt paske yo pa t kite dezi pou yo fè peche domine sou yo ankò. Depi lè sa a, yo te fè tout sa yo kapab pou yo viv yon fason ki fè Bondye plezi. Yo te “mouri toutbon parapò ak peche, men [yo t ap] viv pou Bondye grasa Kris Jezi”. — Women 6:9, 11.

11. Ki jan kretyen yo jodi a “mouri anrapò ak peche”?

¹¹ E nou menm? Nan ki sans nou “mouri anrapò ak peche”? Anvan nou te vin kretyen, petèt nou te fè anpil move aksyon san nou pa t konnen ki jan Jewova konsidere yo. Nou te “esklav [...] ni konduit ki pa pwòp, ni sa lalwa kondane”, sa vle di nou te “esklav peche”. (Women 6:19, 20.) Men, lè n te vin aprann nan Bib la fason Bondye vle nou viv, nou te fè chanjman nan lavi nou, nou te vwe tèt nou bay Bondye e nou te batize. Nou te gen yon gwo dezi pou n obeyi Jewova e pou n viv yon fason ki fè l plezi. Nou te “libere anba peche” e nou te “vin esklav sa ki jis”. — Women 6:17, 18.

12. Ki desizyon nou chak dwe pran?

¹² Aktout sa, nou toujou devan yon chwa. Men sa Pòl te di: “Pa kite peche kontinye domine antanke wa sou kò nou ki ka mouri, pou l fè nou obeyi dezi kò nou genyen.” (Women 6:12). Se swa nou suiv panse ak dezi nou genyen pou n fè peche oswa nou metrize yo. Mande tèt ou: ‘Èske m kite move dezi m genyen yo vin tèlman fò, sa fè m tonbe nan fè sa k mal? Oubyen èske m rejte yo san pèdi tan?’ Si nou gen anpil rekonesans pou favè san parèy Bondye a, n ap fè tout sa n kapab pou n fè Bondye plezi.

13. Poukisa nou mèt gen konfyans nou kapab fè sa ki dwat?

¹³ Nan premye syèk la, kèk moun nan vil Korent lan ki te konn vòlè, ki te omoseksyèl, ki te konn fè adiltè, ki te konn adore zidòl e ki te bwasonyè, te vin aprann konnen Jewova, yo te vin renmen l, e yo te chanje. Yo te vin wont sa yo te konn fè yo (Women 6:21; 1 Korentyen 6:9-11). Kretyen ki te nan vil Wòm yo te bezwen fè menm chanjman sa yo tou. Men sa Pòl te di yo: “Pa kontinye prezante kò nou bay peche kòm zam k ap sèvi pou fè sa ki pa jis. Men, prezante nou bay Bondye antanke moun vivan ki sot pami mò yo, e prezante kò nou tou bay Bondye kòm zam k ap sèvi pou fè sa ki jis.” (Women 6:13). Pòl te gen konfyans yo te kapab fè sa ki dwat pou yo ka kontinye gen favè san parèy Bondye a.

14, 15. Ki kesyon nou dwe poze tèt nou?

¹⁴ Se menm bagay la tou jodi a. Petèt gen kèk nan frè ak sè n yo ki te konn viv menm jan ak moun Korent yo. Men, apre yo fin aprann konnen Jewova, yo te chanje. Se kòmsi yo te lave yo. Nou tout te fè chanjman nan lavi nou pou n ka fè Jewova plezi. Jis kounye a, nou bezwen montre nou gen anpil rekonesans pou favè san parèy Bondye a. Se sa k fè nou detèmine pou n konbat move dezi nou yo e pou n itilize lavi nou pou n sèvi Jewova.

¹⁵ Nòmalman, nou dwe evite fè peche grav kèk nan moun ki t ap viv Korent yo te konn fè. Nou pa kapab kontinye ap fè bagay sa yo e anmenmtan pou n atann Bondye ap montre favè san parèy li a anvè nou e l ap padone nou. Bon, ki sa n ka di konsènan peche kèk moun ka konsidere kòm peche ki pa twò grav? Èske nou pran detèminasyon pou n fè tout sa n kapab pou n obeyi Jewova nan tout bagay? — Women 6:14, 17.

16. Ki jan nou fè konnen nou dwe evite fè peche yo pa site nan 1 Korentyen 6:9-11 yo?

¹⁶ Fè yon ti reflechi sou egzanp apot Pòl. Men sa l te ekri: “Mwen fèt nan lachè, yo vann mwen bay peche. Anfèt, mwen pa konprann sa m ap fè. Paske, sa m vle a, se pa li m pratike, men sa m rayi a, se li m fè.” (Women 7:14, 15). Byenke Pòl pa t ap pratike bagay yo site nan 1 Korentyen 6:9-11 yo, li te rekonèt li te toujou fè peche. Li te vle fè Jewova plezi, se sa k fè li te goumen pou l pa t fè sa k mal. (Li Women 7:21-23.) Annou imite egzanp li e ann fè tout sa n kapab pou n obeyi Jewova.

17. Poukisa w dwe onèt?

¹⁷ Pa egzanp, nou konnen pou n sèvi Jewova nou dwe onèt. (Li Pwovèb 14:5; Efezyen 4:25.) Nou pa ta renmen menm jan ak Satan, ki se “papa manti”. Mete sou sa, nou sonje Anànyas ak madanm li te mouri paske yo te bay manti. Kidonk, nou pap bay manti (Jan 8:44; Travay 5:1-11). Men, pou yon moun onèt sa mande plis pase annik pa bay manti. Si nou gen rekonesans toutbonvre pou favè san parèy Bondye a, n ap montre nou onèt tou plizyè fason.

18, 19. Sa sa vle di pou yon moun onèt?

¹⁸ Yon moun gendwa pa bay manti, poutan li pa onèt. Pa egzanp, Jewova te di Izrayelit yo: “Nou pa dwe vòlè, nou pa dwe twonpe moun, nou pa dwe aji yon fason ki malonèt youn ak lòt.” Poukisa yo te dwe suiv konsèy sa a? Men sa Jewova te di: “Nou dwe sen, paske mwen menm, Jewova, Bondye nou an, mwen sen.” (Levitik 19:2, 11). Menm lè nou gendwa pa bay manti, men, si nou fè lòt moun kwè yon bagay ki pa vre, nou pa onèt.

¹⁹ Pa egzanp, yon moun ka di patwon l oswa kòlèg travay li li dwe kite travay la bonè paske l gen yon randevou kay doktè. Men, se pa vrè rezon an. Li ta renmen kite travay la bonè paske l pral regle zafè pa l. An reyalite, swadizan randevou li gen kay doktè a se jis pase l ap pase byen vit nan yon famasi oswa l ap pase peye yon kòb li te dwe doktè a. Èske moun sa a onèt oubyen l ap twonpe moun? Li te fè lòt moun kwè yon bagay ki pa verite. Pafwa, gen moun ki twonpe moun paske yo vle jwenn yon bagay oswa yo vle evite yon pinisyon. Men, nou obeyi Jewova, li menm ki te di: “Nou pa dwe twonpe moun.” Nou vle fè sa l di ki dwat e ki sen. — Women 6:19.

20, 21. Si n gen rekonesans pou favè san parèy Bondye a, ki lòt bagay nou dwe evite?

²⁰ Nòmalman, nou evite fè adiltè, bwè pou n sou, ak lòt peche grav ankò. Mete sou sa, nou fè efò pou n evite kèlkeswa bagay ki pap fè Jewova plezi. Pa egzanp, nou pa sèlman evite imoralite seksyèl, men nou evite divètisman ki imoral tou. Nou pa sèlman evite bwè pou n sou, men nou evite bwè nan pwen pou n prèske sou tou. Sa ka mande anpil efò pou n reziste ak tantasyon sa yo, men se yon bagay ki posib.

²¹ Objektif nou se suiv konsèy Pòl te bay la lè l te di: “Pa kite peche kontinye domine antanke wa sou kò nou ki ka mouri, pou l fè nou obeyi dezi kò nou genyen.” (Women 6:12; 7:18-20). Se vre, nou pa ka evite tout kalite peche. Men, lè n konbat tout kalite peche, nou montre nou vrèman gen rekonesans pou favè san parèy Bondye ak Kris fè nou an.

22. Ki rekonpans nou kapab espere jwenn si nou vrèman gen rekonesans pou favè san parèy Jewova a?

²² Jewova padone peche nou yo e li kapab kontinye padone yo. Se pa ti rekonesans nou genyen pou favè san parèy li a! Kidonk, ann fè gwo efò pou n evite fè sa l di ki mal, menmsi lòt moun pa konsidere bagay sa yo kòm peche. Ki rekonpans nou ka espere jwenn si nou fè sa? Men sa Pòl te di: “Kòm nou libere anba peche e nou vin esklav Bondye, fwi nou bay se yon lavi ki sen, e alafen, n ap gen lavi ki pap janm fini an.” — Women 6:22.