Ann ede sanblab nou yo vin ‘ moun ki obeyi ak tout kè yo ’
1. Ki sa Jewova mande moun k ap adore l yo ?
1 Obeyisans se yon bagay ki fondamantal pou moun adore Jewova yon fason ki akseptab (Det. 12:28 ; 1 Pyè 1:14-16). Talè konsa, Bondye pral egzekite jijman l “ sou moun ki pa konnen Bondye e sou moun ki pa obeyi bon nouvèl ” la. (2 Tes. 1:8.) Ki sa nou ka fè pou nou ede sanblab nou yo vin ‘ moun ki obeyi ansèyman Pawòl Bondye a ak tout kè yo ’ ? (Wom. 6:17.)
2. Poukisa li enpòtan pou nou ede lòt moun bati yon fwa solid ?
2 Lè nou ede yo bati lafwa yo ak lanmou yo : Nan Ekriti yo, obeyisans makònen ak lafwa. Apot Pòl te pale de “ kòmandman Bondye etènèl la pou ankouraje obeyisans grasa lafwa ”. (Wom. 16:26.) Ebre chapit 11 site egzanp yon bann moun ki te gen lafwa. Anpil nan moun sa yo te aji ann amoni ak volonte Jewova, volonte li te fè yo konnen (Ebre 11:7, 8, 17). Yon lòt bò, dezobeyisans asosye ak manke lafwa (Jan 3:36 ; Ebre 3:18, 19). Nou bezwen devlope abilite nou lè n ap itilize Pawòl Bondye a, yon fason pou n ede lòt moun yo devlope jan de fwa k ap pwodui obeyisans lan. — 2 Tim. 2:15 ; Jak 2:14, 17.
3. a) Nan ki sans obeyisans makònen ak lanmou ? b) Ki jan nou kapab ede moun k ap etidye Labib yo pou yo devlope lanmou pou Jewova ?
3 Obeyisans makònen ak lanmou pou Bondye (Det. 5:10 ; 11:1, 22 ; 30:16). Selon 1 Jan 5:3, “ men sa lanmou pou Bondye vle di : se pou nou obsève kòmandman l yo. Epoutan kòmandman l yo pa lou. ” Ki jan nou kapab ede moun k ap etidye Labib yo pou yo devlope lanmou pou Jewova ? Chèche okazyon lè n ap fè etid la pou n ogmante rekonesans yo pou kalite Jewova genyen yo. Eksprime pwofon santiman ou menm ou genyen pou Bondye. Ede etidyan an reflechi sou fason pou l rive devlope relasyon pèsonèl avèk Jewova. Plis pase tout lòt bagay, lanmou pou Jewova ap motive sanblab nou yo pou yo obeyi Jewova ak tout kè yo, menm jan l ap motive nou tou. — Mat. 22:37.
4. a) Poukisa egzanp nou enpòtan ? b) Ki sa nou dwe fè pou nou kiltive “ yon kè ki obeyisan ” ?
4 Grasa egzanp nou bay : Youn nan mwayen pisan nou ka sèvi pou nou ankouraje lòt moun obeyi bon nouvèl la se egzanp pa nou. Sepandan, sa mande pou nou fè efò konstan pou nou kiltive “ yon kè ki obeyisan ”. (1 Wa 3:9 ; Pwo. 4:23.) Ki sa sa enplike ? Se pou w nouri kè w grasa yon etid biblik regilye ak asistans reyinyon regilye (Sòm 1:1, 2 ; Ebre 10:24, 25). Chèche frekante moun ki gen kè yo ini nan vrè adorasyon an (Pwo. 13:20). Patisipe regilyèman nan predikasyon avèk dezi sensè pou w ede moun nan tèritwa a. Priye pou Jewova ede w jwenn direksyon pou w devlope yon kè ki bon (Sòm 86:11). Evite bagay ki ka kòwonp kè w tankou divètisman imoral oswa divètisman vyolan. Pousuiv bagay k ap fè w vin pi pwòch Bondye e k ap ranfòse relasyon w avèk li. — Jak 4:7, 8.
5. Ki jan moun ki obeyisan yo jwenn benediksyon ?
5 Jewova te bay ansyen pèp li a asirans benediksyon ta atenn yo si yo koute vwa li (Det. 28:1, 2). Menm jan an tou jodi a, Jewova lage anpil benediksyon sou “ moun ki obeyi l kòm chèf ”. (Tra. 5:32 .) Se sa k fè, kit se pa mwayen ansèyman nou, kit se pa mwayen egzanp nou, annou ede sanblab nou yo vin moun ki obeyi ak tout kè yo.