Referans pou Pwogram reyinyon Lavi nou ak travay nou fè a
2-8 SEPTANM
TREZÒ KI NAN PAWÒL BONDYE A | EBRE 7-8
“Yon prèt pou toutan, menm jan ak Mèlkisedèk”
it-2-F 249
Mèlkisedèk
Li te wa ansyen vil ki te rele Salèm nan e li te “prèt Bondye, Sila a ki nan pi gwo pozisyon an”, anpalan de Jewova (Jen 14:18, 22). Se premye prèt Bib la pale de li. Li te kòmanse sèvi antanke prèt yon ti tan anvan ane 1933 anvan epòk nou an. Etandone Mèlkisedèk te wa vil Salèm, ki vle di “lapè”, apot Pòl rele l “Wa lapè”, e li rele l “Wa jistis” tou, se sa non l vle di (Eb 7:1, 2). Yo panse ansyen vil Salèm te vin kè vil ki rele Jerizalèm nan, e nou jwenn non vil Salèm nan non Jerizalèm. Pafwa, yo te konn rele Jerizalèm “Salèm”. — Sm 76:2.
Apre Abram (Abraram) te sot pot laviktwa sou Kedòlawomè ak lòt wa ki te avè l yo, li t al nan Vale Chave oswa “Vale Wa a”. Se la Mèlkisedèk te vin rankontre Abraram, li te “pote manje ak diven” pou li e li te beni l. Men sa l te di Abraram: “Mwen swete pou Bondye, Sila a ki nan pi gwo pozisyon an, Sila a ki fè syèl la ak tè a, beni Abram. Glwa pou Bondye, Sila a ki nan pi gwo pozisyon an, ki lage ènmi w yo nan men w!” Lè sa a, Abram te ba l “yon dizyèm nan tout sa l genyen”, sa vle di yon dizyèm nan “pi bon bagay li te pran nan batay” li te ranpòte sou wa ki te ansanm ak Kedòlawomè yo. — Jen 14:17-20; Eb 7:4.
it-2-F 250 § 3
Mèlkisedèk
Poukisa nou kapab di moun pa t konn ‘ni ki lè Mèlkisedèk fèt ni ki lè l mouri’?
Pòl bay yon detay ki vrèman enteresan konsènan Mèlkisedèk. Li di: “Piske li pa gen papa, li pa gen manman, li pa gen zansèt, moun pa konn ki lè l fèt ni ki lè l mouri, e yo te fè l vin tankou Pitit Bondye a, li rete prèt pou toutan.” (Eb 7:3). Menm jan ak tout moun, Mèlkisedèk te fèt e li te mouri. Sepandan, yo pa bay non manman l ak papa l, yo pa di anyen sou zansèt li, e Labib pa bay okenn enfòmasyon sou ki lè l fèt ak lè l mouri. Donk, Mèlkisedèk te byen plase pou l reprezante Jezi Kris, li menm ki t ap prèt pou toutan. Menm jan pa gen anyen ki montre te gen prèt anvan Mèlkisedèk ak apre l, se menm jan an tou pa gen okenn gran prèt ki sanble ak Kris, ki te la anvan l. Anplis de sa, Labib fè konnen pap janm gen yon lòt gran prèt apre l. Epitou, byenke Jezi te soti nan tribi Jida ak nan liy fanmi wa David, zansèt li yo nan lachè pa gen okenn enpak sou pozisyon l antanke prèt, nitou se pa grasa zansèt li yo li te vin kalifye pou l vin wa ak prèt anmenmtan. Li te vin gen pozisyon sa yo paske Jewova te fè l yon sèman.
it-2-F 249
Mèlkisedèk
Yon fonksyon prèt ki te reprezante fonksyon prèt Kris la. Jewova te fè “Seyè” David la yon sèman ki gen rapò ak yon bèl pwofesi konsènan Mesi a. Men sa Jewova te di: “Ou se prèt pou toutan, menm jan ak Mèlkisedèk!” (Sm 110:1, 4). Sòm sa a Bondye te fè ekri a te bay Ebre yo rezon pou yo kwè Mesi Bondye te pwomèt la t ap wa ak prèt. Nan lèt apot Pòl te ekri kretyen ebre yo, li te montre aklè kiyès Mesi yo te anonse a ye lè l te di: “Jezi [...] vin gran prèt pou toutan, menm jan ak Mèlkisedèk.” — Eb 6:20; 5:10; gade ALYANS (fransè).
Fouye pou n ka jwenn trezò espirityèl
w00-F 15/8 14 § 11
Sakrifis ki fè Bondye plezi
Apot Pòl te di: “Chak gran prèt la pou fè ofrann ak sakrifis.” (Ebre 8:3). Remake Pòl te pale de de kategori ofrann gran prèt nan Izrayèl tan lontan yo te konn fè, li te pale de “ofrann” ak “sakrifis” oswa “sakrifis pou peche”. (Ebre 5:1.) An jeneral, moun ‘ofri’ kado pou yo montre jan yo renmen yon moun oswa pou yo montre yo gen rekonesans. Oubyen tou, paske yo ta renmen zanmi yon moun, fè moun apresye yo oswa aksepte yo (Jenèz 32:20; Pwovèb 18:16). Menm jan an tou, yo te ka konsidere tout ofrann Lalwa te mande yo kòm “ofrann” moun fè Bondye pou l ka aksepte yo oswa pou yo ka jwenn favè l. Selon Lalwa, lè yon moun peche, li te dwe repare sa l fè a e li te dwe ofri “sakrifis pou peche” l pou l te ka repare dega yo. Pentatek la, sitou liv Egzòd, Levitik ak Nonb, bay anpil enfòmasyon konsènan divès kalite sakrifis ak ofrann. Se vre li kapab difisil anpil pou n konnen epi sonje tout ti detay sou yo, sepandan, li enpòtan pou n konnen kèk pwen enpòtan konsènan divès kalite sakrifis ki te genyen yo.
it-1-F 79 § 7
Alyans
Nan ki sans alyans Lalwa a te vin “pase mòd”?
Sepandan, nan yon sans, alyans Lalwa a te vin “pase mòd” lè Bondye te anonse yon nouvo alyans pa mwayen pwofèt Jeremi (Jr 31:31-34; Eb 8:13). Nan ane 33 epòk nou an, alyans Lalwa a te vin pa valab ankò lè Kris te mouri sou poto soufrans lan (Kl 2:14). Se konsa, nouvo alyans lan te ranplase ansyen an. — Eb 7:12; 9:15; Tr 2:1-4.
9-15 SEPTANM
TREZÒ KI NAN PAWÒL BONDYE A | EBRE 9-10
“Lonbray bon bagay ki gen pou vini yo”
it-2-F 490 § 7
Padon
Selon lwa Bondye te bay nasyon Izrayèl la, pou yon moun ki te peche kont Bondye oubyen kont pwochen l jwenn padon pou peche l, li te dwe repare mal li te fè a jan Lalwa te mande sa, e apre sa, nan pifò ka, li te dwe prezante yon ofrann ki t ap mande pou san an koule kòm sakrifis bay Jewova (Le 5:5–6:7). Se sa k fè, Pòl te bay prensip sa a: “Wi, selon Lalwa, san pirifye prèske tout bagay, e si pa gen san ki koule, pa ka gen padon.” (Eb 9:22). Anfèt, san bèt yo te ofri kòm sakrifis yo pa t ka elimine peche epi pèmèt moun ki peche a gen yon konsyans ki klè yon fason ki pafè (Eb 10:1-4; 9:9, 13, 14). Tandiske nouvo alyans Bondye te fè anonse a te fè l posib pou yon moun jwenn padon toutbon grasa sakrifis Jezi Kris te bay kòm ranson an (Jr 31:33, 34; Mt 26:28; 1Ko 11:25; Ef 1:7). Pandan Jezi te sou tè a, li te montre li gen pouvwa pou l padone peche lè l te geri yon mesye ki te paralize. — Mt 9:2-7.
it-2-F 548
Pèfeksyon
Lwa Moyiz la te pafè. Lwa Bondye te bay pèp Izrayèl la pa mwayen Moyiz la te gen ladan l prèt yo, yo te mete nan fonksyon yo, ak divès kalite bèt pèp la te konn bay kòm sakrifis. Byenke se Bondye ki te bay Lalwa e Lalwa te pafè, ni Lalwa, ni prèt ki te an fonksyon yo, ni sakrifis yo, pa t rive fè moun ki te anba Lalwa yo vin pafè, jan Bondye te fè apot la ekri sa (Eb 7:11, 19; 10:1). Lalwa pa t libere moun anba peche ak lanmò, okontrè, li te fè peche yo parèt aklè (Wm 3:20; 7:7-13). Sepandan, tout dispozisyon sa yo te atenn objektif Bondye te vle pou yo atenn. Lalwa te aji kòm yon “gid” k ap mennen moun bay Kris, li menm ki te “lonbray [pafè] bon bagay ki gen pou vini yo”. (Ga 3:19-25; Eb 10:1.) Se pou rezon sa a, lè Pòl te di se “sa Lalwa pa t kapab fè a, etandone lachè te rann li fèb” la (Wm 8:3), li klè li t ap fè referans ak gran prèt juif la nan lachè ki pa t gen kapasite (Lalwa te etabli gran prèt sa a pou l ofri sakrifis moun yo t ap fè epi li te konn antre kote ki pi sen an nan jou y ap ofri san kòm sakrifis pou peche) pou l “sove [moun l ap sèvi yo] totalman”, jan yo esplike sa nan Ebre 7:11, 18-28. Byenke sakrifis prèt ki soti nan liy fanmi Arawon yo te konn ofri yo te pèmèt pèp la gen bon repitasyon devan Bondye, li pa t fè yo gen yon konsyans ki klè nètale. Apot la te montre sa lè l te di sakrifis pou peche yo pa t ka fè “moun k ap pwoche bò kote Bondye yo vin pafè”, sa vle di konsyans moun sa yo (Eb 10:1-4; konpare ak Eb 9:9). Gran prèt la pa t ka peye pri ki te nesesè pou rachte nou an ki t ap fè nou jwenn bonjan padon pou peche nou. Se sèl Kris ki te ka fè sa, paske li prèt pou toutan e li te fè yon sakrifis ki kapab fè sa. — Eb 9:14; 10:12-22.
Fouye pou n ka jwenn trezò espirityèl
w92-F 1/3 31 § 4-6
Kesyon lektè yo poze
Pòl te fè konnen depi gen alyans ant moun ak Bondye, se pou gen lanmò. Alyans Lalwa a se yon egzanp nan sans sa a. Moyiz te sèvi kòm entèmedyè ant Bondye ak Izrayèl selon lachè a e se li ki te etabli alyans sa a. Kidonk, Moyiz te jwe yon gwo wòl nan sa e se li ki te trete ak Izrayelit yo lè yo t ap fè alyans lan. Se sa k fè, yo te ka konsidere Moyiz kòm moun ki te met alyans Lalwa a sou pye, alòske se Jewova ki te fè l. Men, èske Moyiz te bezwen bay san l pou l valide alyans Lalwa a? Non. Okontrè, yo te bay san bèt nan plas san l. — Ebre 9:18-22.
E konsènan nouvo alyans ant Jewova ak nasyon Izrayèl espirityèl la? Jezi Kris te jwe yon gwo wòl antanke Medyatè ant Jewova ak Izrayèl espirityèl la. Byenke se Jewova ki te vin ak alyans sa a, se Jezi Kris ki te etabli l. Nonsèlman Jezi te Medyatè alyans lan, men tou, pandan li te nan lachè, li te an kontak dirèk ak premye gwoup moun ki te vin fè pati alyans lan (Lik 22:20, 28, 29). Anplis de sa, li te byen plase pou l bay sakrifis ki te nesesè pou valide alyans lan. Sakrifis sa a pa t yon senp sakrifis bèt, se te lavi yon moun pafè. Se sa k fè, Pòl te ka pale de Kris antanke moun ki te met nouvo alyans lan sou pye. ‘Kris antre nan syèl la pou l parèt kounye a pou nou devan Bondye’, konsa, nouvo alyans lan te vin valid. — Ebre 9:12-14, 24.
Lè Pòl te pale de Moyiz ak Jezi kòm moun ki te met alyans sou pye, li pa t vle di se Moyiz ak Jezi ki te fè alyans yo, paske an reyalite, se Bondye ki te pran dispozisyon pou yo fèt. Okontrè, de moun sa yo te jwe yon wòl enpòtan yo chak bò kote pa yo antanke entèmedyè lè yo t ap etabli alyans sa yo. E nan chak ka sa yo, te dwe gen lanmò: lanmò bèt yo te bay nan plas Moyiz ak lanmò Jezi, li menm ki te bay pwòp vi l pou moun ki fè pati nouvo alyans lan.
it-1-F 263-264
Batèm
Lik fè konnen nan moman Jezi t ap batize a, li t ap priye (Lk 3:21). Pi devan, moun ki te ekri lèt pou kretyen Ebre yo di lè Jezi te vini “nan monn nan” (se pa t lè li te fèt la, kote li pa t konn li e li pa t menm ka li pawòl sa yo, men pito se lè li te prezante tèt li pou l batize epi li te kòmanse ministè l), li te di pawòl sa yo nou jwenn nan Sòm 40:6-8 (LXX): “Se pa sakrifis ak ofrann ou te vle, men ou te prepare yon kò pou mwen. [...]. Gade! Mwen vini (Se sa ki ekri nan woulo a konsènan mwen) pou m fè volonte w, o Bondye.” (Eb 10:5-9). Jezi te fèt nan nasyon juif la, yon nasyon Bondye te fè yon alyans avèk li, anpalan de alyans Lalwa a (Eg 19:5-8; Ga 4:4). Se pou rezon sa a, Jezi te gentan gen yon alyans ak Jewova Dye, lè l t al kot Jan pou Jan batize l. Donk, sa Jezi te fè a te ale pi lwen pase sa Lalwa te mande. Li te prezante tèt li bay Jewova, Papa l, pou l fè “volonte” l, e volonte Papa l se te pou l ofri kò sa a li te “prepare” pou li a epi met yon fen nan sakrifis bèt Lalwa te mande a. Apot Pòl di: “Nou vin sen grasa “volonte” sa a, paske Jezi Kris te bay kò l kòm ofrann yon fwa pou tout.” (Eb 10:10). Volonte Papa Jezi te gen pou li a te gen ladan l patisipe nan tout aktivite ki gen rapò ak Wayòm nan, e Jezi te prezante tèt li pou sa tou (Lk 4:43; 17:20, 21). Jewova te aksepte lè Pitit li a te prezante tèt li ba li, li te vide lespri sen l sou li e li te di l: “Ou se Pitit Gason m, pitit mwen renmen anpil la. Mwen pran plezi nan ou.” — Mk 1:9-11; Lk 3:21-23; Mt 3:13-17.
16-22 SEPTANM
TREZÒ KI NAN PAWÒL BONDYE A | EBRE 11
Fouye pou n ka jwenn trezò espirityèl
it-1-F 907 § 7
Lafwa
Egzanp moun ki te gen lafwa. Lafwa chak grenn moun ki fè pati “gwo nyaj temwen” Pòl pale de yo a te chita sou yon baz solid (Eb 12:1). Pa egzanp, pa t gen dout Abèl te okouran de pwomès Bondye te fè konsènan yon “desandans” ki t ap gen pou l kraze tèt “sèpan” an. Anplis de sa, li te wè aklè jan pawòl Jewova te anonse kont paran l yo nan jaden Edenn nan te reyalize. Vrèmanvre, apre yo te fin met Adan ak Èv deyò nan jaden an, se ak swè nan fwon yo Adan ak fanmi l te jwenn bagay pou yo manje paske Bondye te modi tè a, se sa k fè, se pikan ak chadwon ki te leve ladan l. Abèl te ka wè jan tout dezi manman l se te pou mari l e jan Adan li menm t ap domine sou madanm li. Pa gen dout, manman l te pale l de doulè li te genyen lè li t ap akouche l. Epitou, li te ka wè kèk cheriben ak epe ki klere kou dife a k ap pwoteje antre jaden Edenn nan (Jen 3:14-19, 24). Tout bagay sa yo “se prèv klè” ki te bay Abèl asirans se grasa ‘desandans Bondye pwomèt’ la li t ap ka jwenn delivrans. Kidonk, grasa lafwa li te genyen an li te “bay Bondye yon sakrifis” ki te gen plis valè pase sa Kayen te bay la. — Eb 11:1, 4.
23-29 SEPTANM
TREZÒ KI NAN PAWÒL BONDYE A | EBRE 12-13
w12-F 1/7 21 § 3
“Lè n ap priye, men sa pou nou di: ‘Papa’”
Yon papa ki renmen pitit li ap disipline l, paske li ta renmen pou pitit li vin yon moun ki responsab demen (Efezyen 6:4). Li gendwa aji yon fason ki fèm ak timoun nan, men li pap janm trete l yon fason ki twò di. Se menm jan an tou, Papa nou ki nan syèl la gendwa twouve l nesesè pou l ban nou disiplin pafwa, sepandan l ap toujou fè sa avèk lanmou, li pap janm fè sa ak mechanste. Jezi te menm jan ak Papa l, li pa t janm twò di ak disip li yo, menm lè yo te pran tan pou yo aksepte koreksyon yo te merite. — Matye 20:20-28; Lik 22:24-30.
Fouye pou n ka jwenn trezò espirityèl
w89-F 15/12 22 § 10
Ofri Jewova sakrifis ki fè l plezi
Kretyen ebre yo pa t dwe “kite divès kalite ansèyman etranj” yon seri moun ki nan relijyon juif yo “pote [yo] ale”. (Galat 5:1-6.) Dayè, se pa ansèyman sa yo ki t ap ede yo rete fèm nan laverite, men pito, se ‘favè san parèy Bondye’ a ki t ap pèmèt yo rete fèm. Sanble kèk nan kretyen sa yo te konn fè diskisyon sou manje ak sakrifis ki te konn fèt, kidonk Pòl te fè yo konnen se pa t ‘manje ak bagay ki pa pwofitab pou moun ki met lide yo sou yo’ ki t ap fè kè yo vin fèm. Se atachman yon moun genyen pou Bondye ak rekonesans li demontre pou ranson an k ap fè l jwenn byenfè nan domèn espirityèl, men, se pa lè l ap bay tèt li pwoblèm pou yon manje oubyen obsève yon jou kèlkonk (Women 14:5-9). Anplis de sa, grasa sakrifis Kris la sakrifis prèt yo te konn fè yo pa gen valè ankò. — Ebre 9:9-14; 10:5-10.
30 SEPTANM–6 OKTÒB
TREZÒ KI NAN PAWÒL BONDYE A | JAK 1-2
Fouye pou n ka jwenn trezò espirityèl
it-2-F 168
Limyè
Jewova se “Papa limyè yo ki nan syèl la”. (Jk 1:17.) Nonsèlman li se “Sila a ki fè solèy la pou l bay limyè lajounen, ki fè lwa pou lalin nan ak zetwal yo ka bay limyè lannuit” (Jr 31:35), men tou, li se Sous tout limyè espirityèl (2Ko 4:6). Lwa l yo, kòmandman l yo ak pawòl li se limyè pou moun ki kite l gide yo (Sm 43:3; 119:105; Pw 6:23; Eza 51:4). Men sa youn nan moun ki te ekri Sòm yo te di: “Se limyè ki soti nan ou ki ban nou limyè.” (Sm 36:9; konpare ak Sm 27:1; 43:3). Menm jan limyè solèy la kontinye ap vin pi klere tank l ap sot nan klète douvanjou “jiskaske l fin jou nèt”, se menm jan an chemen moun ki dwat yo kontinye ap vin pi klere grasa sajès Bondye bay la (Pw 4:18). Yon moun k ap suiv wout Jewova a dwe mache nan limyè l la (Eza 2:3-5). Yon lòt bòt, lè yon moun wè bagay yo yon fason ki pa pwòp oswa avèk mechanste, li nan fènwa pwès nan domèn espirityèl. Jan Jezi te di sa: “Si je w ap gade toupatou e li chaje ak tanta, tout kò w ap nan fènwa. Si limyè ki nan ou a se fènwa l ye toutbonvre, fènwa sa a pa manke pa pwès!” — Mt 6:23; konpare ak Dt 15:9; 28:54-57; Pw 28:22; 2P 2:14.
it-2-F 162 § 7
Lalwa
“Lwa Wa a.” “Lwa Wa a” gen plis enpòtans pase lòt lwa ki jere relasyon moun gen ak lòt moun, menm jan yon wa ka gen plis enpòtans pase lòt moun yo (Jk 2:8). Alyans Lalwa a te chita sou lanmou. “Nou dwe renmen pwochen nou menm jan nou renmen tèt nou” (lwa Wa a) se dezyèm nan de kòmandman Lalwa ak tout pawòl pwofèt yo chita sou yo a (Mt 22:37-40). Se vre kretyen yo pa anba alyans Lalwa a, sepandan, an rapò ak nouvo alyans lan, yo dwe soumèt yo anba lwa Jewova, Wa a, ak Jezi Kris, Pitit li a, ki Wa.