Nou menm mesye yo, èske nou soumèt nou anba otorite Kris?

“Kris la se chèf tout gason.” —1 KOR. 11:3.

 1. Ki sa k montre Jewova se yon Dye ki gen lòd?

MEN sa nou li nan Revelasyon 4:11: “O Bondye, Mèt nou, ou merite pou ou resevwa lwanj, respè ak pouvwa. Se ou menm ki fè tout bagay. Si yo la, si yo gen lavi, se paske ou vle l.” Piske se Jewova Dye ki kreye tout bagay, se li menm ki Souvren linivè, e li gen otorite sou tout sa li kreye. Nou kapab wè Jewova “pa yon Bondye dezòd, men se yon Bondye lapè” nan fason li òganize zanj yo, ki fòme yon fanmi. —1 Kor. 14:33, NW; Iza. 6:1-3; Ebre 12:22, 23.

2, 3. a) Kiyès ki te premye kreyasyon Bondye? b) Ki pozisyon premye Pitit la genyen parapò ak Papa l?

² Bondye te deja egziste depi yon kantite tan moun pa ka konte anvan li te kòmanse kreye tout bagay. Premye sa l te kreye se yon kreyati espirityèl yo rele “Pawòl la”. Yo rele l konsa paske se li menm ki te Pòtpawòl Jewova. Se pa mwayen Pawòl la tout lòt bagay te vin egziste. Annapre, li te vin sou tè a e li te yon moun ki pafè, e yo te vin konnen l sou non Jezi Kris. —Li Jan 1:1-3, 14.

³ Ki sa Ekriti yo di konsènan pozisyon Bondye genyen parapò ak premye Pitit li a? Men sa Bondye te enspire apot Pòl pou l ekri: “Mwen vle nou konprann sa byen: Kris la se chèf tout gason, gason se chèf fanm. Bondye se chèf Kris la.” ​(1 Kor. 11:3). Kris soumèt anba otorite Papa l. Pou lapè ak lòd kapab egziste nan mitan kreyati entèlijan yo, li esansyèl pou gen nan kreyati sa yo ki gen otorite e pou gen lòt ki soumèt anba otorite yo. Menm Kris, moun ‘Bondye te [itilize pou l] kreye tout bagay’ la, dwe soumèt anba otorite l. —Kol. 1:16.

4, 5. Ki jan Jezi te konsidere pozisyon l parapò ak Jewova?

⁴ Ki jan Jezi te konsidere kesyon soumèt devan otorite Jewova a ak kesyon vin sou tè a? Gade sa Ekriti yo di: “Byenke [Kris Jezi] te egziste nan menm fòm ak Bondye, li pa t anvizaje fè yon dappiyanp sou pozisyon Bondye, sa vle di pou l ta egal avè l. Non, li te pito kite fòm li te genyen an, li te pran fòm yon esklav e li te vin tankou lèzòm. Anplis de sa, lè l te vin twouve l nan fòm lòm, li te imilye tèt li e li te vin obeyisan jis li mouri, wi, jis li mouri sou yon poto soufrans.” —Fil. 2:5-8, NW.

⁵ Jezi te toujou fè volonte Papa l avèk imilite. Men sa l te di: “Mwen pa kapab fè anyen pou kò mwen. [...] Jijman mwen bon paske sa m’ap chache fè a se pa sa m vle, men sa moun ki voye m lan vle.” ​(Jan 5:30). Men yon lòt bagay li te di: “Mwen toujou fè sa k fè [Papa m] plezi.” ​(Jan 8:29.) Men sa l te di Papa l nan yon priyè li te fè yon ti tan anvan l te mouri: “Mwen te fè yo wè bèl pouvwa ou sou tè sa a. Mwen fè tou sa ou te ban m fè.” ​(Jan 17:4). Sa klè, Jezi pa t gen pwoblèm pou l rekonèt Bondye gen otorite sou li e pou l soumèt li anba otorite sa a.

Pitit la jwenn byenfè lefètke li soumèt li ak Papa a

 6. Ki kalite estrawòdinè Jezi te demontre?

⁶ Lè Jezi te sou tè a, li te demontre yon seri kalite estrawòdinè. Pami kalite sa yo gen gwo lanmou li te demontre li gen pou Papa l. Li te di: “Mwen renmen Papa m.” ​(Jan 14:31). Mete sou sa, li te demontre li renmen moun anpil tou. (Li Matye 22:35-40.) Jezi te janti e li te gen konsiderasyon pou moun, li pa t di ni li pa t konn aji an diktatè. Men sa l te di: “Vini jwenn mwen, nou tout ki bouke, nou tout ki anba chay, m’a soulaje nou. Pran jouk mwen, mete l sou zepòl nou. Pran leson nan men mwen. Paske mwen dou, mwen toujou soumèt mwen tout bon devan Bondye. Konsa, n’a viv ak kè poze. Paske, jouk m’ap ban nou an fasil pou pote, chay m’ap ban nou an pa lou.” ​(Mat. 11:28-30). Moun tout laj ki te tankou mouton yo, sitou moun yo te maltrete yo, te jwenn anpil soulajman grasa bèl pèsonalite Jezi e grasa mesaj rekonfòtan li t ap preche a.

7, 8. Selon Lalwa, ki sa fi ki te gen san ap koule sou li a pa t gen dwa fè, men ki jan Jezi te trete l?

⁷ Annou konsidere fason Jezi te aji avèk fi. Pandan tout listwa, gen anpil gason ki te maltrete fi anpil. Chèf relijye nan Izrayèl tan lontan yo te konn fè sa tou. Men, Jezi li menm te trete fi yo avèk respè. Sa te parèt klè nan fason li te aji ak yon fi ki te gen 12 an depi yon san t ap koule sou li. Labib di “li te soufri anpil” nan men plizyè doktè e li te fin depanse tout sa l genyen ap chèche yon solisyon. Men, malgre li te fè tout efò sa yo, “maladi a te vin pi rèd sou li”. Selon Lalwa, yo te konsidere l kòm yon moun ki pa t pwòp. E kèlkeswa moun ki ta manyen l lan, li t ap vin pa pwòp tou. —Lev. 15:19, 25.

⁸ Lè fi sa a te tande Jezi t ap geri moun malad, li te antre nan yon foul moun ki te antoure Jezi paske li te di tèt li: “Si m kapab manyen ke rad li sèlman, m’a geri.” Li manyen Jezi, epi li geri menm moman an. Jezi te konnen fi a pa t dwe manyen rad li. Sepandan, li pa t kouri dèyè l. Okontrè, li te janti avèk li. Li te konprann ki jan li dwe te santi l apre tout ane li te pase malad yo, e li te konprann li te vrèman bezwen pou yon moun ede l. Avèk konpasyon, Jezi te di l: “Mafi, se konfyans ou nan Bondye ki geri ou. Ou mèt ale ak kè poze, tande. Ou geri nèt.” —Mak 5:25-34.

 9. Ki jan Jezi te reyaji lè disip li yo te eseye anpeche timoun vin jwenn li?

⁹ Menm timoun yo te santi yo alèz avèk Jezi. Yon fwa, te gen moun ki te mennen timoun vin jwenn Jezi, disip li yo te reprimande moun yo, sandout yo te panse li pa t vle timoun vin nui l. Men Jezi pa t wè bagay yo konsa. Labib fè nou konnen: ‘Lè Jezi wè sa, li pat kontan menm. Li di disip yo: Kite timoun yo vin jwenn mwen non. Pa anpeche yo vini, paske wayòm Bondye a, se pou moun ki tankou timoun sa yo.’ Annapre, “li pran timoun yo nan bra l, li mete men l sou tèt yo chak, li beni yo”. Jezi pa t annik kite timoun yo vin jwenn li, men li te kontan akeyi yo. —Mak 10:13-16.

10. Ki jan Jezi te fè vin gen kalite li te demontre yo?

¹⁰ Ki jan Jezi te fè vin gen kalite li te demontre pandan l t ap viv sou tè a? Anvan li te vin viv sou tè a antanke moun, li te suiv Papa l pandan lontan e li te aprann fason li aji. (Li Pwovèb 8:22, 23, 30.) Lè l te nan syèl la, li te wè fason Jewova te egzèse otorite l sou tout kreyati l yo avèk amou e li te vin menm jan avè l. Èske Jezi t ap kapab fè sa si l pa t soumèt li devan Papa l? Jezi te pran plezi pou l soumèt li devan Papa l, e Jewova te kontan gen yon Pitit konsa. Lè Jezi te sou tè a, li te demontre kalite estrawòdinè Papa l ki nan syèl la genyen yo yon fason ki pafè. Ala yon privilèj nou genyen dèske nou kapab soumèt nou devan Kris, Wa Bondye mete dirije nan Wayòm syèl la!

Imite kalite Kris yo

11. a) Kiyès nou ta dwe fè anpil efò pou nou imite? b) Nan kongregasyon an, poukisa gason yo sitou ta dwe fè anpil efò pou yo imite Jezi?

¹¹ Tout moun ki fè pati kongregasyon kretyen an, gason yo sitou, ta dwe toujou fè anpil efò pou yo imite kalite Kris yo. Jan nou te deja wè sa, Labib di “Kris la se chèf tout gason”. Menm jan Kris te imite Chèf li, vrè Dye a, se konsa gason ki kretyen yo ta dwe fè efò pou yo imite chèf pa yo a, sètadi Kris. Lè apot Pòl te vin kretyen, se sa menm li te fè. Li te bay lòt kretyen yo konsèy sa a: “Se pou nou swiv egzanp mwen, menm jan mwen menm mwen swiv egzanp Kris la.” ​(1 Kor. 11:1). Apot Pyè li menm te di: “Se pou sa menm Bondye te rele nou, paske Kris la te soufri pou nou. Li kite yon egzanp pou nou swiv pye pou pye.” ​(1 Pyè 2:21). Gen yon lòt rezon ankò ki fè li enpòtan pou gason yo sitou imite Kris. Se paske se yo menm ki vin ansyen ak asistan ministeryèl nan kongregasyon an. Menm jan Jezi te kontan imite Jewova, se konsa gason ki kretyen yo ta dwe kontan imite Kris e yo ta dwe kontan imite kalite l yo.

12, 13. Ki jan ansyen yo ta dwe aji avèk mouton Jewova konfye yo?

¹² Ansyen ki nan kongregasyon kretyen an gen obligasyon pou yo chèche vin menm jan ak Kris. Pyè te bay ansyen yo konsèy sa a: “Tankou gadò, se pou nou swen bann mouton Bondye ki sou kont nou an. Pa fè sa tankou si se fòse y’ap fòse nou. Men, fè l paske nou vle fè sa Bondye vle. Pa fè travay la tankou si se dèyè lajan nou ye. Men, fè l ak tout kè nou. Pa fè menm jan ak chèf k’ap maltrete moun ki sou kont yo. Okontrè, se pou nou tounen yon egzanp pou mouton yo.” ​(1 Pyè 5:1-3). Ansyen yo pa ta dwe aji an diktatè, yo pa ta dwe ap chèche domine sou twoupo a, yo pa ta dwe neglije bezwen twoupo a genyen, ni yo pa ta dwe di avè l. Lefètke yo imite egzanp Kris, yo bezwen fè efò pou yo demontre yo gen lanmou, konsiderasyon, imilite ak bonte nan fason y ap boule ak mouton yo, mouton Jewova konfye yo.

¹³ Moun ki pran latèt nan kongregasyon an se moun ki enpafè, e se toutan yo ta dwe sonje yo gen limit (Wom. 3:23). Se sa k fè yo ta dwe toujou chèche aprann plis sou Jezi e yo ta dwe imite lanmou li te demontre a. Yo bezwen byen reflechi sou fason Bondye ak Kris boule ak moun e yo ta dwe fè anpil efò pou yo imite yo. Men ki egzòtasyon Pyè ban nou: “Nou tout, se pou nou youn soumèt devan lòt. Sèvi ak imilite kòm tabliye. Paske, Bondye kenbe tèt ak awogan yo. Men, moun ki rabese tèt yo, Bondye ba yo gras.” —1 Pyè 5:5, Bib Kreyòl La.

14. Jis nan ki pwen ansyen yo ta dwe onore lòt moun?

¹⁴ Mesye ki nome nan kongregasyon an dwe demontre bèl kalite nan fason y ap boule ak twoupo Bondye a. Men sa Women 12:10 fè konnen: “Se pou nou yonn renmen lòt tankou frè ak frè k’ap viv ansanm ak Kris la. Nan tou sa n’ap fè, se pou nou gen respè yonn pou lòt, pa konsidere tèt nou anvan.” Ansyen yo ak asistan ministeryèl yo gen respè pou lòt moun, yo onore yo. Menm jan ak lòt kretyen yo, mesye sa yo ‘pa dwe fè anyen nan lide pou fè tèt yo pase pou pi bon, ni pou fè lwanj tèt yo. Men, yo dwe soumèt yo. Yo dwe mete nan tèt yo lòt moun yo pi bon pase yo’. (Fil. 2:3.) Pa gen dout nan sa, moun ki pran latèt yo dwe konsidere lòt moun yo gen plis valè pase yo. Lè yo fè sa, yo suiv konsèy Pòl te bay lè l te di: “Nou menm ki fò nan konfyans nou nan Bondye, se pou nou ede sa ki fèb yo pote feblès yo. Nou pa dwe ap chache sa ki fè nou plezi sèlman. Okontrè, se pou nou chak chache fè frè parèy nou plezi pou byen l, konsa n’a fè l grandi nan konfyans li nan Bondye. Paske Kris la pat chache sa ki te fè l plezi.” —Wom. 15:1-3.

‘Bay madanm nou tout respè yo merite’

15. Ki jan mari yo ta dwe aji ak madanm yo?

¹⁵ Kounye a, annou konsidere konsèy Pyè te bay mesye marye yo. Men sa l te ekri: “Nou menm mari, nan tout bagay se pou nou viv byen ak madanm nou paske yo pi fèb pase nou. Ba yo tout respè yo merite.” ​(1 Pyè 3:7). Lè nou bay yon moun tout respè li merite, nou ba l anpil valè. Konsa, nou demontre konsiderasyon pou opinyon moun sa a, pou bezwen l genyen ak dezi l e nou ka menm sede devan opinyon l, bezwen l oswa dezi l si pa gen yon rezon enpòtan ki anpeche n fè sa. Se konsa yon mari ta dwe aji ak madanm li.

16. Ki sa Pawòl Bondye a di ki sèvi avètisman pou mari yo anrapò ak kesyon bay madanm yo tout respè yo merite?

¹⁶ Apre Pyè te fin di mari yo pou yo bay madanm yo tout respè yo merite, li te di yon pawòl ki sèvi kòm avètisman. Men sa l te di: “Konsa, anyen p’ap antrave lapriyè nou.” ​(1 Pyè 3:7). Sa montre nou aklè fason yon gason trete madanm li se yon bagay Jewova bay anpil enpòtans. Si l pa ba l tout respè li merite, sa ka fè Jewova pa koute priyè l yo. Mete sou sa, an jeneral, èske madanm yo pa byen reyaji lè mari yo ba yo tout respè yo merite?

17. Nan ki pwen yon mari ta dwe renmen madanm li?

¹⁷ Men ki konsèy Pawòl Bondye a bay anrapò ak kesyon pou yon mari bay madanm li tout respè li merite: “Se pou mari yo renmen madanm yo menm jan yo renmen pwòp tèt pa yo. [...] Pèsonn pa janm rayi kò li. Okontrè, li ba l manje, li pran swen l, tankou Kris la ap fè sa pou [kongregasyon an]. [...] Se pou chak mari renmen madanm yo tankou yo renmen tèt pa yo.” ​(Efe. 5:28, 29, 33). Nan ki pwen mari yo ta dwe renmen madanm yo? Men sa Pòl te ekri: “Nou menm, mari yo, se pou nou renmen madanm nou menm jan Kris la te renmen [kongregasyon an], jouk li te asepte mouri pou li.” ​(Efe. 5:25). Vrèman, yon mari ta dwe prè pou l bay lavi l pou madanm li, menm jan Kris te fè sa pou lòt moun. Lè yon mari kretyen trete madanm li avèk tandrès, avèk konsiderasyon, li ba l atansyon li bezwen e li pa aji avè l yon fason egoyis, li pi fasil pou madanm nan soumèt anba otorite l.

18. Ki sa k ap ede mari yo pran responsablite yo nan maryaj yo?

¹⁸ Èske li twò difisil pou mari yo onore madanm yo konsa? Non, Jewova pa t ap janm mande yo fè yon bagay ki twòp pou yo. Mete sou sa, moun k ap sèvi Jewova yo gen posiblite pou yo jwenn pi gwo fòs ki egziste nan linivè a, sètadi lespri sen Bondye. Gade sa Jezi te di: “Si nou menm ki mechan jan nou mechan an, nou konn bay pitit nou bon bagay, se pa Papa nou ki nan syèl la ki pou ta refize ban nou Sentespri l, lè nou mande l li.” ​(Lik 11:13). Mari yo ka priye Jewova pou yo mande l ede yo pa mwayen lespri l pou yo byen boule ak lòt moun, san wete madanm yo. —Li Travay 5:32.

19. Sou ki sa atik ki vin apre a pral pale?

¹⁹ Vrèman, gason yo gen gwo responsablite pou yo aprann ki jan pou yo soumèt devan Kris e pou yo imite fason li egzèse otorite l. Men, ki responsablite fi yo genyen, sitou fi ki marye yo? Atik ki vin apre a pral pale sou fason yo ta dwe konsidere wòl yo jwe nan dispozisyon Jewova pran pou gen otorite a.

Nou menm medam yo, poukisa nou dwe soumèt nou anba otorite?

“Gason se chèf fanm.” —1 KOR. 11:3.

1, 2. a) Ki sa apot Pòl te ekri konsènan dispozisyon Jewova pran anrapò ak otorite ak soumisyon? b) Ki kesyon nou pral egzamine nan atik sa a?

SE Jewova ki te etabli prensip otorite apot Pòl te mansyone lè l te di “Kris la se chèf tout gason” e “Bondye se chèf Kris la”. (1 Kor. 11:3.) Atik nou te egzamine anvan an te montre Jezi te konsidere se yon privilèj pou l soumèt devan Chèf li, Jewova Dye, e li te kontan fè sa. Anplis, li te montre chèf gason ki kretyen yo se Kris. Kris te gen bonte, li te janti, li te gen konpasyon e li pa t egoyis nan fason li te boule ak moun. Mesye yo nan kongregasyon an bezwen konsa tou avèk lòt moun, sitou avèk madanm yo.

² Men, e fi yo, kiyès ki chèf yo? Pòl te ekri “gason se chèf fanm”. Ki jan medam yo ta dwe konsidere pawòl enspire sa a? Èske prensip sa a valab tou lè mari yon kretyèn pa kwayan? Piske madanm nan dwe soumèt anba otorite mari a, èske sa vle di li pa gen opinyon pou l bay lè gen desizyon ki pou pran? Ki lè y ap fè lwanj pou yon fi?

“M’ap fè yon lòt moun sanble avè l pou ede l”

3, 4. Poukisa li pwofitab pou moun marye yo respekte prensip otorite a?

³ Se Jewova ki etabli prensip otorite a. Apre Jewova te fin kreye Adan, men sa li te di: “Sa pa bon pou nonm lan rete pou kont li. M’ap fè yon lòt moun sanble avè l pou ede l.” Lè Jewova te fin kreye Èv, Adan te tèlman kontan dèske li te gen yon konpay, yon moun pou ede l, men sa l te di: “Aa! Fwa sa a, men yonn ki menm jan avè m! Zo l se zo mwen. Chè l se chè mwen.” ​(Jen. 2:18-24). Adan ak Èv te gen posiblite estrawòdinè pou yo vin papa ak manman tout moun sou tè a, ki t ap pafè, ki t apral viv pou toutan ak kè kontan nan yon paradi ki t ap kouvri tout tè a.

⁴ Akoz premye paran nou yo te rebele nan jaden Edenn, lèzòm te vin pa kapab jwe wòl yo yon fason ki pafè ankò nan dispozisyon Jewova te pran anrapò ak otorite a. (Li Women 5:12.) Men, Bondye te toujou konsidere mari yo kòm chèf madanm yo. Lè yon mari egzèse otorite l kòrèkteman, e lè madanm li soumèt li anba otorite l, sa pote anpil byenfè ak anpil kè kontan nan maryaj yo. Lè sa a, moun yo ap santi yo menm jan Jezi te santi l lefètke li te soumèt li devan Chèf li, Jewova. Anvan Jezi te vin sou tè a, li te “toujou kontan travay anba je [Jewova]”. (Pwo. 8:30.) Akoz enpèfeksyon lèzòm, gason yo vin pa kapab egzèse otorite yo yon fason ki pafè ankò, e fi yo pa kapab demontre yon soumisyon ki pafè. Sepandan, lè mari yo ak madanm yo kontinye fè tout sa yo kapab pou yo jwe wòl yo genyen an, dispozisyon sa a pèmèt yo jwenn pi gwo kè kontan ki posib pou moun jwenn nan maryaj yo, malgre yo enpafè.

 5. Poukisa mari yo ak madanm yo ta dwe aplike konsèy nou jwenn nan Women 12:10 la?

⁵ Pou yon maryaj reyisi, li esansyèl pou konjwen yo aplike yon konsèy ki nan Ekriti yo tout kretyen ta dwe suiv: “Se pou nou yonn renmen lòt tankou frè ak frè k’ap viv ansanm ak Kris la. Nan tou sa n’ap fè, se pou nou gen respè yonn pou lòt, pa konsidere tèt nou anvan.” ​(Se nou ki mete mo yo ann italik; Wom. 12:10). Anplis, ni mari ni madanm ta dwe fè anpil efò pou yo suiv konsèy ki nan Efezyen 4:32 a ki di: “Se pou nou aji byen yonn ak lòt, se pou nou gen bon kè yonn pou lòt, pou nou yonn padonnen lòt.”

Si konjwen w pa kwayan

6, 7. Ki sa k ka rive si yon madanm ki kretyèn soumèt li ak mari l ki pa kwayan?

⁶ E si youn nan konjwen yo pap sèvi Jewova? Byen souvan se mari a ki konn pa kwayan. Nan ka sa a, ki jan madanm li ta dwe trete l? Men repons Bib la bay: “Nou menm medam, soumèt devan mari nou. Konsa, si gen nan mari nou yo ki pa kwè nan Bondye, kondit nou kont pou fè yo kwè, san n pa janm bezwen louvri bouch nou, paske y’a wè jan nou viv byen, jan nou respekte yo.” —1 Pyè 3:1, 2.

⁷ Pawòl Bondye a mande madanm yo pou yo toujou soumèt yo ak mari yo menmsi li pa kwayan. Bon konduit yon madanm ka pouse mari l chèche konnen ki sa ki pouse madanm nan aji byen konsa. Kòm rezilta, mari a ka chèche konnen kwayans madanm li ki kretyèn e finalman, li ka vin aksepte laverite.

8, 9. Ki sa yon madanm ki kretyèn kapab fè si mari l ki pa kwayan pa byen reyaji devan bèl konduit li genyen?

⁸ Men, e si yon mari ki pa kwayan pa byen reyaji devan bèl konduit madanm li genyen? Ekriti yo ankouraje madanm nan pou l pa janm sispann demontre bèl kalite li genyen antanke kretyèn, kèlkeswa jan sa difisil. Pa egzanp, men sa nou li nan 1 Korentyen 13:4: “Moun ki gen renmen nan kè li gen pasyans.” Donk, l ap bon pou madanm nan kontinye aji ‘avèk yon imilite ki konplè, yon dousè ki konplè e avèk pasyans’ yon fason pou l ka sipòte sitiyasyon an avèk amou (Efe. 4:2, NW). Avèk èd lespri sen Bondye, fòs aktif li a, li toujou posib pou nou demontre bèl kalite nou genyen antanke kretyen, menm lè n ap fè fas ak yon sitiyasyon ki difisil.

⁹ Men sa Pòl te ekri: “Pou tout bagay, mwen gen fòs grasa sila a ki ban m pisans lan.” ​(Fil. 4:13, NW). Lespri Bondye pèmèt konjwen ki kretyen an rive fè yon pakèt bagay li pa t ap janm ka fè san èd lespri sa a. Pa egzanp, lè konjwen ki pa kretyen an aji yon fason ki di avèk li, li ta gendwa vle rann li mal pou mal. Sepandan, men sa Labib di tout kretyen: “Si yon moun fè nou mal, pa chache fè l mal tou. [...] Paske men sa ki ekri nan liv la: Se mwen menm sèl ki gen dwa tire revanj, se mwen menm sèl ki va bay moun sa yo merite. Se Bondye menm ki di sa.” ​(Wom. 12:17-19). Nan menm sans lan, men ki konsèy nou jwenn nan 1 Tesalonisyen 5:15: “Pa kite pèsonn rann mal pou mal. Okontrè, toujou chache fè sa ki byen yonn pou lòt ak sa ki byen pou tout moun.” Grasa èd lespri sen Jewova, nou vin kapab fè sa nou pa t kapab fè ak pwòp fòs nou. Li vrèman apwopriye pou nou mande Bondye lespri sen l pou ede nou.

10. Ki jan Jezi te reyaji lè moun te pale mal avèk li oswa yo te aji mal avèk li?

¹⁰ Jezi te bay yon egzanp san parèy nan fason li te boule ak moun ki te pale mal e ki te aji mal avèk li. Selon 1 Pyè 2:23: “Lè yo t’ap joure l, li pat reponn. Lè yo t’ap maltrete l, li pat mennase pèsonn. Men, li [te] renmèt kòz li nan men Bondye k’ap jije tout bagay san patipri.” Nou jwenn egzòtasyon pou nou suiv bèl egzanp li bay. Pa kite move konduit yon moun genyen fè nou mal aji. Menm jan tout kretyen yo resevwa konsèy sa a, “se pou nou yonn renmen lòt tankou frè ak sè, se pou nou gen bon kè, san lògèy. Pa rann moun mal pou mal, jouman pou jouman”. —1 Pyè 3:8, 9.

Èske yo pa gen dwa bay opinyon yo?

11. Ki gwo privilèj kèk kretyèn pral genyen?

¹¹ Èske lefètke fi yo dwe soumèt anba otorite mari yo, sa vle di yo dwe toujou rete an silans, san yo pa gen dwa bay opinyon yo sou bagay ki konsène fanmi an ak lòt bagay ankò? Non. Jewova bay ni gason ni fi yon pakèt privilèj. Nou kapab reflechi sou gwo privilèj li bay 144 000 moun pou yo wa ak prèt nan syèl la anba direksyon Kris lè l pral dirije tè a. Gen fi tou pami moun sa yo (Gal. 3:26-29). Sa klè, Jewova bay fi yo jwe yon wòl aktif nan dispozisyon li pran yo.

12, 13. Bay yon egzanp ki montre fi yo te konn bay mesaj ki soti nan Bondye oubyen pwofetize.

¹² Pa egzanp, nan tan biblik yo, fi yo te konn pwofetize. Men sa Jewova te di pa mwayen pwofèt Yowèl nan Yowèl 2:28, 29: “M’a vide lespri mwen sou tout moun. Pitit gason ak pitit fi nou yo va bay mesay m’a ba yo. [...] Wi, lè sa a, m’a vide lespri m sou tout moun, ata sou moun k’ap travay lakay nou, fi kou gason.”

¹³ Nan jou Pannkòt ane 33 epòk nou an, Jezi te gen anviwon 120 disip, fi kou gason, ki te reyini nan yon chanmòt nan Jerizalèm. Lespri sen Bondye te vide sou tout moun ki te la yo nèt. Se sa k fè Pyè te kapab site sa pwofèt Yowèl te anonse a e li te kapab fè aplikasyon an ni sou gason ni sou fi san distenksyon. Men sa Pyè te di: “Sa pwofèt Jowèl te fè konnen gen pou rive a, se sa k’ap pase kounyeya: Men sa k pral rive nan dènye tan an: Se Bondye menm k’ap pale: M’ap vide Lespri m sou tout moun sou latè. Pitit gason nou ak pitit fi nou yo va pale tankou pwofèt. [...] Wi, lè sa a, m’ap vide Lespri m sou tout sèvitè m yo, fi kou gason, epi y’a bay mesay ki sòti nan Bondye [“y ap pwofetize”, NW].” —Tra. 2:16-18.

14. Ki wòl fi yo te jwe nan gaye krisyanis la nan premye syèk la?

¹⁴ Nan premye syèk la, fi yo te jwe yon wòl enpòtan nan gaye krisyanis la. Yo te preche lòt moun Wayòm Bondye a e yo te fè lòt bagay pou yo soutni travay predikasyon an (Lik 8:1-3). Pa egzanp, apot Pòl te pale de Febe; li te di se “yon sè k’ap sèvi nan [kongregasyon] Sankre”. E lè apot Pòl t ap voye salitasyon pou kèk konpayon travay li, li te mansyone yon seri medam ki te fidèl, tankou “Trifèn ak Trifòz, de sè k’ap bay kò yo anpil traka pou Senyè a”. Li te pale tou de “Pèsid [Pèsis], bon zanmi [l] ki te pran anpil fatig pou Senyè a”. —Wom. 16:1, 12.

15. Ki wòl fi yo jwe nan gaye krisyanis la nan epòk nou an?

¹⁵ Nan epòk nou an, gen plis pase sèt milyon moun k ap preche bon nouvèl Wayòm Bondye a sou tout tè a, e yon bonkou nan moun sa yo se fi ki gen tout laj (Mat. 24:14). Gen anpil nan yo ki nan sèvis aplentan, ki misyonè oswa ki manm fanmi Betèl yo. Men sa salmis David te di nan yon chante: “Senyè a bay lòd, epi yon bann fanm pran gaye nouvèl la.” ​(Sòm 68:11). Vrèman, nou kapab wè ki jan pawòl sa yo se verite. Jewova bay wòl fi yo jwe nan deklare bon nouvèl la e nan akonpli objektif li anpil valè. Pa gen dout, lè l mande kretyèn yo pou yo soumèt yo, sa pa vle di yo pa gen dwa bay opinyon yo.

De fi ki pa t annik rete an silans

16, 17. Ki jan egzanp Sara montre madanm yo pa oblije rete an silans?

¹⁶ Si Jewova bay fi yo anpil privilèj konsa, èske mari yo pa ta dwe mande madanm yo opinyon yo anvan yo pran yon gwo desizyon? Li t ap saj pou yo fè sa. Ekriti yo pale de divès sitiyasyon kote gen madanm ki te pale oubyen ki te aji san mari yo pa t mande yo fè sa. Annou konsidere de egzanp.

¹⁷ Sara, madanm Abraram, yon patriyach, t ap plede di l pou l fè dezyèm madanm li an ansanm ak pitit gason l lan ale paske yo te aji yon fason derespektan. Labib fè konnen “pawòl sa a te fè Abraram lapenn anpil”. Men, Jewova pa t wè bagay yo konsa. Li te di Abraram: “Ou pa bezwen pran lapenn pou ti gason an ak pou Aga, sèvant ou a. Ou mèt fè tout sa Sara di ou fè a.” ​(Jen. 21:8-12). Abraram te obeyi Jewova, li te koute Sara, e li te fè sa Sara te mande l fè a.

18. Ki inisyativ Abigayil te pran?

¹⁸ Nou ka sonje Abigayil tou, madan Nabal. Lè David t ap chape pou wa Sayil, pandan yon tan li te tabli kan l toupre twoupo Nabal yo. David ak mesye ki te avè l yo pa t pran anyen nan sa mesye rich sa a te posede, okontrè, yo te pwoteje yo. Sepandan, Nabal “te gen move jan, li pat konn boule byen ak moun menm” e li te “pale mal” ak mesye David yo. Se te “yon voryen”, yon “moun fou”. Lè mesye David yo t al mande Nabal kèk pwovizyon avèk respè, li te refize. Ki jan Abigayil te reyaji lè l te tande sa k te rive a? San l pa di Nabal anyen, li “prese pran desan (200) pen, de gwo veso an po bèt plen diven, senk mouton tou kwit, de barik grenn griye, san mamit rezen chèch, desan (200) gato fèt ak figfrans chèch” epi li pote yo bay David ak mesye l yo. Èske Abigayil te gen rezon pou l aji konsa? Wi, paske men sa Labib di: “Senyè a frape Nabal, Nabal mouri”. Pi devan, David marye ak Abigayil. —1 Sam. 25:3, 14-19, 23-25, 38-42.

‘Fi yo fè lwanj pou li a’

19, 20. Ki sa k fè yon fi vrèman merite pou yo fè lwanj pou li?

¹⁹ Ekriti yo felisite madanm ki fè bagay yo fason Jewova vle yo a. Liv Pwovèb la fè lwanj pou “yon bon madanm”. Men sa l di: “Li gen plis valè pase yon boul lò. Mari l mete tout konfyans li nan li. Tout bagay ap mache byen lakay li. Madanm lan p’ap janm aji mal ak mari l, l’ap pase tout lavi l ap fè l byen.” Mete sou sa, “lè li louvri bouch li, se bon konsèy li bay. Li toujou gen bon pawòl nan bouch li. Li konnen vire tounen tout moun nan kay la. Li toujou gen yon bagay l’ap fè. Tout pitit li yo ap fè l konpliman. Mari l menm ap fè lwanj li”. —Pwo. 31:10-12, 26-28.

²⁰ Ki sa k fè yon fi vrèman merite pou yo fè lwanj pou li? Men sa Pwovèb 31:30 di: “Bèl fanm pa di bon madanm pou sa. Bèl figi pa la pou lontan. Men, y’a fè lwanj yon fanm ki gen krentif pou Senyè a.” Yon moun ki gen krentif pou Bondye bezwen soumèt li volontèman devan moun Jewova bay otorite. Bib la di “gason se chèf fanm”, “Kris la se chèf tout gason” e “Bondye se chèf Kris la”. —1 Kor. 11:3.

Se pou nou rekonesan pou kado Bondye bay la

21, 22. a) Ki rezon kretyen ki marye yo genyen pou yo gen rekonesans pou maryaj ki se yon kado Bondye bay? b) Poukisa nou ta dwe demontre nou gen respè pou moun Jewova bay otorite? (Gade kare ki nan paj 17 la.)

²¹ Kretyen ki marye yo vrèman gen yon pakèt rezon pou yo gen rekonesans pou Bondye! Yo ta dwe gen rekonesans pou li sitou poutèt maryaj yo ki se yon benediksyon Bondye ba yo, paske li ba yo posiblite pou youn atache ak lòt e pou yo sèvi Jewova kòtakòt ak kè kontan antanke moun marye (Rit 1:9; Mika 6:8). Jewova, Sila ki kreye maryaj la, konnen egzakteman ki sa ki nesesè pou moun jwenn kè kontan nan maryaj. Se pou nou toujou aji ann amoni ak volonte Jewova, konsa ‘kontantman Bondye ap mete nan kè nou an va ban nou fòs’ menm nan monn sa a ki chaje ak pwoblèm. —Ney. 8:10.

²² Yon mari kretyen ki renmen madanm li menm jan li renmen tèt li ap demontre otorite li avèk tandrès e avèk konsiderasyon. Madanm li, ki gen krentif pou Bondye, ap soutni l e l ap demontre yon pwofon respè pou li, e sa ap fè l vrèman merite pou mari l renmen l. Sa ki pi enpòtan, sèke maryaj yo ap sèvi kòm egzanp e l ap onore Jewova, Bondye nou an, ki merite louwanj.