Bati yon maryaj ki solid e ki bay kè kontan

1-3. Ak ki difikilte moun ki marye yo ap fè fas? (Gade foto ki nan kòmansman atik la.)

MEN sa yon mari ki gen 38 an depi l marye e ki jwenn kè kontan nan maryaj li fè konnen: “Si w fè bonjan efò epi w montre w vle maryaj ou reyisi, ou kapab jwenn benediksyon Jewova.” Vrèmanvre, ni mari ni madanm gen posiblite pou yo pase moman ki bay kè kontan ansanm e pou youn soutni lòt nan moman difisil. — Pwo. 18:22.

² Sepandan, koup marye yo konn jwenn kèk “tribilasyon nan lavi yo”. (1 Kor. 7:28.) Sa k fè sa? Se tou senpleman paske pwoblèm moun rankontre chak jou kapab gen efè sou lyen ki ini de moun marye. Lefètke yo enpafè youn ka blese santiman lòt nan pawòl y ap di, youn ka mal konprann lòt epi yo gendwa pa gen bonjan kominikasyon youn ak lòt, tout sa ka lakòz gen difikilte menm nan maryaj ki pi bon an (Jak 3:2, 5, 8). Anplis de sa, gen anpil koup marye k ap fè fas ak egzijans yo jwenn nan travay yo toutpandan yo gen pou yo pran swen timoun yo. Strès ak fatig fè l difisil pou kèk koup marye jwenn tan yo bezwen pou yo fè maryaj yo vin pi solid. Pwoblèm ekonomik, pwoblèm sante ak lòt difikilte ankò kapab minen lanmou ak respè yo gen youn pou lòt la. Mete sou sa, menm lè yon maryaj te bati sou yon fondasyon ki byen solid, li kapab vin kraze akoz kèk “zèv lachè” tankou imoralite seksyèl, konduit deregle, rayisman, fè kont, jalouzi, kòlè san kontwòl ak chirepit. — Gal. 5:19-21.

³ Sa k pi rèd la, tandans egoyis ak mank respè pou Bondye ki karakterize “dènye jou yo” se yon seri tandans ki reprezante pwazon pou yon maryaj (2 Tim. 3:1-4). Pou fini, moun ki marye yo dwe lite kont yon seri atak yon ènmi ki mechan detèmine pou l fè sou yo. Men ki avètisman apot Pyè ban nou: “Advèsè nou an, Dyab la, ap sikile tankou yon lyon k ap gwonde, l ap chèche devore moun.” — 1 Pyè 5:8; Rev. 12:12.

 4. Ki jan n ka rive bati yon maryaj ki solid e ki bay kè kontan?

⁴ Men ki sa yon mari nan peyi Japon fè konnen: “Mwen t ap fè fas ak anpil pwoblèm ekonomik. Epi, lefètke m pa t vrèman konn pale ak madanm mwen li menm tou li te vin ap fè fas ak anpil presyon. Anplis de sa, sa pa gen twò lontan depi l te gen gwo pwoblèm sante. Pafwa, strès sa a te konn fè n fè kont.” Gen kèk difikilte nou gen pou n rankontre kanmenm nan yon maryaj, men, sa pa vle di n pap ka rezoud yo. Grasa èd Jewova, koup marye yo ka bati yon maryaj ki solid e ki bay kè kontan. (Li Sòm 127:1.) Ann fè yon ti pale konsènan senk blòk espirityèl ki kapab ede n bati yon maryaj solid k ap dire. Apre sa, nou pral wè kòman nou ka simante blòk sa yo avèk lanmou.

5, 6. Ki sa ni mari ni madanm kapab fè pou yo bay Jewova plas li nan maryaj yo?

⁵ Pou yon maryaj solid, wòch ki nan kwen fondasyon l lan dwe se fidelite ak soumisyon anvè Sila a ki vin ak maryaj la. (Li Eklezyas 4:12.) Mari ak madanm ka bay Jewova plas li nan maryaj yo lè yo suiv direksyon ki plen lanmou li bay yo. Men sa Bib la di konsènan pèp Bondye te gen nan tan lontan an: “Si nou kite bon wout la pou n fè adwat oswa agoch, n ap tande yon vwa dèyè nou k ap di: ‘Men chemen an. Mache ladan l.’” ​(Iza. 30:20, 21, NW). Jodi a, koup marye yo kapab “tande” konsèy Jewova yo lè yo li Pawòl Bondye a ansanm (Sòm 1:1-3). Yo kapab fè maryaj yo vin pi solid grasa pwogram adorasyon an fanmi an ki nonsèlman se yon moman ki bay kè kontan men tou ki pote ankourajman nan domèn espirityèl. Mete sou sa, lè yo priye ansanm chak jou sa enpòtan pou ede yo bati yon maryaj ki kapab reziste kont atak monn Satan an ap fè sou yo.

⁶ Men sa Gerhard k ap viv nan peyi Almay fè konnen: “Chak fwa n vle pèdi jwa nou akoz difikilte pèsonèl oswa lè youn mal konprann lòt, konsèy nou jwenn nan Pawòl Jewova a ede n aprann gen pasyans epi l ede n aprann padone. Kalite sa yo enpòtan anpil pou yon maryaj reyisi.” Koup marye yo fè gwo efò pou yo kontinye bay Bondye plas li nan maryaj yo lè yo fè aktivite espirityèl ansanm, konsa yo vin gen yon relasyon sere youn ak lòt e ak Bondye, e sa fè yo gen kè kontan.

 7. Ki fason mari yo dwe egzèse otorite yo?

⁷ Fason yon mari egzèse otorite l kapab jwe yon gwo wòl nan ede yo bati yon maryaj ki solid e ki bay kè kontan. Men sa Bib la di: “Chèf tout gason se Kris, chèf fi se gason.” ​(1 Kor. 11:3). Nan kontèks deklarasyon sa a, yo montre mari yo kòman yo dwe egzèse otorite yo, sa vle di yo dwe fè sa menm jan Kris egzèse otorite l sou gason yo. Jezi pa t janm konn aji yon fason ki di, men, li te toujou demontre lanmou, li te gen tandrès, li te rezonab, li te gen tanperaman dou e l te gen imilite nan kè l. — Mat. 11:28-30.

 8. Ki jan yon mari kapab jwenn respè ak lanmou nan men madanm li?

⁸ Mari kretyen yo pa oblije toutan ap mande madanm yo pou yo demontre respè anvè yo. Olye de sa, yo “kontinye viv avèk yo dapre konesans”. Yo “onore yo tankou yon veso ki pi fèb, anpalan de fi”. (1 Pyè 3:7.) Kit se an prive kit se an piblik, mari yo montre jan madanm yo gen anpil valè pou yo grasa pawòl yo di ki demontre respè ansanm ak aksyon yo fè ki demontre konpasyon (Pwo. 31:28). Fason sa a yo egzèse otorite yo avèk lanmou an fè yo jwenn lanmou ak respè nan men madanm yo e sa pèmèt Bondye vide benediksyon sou maryaj yo.

 9. Ki jan yon madanm kapab soumèt li devan mari l avèk imilite?

⁹ Lè lanmou n gen pou Jewova a se yon lanmou ki pa chèche enterè pa l e ki baze sou prensip, sa ap ede nou tout soumèt tèt nou anba men Bondye ki pisan an (1 Pyè 5:6). Youn nan pi bon fason yon madanm ki soumèt li devan mari l kapab demontre respè anvè Jewova se lè l kowopere ak mari l epi l bay sipò pa l anndan fanmi an. Men sa Bib la di: “Nou menm madanm, se pou nou soumèt devan mari nou, jan sa dwe fèt nan Seyè a.” ​(Kol. 3:18). An reyalite, se pa tout desizyon yon mari pran k ap nan gou madanm li. Aktout sa, depi desizyon mari a pa vyole lwa Bondye yo, yon madanm ki soumèt li devan mari l ap dispoze soutni yo. — 1 Pyè 3:1.

10. Ki sa k fè l enpòtan pou madanm yo soumèt yo avèk lanmou?

¹⁰ Yon madanm gen yon plas ki onorab antanke “konpay” mari l (Mal. 2:14, NW). Li bay kèk ide ki gen anpil valè sou desizyon fanmi an ap pran lè l di sa l panse ak lè l eksprime sa l santi avèk respè toutpandan l kontinye soumèt li. Yon mari ki gen sajès ap pran san l pou l koute sa madanm li ap di (Pwo. 31:10-31). Lè madanm nan soumèt li devan mari l avèk lanmou, sa pèmèt gen lajwa, lapè ak amoni nan fanmi an e sa fè kè mari a ak kè madanm nan kontan lefètke yo konnen yo fè Bondye plezi. — Efe. 5:22.

11. Poukisa l enpòtan pou n padone youn lòt?

¹¹ Padon se youn nan blòk enpòtan ki kapab ede n bati yon maryaj k ap dire. Lyen ki ini koup marye yo vin pi solid lè ni mari ni madanm ‘kontinye sipòte youn lòt epi youn kontinye padone lòt ak tout kè yo’. (Kol. 3:13.) Yon lòt bò, yon koup kapab minen relasyon yo gen nan maryaj yo lè yo kontinye panse ak erè yo te fè epi, souvan, yo sèvi avè yo pou youn atake lòt. Menm jan lè yon kay fisire sa vin fè kay la pa solid, konsa tou, nou kapab vin gen lapenn ak rankin nan kè nou e sa ka fè l vin pi difisil pou n padone. Sepandan, lè mari ak madanm padone youn lòt menm jan Jewova padone yo, sa fè maryaj yo vin pi solid. — Mika 7:18, 19.

12. Nan ki sans lanmou kouvri “yon pakèt peche”?

¹² Vrè lanmou an “pa note bagay mal yo fè l”. Anfèt, “lanmou kouvri yon pakèt peche”. (1 Kor. 13:4, 5; li 1 Pyè 4:8.) Sa vle di, lanmou pa konte kantite peche nou kapab padone. Lè apot Pyè te mande Jezi ki kantite fwa l ta dwe padone yon moun, Jezi te reponn li: “Jiska swasanndisèt fwa.” ​(Mat. 18:21, 22). Jezi te vle montre pa gen yon limit nan kantite fwa yon kretyen dwe padone lòt mouna. — Pwo. 10:12.

13. Ki jan n ka rive venk tandans nou genyen pou n pa padone a?

¹³ Men sa Annette fè konnen: “Si de moun ki marye pa vle padone youn lòt, rankin ap grandi nan kè yo e youn pap fè lòt konfyans, tout sa se pwazon pou yon maryaj. Lè yo dispoze padone, sa ap fè maryaj yo vin pi solid epi youn ap vin pi pwòch lòt.” Pou n rive venk tandans nou genyen pou n pa padone a nou bezwen travay pou n aprann gen rekonesans. Pran abitid felisite konjwen w ak tout kè w (Kol. 3:15). Chèche gen lapè lespri a, chèche gen inite ak benediksyon Bondye bay moun ki renmen padone yo. — Wom. 14:19.

14, 15. Ki sa Règ annò a ye, e ki enpòtans li genyen nan yon maryaj?

¹⁴ Sandout ou renmen lè yo trete w ak respè e ak diyite. Ou renmen lè yo konprann sa w panse ak lè yo pran santiman w an konsiderasyon. Men, èske w pa janm konn tande moun ap di: “M pral fè l menm sa l te fè m nan!” Byenke, pafwa, yon moun gendwa gen rezon pou l reyaji konsa, men, Bib la di nou: “Pa di: ‘M ap fè l menm sa l te fè m nan.’” ​(Pwo. 24:29, NW). Anfèt, Jezi te montre nou yon fason ki pi pozitif pou n regle sitiyasyon ki difisil yo. Règ sa a se yon règ konduit tout moun byen konnen e byen souvan yo rele l Règ annò a. Men sa l di: “Sa nou ta renmen moun fè pou nou, se menm bagay la nou dwe fè pou yo.” ​(Lik 6:31). Jezi te vle di nou dwe trete lòt moun menm jan nou ta renmen yo trete nou epi pou n pa rann mal pou mal. Anrapò ak maryaj li vle di sa nou menm nou espere jwenn nan se sa nou dwe bay.

¹⁵ Moun marye yo ap fè relasyon yo vin pi solid lè yo pran santiman konjwen yo an konsiderasyon. Men sa yon mari k ap viv ann Afrik disid fè konnen: “Nou te eseye suiv Règ annò a. Se vre gen de fwa nou konn an kòlè anpil, men, nou fè gwo efò pou youn trete lòt menm jan l ta renmen yo trete l, sa vle di ak respè e ak diyite.”

16. Ki sa moun ki marye yo pap fè youn lòt?

¹⁶ Pa rakonte lòt moun feblès konjwen w oswa pa plede ap plenyen toutan pou defo l yo menm lè se an jwèt. Nou bezwen sonje maryaj pa tankou yon konpetisyon ki pèmèt yon moun wè kiyès ki pi djanm, kiyès ki konn rele sou moun pi plis oswa kiyès ki ka di pawòl k ap plis blese lòt. Vrèmanvre, nou tout nou gen defo e nou konn blese lòt moun pafwa. Sepandan, pa gen anyen ki ka jistifye rezon ki fè yon mari oswa yon madanm ap sèvi ak pawòl pou youn imilye lòt oswa sa k pi mal la, pou youn ta frape oswa pouse lòt. — Li Pwovèb 17:27; 31:26.

17. Ki fason mari yo kapab suiv Règ annò a?

¹⁷ Menm lè nan kèk peyi yo konsidere se lè yon gason ap fè presyon sou madanm li oswa l ap bat madanm li se lè sa l gason, Bib la fè konnen: “Moun ki pa fè kòlè fasil pi bon pase gason vanyan. Moun ki kontwole tèt yo pi bon pase yon moun ki pran yon vil.” ​(Pwo. 16:32, NW). Sa mande yon gwo fòs moral pou yon moun rive imite Jezi Kris, moun ki pi enpòtan ki te pase sou tè a, e pou l rive kontwole lespri l. Yon gason k ap bat madanm li ak bouch li oswa k ap ba l kou se pa yon gason, e l gen pou l pèdi relasyon l ak Jewova. Men sa salmis David ki te yon gason ki djanm e ki te gen anpil kouraj te di: “Si nou fache, pinga nou peche. Pale nan kè nou sou kabann nou epi fè silans.” — Sòm 4:4, NW.

18. Ki sa k fè l enpòtan pou n kontinye demontre lanmou?

¹⁸ Li 1 Korentyen 13:4-7. Lanmou se kalite ki pi enpòtan nan yon maryaj. Bib la di: “Abiye nou avèk yon konpasyon ki pwofon anpil, ak bonte, imilite, dousè ak pasyans. Men, anplis tout bagay sa yo, abiye nou ak lanmou, paske li se yon chenn ki ini moun yon fason ki san fay.” ​(Kol. 3:12, 14). Lanmou sa a se yon lanmou ki pa chèche enterè pa l, sa vle di li menm jan ak lanmou Kris la, e se li menm ki se siman k ap simante blòk pou n bati yon maryaj solid. Maryaj sa a ap ret byen djanm menm lè l ap fè fas ak defo nan pèsonalite, gwo pwoblèm sante, pwoblèm ekonomik ki difisil ansanm ak pwoblèm ki gen nan fanmi.

19, 20. a) Ki jan moun marye yo ka rive bati yon maryaj ki solid e ki bay kè kontan? b) Ki sa n pral wè nan atik ki vin apre a?

¹⁹ Vrèmanvre, pou yon maryaj reyisi sa mande pou moun ki marye yo gen atachman ki plen lanmou youn pou lòt, pou yo toule de fidèl anvè angajman yo pran an e pou yo kontinye fè anpil efò. Lè moun marye yo ap fè fas ak difikilte, olye pou yo kouri abandone maryaj yo oswa pou yo annik reziyen yo, yo ta dwe detèmine pou yo fè relasyon yo vin pi solid. Koup kretyen ki atache ak Jewova e ki atache youn ak lòt kite lanmou yo gen pou Bondye a ansanm ak lanmou youn gen pou lòt la pouse yo rezoud pwoblèm yo paske “lanmou pa janm fayi”. — 1 Kor. 13:8; Mat. 19:5, 6; Ebre 13:4.

²⁰ Li sitou difisil pou n rive bati yon maryaj ki solid e ki bay kè kontan nan ‘tan di’ n ap viv la (2 Tim. 3:1). Men, sa posib grasa èd Jewova. Malgre sa, koup marye yo gen pou yo fè fas tou ak kondisyon moral monn nan k ap fin degrade. Nan atik ki vin apre a, nou pral wè ki sa mari ak madanm ka fè pou yo ranfòse defans maryaj yo nan domèn espirityèl.