Èske pawòl ou ‘se Wi ki tounen Non’?

Ann imajine yon lòt sèn: Gen yon koup nan kongregasyon an ki envite yon manman k ap leve de pitit fi poukont li vin pase yon aprèmidi ansanm ak yo. Lè manman an di timoun yo sa, timoun yo kontan anpil e yo pa ka tann pou jou sa a rive. Sepandan, nan lavèy, koup la di manman an gen yon bagay yo pa t atann ki rive e yo oblije anile envitasyon an. Annapre, manman an te vin konn rezon ki fè koup la te anile envitasyon an. Apre yo te fin envite manman an, gen kèk zanmi koup la ki te envite koup la vin lakay yo menm aprèmidi a e yo te aksepte.

Nòmalman, antanke kretyen nou dwe kenbe pawòl nou. Nou pa dwe janm vin tankou moun ki kite ‘Wi nou te di a tounen Non’. (2 Kor. 1:18.) Sepandan, jan de egzanp yo montre sa, se pa tout sitiyasyon ki menm. Gendelè, nou gendwa pa gen lòt chwa, e konsa, nou oblije anile yon aranjman nou te fè. Yon lè apot Pòl te twouve l nan yon sitiyasyon konsa.

Nan ane 55 epòk nou an, pandan Pòl te twouve l nan vil Efèz nan twazyèm vwayaj misyonè l la, li te planifye pou l pran bato sou lanmè Eje pou l al Korent, e apati Korent, li t ap vwayaje pou l al Masedwàn. Pandan l sou wout pou l retounen Jerizalèm, li te planifye pou l al vizite kongregasyon Korent lan yon dezyèm fwa yon fason pou l te ka ranmase don frè Korent yo t ap voye pou frè Jerizalèm yo (1 Kor. 16:3). 2 Korentyen 1:15, 16 montre sa byen klè. Men sa vèsè sa yo di: “Se avèk konfyans sa a mwen te gen entansyon vin jwenn nou anvan sa, pou nou te ka gen kè kontan yon dezyèm fwa. Mwen te gen entansyon al Masedwàn tou apre m fin fè yon ti rete lakay nou, e apre, pou m retounen lakay nou lè m sot Masedwàn, e apre sa, pou nou ka kondui m mete m nan wout pou m al Jide.”

Sanble, Pòl te fè frè Korent yo konn aranjman l te fè yo nan yon lèt li te ekri yo anvan sa (1 Kor. 5:9). Sepandan, yon ti tan apre Pòl te fin ekri yo lèt la, mou kay Kloye te fè l konnen gen gwo pwoblèm nan kongregasyon an (1 Kor. 1:10, 11). Pòl te deside fè kèk ajisteman nan aranjman l te fè yo, e l te ekri yo lèt kounye a nou konnen sou non 1 Korentyen an. Lefètke Pòl te gen lanmou pou yo, nan lèt sa a, li te ba yo konsèy e l te korije yo. Li te fè yo konnen li te chanje pwogram li te genyen an, li te di yo l ap vizite Masedwàn anvan, epi, apre sa, l ap vin Korent. — 1 Kor. 16:5, 6a.

Sanble, lè frè Korent yo te resevwa lèt Pòl la, gen kèk nan “gwo apot” nan kongregasyon sa a ki te akize Pòl kòmkwa li pa kenbe pawòl li oswa li pa kenbe pwomès li. Pou Pòl te defann tèt li, li te mande yo: “Bon, lè m te gen entansyon fè sa a, èske m te pran sa alalejè? Oswa, sa m te gen entansyon fè yo, èske se te selon prensip monn nan mwen te gen entansyon fè yo, kòmkwa pou m ta fin di ‘Wi, san mank’, epi apre, pou m ta di ‘Non, jamè’?” — 2 Kor. 1:17; 11:5.

Nou ta gendwa mande, nan ka sa a, èske apot Pòl te “pran sa alalejè” toutbonvre? Jamè! Mo lè yo tradui l yo mete “alalejè” pou li a gen sans yon bagay k ap chanje toutan. Se tankou yon moun ki pa fin konn sa l ap fè, ki pa kenbe pwomès li. Lè Pòl te mande yo “èske se te selon prensip monn nan mwen te gen entansyon fè yo?” a, se yon fason pou l te fè kretyen Korent yo konprann byen klè, se pa paske l pa t fin konn sa l t ap fè ki fè l te pran desizyon pou l chanje pwogram li an.

Men sa Pòl te di avèk fòs pou l te reponn akizasyon yo a: “Men, menm jan nou ka fè Bondye konfyans, se konsa tou, pawòl mwen te di nou yo se pa Wi ki tounen Non.” ​(2 Kor. 1:18). Vrèmanvre, Pòl t ap panse ak byennèt frè ak sè nan kongregasyon Korent lan lè l te chanje pwogram li an. 2 Korentyen 1:23 fè n konnen se paske l te vle “menaje” yo ki fè l te chanje pwogram li te gen okòmansman pou l al Korent lan. Sa klè, li te ba yo opòtinite pou yo korije bagay yo anvan l vini. Jan Pòl te espere sa a, pandan l nan vil Masedwàn, Tit te fè l konnen lèt li a te fè frè yo tris anpil e yo te repanti. Nouvèl sa a te fè Pòl kontan anpil. — 2 Kor. 6:11; 7:5-7.

Lè yo te akize Pòl kòmkwa li pa kenbe pawòl li a, se kòmsi yo te vle di, si Pòl pa t ka kenbe pwomès li fè chak jou nan lavi a, donk, nou pa bezwen kwè nan travay predikasyon l lan. Sepandan, Pòl te fè kretyen Korent yo sonje se li menm ki te preche yo Jezi Kris. Men sa l te di yo: “Pitit Bondye a, Kris Jezi, li menm mwen menm ak Silven ak Timote te preche nou an, pa t Wi, apre sa l vin Non. Men, nan ka pa l, Wi se Wi.” ​(2 Kor. 1:19). Èske Jezi Kris te yon moun ki pa t fin konn tout sa l ap fè? Non, li pa t yon moun konsa. Jezi te toujou di laverite pandan tout vi l e pandan ministè l (Jan 14:6; 18:37). Si mesaj Jezi t ap preche a te laverite e yo te ka fè l konfyans, epi Pòl te preche menm mesaj sa a, sa montre apot la te preche laverite tou.

Nòmalman, Jewova se “Bondye verite a”. (Sòm 31:5, NW.) Sa parèt klè nan sa Pòl te di annapre yo: “Kèlkeswa kantite pwomès Bondye fè, yo vin tounen Wi” grasa Kris. Entegrite san fay Jezi te demontre pandan l te sou tè a, fè nou gen yon konfyans total nan pwomès Jewova yo. Men sa Pòl te di: “Kidonk, se grasa li tou nou di ‘Amèn’ pou nou bay Bondye glwa.” ​(2 Kor. 1:20). Jezi se garanti oswa “Amèn” ki fè nou gen konfyans tout pwomès Bondye yo ap reyalize!

Menm jan ak Jewova ak Jezi, Pòl te toujou aji ann amoni ak sa l ap di (2 Kor. 1:19). Pòl pa t yon moun ki pa kenbe pawòl li oswa yon moun ki fè pwomès “selon prensip monn nan”. (2 Kor. 1:17.) Olye de sa, li te “viv selon lespri a”. (Gal. 5:16.) Pòl te toujou ap panse ak byennèt frè ak sè yo nan fason li te konn boule ak yo. Wi l te vle di Wi!

Jodi a, an jeneral, moun ki pap viv ann amoni ak prensip ki nan Bib la toujou ap fè pwomès, epi annapre, yo bliye pwomès sa yo pou nenpòt ti pwoblèm yo genyen oswa pou nenpòt lòt bagay ki pi enterese yo. Nan zafè biznis, “Wi” pa toujou vle di “Wi” menm lè gen akò ki te siyen pou sa. Anpil moun pa konsidere maryaj kòm yon pwomès ki fèt ant de moun, oswa yon angajman de moun pran. Olye de sa, kantite divòs ki gen jodi a montre anpil moun konsidere maryaj tankou yon bagay ki pa alamòd e ki ka kraze byen fasil. — 2 Tim. 3:1, 2.

E ou menm? Èske Wi w vle di Wi? Vrèmanvre, jan sa parèt nan kòmansman atik sa a, sa ka rive ou anile yon randevou paske gen kèk sikonstans ki pa sou kontwòl ou, men, se pa paske w se yon moun ki pa konn kenbe pwomès ou. Sepandan, antanke kretyen, si w fè yon pwomès oswa w pran yon angajman, ou dwe fè tout sa w kapab pou w kenbe pawòl ou toutbonvre (Sòm 15:4; Mat. 5:37). Si w fè sa, y ap konnen w kòm moun yo ka fè konfyans, yon moun ki kenbe pawòl li, yon moun ki toujou di laverite (Efe. 4:15, 25; Jak 5:12). Lè moun yo rann yo kont jan yo ka fè w konfyans nan aktivite w fè chak jou yo, y ap ka pi dispoze koute w lè w ap preche yo verite konsènan Wayòm Bondye a. Kidonk, annou fè tout sa n kapab pou n gen asirans Wi nou vle di Wi toutbonvre!