Kontinye fè pwogrè

LÈ W te fèk ap aprann aplike prensip biblik yo, fason w panse, fason w pale ak konpòtman w, ki te byen anrasinen nan ou, te kòmanse chanje ofiramezi. Ou te rive fè anpil nan chanjman sa yo menm anvan w te enskri nan Lekòl ministè teyokratik la. Kounye a, sandout ou vin pwogrese nan pwen pou w vwe lavi w bay Jewova. Èske sa vle di ou ka sispann pwogrese? Non. Batèm ou an se tou senpleman yon kòmansman li ye.

Timote te deja ap sèvi kòm ansyen nan kongregasyon an, lè apot Pòl te di l pou l “reflechi” ni sou konsèy li te ba li ni sou responsablite yo te konfye l, pou l “plonje nèt nan” bagay sa yo, yon fason ‘pou tout moun ka wè pwogrè l aklè’. (1 Tim. 4:12-15.) Kit ou fèk kòmanse suiv chemen laverite a, kit ou gen anpil tan depi w kretyen, ou ta dwe chèche fè pwogrè.

Nan Efezyen 3:14-19, nou aprann apot Pòl te priye pou konpayon kretyen l yo “ka konprann lajè, longè, wotè ak pwofondè laverite totalman”. Nan objektif sa a, Jezi te bay gason kòm kado pou anseye kongregasyon an, pou redrese l e pou fòtifye l. Lè nou reflechi regilyèman sou Pawòl Bondye a e nou jwenn enstriksyon nan men anseyan ki gen eksperyans, sa ka ede nou “grandi” nan domèn espirityèl. — Efe. 4:11-15.

Pou nou grandi konsa, sa mande pou nou “renouvle mantalite k ap domine nan nou an”. Sa mande pou nou chèche panse yon fason ki wo nivo, jan Bondye ak Kris panse a. Pou nou ka fè sa, nou bezwen egzamine regilyèman fason Bondye ak Kris panse, konsa n ap “abiye ak nouvo pèsonalite a”. (Efe. 4:23, 24.) Lè w ap etidye Evanjil yo, èske w konsidere istwa sa yo ki pale sou lavi Kris kòm yon gid nan lavi w? Èske w chèche idantifye kèk kalite presi Jezi te demontre e èske w fè bonjan efò apre sa pou w chèche gen kalite sa yo nan lavi w? — 1 Pyè 2:21.

Sa w ap pale nan konvèsasyon w ka montre tou nan ki pwen w pwogrese. Moun ki abiye ak nouvo pèsonalite a pa nan bay manti, yo pa nan di move pawòl, pawòl sal, oswa pawòl ki negatif. Okontrè, yo di pawòl ki “bon pou fòtifye moun [...], yon fason pou pawòl sa [yo] pote sa ki bon pou moun ki tande l yo”. (Efe. 4:25, 26, 29, 31; 5:3, 4; Jid 16.) Sa y ap di ni an prive ni nan kongregasyon an montre laverite chanje lavi yo.

Si w pap ‘fè ale vini ankò, tankou yon moun ki kite lanm lanmè ap balanse l, ki kite tout van ansèyman ap pote l ale adwat agoch’, sa a tou se prèv ki montre w fè pwogrè (Efe. 4:14). Pa egzanp, ki jan w reyaji lè monn nan ap bonbade w ak yon pakèt ide ki fèk parèt, yon pakèt pwopagann oswa yon pakèt divètisman? Èske w anvi pran tan ou te rezève pou w fè aktivite espirityèl yo pou w lage kò w nan bagay sa yo? Si w fè sa, sa ka anpeche w fè pwogrè nan domèn espirityèl. Ala saj sa t ap pi saj pou w sèvi ak tan w pou w kontinye chèche atenn objektif espirityèl! — Efe. 5:15, 16.

Fason w boule ak lòt moun ka montre tou si w pwogrese nan domèn espirityèl. Èske w aprann ‘gen konpasyon ak tandrès pou frè ak sè w yo e w aprann padone yo ak tout kè w’? — Efe. 4:32.

Pwogrè w fè nan fason w aji ann amoni ak volonte Jewova ta dwe parèt klè ni nan kongregasyon an ni lakay ou. Yo ta dwe parèt klè tou lè w nan lekòl ou, nan travay ou ak nenpòt lòt kote w ye (Efe. 5:21–6:9). Si nan tout okazyon sa yo, ou montre ou gen kalite ki soti nan Bondye yo pi plis toujou, sa ap fè pwogrè w parèt klè.

Jewova bay nou chak kapasite ak talan. Li vle nou itilize yo nan enterè lòt moun yon fason pou l ka sèvi avèk nou pou l demontre favè san parèy li genyen. Men sa apot Pyè te ekri sou sa: “Se pou chak moun itilize don l resevwa a pou l sèvi lòt moun. Konsa, l ap sanble ak moun k ap byen jere favè san parèy Bondye a.” ​(1 Pyè 4:10). Ki jan w jere favè san parèy Bondye a?

Men sa Pyè te ekri apre sa: “Si yon moun ap pale, se pou l pale kòmsi se deklarasyon sakre Bondye l ap bay.” ​(1 Pyè 4:11). Vèsè sa a mete aksan sou responsablite w genyen pou w pale totalman ann amoni ak Pawòl Bondye a, konsa w ap bay Bondye glwa. Fason w ap pale a tou ta dwe bay Jewova glwa. Fòmasyon yo ba w nan Lekòl ministè teyokratik la ka ede w sèvi ak don sa a pou w louwe Jewova nan fason w ap ede lòt moun. Piske w gen objektif sa a nan lespri w, ki jan w dwe evalye pwogrè w fè nan lekòl la?

Olye w reflechi sou kantite pwen ou deja travay nan fich konsèy ou a oswa sou ki kalite diskou yo ba w fè, reflechi pou w wè jis nan ki pwen fòmasyon w resevwa a ede w amelyore kalite louwanj w ap bay Jewova kòm sakrifis la. Lekòl la prepare nou pou nou fè travay predikasyon an pi byen. Se sa k fè, ou dwe poze tèt ou kesyon sa yo: ‘Èske m vrèman prepare sa m pral di lè m prale nan predikasyon? Èske m aprann montre mwen enterese pèsonèlman nan moun m ap preche yo? Èske m poze baz pou m retounen vizite yo lè m soulve yon kesyon pou m vin egzamine avèk yo nan lòt vizit la? Si m ap etidye Labib ak yon moun, èske m ap travay pou m amelyore kapasite m antanke anseyan pou m ka touche kè l?’

Ou pa ta dwe evalye pwogrè w sèlman sou baz responsablite yo konfye w nan òganizasyon an. Se pa responsablite yo ba ou k ap fè wè pwogrè w, men se fason w ranpli yo. Si yo ba w responsablite pou w patisipe nan travay ansèyman an, apre chak patisipasyon, mande tèt ou: ‘Èske m te byen sèvi ak ladrès pou m anseye moun k ap koute m yo? Èske m te sèvi ak enfòmasyon yo yon fason pou m ede moun k ap koute m yo fè chanjman nan lavi yo?’

Ankourajman yo ban nou pou n sèvi ak don nou resevwa a mande pou n pran inisyativ. Èske w pran inisyativ pou w preche ak lòt moun? Èske w chèche okazyon pou w ede lòt manm nan kongregasyon an ki nouvo, ki jèn oswa ki malad? Èske w ofri tèt ou kòm volontè pou w netwaye Sal Wayòm nan oswa pou w bay èd ou divès fason nan kongrè yo ak nan asanble yo? Èske w ka pran sèvis pyonye oksilyè detanzantan? Èske w ka pran sèvis pyonye pèmanan oswa èske w ka al ede yon kongregasyon kote yo bezwen plis pwoklamatè? Si w se yon frè, èske w chèche kalifye pou w ranpli kondisyon Labib mande yo pou w ka vin asistan ministeryèl oswa ansyen? Si w dispoze bay èd ou e ou dispoze aksepte responsablite yo konfye w se yon prèv ki montre w ap pwogrese. — Sòm 110:3.

Si w santi w limite paske w manke eksperyans antanke yon moun ki pa gen lontan depi l vin kretyen, pa dekouraje. Pawòl Bondye a ka fè yon “moun ki pa gen eksperyans vin saj”. (Sòm 19:7; 119:130; Pwo. 1:1-4.) Si nou aplike konsèy Bib la bay, sa ap ede nou byen pwofite sajès Jewova, yon sajès ki san fay e ki gen plis valè lontan pase tout eksperyans nou te ka fè poukont nou. Men, ofiramezi nou fè pwogrè nan sèvis n ap bay Jewova a, nou vin gen yon eksperyans ki gen anpil valè. Ki jan nou ka sèvi avè l pou nou fè byen?

Yon moun ki abitye fè fas ak yon pakèt sitiyasyon nan lavi a ka anvi rezone konsa: ‘Mwen rankontre sitiyasyon sa a deja. Mwen konnen sa pou m fè.’ Èske li saj pou l rezone konsa? Pwovèb 3:7 ban nou yon avètisman lè l di: “Pa vin saj nan pwòp je pa w.” Pa gen dout nan sa, eksperyans nou genyen ta dwe ede nou wè pi klè konsènan aspè nou bezwen egzamine lè n ap fè fas ak yon sitiyasyon ki prezante. Men, si n ap fè pwogrè nan domèn espirityèl, eksperyans nou genyen ta dwe enfliyanse ni lespri nou, ni kè nou pou fè nou toujou sonje nou bezwen benediksyon Jewova pou nou reyisi. Lè n ap fè fas ak yon sitiyasyon ki prezante, se pa lè nou mete konfyans nan tèt nou, pwogrè nou parèt aklè, men pito se lè nou pran abitid chèche direksyon Jewova nan lavi nou. Nou montre n ap fè pwogrè lè nou kwè anyen pap ka rive si Jewova pa pèmèt sa e lè nou toujou gen konfyans nan Jewova, Papa nou ki nan syèl la, e nou kenbe yon relasyon sere sere avè l.

Byenke apot Pòl te yon kretyen ki gen matirite nan domèn espirityèl e Bondye te chwazi l pou l al nan syèl, li te rekonèt li bezwen kontinye “lanse dèyè bagay ki devan yo” pou l ka rive gen lavi (Fil. 3:13-16). Èske w wè bagay yo konsa tou?

Jis nan ki pwen w pwogrese? Egzamine pwogrè w fè lè w chèche konnen jis nan ki pwen w abiye ak nouvo pèsonalite a, jis nan ki pwen w soumèt ou devan souvrènte Jewova e jis nan ki pwen w chofe pou w sèvi ak don w genyen yo pou w onore Jewova. Toutpandan w ap kontinye byen pwofite fòmasyon Lekòl ministè teyokratik la ba ou a, tikras pa tikras, gen yon seri kalite Pawòl Bondye a mete aksan sou yo ki ta dwe parèt klè nan fason w pale ak nan fason w anseye. Toujou reflechi sou pwen sa yo pandan w ap chèche fè pwogrè. Wi, pran plezi ladan yo, e pwogrè w ap parèt aklè byen vit.