Referans pou Pwogram reyinyon Lavi nou ak travay nou fè a

3-9 JEN

TREZÒ KI NAN PAWÒL BONDYE A | GALAT 4-6

“Yon istwa ki ‘gen yon sans senbolik’ ki enpòtan pou nou”

it-1-F 56 § 1

Aga

Selon apot Pòl, Aga te jwe yon wòl nan yon istwa ki gen yon sans senbolik. Li te reprezante nasyon Izrayèl selon lachè a, yon nasyon ki te vin byen pa Jewova grasa alyans Lalwa a ki te fèt sou Mòn Sinayi. Alyans sa a te fè ‘tout moun ki te anba l yo vin esklav’. Etandone pèp la fèt nan peche, yo pa t anmezi pou yo respekte tout sa alyans sa a te mande. Alyans sa a pa t fè pèp Izrayèl la vin lib, paske antanke pechè, yo te kondane pou yo mouri. Kidonk, yo te esklav (Jan 8:34; Wm 8:1-3). Nan epòk Pòl la, Jerizalèm te gen anpil bagay ki te fè l sanble ak Aga. Antanke kapital, Jerizalèm, ki te reprezante fason Izrayèl selon lachè a te òganize, te nan esklavaj ansanm ak tout pitit li yo. Yon lòt bò, kretyen ki te vin pitit espirityèl Bondye yo se pitit “Jerizalèm anwo a”, ki se madanm Bondye nan yon sans senbolik. Menm jan ak Sara, fi ki pa t esklav la, Jerizalèm sa a pa t janm nan esklavaj. Menm jan Izmayèl te pèsekite Izarak, se menm jan an tou pitit Jerizalèm ki te esklav la te pèsekite pitit “Jerizalèm anwo a”, yo menm ki te vin lib grasa Pitit Bondye a. Sepandan, mete yo te mete Aga ak tout pitit gason l lan deyò a gen rapò ak Jewova ki te rejte Izrayèl antanke pèp. — Ga 4:21-31; gade tou Jan 8:31-40.

Fouye pou n ka jwenn trezò espirityèl

w09-F 1/4 13

Èske w te konnen?

Poukisa pandan Jezi t ap priye Jewova, li te di: “Abba, Papa”?

Mo abba a se yon mo nan lang arameyen ki kapab vle di “papa a” oswa “O Papa”. Toule twa fwa nou jwenn mo sa a nan Ekriti yo, se te nan priyè moun t ap fè e li te toujou gen rapò ak Papa a ki nan syèl la, anpalan de Jewova. Ki sans mo sa a?

Men sa yon ansiklopedi fè konnen: “Nan konvèsasyon moun yo te konn genyen nan epòk Jezi a, toudabò, yo te konn sèvi ak mo abba a pou yo montre entimite ak respè yon pitit gen pou papa l.” (The International Standard Bible Encyclopedia). Se te yon mo moun te konn itilize ki demontre afeksyon ak respè, e li te pami premye mo yon timoun te aprann. Jezi te itilize mo sa a nan yon moman kote li t ap pale ak Papa l ak tout kè l. Kèk èdtan anvan l mouri, pandan l te nan jaden Jetsemane a, li te itilize ekspresyon “Abba, Papa” a lè l t ap priye Jewova. — Mak 14:36.

Menm ansiklopedi a fè konnen, “li te vrèman ra pou Juif yo itilize mo Abba a lè y ap pale ak Bondye, se apèn si yo te konn jwenn li nan liv Juif yo nan epòk Grèk ak Women yo, paske se kòmsi yo t ap manke Bondye respè pou yo ta pale avè l yon fason entim konsa. [Sepandan,] lefètke Jezi te itilize mo sa a, sa montre jis nan ki pwen li gen yon relasyon sere sere ak Bondye”. De lòt kote nou jwenn mo sa a nan Ekriti yo se nan lèt apot Pòl te ekri yo, e sa montre kretyen ki t ap viv nan premye syèk la te konn itilize l nan priyè yo. — Women 8:15; Galat 4:6.

w10-F 1/11 15

Èske w te konnen?

Ak ki sa apot Pòl t ap fè referans lè l te di li gen “mak yon esklav Jezi” sou kò l? — Galat 6:17.

▪ Pawòl Pòl te di yo te ka gen plizyè sans nan lespri moun ki t ap koute l nan premye syèk la. Pa egzanp, nan tan lontan yo te konn itilize yon fè byen cho pou yo make moun yo te pran kòm prizonye nan lagè, moun ki te konn vòlè nan tanp yo ak esklav ki te sove yo. Lè yo te make yon moun konsa, mak sa a te montre moun nan pèdi diyite l.

Yo pa t janm konsidere mak yo met sou yon moun kòm yon bon bagay. Anpil pèp ki t ap viv nan tan lontan te konn sèvi ak sa pou yo montre yo soti nan yon tribi oswa yo fè pati yon relijyon byen presi. Selon sa yon diksyonè fè konnen, “Siryen yo te konn fè mak sou ponyèt yo ak nan kou yo [...] pou yo montre yo vwe tèt yo bay dye ki te rele Adad ak Atagatis. Adoratè Dyonizòs yo te konn make kò yo, yo te konn fè imaj fèy yo rele lyè a (lierre) sou yo”. — Theological Dictionary of the New Testament.

Anpil moun ki fè kòmantè sou Bib la panse Pòl t ap fè referans ak mak li te vin genyen sou kò l afòs yo te maltrete l nan divès okazyon poutèt aktivite li t ap fè antanke misyonè (2 Korentyen 11:23-27). Sepandan, petèt Pòl pa t ap pale de mak nan yon sans literal, men li t ap fè referans ak fason l t ap viv ki te idantifye l antanke kretyen.

10-16 JEN

TREZÒ KI NAN PAWÒL BONDYE A | EFEZYEN 1-3

“Yon travay Jewova ap jere”

it-2-F 858 § 2

Sekrè sakre

Wayòm Mesi a. Nan lèt Pòl te ekri yo, li te byen esplike sa sekrè sakre ki gen rapò ak Kris la ye. Nan Efezyen 1:9-11, li te pale de Bondye ki fè konnen “sekrè sakre” sou volonte L, e li te di: “Se selon bon plezi l li te deside jere bagay yo nan dènye limit tan fikse yo pou l reyini tout bagay ansanm nan Kris, bagay ki nan syèl la ak bagay ki sou tè a. Wi, se nan li, e se ann inyon avèk li Bondye te chwazi nou tou kòm eritye, piske Bondye te chwazi nou davans selon objektif li genyen, li menm ki fè tout bagay ann amoni ak volonte l.” “Sekrè sakre” a gen rapò ak yon gouvènman, ki se Wayòm Mesi a, yon wayòm Bondye te ba li. “Bagay ki nan syèl la” Pòl t ap pale de yo a, se moun ki pral eritye Wayòm sa a ansanm ak Kris. “Bagay ki sou tè a” se moun ki pral viv sou tè a anba gouvènman sa a. Jezi te montre sekrè sakre sa a gen rapò ak Wayòm nan lè l te di yo: “Nou menm, yo pèmèt nou konprann sekrè sakre ki gen rapò ak Wayòm Bondye a.” — Mk 4:11.

17-23 JEN

TREZÒ KI NAN PAWÒL BONDYE A | EFEZYEN 4-6

Fouye pou n ka jwenn trezò espirityèl

it-2-F 859 § 7

Sentete

Lespri sen. Fòs oswa espri Jewova itilize pou l aji. Se Jewova ki dirije fòs sa a e li toujou reyalize sa Jewova vle. Se yon fòs ki san tach, ki pwòp, ki sakre, e Bondye rezève l pou sa ki bon. Se pou rezon sa a li rele “lespri sen”. (Sm 51:11; Lk 11:13; Wm 1:4; Ef 1:13.) Lè yon moun gen lespri sen, moun sa a aji yon fason ki pwòp. Aksyon ki pa bon e ki sal anpeche lespri sen aji oubyen tou fè l “lapenn”. (Ef 4:30.) Se vre lespri sen pa yon moun, men li fè n wè aklè pèsonalite Bondye sen, e se poutèt sa nou ka fè l “lapenn”. Si yon moun pran abitid fè sa ki mal, sa kapab “etenn dife lespri a”. (1Te 5:19.) Si moun nan pa sispann aji mal, nan yon sans, sa ap fè lespri sen Bondye “lapenn” e kòm rezilta, Bondye ka vin konsidere moun sa a, ki vin gen yon atitid rebèl, kòm yon ènmi (Eza 63:10). Yon moun k ap fè lespri sen lapenn ka menm rive nan di move pawòl sou lespri sen, e Jezi Kris te di yon moun pap janm jwenn padon pou kalite peche sa a ni nan sistèm sa a, ni nan sistèm ki gen pou vini an. — Mt 12:31, 32; Mk 3:28-30; gade ESPRIT.

it-1-F 237 § 7

Ava

Parèt aklè nan aksyon. Lè yon moun ava, sa ap parèt klè nan yon aksyon li poze k ap montre move dezi li genyen ak jan l pa janm satisfè. Jak, youn nan moun ki te patisipe nan ekri Bib la, di lè yon moun kite move dezi l mennen l l ap peche (Jk 1:14, 15). Kidonk, lè yon moun ava, aksyon l kapab fè lòt moun wè sa aklè. Apot Pòl di yon moun ki ava se yon moun ki nan idolatri (Ef 5:5). Moun nan tèlman anvi satisfè dezi li genyen, sa l anvi a vin tounen yon dye pou li, e li mete l anvan sèvis ak adorasyon l ap bay Kreyatè a. — Wm 1:24, 25.

24-30 JEN

TREZÒ KI NAN PAWÒL BONDYE A | FILIPYEN 1-4

Fouye pou n ka jwenn trezò espirityèl

it-2-F 850 § 1

Ofrann, sakrifis

Bwason n ap bay kòm ofrann yo. Yo te konn prezante bwason yo te konn bay kòm ofrann yo ansanm ak pifò lòt ofrann yo, yo te konn plis fè sa apre Izrayelit yo te fin antre nan peyi Bondye te pwomèt la (Nb 15:2, 5, 8-10). Bwason sa yo se te diven (“bwason ki gen alkòl”), yo te konn vide yo sou lotèl la (Nb 28:7, 14; konpare ak Eg 30:9; Nb 15:10). Men sa apot Pòl te ekri kretyen Filip yo: “Menmsi yo vide m tankou yon bwason y ap vide kòm ofrann sou sakrifis lafwa nou pouse nou fè nan sèvis sakre n ap bay la, mwen kontan.” Nan vèsè sa a, Pòl sèvi ak egzanp yon bwason y ap bay kòm ofrann pou l montre volonte l genyen pou l fè plis pou kretyen parèy li yo (Fp 2:17). Yon ti tan anvan l mouri, li te di Timote: “Mwen prezante tèt mwen tankou yon bwason y ap vide kòm ofrann, e moman pou m libere a toupre rive.” — 2Ti 4:6.