Fason pou w reponn kesyon

GEN kesyon moun poze ki tankou gwo blòk glas ki nan lanmè. Pi gwo pati glas la kache anba lanmè. Sa vle di, souvan kesyon sa yo moun yo poze yo konn gen lòt kesyon ki dèyè yo ki pi gwo toujou.

Menm lè moun ki poze kesyon an chofe pou l jwenn repons lan, si w konnen fason pou w reponn, w ap ka chèche wè ki kantite bagay pou w di e sou ki aspè pou w abòde pwen an (Jan 16:12). Nan kèk ka, jan Jezi te montre apot li yo sa, yon moun ka mande yon enfòmasyon li pa gen dwa konnen oswa yon enfòmasyon ki pap vrèman pwofitab pou li. — Tra. 1:6, 7.

Men yon konsèy Labib ban nou: “Se pou pawòl nou toujou bèl, se pou l sizonnen ak sèl, yon fason pou nou konnen jan nou dwe reponn chak moun.” ​(Kol. 4:6). Se sa k fè, anvan nou reponn yon kesyon, nou bezwen reflechi nonsèlman sou sa n ap di, men tou, sou fason n ap di l.

Sadiseyen yo te eseye pran Jezi nan pyèj lè yo te poze l yon kesyon sou rezirèksyon yon fi ki te marye plizyè fwa. Sepandan, Jezi te konnen yo pa t kwè nan rezirèksyon. Se poutèt sa, li te reponn yo yon fason ki te montre li wè move pwennvi yo genyen an, ki te alabaz kesyon yo te poze a. Jezi te rezone avèk yo yon fason yo pa t ka kontrekare e li te site yon istwa ki soti nan Ekriti yo yo te byen konnen pou l te montre yo yon bagay yo pa t janm reflechi sou li anvan sa: istwa sa a bay yon prèv klè ki montre Bondye pral resisite mò yo toutbonvre. Repons li te bay opozan sa yo te tèlman fè yo sezi, yo te pè poze l lòt kesyon. — Lik 20:27-40.

Menm jan an tou, pou w konnen ki jan pou w reponn yon kesyon, ou dwe chèche konnen pwennvi moun ki poze kesyon an ak sa k ap trakase lespri l. Pa egzanp, yon kondisip ou oswa yon kòlèg travay ou ka mande w poukisa ou pa fete fèt Nwèl. Poukisa li poze w kesyon sa a? Èske se rezon ki fè w pa fete fèt sa a li vrèman bezwen konnen, oswa èske li senpleman bezwen konnen si se relijyon w lan ki pa vle w amize w? Pou w konnen pwennvi l, ou ka mande l sa k pouse l poze kesyon sa a. Ansuit, reponn li selon repons li ba ou a. Men tou, ou ka sèvi ak okazyon sa a pou w montre l ki jan lè nou suiv prensip ki nan Bib la, sa pwoteje nou anba kèk pratik ki gen nan fèt sa a ki dekouraje moun yo e ki se yon fado pou yo.

Ann sipoze yo mande w pou w prezante yon sijè konsènan Temwen Jewova yo devan yon gwoup elèv oswa yon gwoup etidyan. Apre w fin fè prezantasyon w lan, yo ka poze w kèk kesyon. Si w rann ou kont yo vrèman bezwen konn repons yo, li ka pi bon pou w ba yo kèk repons ki senp e ki dirèk. Men, si kesyon yo poze w yo montre se prejije ki gaye nan zòn nan ki enfliyanse yo, w ap fè pi byen si anvan w reponn yo, ou fè kèk kòmantè sou rezon ki ka fè moun yo gen pwennvi sa yo sou kesyon an e sou rezon ki fè Temwen Jewova yo chwazi suiv prensip ki nan Bib la. Souvan, li bon pou w konsidere kesyon sa yo antanke sijè k ap trakase lespri moun yo, olye w konsidere yo kòm yon pwovokasyon, menmsi se ta nan entansyon sa a yo te poze yo. Konsa, nan repons w ap ba yo a, ou ka ede yo wè bagay yo pi byen, ou ka ba yo enfòmasyon ki egzak e ou ka esplike yo kwayans ou yo ki baze sou Bib la.

Ki jan pou w reyaji si patwon w pa vle ba w konje pou w al asiste yon kongrè? Toudabò, eseye wè bagay yo jan li wè yo antanke patwon. Si w pwopoze l pou w ta fè siplemantè nan yon lòt lè, èske sa ka fè l aksepte? Si w fè l konnen enstriksyon ou resevwa nan kongrè yo ede w pou w yon anplwaye ki onèt, yon anplwaye moun ka fè konfyans, èske sa pa ta ka fè l chanje ide? Si w montre w bay bagay li bay valè yo anpil enpòtans, petèt l ap gen bonjan konsiderasyon tou pou sa li wè ou bay anpil enpòtans nan lavi w. Men, ki sa w ap fè si l mande w pou w fè yon bagay ki malonèt? Si w di l ou pa dakò yon fason ki klè epi ou ba l rezon nan Bib la ki fè w pa dakò a, sa ka montre l pozisyon w. Men, èske w pa panse ou ka jwenn pi bon rezilta toujou si w rezone avè l anvan pou w montre l si yon moun aksepte bay manti pou li oswa vòlè pou li, li ka ba l manti tou e li ka vòlè afè l tou?

Yon lòt bò, petèt ou se yon elèv ki pa vle patisipe nan kèk aktivite ki nan lekòl ou paske yo kontrè ak prensip ki nan Bib la. Pa bliye sa, pwofesè a ka pa dakò ak fason w wè bagay yo e se responsablite l pou l fè toujou gen lòd nan klas la. Men sa w ap bezwen fè ki ka parèt difisil: 1) montre w gen konsiderasyon pou sa k ap ba l pwoblèm nan, 2) esplike l pozisyon w avèk respè e 3) pran pozisyon fèm pou sa w konnen k ap fè Jewova plezi. Pou w ka jwenn pi bon rezilta, pa kontante w annik di l sa w kwè a dirèkteman (Pwo. 15:28). Si w se yon timoun, siman papa w oswa manman w ka ede w prepare sa w gen pou w di a.

Pafwa, li ka nesesè pou w defann ou kont akizasyon yon moun ki gen otorite lage sou do w. Yon polisye, yon manm nan gouvènman an oswa yon jij ka egzije w pou w reponn kèk kesyon anrapò ak yon lwa ou dwe obeyi, oswa anrapò ak pozisyon net ou genyen antanke kretyen an oubyen paske w pa patisipe nan seremoni patriyotik. Ki jan w ta dwe reponn? Labib montre nou dwe fè sa “avèk dousè e avèk gwo respè”. (1 Pyè 3:15.) Anplis, mande tèt ou poukisa bagay sa yo ba yo pwoblèm, e avèk respè, montre w rekonèt sa ba yo pwoblèm. Apre sa, ki sa pou w fè? Apot Pòl te pale de dwa li genyen selon lwa women an. Kidonk, ou ka pale de dwa w genyen selon lwa ki konsène sitiyasyon w lan (Tra. 22:25-29). Petèt, si w bay moun ki gen otorite a enfòmasyon sou pozisyon premye kretyen yo te genyen e sou pozisyon Temwen Jewova yo genyen nan lemonnantye, sa ka fè l konprann pwennvi w pi byen. Oswa ou ka montre l lefètke yon moun rekonèt otorite Bondye, sa pouse l plis obeyi lwa lèzòm bay ki kòrèk yo (Wom. 13:1-14). Lè w fin ba l esplikasyon sa yo, li ka dakò pou w di l rezon ou genyen ki chita sou Bib la ki fè w pran pozisyon sa a.

Lè w ap chwazi fason pou w reponn yon kesyon, ou ka bezwen konsidere tou pwennvi moun ki poze kesyon an genyen sou Labib. Jezi te fè sa lè l t ap reponn kesyon Sadiseyen yo te poze sou rezirèksyon an. Piske l te konnen se sèl liv Moyiz te ekri yo yo te aksepte, li te rezone avèk yo sou yon istwa ki te nan liv sa yo. Men sa l te di anvan l te fè kòmantè sou istwa a: “Sou kesyon mò ap leve a, menm Moyiz te fè konn sa.” ​(Lik 20:37). Menm jan an tou, ou ka twouve li bon pou w site kèk pòsyon nan Bib la moun k ap koute w la dakò e li byen konnen.

Men, ki sa pou w fè si moun k ap koute w la pa rekonèt enpòtans Labib genyen? Remake, selon Travay 17:22-31, ki sa Pòl te fè nan diskou li te bay nan Areyopaj la, yon ti mòn nan vil Atèn tan lontan an, kote pi gwo tribinal peyi a te konn reyini. Li te site kèk verite ki baze sou Bib la san l pa t site sa Labib di dirèkteman. Lè sa nesesè, ou ka fè menm bagay la tou. Gen kèk kote ou ka oblije fè plizyè ti pale ak yon moun anvan w fè referans ak Labib dirèkteman. Lè w pral antre Labib nan ti pale sa yo, li ka saj pou w senpleman bay moun nan kèk rezon ki fè Labib merite pou nou itilize l nan konvèsasyon sa yo olye w annik fè l konnen yon fason fèm Bib la se Pawòl Bondye. Men, objektif ou se ta dwe pou w bay yon temwayaj klè sou objektif Bondye e pi devan, pou w kite moun k ap koute w la wè ak je l ki sa Labib di. Labib ap plis konvenk yon moun pase tout sa nou ta ka di. — Ebre 4:12.

Piske Jewova se yon Dye ki chaje bonte ki plen lanmou e li janti, li nòmal pou l mande sèvitè l yo pou pawòl yo ‘toujou bèl e pou yo sizonnen ak sèl’! (Kol. 4:6; Egz. 34:6.) Sa vle di, nou dwe pale ak lòt moun avèk bonte, menm lè sanble yo pa merite sa. Nou ta dwe pale yon fason ki agreyab, nou pa ta dwe pale yon fason ki di oswa yon fason ki montre nou pa gen konsiderasyon pou lòt moun.

Anpil moun anba gwo presyon e chak jou moun ap di yo move pawòl. Lè nou al vizite moun sa yo, yo ka pale rèd avèk nou. Ki jan nou dwe reponn yo? Bib la di: “Lè yon repons dous, sa detounen kòlè.” Yon repons konsa ka fè yon moun ki gen yon pwennvi ki opoze ak pwennvi pa nou vin pi janti (Pwo. 15:1; 25:15). Gen yon seri moun se chak jou lòt moun ap pale di avèk yo. Si nou menm, nou ba yo bon nouvèl la yon fason ki demontre nou gen bonte epi sa parèt nan ton vwa nou, yo ka koute bon nouvèl la.

Nou pa bezwen rete diskite ak yon moun ki pa montre li gen okenn respè pou laverite. Men, dezi nou se pou nou rezone sou Bib la ak moun ki pèmèt nou fè sa. Kèlkeswa sitiyasyon nou rankontre a, nou dwe sonje nou dwe reponn avèk bonte e avèk konviksyon pou n fè konnen bèl pwomès Bondye fè yo merite pou moun fè yo konfyans. — 1 Tes. 1:5.

Lè yon moun k ap etidye Labib oswa yon lòt kwayan menm jan ak nou mande nou ki sa li dwe fè nan yon sitiyasyon, ki jan pou nou reponn li? Petèt ou menm ou konnen ki sa w ta dwe fè. Men, se chak moun ki responsab pou desizyon l pran nan lavi a (Gal. 6:5). Apot Pòl te esplike li te ankouraje moun li t ap preche yo ‘pou yo demontre lafwa yo e pou yo obeyi’. (Wom. 16:26.) Se yon bèl egzanp pou nou suiv. Yon moun ki pran desizyon nan objektif pou l fè moun k ap etidye Labib avè l la oswa yon lòt moun plezi se yon moun k ap sèvi lòm, li pap viv selon lafwa l (Gal. 1:10). Se sa k fè, lè yon moun poze w yon kesyon, li ka pa bon pou w annik ba l yon repons ki senp e ki dirèk.

Donk, ki jan w ka reponn li yon fason ki ann amoni ak prensip ki nan Bib la? Ou ka atire atansyon l sou kèk prensip ak kèk egzanp nan Bib la ki apwopriye ak sitiyasyon l lan. Nan kèk ka, ou ka montre l ki jan pou l fè rechèch pou l jwenn prensip sa yo ak egzanp sa yo poukont li. Ou ka menm pale avè l sou prensip sa yo e sou enpòtans egzanp sa yo genyen, men, san w pa aplike yo ak sitiyasyon pa l la. Mande moun nan si l wè yon bagay nan prensip sa yo ak nan egzanp sa yo ki ka ede l pran yon bon desizyon. Ankouraje l pou l sèvi ak prensip sa yo e ak egzanp sa yo pou l wè ki sa pou l fè k ap fè Jewova plezi. Konsa, w ap ede l ‘antrene kapasite li genyen pou l konprann pou l distenge sa ki byen ak sa ki mal’. — Ebre 5:14.

Souvan, reyinyon ki fèt nan kongregasyon yo ban nou posiblite pou nou demontre lafwa nou. Youn nan fason nou fè sa se lè nou fè kòmantè, sètadi nou reponn kesyon yo poze nan patisipasyon k ap fèt nan reyinyon yo. Ki jan pou nou fè kòmantè yo? Nou dwe fè yo nan objektif pou nou beni Jewova, sa vle di pou nou pale de li an byen. Se sa salmis David te fè “pami foul moun ki rasanble yo”. (Sòm 26:12.) Nou dwe fè kòmantè yo tou yon fason pou nou ankouraje konpayon kretyen nou yo, yon fason pou nou pouse yo ‘gen lanmou e pou nou pouse yo fè bèl aksyon’, jan apot Pòl te ankouraje nou fè sa (Ebre 10:23-25). Lè nou prepare reyinyon yo alavans, sa ap pèmèt nou fè sa.

Lè yo ba w fè yon kòmantè, bay yon repons ki senp, ki klè e ki kout. Pa pale sou tout paragraf la, pran yon pwen sèlman. Si w bay sèlman yon pati nan repons lan, lòt moun yo ap jwenn posiblite pou yo fè lòt kòmantè. Li trè bon pou w fè kòmantè sou vèsè yo bay kòm referans nan sijè y ap egzamine a. Lè w ap fè sa, atire atansyon moun yo sou pati nan vèsè a ki gen rapò ak pwen y ap egzamine a. Aprann fè kòmantè yo ak pwòp mo pa w olye pou w li yo dirèkteman nan paragraf la. Pa bay tèt ou pwoblèm si w fè yon kòmantè ki pa fin bon nèt. Sa konn rive tout moun k ap fè kòmantè.

Li klè pou w reponn yon kesyon, se pa sèlman repons lan pou w konnen. Sa mande pou w gen disènman. Men, se pa ti satisfaksyon w ap jwenn lè w bay repons ki soti nan kè w e ki touche kè lòt moun! — Pwo. 15:23.