Aji ak senserite pou n montre lanmou youn pou lòt

 1. Ki pi gwo lanmou ki egziste, e sa k fè n di sa? (Gade foto ki nan kòmansman atik la.)

LANMOU ki baze sou bonjan prensip (agapè) se yon kado Jewova bay. Se Jewova ki Sous lanmou sa a (1 Jan 4:7). Lanmou sa a se pi gwo lanmou ki egziste. Byenke l ka gen ladan l afeksyon ak tandrès, li parèt sitou nan aksyon san enterè nou fè pou byen lòt moun. Selon sa yon liv referans fè konnen, “nou kapab wè lanmou (agapè) yon moun gen lakay li grasa aksyon lanmou sa a pouse l fè”. Lè n demontre lanmou san enterè pou lòt moun oswa lòt moun demontre lanmou sa a pou nou, lavi n vin pi bèl, li gen plis sans e nou gen plis kè kontan.

2, 3. Ki fason Jewova demontre lanmou san enterè pou lèzòm?

² Jewova te montre l renmen lèzòm anvan menm li te kreye Adan ak Èv. Li te fè tè a pou lèzòm abite pou toutan. Li pa t fè l pou lèzòm annik viv, men, pou yo te ka byen jwi lavi a. Jewova te fè sa espesyalman pou byennèt nou, se pa yon enterè li t ap defann. Anplis de sa, li te demontre yon lanmou san enterè lè l te beni pitit li yo sou tè a e l te ba yo posiblite pou yo viv pou toutan nan Paradi li te prepare pou yo a.

³ Jewova te fè pi gwo aksyon ki demontre lanmou san enterè l genyen an apre Adan ak Èv te fin rebele kont li. Li te pran dispozisyon pou l bay yon ranson pou desandan de rebèl sa yo t apral genyen yo, piske l te gen asirans kèk nan desandan sa yo t ap byen reyaji devan lanmou Li demontre a (Jen. 3:15; 1 Jan 4:10). Anfèt, depi menm moman Jewova te pwomèt l ap voye yon Sovè pou lèzòm nan, pou li menm se kòmsi sakrifis sa a te deja fèt. Konsa, anviwon 4 000 an annapre, Jewova te fè yon sakrifis ki te koute l anpil lè l te bay sèl Pitit Gason li fè a pou lèzòm (Jan 3:16). Nou gen Jewova anpil rekonesans pou lanmou san enterè li demontre pou nou!

 4. Ki sa k montre lèzòm enpafè gen kapasite pou yo demontre lanmou san enterè?

⁴ Nou gen kapasite pou n demontre lanmou san enterè paske Bondye te kreye n pòtre avè l. Piske n eritye peche, sa fè l vin difisil pou n demontre lanmou, men, sa pa retire kapasite n genyen pou n fè sa. Abèl te montre l renmen Bondye lè l te ofri l sa l genyen ki pi bon an san se pa t yon enterè l t ap defann (Jen. 4:3, 4). Noye te demontre lanmou san enterè pou moun nan epòk li a lè l te preche mesaj Bondye a pandan plizyè dizèn ane malgre okenn moun pa t byen reyaji (2 Pyè 2:5). Abraram te met lanmou l gen pou Bondye a anvan santiman l lè Bondye te mande l sakrifye Izarak, pitit gason l (Jak 2:21). Menm jan ak gason fidèl sa yo, nou vle demontre lanmou malgre difikilte n ap rankontre.

 5. Nan ki domèn nou ka demontre vrè lanmou an?

⁵ Bib la fè konnen nou pa ka montre vrè lanmou an “nan bouch, ni ak bèl pawòl, men se pou nou aji avèk senserite pou nou montre sa”. (1 Jan 3:18.) Èske sa vle di nou pa ka demontre lanmou nan pawòl nou? Non, se pa sa (1 Tes. 4:18)! Okontrè, sa vle di nou pa dwe demontre lanmou nan bouch sèlman, sitou lè sitiyasyon an mande pou n aji. Pa egzanp, lè yon kretyen parèy nou pa gen sa ki nesesè pou l viv, nou bezwen fè plis pase annik swete pou bagay yo byen mache pou li (Jak 2:15, 16). Menm jan an tou, lanmou nou gen pou Jewova ak pwochen nou pouse n nonsèlman mande Bondye pou l ‘voye travayè nan rekòt la’, men tou, pou l ede n bay tout nou menm nan travay predikasyon an. — Mat. 9:38.

6, 7. a) Ki sa “lanmou ki san ipokrizi” a ye? b) Bay kèk egzanp fo lanmou.

⁶ Apot Jan te fè konnen nou dwe “aji avèk senserite pou nou montre” lanmou nou. Se sa k fè lanmou nou genyen an “pa [dwe] gen ipokrizi ladan l” oswa l dwe “san ipokrizi”. (Wom. 12:9; 2 Kor. 6:6.) Sa vle di nou pa ka demontre vrè lanmou an toutpandan nou fè tèt nou pase pou sa n pa ye, kòmsi se yon mas nou met nan figi nou. Nou ka ap mande: ‘Èske pa gen yon kalite lanmou ki gen ipokrizi ladan l?’ Pa vrèman. Sa pa t ap lanmou ditou, men l t ap yon imitasyon ki san valè.

⁷ Ann wè kèk egzanp fo lanmou. Nan jaden Edenn, Satan te pretann l ap chèche sa ki pi bon an pou Èv, men an reyalite, li te aji yon fason ki egoyis e ki ipokrit (Jen. 3:4, 5). Nan epòk David la, Ayitofèl te montre l pa t zanmi wa a vre. Ayitofèl te aji an trèt lè l te santi li ka jwenn yon avantaj (2 Sam. 15:31). Menm jan an tou jodi a, aposta yo ak lòt moun k ap simen divizyon nan kongregasyon an sèvi ak “pawòl dous ak pawòl flatri” pou montre yo renmen moun, men an reyalite, se tèt yo sèlman yo wè. — Wom. 16:17, 18.

 8. Ki kesyon nou dwe poze tèt nou?

⁸ Lè yon moun demontre yon lanmou ki gen ipokrizi se yon wont sa ye paske se yon fo lanmou ki opoze ak lanmou ki pouse moun fè sakrifis la ki se yon kalite ki soti nan Bondye. Yon ipokrizi konsa ka blofe moun, men l pa ka blofe Jewova. Anfèt, Jezi te fè konnen moun ki aji tankou ipokrit ap resevwa “yon pinisyon ki rèd anpil”. (Mat. 24:51.) Nòmalman, sèvitè Jewova yo pa t ap janm vle demontre yon lanmou ki gen ipokrizi ladan l. Sepandan, l ap bon pou n mande tèt nou: ‘Èske m toujou demontre vrè lanmou an, yon lanmou ki pa gen egoyis oswa twonpri?’ Ann egzamine nèf fason nou ka fè bonjan efò pou n demontre yon lanmou ki “san ipokrizi”.

 9. Ki sa vrè lanmou an ap pouse n fè?

⁹ Fè sèvis ou ak kè kontan menmsi lòt moun pa wè sa w ap fè. Depi sa posib, nou dwe dispoze aji avèk lanmou pou frè nou yo “an sekrè” oswa san lòt moun pa wè. (Li Matye 6:1-4.) Anànyas ak Safira pa t fè sa. Nonsèlman yo pa t kontante yo bay san moun pa konnen, men tou, yo pa t jennen pou yo di yo bay plis ofrann lontan pase sa yo te bay an reyalite e ipokrizi sa a te lakòz malè tonbe sou yo (Tra. 5:1-10). Yon lòt bò, vrè lanmou an pouse n sèvi frè n ak sè n yo ak kè kontan san n pa mache fè konn sa oswa san n pa atire atansyon sou nou. Pa egzanp, frè k ap ede Kolèj santral la nan preparasyon manje espirityèl la fè sa san moun pa konnen, yo pa atire atansyon sou yo ni yo pa di lòt moun sou ki sa y ap travay.

10. Ki jan n ka pran devan nan onore lòt moun?

¹⁰ Pran devan nan onore lòt moun. (Li Women 12:10.) Jezi kite yon egzanp pou nou nan onore lòt moun lè l te fè yon seri travay ki parèt rabesan anpil (Jan 13:3-5, 12-15). Nou ka bezwen fè gwo efò pou n vin gen imilite nou bezwen pou n onore lòt moun fason sa a. Menm apot yo pa t ka byen konprann sa Jezi te fè yo, e se jis lè yo te resevwa lespri sen yo te konprann sa (Jan 13:7). Nou ka onore lòt moun lè n pa panse n pi bon pase yo akoz fòmasyon nou resevwa, byen materyèl nou posede oswa privilèj nou genyen nan sèvis Jewova a (Wom. 12:3). Epi, olye n anvye moun ki resevwa louwanj yo, nou rejwi avèk yo menmsi n santi nou merite jwenn menm onè sa a oswa n te patisipe nan sa ki te fèt la.

11. Poukisa felisitasyon n ap bay yo dwe sensè?

¹¹ Felisite frè n yo avèk senserite. Nou ta dwe pwofite tout okazyon nou jwenn pou n felisite youn lòt paske sa “bon pou fòtifye moun”. (Efe. 4:29.) Men, nou dwe sensè. Sinon, nou ka tonbe nan flate moun oswa n ka pase sou responsablite n genyen pou n bay konsèy ki nesesè (Pwo. 29:5). Se ipokrizi sa ye lè n felisite yon moun, epi annapre, n ap kritike l dèyè do l. Apot Pòl te evite pyèj sa a e l kite yon bèl egzanp antanke moun ki te demontre vrè lanmou an nan fason l te konn felisite lòt moun. Pa egzanp, li te felisite kretyen nan Korent yo yon fason ki sensè konsènan kèk aspè nan konduit yo (1 Kor. 11:2). Men, lè aksyon yo te fè yo pa t merite felisitasyon, li te esplike yo rezon an avèk jantiyès yon fason ki klè. — 1 Kor. 11:20-22.

12. Ki jan n ka demontre vrè lanmou an lè n akeyi moun?

¹² Renmen akeyi moun. Jewova ban nou lòd pou n montre n donan ak frè n ak sè n yo. (Li 1 Jan 3:17.) Sepandan, nou dwe gen bon motivasyon lè n ap fè sa, nou dwe evite tout tandans egoyis. Nou ka mande tèt nou: ‘Èske se sitou bon zanmi m yo, moun ki nan gwo pozisyon yo oswa moun ki ka remèt mwen sa m fè pou yo, mwen renmen akeyi? Oswa èske m chèche jwenn fason pou m montre m donan ak frè ak sè mwen pa byen konnen oubyen ki pa ka remèt mwen sa?’ (Lik 14:12-14). Ann sipoze yon kretyen parèy nou ta vin nan bezwen akoz kèk move desizyon l te pran oswa l pa ta remèsye n pou sa n te fè pou li. Nan sitiyasyon sa yo, nou ta dwe aplike konsèy sa a ki di: “Se pou youn kontan akeyi lòt, san bougonnen.” (1 Pyè 4:9). Si n suiv konsèy sa a, n ap rive gen kè kontan yon moun genyen lè l bay ak bon entansyon. — Tra. 20:35.

13. a) Ki lè sitou li ka difisil pou n ede moun ki fèb yo? b) Ki sa n ka fè pou n soutni moun ki fèb yo?

¹³ Soutni moun ki fèb yo. Nou ka rive wè si n gen vrè lanmou an nan fason n aplike konsèy Bib la bay pou n “soutni moun ki fèb yo, [e pou n] pran pasyans ak tout moun”. (1 Tes. 5:14.) Byenke anpil nan moun ki te fèb yo konn vin solid nan lafwa pi devan, gen lòt ki bezwen pou n demontre pasyans anvè yo e pou n kontinye soutni yo. Sa ka mande pou n pataje panse ankourajan ki baze sou Ekriti yo avè yo, envite yo preche avè n oswa annik pran tan pou n koute yo. Mete sou sa, olye n annik panse yon frè oswa yon sè “djanm” oubyen l “fèb”, nou ta dwe rekonèt nou tout gen fòs nou ak feblès nou. Menm apot Pòl te rekonèt li gen feblès (2 Kor. 12:9, 10). Kidonk, nou tout ka benefisye èd kretyen parèy nou yo.

14. Jis nan ki pwen nou ta dwe dispoze viv anpè ak frè n yo?

¹⁴ Fè lapè. Nou fè tout sa n kapab pou n viv anpè ak frè n yo menm lè n santi yo te mal konprann nou oswa yo te trete n yon fason ki enjis. (Li Women 12:17, 18.) Yon eskiz ka ede w fè lapè ak yon moun ou te blese santiman l, men w dwe sensè. Pa egzanp, olye w di: “M vrèman regrèt dèske w te santi w konsa”, ou ka rekonèt wòl pa w nan pwoblèm nan lè w di: “M regrèt dèske sa m te di a te blese w.” Lapè sitou enpòtan nan yon maryaj. Yon mari ak yon madanm pa ta dwe pran pòz youn renmen lòt lè yo devan moun alòske lè yo poukont yo, youn pa pale ak lòt, youn ap di lòt move pawòl oswa youn ap fè vyolans sou lòt.

15. Ki jan n ka montre nou padone ak tout kè n?

¹⁵ Padone ak tout kè n. Nou padone yon moun ki te blese santiman n lè n rejte rankin nou te gen kont li a. Lè “youn ap sipòte lòt nan lanmou, [...] toutpandan n ap fè gwo efò pou nou kenbe inite lespri a, nan chenn inyon lapè a”, se ak tout kè n n ap padone moun ki gendwa pa t menm konn si yo te ofanse nou (Efe. 4:2, 3). Pou n rive padone moun ak tout kè n, nou dwe kontwole panse nou yon fason pou n “pa note bagay mal” yo te fè n (1 Kor. 13:4, 5). Si n kontinye kenbe rankin nan kè n, nou riske kraze ni relasyon nou gen ak frè n ak sè n yo ni relasyon nou gen ak Jewova a pou toutan (Mat. 6:14, 15). Anplis de sa, nou ka montre nou padone ak tout kè n lè n priye pou moun ki te peche kont nou yo. — Lik 6:27, 28.

16. Ki jan n ta dwe konsidere privilèj nou gen nan sèvis Jewova a?

¹⁶ Pase sou avantaj pèsonèl ou. Si n resevwa privilèj nan sèvis Jewova a, nou ta dwe konsidere sa kòm okazyon pou n demontre vrè lanmou an lè n pa “chèche [...] pwòp avantaj pa [nou], men avantaj pa lòt moun”. (1 Kor. 10:24.) Pa egzanp, nan asanble nou yo ak nan kongrè nou yo, plasè yo konn gentan la nan zòn kote moun yo pral chita a anvan lè a rive pou moun yo antre. Olye yo konsidere asiyasyon yo a kòm yon okazyon pou yo jwenn pi bon plas yo pou yo menm ak fanmi yo, anpil nan frè sa yo chwazi chita nan plas moun pa twò renmen yo ki nan seksyon y ap travay la. Lè yo sakrifye avantaj pèsonèl yo nan sans sa a, yo montre lanmou yo genyen an pa gen okenn egoyis ladan l. Ki jan w ka imite bèl egzanp yo bay la?

17. Ki sa vrè lanmou an ap pouse yon moun fè si l fè yon peche grav?

¹⁷ Konfese peche n fè an kachèt yo e sispann fè yo. Gen kèk kretyen ki eseye kache yon peche grav yo te fè yon fason pou yo pa wont oswa pou yo pa desevwa lòt moun (Pwo. 28:13). Sepandan, yon konduit konsa pa demontre lanmou paske l ka fè ni moun ki peche a ni lòt moun mal. Sa ka anpeche lespri sen Bondye aji nan kongregasyon an e sa ka fè pa gen lapè nan kongregasyon an (Efe. 4:30). Vrè lanmou an pouse kretyen ki te fè peche yo pale ak ansyen yo pou ansyen yo ka ba yo èd ki nesesè. — Jak 5:14, 15.

18. Ki enpòtans vrè lanmou an genyen?

¹⁸ Lanmou pi enpòtan pami tout lòt kalite yo (1 Kor. 13:13). Li idantifye nou antanke disip Jezi e antanke moun k ap imite Jewova, Sous lanmou an (Efe. 5:1, 2). Men sa Pòl te ekri: “Si [...] mwen pa gen lanmou, mwen pa anyen.” (1 Kor. 13:2). Kidonk, ann kontinye demontre lanmou, pa sèlman “nan bouch”, men nou dwe “aji avèk senserite pou nou montre sa”.