Se pou w gen yon bon aparans

APARANS ou di anpil bagay sou ou. Se vre, Jewova gade sa k nan kè nou, men jeneralman, lòm “wè sa je l ba li”. (1 Sam. 16:7.) Lè w pwòp e w byen abiye, lòt moun ka wè ou respekte tèt ou, e y ap plis anvi koute w. Lefètke w byen abiye, sa ap fè moun k ap koute w yo byen konsidere òganizasyon ou reprezante a e y ap byen konsidere Bondye w ap adore a.

Prensip pou nou aplike. Labib pa bay yon pakèt règ sou fason pou nou abiye ak fason pou nou penyen. Men, li bay yon seri prensip rezonab ki ka ede nou pran bon desizyon nan domèn sa a. Youn nan prensip ki pi enpòtan, se pou nou “fè tout bagay pou glwa Bondye”. (1 Kor. 10:31.) Ki prensip konsa nou dwe konsidere konsènan aparans nou?

Premyèman, Bib la ankouraje nou pou nou kenbe ni kò nou ni rad nou pwòp. Nan Lwa Jewova te bay Izrayèl nan tan lontan an, li te bay kèk prensip ki anrapò ak pwòpte. Pa egzanp, lè prèt yo t ap fè sèvis yo, yo te dwe benyen e yo te dwe lave rad yo nan kèk moman byen presi (Lev. 16:4, 24, 26, 28). Kretyen yo pa anba Lalwa Moyiz la ankò, men prensip li gen ladan l yo toujou valab (Jan 13:10; Rev. 19:8). Li sitou enpòtan pou nou veye sou pwòpte kò nou, rad nou ak bouch nou lè nou pral nan lokal kote nou adore Bondye oswa lè nou pral nan predikasyon, yon fason pou nou pa deranje lòt moun. Moun k ap fè diskou ak moun k ap patisipe nan demonstrasyon devan kongregasyon an dwe bay bon egzanp nan sans sa a. Lè nou veye sou aparans nou, sa montre nou gen respè pou Jewova e pou òganizasyon l lan.

Dezyèmman, Bib la ankouraje nou pou nou senp, pou nou rezonab e pou nou gen bonsans. Apot Pòl te egzòte kretyèn nan vil Wòm yo pou yo ‘fè bèbèl ak tèt yo, pou yo fè sa yon jan ki senp e avèk bonsans, pou yo pa fè sa ak yon seri stil cheve trese, oswa ak lò, oubyen ak pèl oswa ak rad ki koute chè anpil, men, pou yo fè sa jan medam ki di yo gen atachman pou Bondye yo ta dwe fè sa’. (1 Tim. 2:9, 10.) Li enpòtan tou pou mesye yo abiye, pou yo penyen e pou yo fè cheve yo yon jan ki senp, ki rezonab e avèk bonsans.

Yon moun ki senp e ki rezonab pa chèche deranje lòt moun san rezon e li pa chèche atire atansyon sou li yon fason ki pa kòrèk. Bonsans fè moun gen konsiderasyon pou lòt moun, li fè moun gen bon jijman. Yon moun ki gen kalite sa yo montre li gen ekilib, e se paske l ap suiv prensip Bondye yo ki fè l konsa. Kalite sa yo pa anpeche nou abiye yon fason ki atiran, men yo ede nou veye sou aparans nou e yo ede nou evite stil abiman, kwafi ak koup ki egzajere (1 Jan 2:16). Nou vle suiv prensip sa yo kit nou nan lokal kote n ap adore Bondye, kit nou nan predikasyon, kit nou nan lòt aktivite. Menm rad ki pa rad nou mete pou nou soti yo ta dwe montre nou abiye yon jan ki senp, ki rezonab e nou gen bonsans. Nan lekòl nou oswa nan travay nou, n ap jwenn okazyon pou nou bay temwayaj. Menmsi sa ka rive nou pa abiye tankou lè nou nan reyinyon, nan kongrè ak nan asanble, nou ta dwe toujou abiye yon fason ki pwòp, ki senp e ki rezonab.

An reyalite, nou tout pa abiye menm jan. E nou pa gen pou n fè sa nonplis. Nou pa gen menm gou, e sa se yon bagay ki nòmal. Men, nou dwe toujou aplike prensip biblik yo.

Apot Pyè te montre bote nou genyen ki gen rapò ak “moun nou ye nan fon kè nou” an gen plis enpòtans pase fason nou penyen e pase rad nou mete sou nou (1 Pyè 3:3, 4). Lè kè nou ranpli ak lanmou, lajwa, lapè, bonte ak yon lafwa ki solid, kalite sa yo ap tounen yon rad nan domèn espirityèl ki vrèman onore Bondye.

Twazyèmman, Bib la ankouraje nou pou nou egzamine si aparans nou kòrèk. Nan 1 Timote 2:9, yo pale de “abiman ki kòrèk”. Byenke apot Pòl t ap pale de abiman medam yo, menm prensip la valab pou mesye yo tou. Yon moun abiye yon fason ki kòrèk lè rad ki sou li a pwòp e li byen ranje. Kit nou gen anpil bagay nan domèn materyèl, kit nou pa gen anpil, nou kapab gen yon aparans ki pwòp.

Youn nan premye bagay lòt moun remake nan aparans nou se cheve nou. Cheve nou dwe pwòp e yo dwe byen ranje. Koutim ki gen nan zòn yon moun oswa ras li soti konn gen yon enfliyans sou fason l penyen. Nan 1 Korentyen 11:14, 15, apot Pòl bay konsèy sou stil moun fè nan cheve yo. Li klè konsèy sa a touche ni kesyon pwòp la ni kesyon byen ranje a. Sepandan, lè yon gason fè cheve l yon fason ki bay enpresyon l ap chèche sanble ak fi oswa yon fi fè cheve l yon fason ki bay enpresyon l ap chèche sanble ak gason, sa se yon bagay ki depaman ak prensip ki nan Bib la. — Det. 22:5.

Pou mesye yo, yon aparans pwòp ka gen ladan l pou yo byen raze yo. Nan zòn kote yo gen respè pou yon moun ki gen moustach, yon gason ki gen moustach dwe toujou byen fè moustach li.

Katriyèmman, aparans nou ta dwe montre nou pa renmen monn nan e nou pa renmen fason l aji. Apot Jan te ban nou yon egzòtasyon lè l te di: “Pa renmen monn nan, ni bagay ki nan monn nan.” ​(1 Jan 2:15-17). Gen anpil move dezi nan monn nan. Pami yo, Jan site dezi lachè ak egzibisyon yon moun ap fè ak mwayen l genyen pou l viv. Labib atire atansyon nou tou sou espri rebelyon oswa sou dezobeyisans anvè otorite ki gen nan monn nan (Pwo. 17:11; Efe. 2:2). Dezi sa yo ak atitid sa yo parèt aklè souvan nan fason moun yo abiye ak nan fason yo penyen. Se sa k fè, yo gen yon aparans ki montre yo awogan, ki atire atansyon sou bagay seksyèl, ki montre y ap chèche fè moun wè, yo pa pran swen tèt yo, yo neglijan oswa yo pa pwòp. Antanke sèvitè Jewova, nou menm nou evite stil ki chita sou konpòtman sa yo ki pa pou kretyen.

Olye w imite monn nan, li pi bon lontan pou w kite egzanp frè ak sè ki gen matirite espirityèl ki nan kongregasyon an enfliyanse fason w abiye ak fason w penyen! Jèn frè ki vle vin oratè yo ka suiv fason moun ki deja kalifye pou yo bay diskou piblik yo abiye. Tout moun kapab suiv egzanp moun ki gen anpil tan depi y ap patisipe fidèlman nan aktivite predikasyon an. — 1 Tim. 4:12; 1 Pyè 5:2, 3.

Senkyèmman, lè n ap deside sa ki apwopriye anrapò ak aparans nou, nou dwe sonje “menm Kris la pa t fè tèt li plezi”. (Wom. 15:3.) Se fè volonte Bondye ki te pi enpòtan pou Jezi. Epitou, Jezi te mete preferans pèsonèl li sou kote pou l te ka ede lòt moun. Ki sa nou dwe fè si nan fason nou abiye, nan fason nou penyen ak nan fason nou fè tèt nou, gen yon bagay ki ka mete yon baryè ant nou menm ak lòt moun nan zòn n ap preche a? Si nou imite etadespri Kris te genyen an, kote li te montre li se yon moun ki gen imilite, sa ka ede nou pran bon desizyon. Men yon prensip apot Pòl te bay: “Nan okenn fason, nou pap bay okenn okazyon pou moun bite.” ​(2 Kor. 6:3). Pou rezon sa a, nou evite fè yon seri stil nan cheve nou e nou evite yon seri stil abiman ki ka gen tandans deranje moun nou vle preche yo.

Fason w kanpe ak fason w chita. Pou nou gen yon bon aparans tou, sa mande pou nou kanpe e pou nou chita yon fason ki kòrèk. Natirèlman, nou tout pa kanpe ni nou tout pa chita menm jan, e nou pap chèche suiv yon moun kòm modèl nan sans sa a. Men, li enpòtan pou nou note, selon sa nou jwenn nan Bib la, lè yon moun kanpe oswa li chita byen dwat, sa demontre li gen diyite e li gen yon atitid pozitif (Lev. 26:13; Lik 21:28). Men, yon frè oswa yon sè gendwa pa kapab ni kanpe ni chita dwat oubyen li ka bezwen yon sipò pou l apiye akoz li travay pandan anpil tan nan yon pozisyon ki pa bon pou kò l, oswa akoz li aje oswa fòs fizik li diminye. Sepandan, pou moun ki pa gen pwoblèm sa yo, li bon lè y ap pale devan lòt moun pou yo kanpe dwat oswa pou yo chita dwat yon fason ki rezonab pou yo pa bay enpresyon yo endiferan oswa yo jennen. Menm jan an tou, byenke li pa mal pou yon oratè mete men l sou pipit la pafwa, an jeneral, moun k ap koute oratè a ap gen yon pi bon enpresyon sou li si l pa apiye sou pipit la.

Bagay w ap itilize yo dwe pwòp. Nonsèlman w ta dwe gen yon aparans ki pwòp e ki kòrèk, men tou, bagay w ap itilize nan predikasyon yo ta dwe pwòp.

Ann pran egzanp bib ou. Li pa posib pou tout moun jwenn yon lòt bib lè sa yo genyen an vin ize. Men, kèlkeswa kantite tan ki pase depi w gen bib ou a, moun ta dwe wè ou sèvi avè l avèk swen.

Gen yon pakèt fason nou ka ranje valiz predikasyon nou, men li ta dwe pwòp e bagay yo ta dwe annòd ladan l. Èske sa deja rive ou wè papye k ap sot tonbe nan bib yon pwoklamatè pandan l ap pare pou l li yon vèsè ak yon moun, oswa petèt ou konn wè papye k ap sot tonbe nan bib yon frè pandan l ap fè yon diskou nan kongregasyon an? Sa te distrè w, pa vre? Si lefètke w kenbe papye nan Bib la, sa ka lakòz ou distrè lòt moun, petèt l ap pi bon pou w mete yo yon lòt kote, sa ki t ap montre bagay w ap itilize yo byen ranje. Se pou w konprann tou nan kèk kilti, si yon moun mete Bib la oswa lòt piblikasyon ki anrapò ak relijyon atè, yo konsidere sa kòm yon mank respè.

Nou ta dwe sousye nou pou nou gen yon bon aparans. Sa gen yon enfliyans tou sou fason lòt moun konsidere nou. Men, sa ki pi enpòtan, se paske nou vle “anbeli ansèyman Bondye, Sovè nou an, nan tout bagay” ki fè nou veye avèk atansyon sou aparans nou. — Tit 2:10.