Pawòl Jewova a vivan
Pwen enteresan ki nan liv Tesalonisyen an ak nan liv Timote a
NOUVO kongregasyon apot Pòl te fin fòme nan Tesalonik la te jwenn yon opozisyon li pa t janm rankontre oparavan. Se sa k fè Pòl te santi l oblije ekri Tesalonisyen yo yon lèt pou l felisite yo e pou l ankouraje yo. Li te ekri yo apre Timote te fin pote yon bon rapò sou frè yo ba li lè l te soti Tesalonik. Petèt Timote te nan ventèn li lè sa a. Sanble se nan fen ane 50 nan epòk nou an Pòl te ekri lèt sa a e pami tout lèt enspire li te ekri yo, lèt sa a se premye a. Yon ti tan apre, li te ekri yon dezyèm lèt voye bay kretyen Tesalonik yo. Fwa sa a, li te korije yon move pwennvi kèk moun te genyen e li te ankouraje frè yo kenbe fèm nan lafwa.
Anviwon dizan apre, Pòl te Masedwàn e Timote li menm te Efèz. Li te ekri Timote pou l ankouraje l rete Efèz pou l mennen yon batay espirityèl kont moun ki t ap anseye sa k pa sa nan kongregasyon an. Pòl te ekri Timote yon dezyèm lèt nan ane 64 epòk nou an paske kretyen yo te jwenn anpil pèsekisyon apre yon dife te fin ravaje vil Wòm. Se te dènye lèt li te ekri. Jodi a, nou kapab jwenn konsèy ak ankourajman nan toule kat lèt sa yo. — Ebre 4:12.
“ PA KITE DÒMI PRAN NOU ”
Pòl te felisite kretyen Tesalonik yo pou ‘ jan yo te gen konfyans nan Bondye, pou jan yo t ap travay di paske yo te gen renmen nan kè yo e pou jan yo te rete fèm ’. Li te di yo se yo ‘ ki tout espwa l, se pa lòt moun. Se yo menm ki fè kè l kontan. Se yo menm k’ap ba l okazyon pou l vante tèt li ’. — 1 Tes. 1:3 ; 2:19.
Apre Pòl te fin ankouraje kretyen Tesalonik yo pou yo konsole youn lòt ak esperans rezirèksyon an, men sa l te di : “ Jou Seyè a gen pou l’ vin sou nou tankou yon vòlò k’ap vin nan mitan lannwit. ” Se poutèt sa, li te konseye yo pou yo ‘ pa kite dòmi pran yo ’ e pou yo rete nan bonsans yo. — 1 Tes. 4:16-18 ; 5:2, 6.
Kesyon biblik ak tout repons :
4:15-17 — Kiyès ‘ y ap mete sou nwaj yo pou y al kontre Seyè a anwo a e ki jan sa ap fèt ’ ? Se kretyen wen ki vivan pandan prezans Kris la, peryòd kote Kris ap dirije nan Wayòm nan. Y al “ kontre Seyè a ”, sètadi Jezi, nan syèl la. Men, anvan pou sa fèt, yo dwe mouri e yo dwe resisite antanke kreyati espirityèl (Wom. 6:3-5 ; 1 Kor. 15:35, 44). Peryòd prezans Kris la deja kòmanse, donk, kretyen wen ki mouri jodi a pa rete tann nan lanmò ankò. Yonfwa yo mouri, yo ‘ mete yo sou nwaj yo pou y al anwo a ’, sètadi yo leve yo tousuit. — 1 Kor. 15:51, 52.
5:23 — Ki sa Pòl te vle di lè l te priye pou yo pa ‘ jwenn [frè yo] ak ankenn defo, ni nan kò yo, ni nan lespri yo, ni nan nanm yo ’ ? Pòl t ap pale la a de lespri kongregasyon ki fòme ak kretyen wen yo, de kò li ak nanm li. Pami kretyen sa yo, gen kretyen wen ki te nan Tesalonik yo. Olye pou Pòl te annik priye pou kongregasyon an rete san defo, li te priye pito pou “ lespri ” l, sètadi dispozisyon l genyen an, rete san defo. Li te priye tou pou “ nanm ” li, sètadi lavi l, ak “ kò ” li, sètadi tout kretyen wen yo, rete san defo (1 Kor. 12:12, 13). Donk, priyè sa a montre ki jan Pòl te gen yon gwo sousi pou kongregasyon an.
Leson pou nou jodi a :
1:3, 7 ; 2:13 ; 4:1-12 ; 5:15. Lè n ap bay yon moun konsèy, nou kapab bay konsèy la yon fason ki efikas si nou ba li yon felisitasyon li merite, e anmenmtan, nou ankouraje l fè pi byen toujou.
4:1, 9, 10. Adoratè Jewova yo dwe kontinye fè pwogrè nan domèn espirityèl.
5:1-3, 8, 20, 21. Etandone jou Jewova a toupre, annou “ toujou kenbe tèt nou anplas. Ann pran konfyans nou gen nan Bondye a ak renmen nou gen nan kè nou tankou yon plak pwotèj pou lestonmak nou. Ann pran espwa nou genyen nan Jezi k’ap vin delivre nou nèt la, ann mete l’ tankou yon kas an fè nan tèt nou ”. Anplis, nou ta dwe prete atansyon toutbonvre ak pwofesi ki gen nan Labib, Pawòl Bondye a.
“ KENBE FÈM ”
Gen kèk moun nan kongregasyon an ki te tòdye sans sa Pòl te di nan premye lèt li te ekri a. Sanble yo te fè konnen “ prezans Seyè [a] ” te rive. Pou Pòl te korije pwennvi sa a, li te di yo sa k ‘ gen pou fèt anvan jou sa a rive ’. — 2 Tes. 2:1-3.
Men yon egzòtasyon Pòl te ba yo : “ Se pou nou kenbe fèm. Pa bliye tou sa nou te aprann nan bouch mwen ak nan lèt mwen an. ” Epi li te ba yo lòd pou yo ‘ pran distans yo ak tout frè k’ap fè parese [“ k ap mache yon fason dezòdone ”, NW] ’. — 2 Tes. 2:15 ; 3:6.
Kesyon biblik ak tout repons :
2:3, 8 — Ki “ moun k ap fè sa ki ilegal la ” (NW) e ki jan y ap elimine l ? “ Moun ” sa a se yon gwoup moun. Li reprezante klèje lakretyente a. Se Jezi Kris, “ Pawòl la ”, sa vle di pòtpawòl an chèf Bondye a, Bondye bay pouvwa pou l di ki jijman ki sere pou mechan yo e se li Li bay lòd tou pou l egzekite jijman sa yo (Jan 1:1). Se sa k fè nou kapab di se Jezi ki pral elimine moun k ap fè sa ki ilegal la lè l “ va soufle ak bouch li sou li ”.
2:13, 14 — Nan ki sans Bondye ‘ chwazi kretyen wen yo depi okòmansman pou yo ka sove ’ (Bib Kreyòl La) ? Antanke gwoup, Jewova te chwazi kretyen wen yo davans lè l te vin gen nan objektif li pou semans fi a kraze sèpan an nan tèt (Jen. 3:15). Depi davans tou, Jewova te di ki kondisyon li te vle pou yo ranpli, ki travay yo t ap gen pou yo fè e ki pwoblèm yo t ap rankontre. Se pou sa menm li te rele yo.
Leson pou nou jodi a :
1:6-9. Jewova ap egzekite jijman l yo sou moun ki merite sa, men l ap pwoteje moun ki pa merite jijman sa yo.
3:8-12. Lefètke jou Jewova a toupre, se pa yon rezon pou nou pa travay pou nou pran swen tèt nou. Lè nou pa gen anyen n ap fè, sa ka fè nou vin parese e sa ka fè nou ‘ foure bouch nan zafè ki pa gade nou ’. — 1 Pyè 4:15.
“ VEYE BYEN SOU SA YO TE RENMÈT OU A ”
Men sa Pòl te di Timote : “ Mennen batay la byen. Kenbe konfyans ou fèm nan Bondye ak konsyans ou an repo. ” Apot la te bay ki pwen ki kapab fè yon frè kalifye pou yo nome l nan kongregasyon an. Li te di Timote tou pou l “ rejte lejann ki pa ann amoni ak bagay ki sakre, lejann granmoun fi yo ap rakonte ” (NW). — 1 Tim. 1:18, 19 ; 3:1-10, 12, 13 ; 4:7.
Pòl te di Timote : “ Pa fè granmoun gason yo repwòch twò di. ” Epi men egzòtasyon li te ba l : “ Konsève sa yo konfye w la. Vire do bay pawòl san valè ki pa ann amoni ak sa ki sakre, e vire do bay kontradiksyon ki genyen nan sa yo swadizan rele “ konesans ” lan. ” — 1 Tim. 5:1 ; 6: 20, NW.
Kesyon biblik ak tout repons :
1:18 ; 4:14 — Ki “ pwofesi ” (Bib Kreyòl La) yo te bay sou Timote ? Sanble te gen yon seri pwofesi yo te bay sou wòl Timote t apral jwe nan kongregasyon an alavni. Yo te bay pwofesi sa yo anba enspirasyon lè Pòl te vin vizite Lis pandan dezyèm vwayaj misyonè l te fè a (Tra. 16:1, 2). Ann amoni ak “ pwofesi sa yo ”, ansyen nan kongregasyon an “ te poze men yo sou ” Timote ki te jèn lè a, konsa yo te mete l apa pou yon sèvis espesyal.
2:15 — Nan ki sans yon fi ap “ delivre lè la fè pitit ” ? Yon fi ki fè pitit k ap pran swen pitit li yo e k ap dirije lakay li kapab “ delivre ”, paske li pap vin yon moun ki ‘ rete san l pa fè anyen, k ap fè tripotay, k ap mele nan zafè moun, k ap pale bagay li pa ta dwe pale ’. — 1 Tim. 5:11-15.
3:16 — Ki sa sekrè sakre atachman pou Bondye a ye (NW) ? Pandan lontan, lèzòm pa t konnen si sa te posib pou yon moun obeyi Jewova yon fason ki pafè. Se te yon sekrè. Men, finalman, Jezi te bay repons la lè l te kenbe entegrite l devan Bondye yon fason ki pafè e li te fè sa jiskaske l mouri.
6:15, 16 — Èske pawòl ki nan vèsè sa yo aplike pou Jewova Dye oswa pou Jezi Kris ? Pawòl sa yo aplike pou Jezi Kris, piske y ap pale de moman kote li va parèt la (1 Tim. 6:14). An konparezon ak moun k ap dirije kòm wa oswa kòm seyè sou latè yo, Jezi se “ sèl otorite ” e se li sèl ki pap janm mouri (Dàn. 7:14 ; Wom. 6:9). Depi lè l monte nan syèl la, pa gen okenn moun sou tè a ki “ ka wè ” l ak je yo.
Leson pou nou jodi a :
4:15. Kit nou fèk vin kretyen, kit nou gen lontan depi nou kretyen, nou ta dwe fè tout sa nou kapab pou nou kontinye fè pwogrè e pou nou kontinye ranfòse relasyon nou genyen avèk Jewova.
6:2. Si n ap travay ak yon frè, nou pa ta dwe abize l nan okenn fason, okontrè, nou ta dwe pi dispoze travay pou li pase pou moun ki pa nan kongregasyon an.
“ FÈ KONNEN PAWÒL BONDYE A, MACHE BAY LI SAN PRAN SOUF ”
Pou Pòl te prepare Timote pou moman difisil ki t apral vini yo, men sa li te ekri l : “ Se pa yon Lespri kapon Bondye ban nou, men se yon Lespri pisans, lanmou, ak disiplin. ” Men konsèy li te bay Timote : “ Yon moun k’ap sèvi Bondye pa fèt pou nan kont. Se pou l’ viv byen ak tout moun, se pou l’ konn ki jan yo fè enstriksyon moun. ” — 2 Tim. 1:7, Bib Kreyòl La ; 2:24.
Pòl te ankouraje Timote pou l “ kontinye nan bagay li te aprann yo, bagay yo te konvenk li pou l kwè yo ”. Piske aposta yo t ap simaye ansèyman pa yo, men konsèy apot la te bay Timote ki te yon jèn siveyan : “ Preche pawòl la, fè sa avèk ensistans [...], reprann, reprimande, egzòte. ” (NW) — 2 Tim. 3:14 ; 4:2.
Kesyon biblik ak tout repons :
1:13 — Ki sa “ modèl pawòl ki pwofitab ” yo ye (NW) ? “ Pawòl ki pwofitab ” yo se “ pawòl Jezi Kris, Seyè nou an ”. Se vrè ansèyman kretyen yo (1 Tim. 6:3). Ni sa Jezi te anseye ni sa l te fè te ann amoni ak Pawòl Bondye a, se sa k fè nan yon sans ki pi laj, ekspresyon “ pawòl ki pwofitab ” la kapab fè referans tou ak tout ansèyman ki nan Labib. Ansèyman sa yo kapab ede nou konprann ki sa Jewova vle nou fè. N ap rete kole ak modèl sa a si nou pratike sa nou aprann nan Bib la.
4:13 — Ki sa ‘ liv ki fèt ak po bèt yo ’ te ye ? Gen kèk nan liv ki nan Ekriti ebrayik yo yo te ekri sou po bèt. Donk, lè Pòl te mande Timote pote liv yo pou li, li posib li t ap pale de kèk nan liv sa yo. Li te mande l pote yo pou l te ka etidye yo pandan l te nan prizon nan Wòm. Li posib pou kèk nan liv yo te fèt ak papiris, yon kalite papye, e kèk lòt te fèt ak po bèt.
Leson pou nou jodi a :
1:5 ; 3:15. Byen bonè nan anfans Timote, yo te anseye l Ekriti yo lakay li. Sa se rezon fondamantal ki fè li te gen lafwa nan Kris Jezi, yon lafwa ki te enfliyanse tout sa l t ap fè. Se sa k fè li trèzenpòtan pou fanmi yo reflechi seryezman pou yo wè si yo ranpli responsablite sa a yo genyen devan Bondye e anvè pitit yo.
1:16-18. Lè gen kwayan parèy nou k ap fè fas ak eprèv, ki jwenn pèsekisyon oswa ki nan prizon, annou priye pou yo e annou fè tout sa nou kapab pou nou ede yo. — Pwo. 3:27 ; 1 Tes. 5:25.
2:22. Kretyen yo, sitou sa ki jèn yo, pa ta dwe lage kò yo nan bat fè, fè spò, mizik, divètisman, pastan yo, vwayaje, konvèsasyon initil, elatriye, opwen pou yo ta prèske pa gen tan pou aktivite espirityèl yo.
[Foto nan paj 32]
Pami lèt Bondye te enspire Pòl pou l ekri yo, ki lèt li te ekri an dènye ?