Pa kite anyen anpeche w jwenn laglwa

1, 2. a) Ki sans mo “glwa” a genyen nan lang ebre a? b) Ki kesyon nou pral egzamine nan atik sa a?

LÈ W tande mo “glwa” a, ki sa k vin nan lespri w? Èske se bèl bagay ki gen nan kreyasyon Bondye a (Sòm 19:1)? Èske se onè ak glwa yo bay moun ki gen anpil richès, sajès oswa ki reyalize anpil bagay nan lavi a? Nan Bib la, mo ebre yo itilize pou pale de “glwa” a gen sans yon bagay ki lou. Nan tan lontan, nan epòk yo te konn fè kòb ak metal ki gen anpil valè yo, plis kòb la te lou se plis li te gen valè pou moun yo. Se sa k fè, mo yo te konn itilize pou yo bay lide yon bagay ki lou a te fè referans ak yon bagay yo konsidere tankou yon trezò, yon bagay ki bèl oswa ki enpresyonan.

² Byenke pouvwa, pozisyon oswa repitasyon lòt moun genyen ka enpresyone nou, men, ki sa Bondye ap chèche lakay lèzòm? An reyalite, Bib la pale de yon glwa Bondye bay lèzòm. Men sa Pwovèb 22:4 di: “Rezilta imilite ak lakrentif pou Jewova, se richès, glwa ak lavi.” ​(NW). Disip Jak te ekri: “Se pou nou gen imilite nan je Jewova, e l ap leve nou.” ​(Jak 4 :10). Ki glwa sa a Jewova bay lèzòm nan? Ki sa k ka anpeche nou jwenn li? E ki jan nou ka ede lòt moun jwenn glwa sa a?

3-5. Ki kalite glwa Jewova ka fè nou jwenn?

³ Gen yon salmis ki te gen konfyans Jewova t ap kenbe men dwat li e l t ap fè l jwenn bonjan glwa. (Li Sòm 73:23, 24.) Ki jan Jewova fè sa? Jewova fè sèvitè l yo ki gen imilite jwenn glwa, lè l onore yo nan plizyè fason. Jewova beni yo lè l ede yo konprann volonte l (1 Kor. 2:7). Li onore moun ki koute Pawòl li a e ki obeyi l lè l pèmèt yo gen yon relasyon sere sere avèk li. — Jak 4:8.

⁴ Anplis de sa, Jewova konfye sèvitè l yo travay predikasyon an, yon travay ki se yon trezò ki gen anpil valè (2 Kor. 4:1, 7). Travay predikasyon an fè nou jwenn glwa. Men ki sa Jewova pwomèt moun ki itilize privilèj sa a yo genyen an pou yo ba l louwanj e pou yo ede lòt moun: “Moun ki onore m, m ap onore yo tou.” ​(1 Sam. 2:30, NW). Jewova onore moun sa yo tou lè l ba yo apwobasyon l, e lòt sèvitè l yo kapab pale an byen de yo. — Pwo. 11:16; 22:1.

⁵ Ki sa k ap tann moun ki ‘mete konfyans yo nan Seyè a e ki fè tout sa l mande yo fè’? Men pwomès Bondye fè yo: “Li [Jewova] va leve w pou w vin posede tè a. Lè y ap derasinen mechan yo, w ap wè sa.” ​(Sòm 37:34, NW). Moun sa yo ap tann moman kote yo pral resevwa lavi pou toutan an, yon onè ki pa gen parèy Bondye fè yo. — Sòm 37:29.

6, 7. Poukisa gen anpil moun ki pa t vle met lafwa nan Jezi?

⁶ Ki sa k ka anpeche nou resevwa glwa Jewova vle ban nou an? Yon bagay ki ka fè sa se lè nou bay opinyon moun ki pa gen okenn relasyon ak Bondye yo twòp enpòtans. Gade ki sa apot Jan te ekri konsènan kèk moun ki te gen otorite nan epòk Jezi a: “Menm pami chèf yo, gen anpil ki te mete lafwa nan [Jezi], men yo pa t fè moun konn sa poutèt Farizyen yo, dekwa pou yo pa t mete yo deyò nan sinagòg la, paske yo te pi renmen jwenn glwa nan men lèzòm pase nan men Bondye.” ​(Jan 12:42, 43). Li t ap pi bon lontan pou chèf sa yo si yo pa t bay opinyon Farizyen yo twòp enpòtans!

⁷ Byen bonè nan ministè Jezi, li te idantifye, byen klè, rezon ki fè anpil moun pa t ap resevwa l e yo pa t ap met lafwa nan li. (Li Jan 5:39-44.) Nasyon Izrayèl la te gen plizyè syèk depi l t ap ret tann moman pou Mesi a parèt. Lè Jezi te kòmanse preche, petèt, gen kèk moun ki te rive konprann moman pou Kris la parèt la te rive dapre sa yo te li nan pwofesi Dànyèl la. Kèk mwa anvan sa, lè Jan ki te konn batize moun nan te kòmanse preche, gen anpil moun ki t ap di: “Ou kwè se pa li menm ki Kris la?” ​(Lik 3:15). Kounye a, Mesi sa a moun yo t ap tann depi byen lontan an t ap anseye nan mitan yo. Sepandan, moun ki te byen konn Lalwa yo pa t aksepte l. Pou Jezi montre yo rezon ki fè yo te aji konsa, li te poze yo kesyon sa a: “Ki jan pou nou ta fè kwè nan mwen, piske nou aksepte glwa nan men youn lòt e nou pa chèche glwa ki soti nan sèl Bondye ki egziste a?”

8, 9. Bay yon egzanp ki montre fason glwa lèzòm bay la ka anpeche nou jwenn glwa Bondye ban nou an.

⁸ Pou nou montre fason glwa lèzòm bay la ka anpeche nou jwenn glwa Bondye ban nou an, nou ka konpare glwa ak limyè. Linivè nou an ki klere anpil chaje ak glwa. Èske w sonje dènye fwa ou te gade syèl la pandan l te lannuit, syèl la te byen klè e w t ap kontanple plizyè milye zetwal ki ladan l? Sa enpresyone nou anpil lè nou wè ‘glwa zetwal yo genyen’! (1 Kor. 15:40, 41.) Sepandan, ki jan w panse menm syèl sa a t ap parèt si w ta nan yon vil ki chaje limyè? Akoz limyè ki gen nan vil sa a, li t ap prèske enposib pou w wè limyè zetwal yo. Èske se paske limyè ki sou wout yo, nan stad yo oswa ki nan kay yo pi fò oubyen yo pi bèl pase limyè zetwal yo? Non! Se paske limyè ki nan vil la pi pre nou ki fè yo anpeche nou wè limyè ki soti nan kreyasyon Jewova a. Si nou vle obsève mèvèy ki gen nan syèl la lè l lannuit, nan yon sans, nou dwe bare oswa evite kèlkeswa limyè atifisyèl ki ka anpeche nou wè yo.

⁹ Menm jan an tou, si nou kite move kalite glwa a rive twò pre kè nou, sa ka anpeche nou apresye glwa Jewova vle ban nou an epi pou nou chèche jwenn glwa sa a. Gen anpil moun ki pa aksepte mesaj Wayòm nan paske yo pè sa zanmi yo oswa fanmi yo ka panse de yo. Men, èske dezi pou moun resevwa glwa nan men lèzòm nan ka gen efè sou sèvitè ki vwe lavi yo bay Bondye yo? Ann sipoze yon jèn frè ta jwenn asiyasyon pou l al preche nan yon tèritwa kote moun yo byen konnen l, men yo poko konnen si l Temwen Jewova. Èske l ap kite laperèz fè l fè bak? E si se nan rizib y ap pase yon moun paske l ap pousuiv kèk objektif teyokratik? Èske l ap kite moun sa yo ki pa wè klè nan domèn espirityèl enfliyanse chwa l ap fè nan lavi a? Petèt yon kretyen te komèt yon peche grav. Èske l ap kache peche sa a paske li pè pou l pa pèdi privilèj li gen nan kongregasyon an oswa paske l pa vle desi moun ki renmen l yo? Nan ka sa a, si objektif ki pi enpòtan pou li a se repare relasyon l gen ak Jewova, l ap “rele ansyen yo nan kongregasyon an” e l ap chèche jwenn èd yo. — Li Jak 5:14-16.

10. a) Lè nou enkyete nou twòp pou sa lòt moun panse de nou, ki jan sa ka enfliyanse pwennvi nou? b) Ki asirans nou genyen si n aji ak imilite?

¹⁰ Petèt nou kapab ap fè anpil pwogrè pou nou vin gen matirite, men, yon kwayan parèy nou ban nou yon konsèy. Konsèy sa a li ban nou ak tout kè l la ta kapab ede nou, si nou pa kite ògèy, anvi nou genyen pou n sove lafas oswa tandans pou n ap defann tèt nou anpeche n aksepte konsèy sa a. Ann sipoze n ap travay nan yon pwojè ak yon kretyen parèy nou. Èske n ap kolabore avè l sèlman paske nou ta renmen pou moun fè lwanj pou nou kòmkwa se nou ki bay pi bon ide yo oswa se nou ki travay pi di? Si n ta twouve n nan kèlkeswa sitiyasyon sa yo, nou met gen asirans “moun ki enb nan lespri l la ap jwenn laglwa”. — Pwo. 29:23, NW.

11. Ki jan n dwe reyaji nan kè n lè moun felisite nou, e poukisa?

¹¹ Menm jan an tou, ansyen yo ak kretyen k ap “chèche” gen plis responsablite nan kongregasyon an dwe fè atansyon pou yo pa chèche glwa nan men lèzòm (1 Tim. 3:1; 1 Tes. 2:6). Ki jan yon frè dwe reyaji lè yo felisite l yon fason ki sensè pou yon travay li byen fè? Natirèlman, li pap fè bati yon moniman pou tèt li menm jan wa Sayil te fè sa (1 Sam. 15:12). Sepandan, èske l rekonèt byen vit se grasa favè san parèy Jewova fè nou an ki fè li reyisi e tout espwa pou l ta reyisi ankò toujou depann de benediksyon ak èd Jewova ap kontinye ba li (1 Pyè 4:11)? Fason nou reyaji nan kè n lè moun fè lwanj pou nou ap montre ki kalite glwa n ap chèche jwenn. — Pwo. 27:21.

12. Ki sa k te anpeche kèk Juif koute mesaj Jezi a?

¹² Dezi nou gen lakay nou se yon lòt bagay ki ka anpeche nou jwenn glwa Bondye bay la. Move dezi ka anpeche nou tande laverite. (Li Jan 8:43-47.) Jezi te di kèk Juif se paske ‘yo te vle fè volonte Dyab la, papa yo’ ki fè yo pa t koute mesaj li a.

13, 14. a) Ki sa moun k ap fè rechèch yo di sou fason sèvo nou fonksyone lè n ap koute moun k ap pale? b) Ki sa k detèmine ki moun n ap chwazi koute?

¹³ Dezi nou yo gen enfliyans sou fason nou tande (2 Pyè 3:5). Jewova kreye nou ak yon kapasite estrawòdinè pou n anpeche zòrèy nou tande bri nou pa anvi. Pran yon ti poz epi konsantre w pou w wè ki kantite son diferan ou ka tande byen vit. Petèt gen anpil nan son sa yo ou ka pa t menm prete atansyon ak yo anvan sa. Sèvo w gen kapasite pou l ede w konsantre sou yon sèl bagay toutpandan li pèmèt ou kontinye kenbe kapasite w genyen pou w tande diferan kalite son. Sepandan, moun k ap fè rechèch yo remake, li pi difisil pou yon moun chèche fè diferans ant plizyè son alafwa sitou lè se vwa moun l ap koute k ap pale. Sa vle di, lè n ap tande de moun k ap pale anmenmtan, nou dwe chwazi kiyès nan de vwa sa yo n ap koute. Chwa n ap fè a ap depann de kiyès nan moun sa yo nou vle koute. Juif ki te vle fè volonte papa yo, Dyab la, pa t chwazi koute Jezi.

¹⁴ Nou jwenn mesaj ki soti ni nan ‘kay bon konprann’ ni nan ‘kay moun sòt’. (Pwo. 9:1-5, 13-17.) Nan yon sans, ni moun ki saj ni moun ki sòt ap rele nou byen fò, e nou dwe fè yon chwa. Ki envitasyon n ap aksepte nan ka sa a? Repons nou an depann de volonte ki moun nou vle fè. Mouton Jezi yo tande vwa l e yo suiv li (Jan 10:16, 27). Yo “pou laverite”. (Jan 18:37.) “Yo pa konn vwa etranje” yo (Jan 10:5). Moun sa yo ki gen imilite ap jwenn glwa. — Pwo. 3:13, 16; 8:1, 18.

15. Nan ki sans tribilasyon Pòl te sibi yo te yon “glwa” pou lòt moun?

¹⁵ Lè nou pèsevere nan fè volonte Jewova sa ede lòt moun jwenn glwa. Men sa Pòl te ekri kretyen ki nan kongregasyon Efèz la: “Mwen mande nou pou nou pa bay legen akoz tribilasyon m ap sibi pou nou yo, paske yo se yon glwa pou nou.” ​(Efe. 3:13). Nan ki sans tribilasyon Pòl t ap sibi yo te yon “glwa” pou Efezyen yo? Lefètke Pòl te pare pou l kontinye sèvi yo malgre tout eprèv li te rankontre, sa te ede Efezyen yo konprann privilèj yo genyen antanke kretyen yo pi enpòtan lontan e yo gen plis valè pase sa yon moun te ka imajine. Si Pòl te sispann sèvi Jewova lè l te jwenn tribilasyon, èske sa pa t ap fè kretyen yo panse relasyon yo gen ak Jewova, travay predikasyon an ak esperans yo a pa gen valè? Lefètke Pòl te andire, sa te bay krisyanis la jarèt e egzanp li montre sa vo lapèn pou yo moun fè sakrifis pou l vin disip Kris.

16. Ki tribilasyon Pòl te jwenn nan vil Lis?

¹⁶ Ann reflechi sou efè andirans ak zèl Pòl te demontre a te genyen. Men sa Travay 14:19, 20 rapòte: “Gen Juif ki soti Antyòch ak Ikónyòm ki vin pran tèt foul la, yo fè yo kalonnen Pòl ak kout wòch, e yo trennen l met deyò vil [Lis] la, paske yo te panse l mouri. Sepandan, lè disip yo vin antoure l, li leve e li antre nan vil la. Nan demen, li pati al Dèbe ak Banabas.” Imajine sa, apre Pòl fin pase toupre lanmò, nan demen li fè yon vwayaj nan yon distans 100 kilomèt nan yon epòk kote pa t gen mwayen transpò nou gen jounen jodi a!

17, 18. a) Nan ki sans Timote te suiv soufrans Pòl te sibi nan vil Lis yo pye pou pye? b) Ki efè andirans Pòl te gen sou Timote?

¹⁷ Èske Timote te youn nan “disip” ki te vin ede Pòl yo? Istwa nou jwenn nan liv Travay la pa di sa klè, men, li posib pou Timote te la. Ann konsidere pawòl Pòl te ekri nan dezyèm lèt li te voye bay Timote a: “Ou menm, se pye pou pye ou suiv ansèyman m, fason m viv, [...] tankou sa k te rive m Antyòch [yo mete l deyò nan vil la], Ikónyòm [yo eseye kalonnen l ak kout wòch] ak Lis yo [yo lapide l]. Ou konnen ki kalite pèsekisyon m te andire, men Seyè a te delivre m anba yo tout.” — 2 Tim. 3:10, 11; Tra. 13:50; 14:5, 19.

¹⁸ Timote te “suiv” evènman sa yo “pye pou pye” e li te byen konnen andirans Pòl. Sa te fè gwo enpresyon sou li. Lè Pòl t al Lis, Timote te yon kretyen ki te bay bon egzanp e “frè Lis ak frè Ikónyòm yo te pale an byen” de li (Tra. 16:1, 2). Rive yon lè, Timote te vin kalifye pou l resevwa plis responsablite. — Fil. 2:19, 20; 1 Tim. 1:3.

19. Ki efè andirans nou ka gen sou lòt moun?

¹⁹ Lè nou pèsevere nan fè volonte Bondye, sa ka gen menm efè a sou lòt moun, sitou sou anpil jèn k ap fè pwogrè pou yo rive sèvi Bondye pi byen. Jèn sa yo pa sèlman remake sa nou fè, aprann nan men nou lè n ap fè diskou oswa lè n ap patisipe nan travay predikasyon an, men, yo jwenn pwofi tou lè yo wè fason n ap fè fas ak pwoblèm ki gen nan lavi a. Pòl te “kontinye andire tout bagay” yon fason pou tout moun ki rete fidèl yo ka ‘jwenn delivrans ak glwa ki la pou toutan an’. — 2 Tim. 2: 10.

20. Poukisa nou dwe kontinye chèche glwa Bondye bay la?

²⁰ Kounye a, èske nou pa ta dwe kontinye “chèche glwa ki soti nan sèl Bondye ki egziste a”? (Jan 5:44; 7:18.) Se egzakteman sa nou dwe fè! (Li Women 2:6, 7.) Jewova ap bay ‘moun k ap chèche glwa yo lavi ki pap janm fini an’. Anplis de sa, lè ‘nou andire nan fè sa ki bon’ n ap ankouraje lòt moun pou yo rete fèm yon fason pou yo ka benefisye lavi pou toutan an. Kidonk, pa kite anyen anpeche w jwenn laglwa Bondye bay la.