Byen egzòte moun yo

ANSYEN YO nan kongregasyon kretyen an dwe kapab “egzòte moun grasa ansèyman ki pwofitab la”. (Tit 1:9.) Pafwa, yo dwe fè sa nan sitiyasyon ki difisil anpil. Li enpòtan pou konsèy yo bay yo ann amoni ak enstriksyon ki nan Bib la. Se sa k fè ansyen yo dwe koute konsèy ki nan 1 Timote 4:13 la ki di: “Kontinye konsantre w [...] sou egzòtasyon.” Byenke, toudabò, leson sa a se pou ansyen yo oswa pou moun k ap chèche kalifye pou yo vin gen responsablite sa a, gen moman kote paran yo dwe egzòte pitit yo oswa kote pwoklamatè ki gen etid biblik yo bezwen egzòte etidyan yo. Yo ka aplike konsèy sa yo nan sitiyasyon sa yo tou.

Sitiyasyon kote li nesesè pou w egzòte moun. Pou w konnen ki lè li nesesè pou w egzòte yon moun, li bon pou w egzamine sitiyasyon yo rapòte nan Bib la kote yo te egzòte kèk moun. Apot Pyè te egzòte ansyen yo pou yo veye sou responsablite yo genyen antanke bèje twoupo Bondye a (1 Pyè 5:1, 2). Pòl te bay Tit konsèy pou l egzòte mesye ki pi jèn yo pou yo “gen bonsans”. (Tit 2:6.) Pòl te ankouraje kretyen yo pou yo “gen menm pawòl” e pou yo evite moun k ap chèche simen divizyon pami yo (1 Kor. 1:10; Wom. 16:17; Fil. 4:2). Byenke Pòl te felisite moun ki te fè pati kongregasyon Tesalonik yo pou bon bagay yo te fè, li te egzòte yo pou yo aplike enstriksyon yo te resevwa yo plis toujou (1 Tes. 4:1, 10). Pyè te mande kretyen yo pou yo “kontinye evite dezi lachè yo”. (1 Pyè 2:11.) Jid te egzòte kretyen parèy li yo pou yo “mennen yon gwo lit pou lafwa yo” piske te gen moun ki san respè pou Bondye ki te lage kò yo nan konduit deregle ki t ap chèche enfliyanse yo (Jid 3, 4). Yo te ankouraje kretyen yo pou yo chak egzòte youn lòt, yon fason pou okenn nan yo pa kite pouvwa peche genyen pou l twonpe moun nan fè yo vin gen tèt di (Ebre 3:13). Pyè te egzòte Juif ki potko mete lafwa yo nan Kris yo lè l te di yo: “Se pou nou sove kite jenerasyon kòwonpi sa a.” — Tra. 2:40.

Ki kalite nou bezwen genyen pou nou egzòte moun ki nan sitiyasyon konsa? Ki jan yon moun k ap bay egzòtasyon ka fè sa yon fason pou l fè moun yo aji vit san l pa plede ap reprimande yo e san l pa twò sevè avèk yo?

“Sou baz lanmou.” Si w pa bay egzòtasyon w lan “sou baz lanmou”, ou ka parèt twò sevè ak moun yo (Flm. 9). An reyalite, lè li nesesè pou moun yo aji tousuit, oratè a dwe montre moun yo se yon sitiyasyon ki mande pou yo aji vit nan fason li pale. Si l pale yon fason ki twò dou, sa ka bay moun yo enpresyon se padon l ap mande yo. Anmenmtan, li ta dwe bay egzòtasyon l lan avèk senserite toutpandan l ap fè efò pou l konprann santiman moun yo. Lè l egzòte moun yo avèk amou, sa ka plis pouse yo aji. Lè Pòl t ap ekri kretyen Tesalonik yo, li te pale sou fason li menm ak lòt konpayon l yo te aji anvè yo, li te di: “Nou konnen byen, tankou yon papa fè sa pou pitit li, nou pa t sispann ankouraje nou chak.” ​(1 Tes. 2:11). Siveyan sa yo ki te nan kongregasyon kretyen an te pouse frè yo aji, men yo te fè sa avèk amou. Se pou pawòl ou yo montre w enterese toutbonvre nan moun k ap koute w yo.

Montre w gen konsiderasyon pou moun yo. Pa bay egzòtasyon w lan yon fason ki ta montre w kont moun w ap chèche pouse aji yo. Anmenmtan, pa ezite konseye yo, di yo “tout sa Bondye deside”. (Tra. 20:27.) Moun pami yo ki gen rekonesans pou konsèy yo resevwa yo pap santi yo fache, ni yo pap renmen w mwens poutèt ou te egzòte yo avèk bonte pou yo fè sa k dwat. — Sòm 141:5.

Souvan, anvan w bay frè ak sè yo yon egzòtasyon, li bon pou w felisite yo yon fason ki presi e ki sensè. Panse ak bon bagay y ap fè, bagay sandout ki dwe fè Jewova plezi: lafwa yo demontre yo genyen nan travay li, lanmou ki pouse yo bay tèt yo nan travay sa a ak andirans yo demontre yo genyen devan sitiyasyon difisil y ap rankontre (1 Tes. 1:2-8; 2 Tes. 1:3-5). Sa ap ede frè yo santi ou apresye yo e w konprann yo, epi y ap dispoze koute egzòtasyon ou pral bay la.

“Avèk anpil pasyans.” Ou dwe montre w gen “anpil pasyans” lè w ap bay egzòtasyon (2 Tim. 4:2). Ki sa sa mande pou w fè? Pou yon moun montre li gen anpil pasyans, li bezwen andire anba sa ki mal oswa sa yo fè l. Yon moun ki gen anpil pasyans toujou gen espwa moun k ap koute l yo ap aplike sa l di yo. Lè w egzòte moun yo avèk etadespri sa a, sa ap anpeche yo met nan tèt yo ou panse y ap vin pi mal. Lè w montre frè ak sè yo ou gen konfyans yo vle sèvi Jewova ak tout kapasite yo, sa ap ranfòse dezi yo genyen pou yo fè sa ki byen. — Ebre 6:9.

“Grasa ansèyman ki pwofitab la.” Ki jan yon ansyen ka “egzòte grasa ansèyman ki pwofitab la”? Lè l “rete kole sou pawòl ki fidèl la nan fason l ap anseye”. (Tit 1:9.) Olye w bay opinyon pa w, sèvi ak Pawòl Bondye a pou w egzòte moun yo pito. Kite Bib la ede w wè ki sa w dwe di. Di yo ki byenfè y ap jwenn lè yo aplike sa Bib la di sou kesyon w ap egzamine avèk yo a. Reflechi tou sou konsekans yon moun ka jwenn ni kounye a ni alavni si l pa aji ann amoni ak Pawòl Bondye a, epi pale de sa ak moun yo pou w konvenk yo pou yo aji yon fason ki kòrèk.

Asire w ou byen esplike moun k ap koute w yo yon fason ki klè ki sa pou yo fè e ki jan pou yo fè sa. Ede yo wè rezònman w fè yo chita byen fèm sou Bib la. Si Bib la bay chak moun libète pou yo fè chwa pa yo nan yon domèn, montre yo ki limit libète sa a. Apre sa, nan konklizyon diskou a, bay yon dènye egzòtasyon k ap ranfòse detèminasyon yo genyen pou yo aji.

Ou dwe ‘alèz pou w pale’. Pou yon moun byen egzòte lòt moun, li dwe ‘alèz pou l pale konsènan lafwa l’. (1 Tim. 3:13.) Ki sa ki ka pèmèt yon oratè pale alèz? Si li se “yon egzanp nan akonpli bèl travay”, sa vle di li fè sa l ap egzòte frè yo pou yo fè a (Tit 2:6, 7; 1 Pyè 5:3). Lè se konsa sa ye, moun yo ap rann yo kont moun k ap egzòte yo a pa mande yo fè yon bagay li menm li pa fè. Y ap wè yo ka imite lafwa l menm jan li menm l ap fè efò pou l imite Kris. — 1 Kor. 11:1; Fil. 3:17.

Lè moun k ap bay egzòtasyon yo baze egzòtasyon yo sou Pawòl Bondye a e yo bay yo avèk amou, sa ka pote anpil bon rezilta. Moun yo konfye responsablite pou yo bay egzòtasyon yo dwe fè tout sa yo kapab pou yo fè sa byen. — Wom. 12:8.