Siveyan ki la pou pran swen twoupo a

LÈ Jezi t ap preche sou tè a, li te montre li se “bon bèje a”. (Jan 10:11.) Lè l te konn wè foul moun ki te konn ap suiv li yo, li te “gen pitye pou yo, paske yo te depafini e yo te lage tankou mouton ki san bèje”. (Mat. 9:36.) Pyè ak lòt apot yo te remake Jezi te gen sousi ak lanmou pou moun yo. Jezi pa t menm jan ak fo bèje nan peyi Izrayèl yo. Yo te tèlman neglije twoupo a, mouton yo te vin gaye e yo te grangou nan domèn espirityèl (Eze. 34:7, 8). Jezi te bay yon bèl egzanp nan fason li te anseye mouton yo e li te pran swen yo. Li te menm bay lavi l pou yo. Egzanp li te bay la te montre apot yo fason pou yo ede moun ki gen lafwa yo retounen vin jwenn Jewova, “bèje k ap veye nanm” yo a. — 1 Pyè 2:25.

² Yon lè, pandan Jezi t ap pale ak Pyè, li te fè l wè enpòtans pou l bay ti mouton yo manje e pou l pran swen yo (Jan 21:15-17). Sandout, sa te touche Pyè anpil. Annapre, li te ankouraje ansyen nan kongregasyon kretyen nan premye syèk la nan sans sa a. Men sa l te di yo: “Pran swen twoupo Bondye a ki sou kont nou, epi fè travay nou kòm siveyan. Pa fè sa nan fòse, men fè sa ak tout kè nou devan Bondye. Pa fè sa paske n ap chèche jwenn avantaj nan move kondisyon, men fè sa avèk dilijans. Pa fè sa tankou se domine n ap domine sou moun ki se eritaj Bondye konfye nou, men se pou nou tounen egzanp pou twoupo a.” ​(1 Pyè 5:1-3). Jodi a tou, pawòl Pyè te di yo valab pou ansyen yo. Menm jan ak Jezi, ansyen yo se egzanp pou twoupo a, yo sèvi frè ak sè yo ak tout kè yo e yo pran latèt nan adorasyon kongregasyon an ap bay Jewova a. — Ebre 13:7.

³ Nou dwe rekonesan pou siveyan lespri sen nome nan kongregasyon an. Nou jwenn anpil byenfè nan fason yo pran swen twoupo a. Pa egzanp, siveyan yo bay tout moun nan kongregasyon an ankourajman e yo pran ka yo chak an patikilye. Chak semèn, yo dirije reyinyon ki fèt nan kongregasyon an, e yo fè sa avèk dilijans. Reyinyon sa yo fòtifye lafwa tout moun (Wom. 12:8). Yo fè efò pou yo pwoteje twoupo a kont tout sa ki ka reprezante yon danje pou li, tankou moun ki gen move entansyon, e sa fè nou santi nou an sekirite (Eza. 32:2; Tit 1:9-11). Lefètke yo pran latèt nan travay predikasyon an, sa ankouraje nou pou nou rete aktif nan preche bon nouvèl la regilyèman chak mwa (Ebre 13:15-17). Jewova sèvi ak “gason kòm kado” sa yo pou l bati kongregasyon an — Efe. 4:8, 11, 12.

⁴ Pou kongregasyon an jwenn bonjan swen, frè yo nome kòm siveyan yo dwe ranpli kondisyon ki nan Pawòl Bondye a. Se sèlman lè yo ranpli kondisyon yo nou kapab di se lespri sen ki nome yo (Tra. 20:28). Vrèmanvre, kondisyon ki nan Pawòl Bondye a montre nivo a wo, piske lè yon frè vin siveyan se yon gwo responsablite li genyen. Men, nivo a pa tèlman wo nan pwen pou frè ki renmen Jewova toutbon yo e ki dispoze pou Jewova sèvi avè yo pa ka rive atenn li. Tout moun ta dwe wè aklè siveyan yo se moun ki aplike konsèy yo jwenn nan Bib la nan lavi yo chak jou.

⁵ Nan premye lèt apot Pòl te ekri Timote a e nan lèt li te ekri Tit la, li te bay yon seri kondisyon yon frè dwe ranpli pou l vin siveyan. Men sa Bib la di nan 1 Timote 3:1-7: “Si yon moun ap chèche vin siveyan, se yon bèl travay li ta renmen genyen. Se poutèt sa, yon siveyan dwe san repwòch, li dwe gen yon sèl madanm, li dwe modere nan abitid li, li dwe gen bonsans, li dwe gen lòd, li dwe renmen akeyi moun, li dwe gen kapasite pou l anseye. Li pa dwe yon bwasonyè, li pa dwe vyolan, men li dwe rezonab. Li pa dwe renmen fè kont, li pa dwe renmen lajan, li dwe yon moun ki dirije pwòp kay li yon fason ki kòrèk, ki kenbe pitit li nan soumisyon ak nan diyite. (Paske, si yon moun pa konn ki jan pou l dirije pwòp kay li, ki jan l ap fè pran swen kongregasyon Bondye a?) Li pa dwe yon moun ki fèk konvèti, pou l pa vin gonfle ak ògèy, e pou l pa tonbe anba menm kondanasyon ak Dyab la. Anplis de sa, moun ki deyò yo ta dwe bay bon temwayaj sou li, dekwa pou l pa tonbe nan dezonè ak nan pyèj Dyab la.”

⁶ Men sa Pòl te ekri Tit: “Mwen te kite w Krèt pou w ka korije bagay ki merite korije yo e pou w ka nome ansyen nan chak vil, jan mwen te ba w lòd fè a, depi moun nan pa gen akizasyon sou do l, li se mari yon sèl fi, pitit li gen lafwa e yo pa gen repitasyon moun ki lage kò yo nan debòch, ni yo pa rebèl. Paske, antanke entandan Bondye, yon siveyan pa dwe gen akizasyon sou do l, li pa dwe gen tèt di, li pa dwe yon moun ki renmen fè kòlè, ni yon bwasonyè, ni yon moun ki vyolan, ni yon moun k ap chèche jwenn avantaj nan move kondisyon, men li dwe yon moun ki renmen akeyi moun, ki renmen sa ki byen, ki gen bonsans, ki jis, ki fidèl, ki gen metriz, ki rete kole sou pawòl ki fidèl la nan fason l ap anseye, dekwa pou l ka ankouraje moun grasa ansèyman ki pwofitab la e pou l ka reprimande moun k ap pale kont ansèyman sa a.” — Tit 1:5-9.

⁷ Menmsi kondisyon ki nan Bib la ka parèt anpil, se pa yon rezon pou frè yo pa chèche vin siveyan. Lè yon frè demontre li gen bèl kalite yon siveyan dwe genyen, li ankouraje lòt moun nan kongregasyon an pou yo travay pou yo gen bèl kalite tou. Pòl te fè konnen Bondye bay “gason kòm kado” sa yo “pou redrese moun ki sen yo, pou fè travay ki gen rapò ak sèvis Bondye, pou konstriksyon kò Kris la, jiskaske nou tout nou rive fè yon sèl nan lafwa ak nan konesans egzak sou Pitit Bondye a, pou nou fin grandi nèt, jis nou rive nan nivo Kris ye a, pou nou vin konplè, menm jan avè l”. — Efe. 4:8, 12, 13.

⁸ Siveyan yo pa timoun, ni yo pa gason ki fèk konvèti. Olye de sa, yo se moun ki gen eksperyans nan fason yo mennen lavi yo antanke kretyen, yo gen anpil konesans sou Labib, yo byen konprann Ekriti yo e yo renmen frè ak sè yo toutbonvre. Yo gen kouraj pou yo pale ak moun ki nan kongregasyon an k ap fè sa ki mal yon fason pou korije yo, sa ki pèmèt yo pwoteje mouton yo kont kèlkeswa moun ki ta vle eksplwate yo (Eza. 32:2). Tout moun ki nan kongregasyon an konnen siveyan yo kòm moun ki gen matirite e ki gen bonjan sousi pou twoupo Bondye a.

⁹ Frè ki kalifye pou vin siveyan yo demontre yo gen sajès nan fason yo mennen vi yo. Yon siveyan ki marye dwe suiv prensip ki nan Bib la ki gen rapò ak maryaj. Sa vle di li dwe gen yon sèl madanm, e li dwe yon moun ki dirije pwòp kay li yon fason ki kòrèk. Si pitit li gen lafwa, si l kenbe pitit li nan soumisyon ak nan diyite, e si pitit li pa gen repitasyon moun ki lage kò yo nan debòch, ni yo pa rebèl, moun nan kongregasyon an ap santi yo alèz pou yo pwoche bò kot frè sa a pou yo ka jwenn konsèy anrapò ak pwoblèm yo jwenn nan fanmi yo e anrapò ak lavi yo antanke kretyen. Anplis de sa, siveyan an dwe san repwòch, li pa dwe gen akizasyon sou do l, e menm moun ki deyò yo ta dwe bay bon temwayaj sou li. Li pa dwe gen prèv kont li pou move konduit, pou sa pa sal repitasyon kongregasyon an. Pou yon frè kalifye pou l vin siveyan, si yo te ba l yon reprimann pou bagay mal li te fè, ta dwe gen yon bon ti tan ki pase depi yo leve reprimann nan. Frè ak sè ki nan kongregasyon an santi yo motive pou yo imite bèl egzanp siveyan yo bay e yo kontan suiv konsèy yo ba yo pou yo rete djanm nan sèvis y ap bay Bondye a. — 1 Kor. 11:1; 16:15, 16.

¹⁰ Ansyen sa yo ki kalifye e ki gen responsablite pou yo ede kongregasyon an jwe menm wòl ak ansyen ki te ann Izrayèl yo. Labib pale de ansyen ki te ann Izrayèl yo kòm gason “ki gen sajès, ki prevwayan e ki gen eksperyans”. (Det. 1:13.) Ansyen yo se pa moun ki pa janm fè peche, men moun ki nan kongregasyon an ak moun ki nan zòn bò lakay yo konnen yo kòm moun ki dwat, ki gen lakrentif pou Bondye e ki gen yon bon ti tan depi y ap aplike prensip Bondye yo nan lavi yo. Lefètke yo san repwòch, yo santi yo alèz pou yo pale devan kongregasyon an. — Wom. 3:23.

¹¹ Frè ki kalifye pou yo sèvi kòm siveyan yo modere nan abitid yo ak nan fason y ap boule ak lòt moun. Yo pa moun ki fanatik. Olye de sa, yo mennen lavi yo yon fason ki montre yo se moun ki ekilibre e ki gen metriz. Yo demontre yo modere nan kantite manje yo manje, nan kantite bwason yo bwè ak nan kantite tan yo pase nan divètisman. Yo modere nan bwè bwason ki gen alkòl, konsa yo pa bay okazyon pou yo akize yo kòm moun ki bwasonyè. Yon moun ki pèdi bonsans li akoz li bwè bwason ki gen alkòl kapab pèdi metriz byen fasil e li pa anmezi pou l ede frè ak sè yo kenbe bon relasyon yo ak Bondye.

¹² Pou yon frè byen ranpli responsablite li genyen pou l veye sou kongregasyon an, sa mande pou l gen lòd. Li montre li gen lòd nan fason li pran swen aparans li, nan fason li pran swen kay li e nan aktivite l ap fè chak jou. Li pa gen abitid ret tann dènye moman pou l fè tout sa l gen pou l fè. Apre l fin reflechi sou sa l gen pou l fè, li fè bonjan planifikasyon. Li se yon moun ki toujou suiv prensip Bondye yo.

¹³ Yon siveyan dwe yon moun ki rezonab. Li dwe kapab travay nan tèt ansanm avèk lòt frè ki fè pati gwoup ansyen an epi kolabore avèk yo. Li pa dwe pran tèt li pou yon pakèt afè e li pa dwe twò egzijan. Antanke yon moun ki rezonab, li pa dwe bay opinyon pa l twòp valè, kòmkwa se pwennvi pa l la ki pi bon pase pa lòt ansyen yo. Sa ka rive gen lòt ansyen ki gen kalite oswa kapasite li menm li pa genyen. Yon ansyen montre li rezonab lè l gen menm pwennvi ak Bib la e lè li fè efò pou l imite egzanp Jezi Kris (Flp. 2:2-8). Li pa dwe renmen fè kont ni li pa dwe yon moun ki vyolan, men li dwe gen respè pou lòt moun, e li dwe konsidere lòt moun siperyè l. Li pa dwe gen tèt di, li pa toujou ap ensiste pou se pwennvi pa l lòt moun aksepte. Li pa dwe yon moun ki renmen fè kòlè, olye de sa, li se yon moun ki favorize lapè nan fason li boule ak lòt moun.

¹⁴ Menm jan an tou, yon frè ki kalifye pou l sèvi antanke siveyan nan kongregasyon an se yon moun ki gen bonsans. Sa vle di li se yon moun ki ekilibre, ki pa kouri jije lòt moun. Li byen konprann prensip Jewova yo ak fason pou l aplike yo. Yon moun ki gen bonsans se yon moun ki koute konsèy e ki suiv direksyon òganizasyon an ba li. Li pa yon moun ki ipokrit.

¹⁵ Pòl te fè Tit sonje yon siveyan se yon moun ki renmen fè sa ki byen. Li dwe yon moun ki jis e ki fidèl. Li montre li gen kalite sa yo nan fason li boule ak lòt moun ak nan fason li pran pozisyon fèm pou sa ki jis ak sa ki byen. Li rete atache ak Jewova e li toujou suiv prensip Bondye yo ki jis. Li pa rakonte bagay konfidansyèl lòt moun. Anplis de sa, li vrèman renmen akeyi moun, li bay tout li menm ak sa l posede pou l ede lòt moun. — Tra. 20:33-35.

¹⁶ Pou yon frè byen ranpli responsablite l antanke siveyan, li dwe gen kapasite pou l anseye. Ann amoni ak pawòl Pòl te ekri Tit yo, yon siveyan dwe “rete kole sou pawòl ki fidèl la nan fason l ap anseye, dekwa pou l ka ankouraje moun grasa ansèyman ki pwofitab la e pou l ka reprimande moun k ap pale kont ansèyman sa a”. (Tit 1:9.) Li dwe kapab rezone ak moun, bay prèv, reponn objeksyon moun fè, epi byen sèvi ak Labib yon fason pou l konvenk lòt moun e pou l fòtifye lafwa yo. Yon siveyan dwe sèvi ak kapasite li genyen pou l anseye, e li fè sa ni nan tan favorab, ni nan tan ki difisil (2 Tim. 4:2). Li demontre bonjan pasyans, e sa pèmèt li korije moun ki nan erè yo avèk dousè, konvenk moun ki gen dout yo epi motive yo pou yo fè bèl aksyon sou baz lafwa. Si yon siveyan kapab anseye yon pakèt moun ki nan yon oditwa oswa li kapab anseye yon sèl moun fasafas, li montre aklè li gen kapasite pou l anseye.

¹⁷ Li enpòtan pou ansyen yo chofe nan travay predikasyon an. Nan domèn sa a tou, yo dwe montre y ap fè efò pou yo imite Jezi ki te bay travay predikasyon an priyorite sou tout lòt bagay. Jezi te enterese nan disip li yo, li te ede yo vin pi efikas nan travay predikasyon an (Mak 1:38; Lik 8:1). Lè ansyen yo detèmine pou yo toujou pase tan nan travay predikasyon an malgre yo gen anpil responsablite, sa ankouraje tout moun nan kongregasyon an pou yo chofe nan travay sa a tou. Lè ansyen yo pase anpil tan ap preche ak fanmi pa yo e ak lòt moun nan kongregasyon an, kòm rezilta, “youn [...] ankouraje lòt”. — Wom. 1:11, 12.

¹⁸ Tout enfòmasyon nou sot wè la yo montre y ap atann anpil bagay nan men siveyan yo. Se sèten pa gen yon siveyan ki rive ranpli kondisyon ki nan Bib la nèt nan yon nivo kote l pa bezwen pwogrese ankò. Men, yon siveyan yo nome nan kongregasyon an pa dwe manke okenn nan kalite sa yo nan pwen pou sa ta parèt li gen yon gwo mankman. Gen kalite kèk ansyen gendwa plis genyen lakay yo, alòske gen lòt kalite lòt ansyen yo gendwa plis genyen lakay yo. Konsa, gwoup ansyen an gen tout bèl kalite ki nesesè pou yo byen pran swen kongregasyon Bondye a.

¹⁹ Lè ansyen yo antanke gwoup rekòmande pou yo nome yon frè kòm siveyan, yo pa dwe bliye yon pawòl apot Pòl te di. Men sa l te di: “M ap di chak moun ki la pami nou pou l pa panse de tèt li plis pase sa l dwe panse, men pou l panse yon fason pou l vin gen bonsans, e chak moun ap fè sa selon mezi lafwa Bondye ba li a.” ​(Wom. 12:3). Se sa k fè yon ansyen pa dwe pran tèt li pou yon pakèt afè. Li pa dwe montre li ‘twò jis’ lè l ap egzamine si yon frè kalifye pou yo nome l (Ekl. 7:16). Lè gwoup ansyen an ap egzamine si yon frè kalifye pou yo nome l, y ap egzamine kondisyon ki nan Bib la e y ap gade si frè a ranpli kondisyon sa yo nan yon degre ki rezonab. Lè y ap rekòmande pou yo nome yon frè, yo dwe respekte prensip Jewova yo ki jis, paske sa ap nan enterè kongregasyon an. Yo dwe sonje pa gen pèsonn ki pafè. Mete sou sa, yo pa dwe gen prejije ni yo pa dwe ipokrit. Anvan yo fè yon rekòmandasyon, yo dwe reflechi seryezman pou yo wè si frè yo vle nome a ranpli tout kondisyon ki nan Bib la, konsa, y ap suiv direksyon lespri sen. Se youn nan gwo responsablite ansyen yo genyen, e yo pa dwe janm bliye sa apot Pòl te di Timote a. Men sa li te di l: “Pa janm prese poze men w sou okenn moun.” — 1 Tim. 5:21, 22.

²⁰ Frè ki kalifye yo montre se lespri sen k ap dirije yo e yo demontre fwi lespri Bondye a nan lavi yo. Pòl mansyone nèf aspè ki gen nan fwi lespri a, anpalan de “lanmou, lajwa, lapè, pasyans, byenveyans, bonte, lafwa, dousè, metriz”. (Gal. 5:22, 23.) Siveyan sa yo ankouraje frè ak sè yo e yo ede yo rete ini nan sèvis sakre y ap bay Jewova a. Konduit yo genyen ak fwi travay yo montre se lespri sen ki nome yo. — Tra. 20:28.

²¹ Li enpòtan pou ansyen yo travay nan tèt ansanm pou yo prezève inite ki genyen nan kongregasyon an. Yo ka pa gen menm pèsonalite, men yo fè sa yo kapab pou gwoup ansyen an rete ini lè youn koute lòt avèk respè, menm lè youn pa dakò ak lòt sou tout pwen y ap diskite. Lè gwoup ansyen an reyini pou yo pran yon desizyon, chak ansyen dwe dispoze sede epi soutni desizyon final la, depi desizyon an pa vyole yon prensip ki nan Bib la. Lè yon ansyen dispoze sede, li montre se “sajès ki sot anwo a [...] ki renmen lapè, ki rezonab” k ap gide l (Jak 3:17, 18). Yon ansyen pa dwe panse li siperyè lòt ansyen yo, ni li pa dwe chèche domine sou yo. Lè ansyen yo kolabore youn ak lòt antanke gwoup pou byen kongregasyon an, an reyalite, se ak Jewova yo kolabore. — 1 Kor., chap. 12; Kol. 2:19.

²² Frè ki gen matirite yo ta dwe chèche vin siveyan (1 Tim. 3:1). Men, pou yon frè ki ansyen fè travay li byen, sa mande pou l fè anpil efò e pou l dispoze fè sakrifis. Sa vle di li dwe disponib pou l sèvi frè ak sè yo, pou l ede yo kenbe bon relasyon yo gen ak Jewova. Si yon frè ap chèche vin ansyen, li dwe fè efò pou l ranpli kondisyon ki nan Bib la.

²³ Yon frè k ap sèvi kòm ansyen fidèlman depi yon bon kantite tan ka vin limite nan sa l ka fè akoz li malad oswa akoz li gen yon lòt pwoblèm. Petèt laj li pa pèmèt li ranpli responsablite l genyen antanke siveyan, jan l te konn fè sa anvan. Menmsi sa, toutotan li se yon frè ki nome, yo dwe kontinye respekte l e yo dwe kontinye konsidere l kòm ansyen. Menmsi li limite nan sa l ka fè, se pa yon rezon ki fè l dwe sispann sèvi kòm ansyen. Li toujou merite pou yo ba li yon onè ki doub, menm jan ak lòt ansyen k ap travay di nan pran swen twoupo a.

²⁴ Men, si yon frè panse li t ap pi bon pou l sispann sèvi kòm ansyen akoz sitiyasyon l chanje, li kapab chwazi fè sa (1 Pyè 5:2). Yo dwe toujou respekte l. Li kapab fè anpil bagay pou ede kongregasyon an, menmsi yo pa ba li privilèj ak responsablite yon ansyen kapab genyen.

²⁵ Ansyen yo gen divès responsablite nan kongregasyon an. Genyen yon ansyen ki kowòdonatè gwoup ansyen an, gen yon sekretè, yon siveyan sèvis, yon kondiktè etid Toudegad ak yon siveyan pou reyinyon Lavi nou ak travay nou fè a. Anpil ansyen sèvi kòm siveyan gwoup pou predikasyon. Lè yon ansyen gen youn nan responsablite sa yo, pa gen limit sou kantite tan li kapab kontinye genyen l. Natirèlman, si yon frè pa abite nan tèritwa kongregasyon an ankò, oubyen li pa ka kontinye ranpli responsablite l genyen antanke ansyen akoz pwoblèm sante, oubyen si l pa kalifye ankò paske l pa ranpli kondisyon ki nan Bib la, yo ka chwazi yon lòt ansyen pou ranplase l. Nan kongregasyon kote pa gen anpil ansyen, li ka nesesè pou yon ansyen gen plizyè responsablite anmenmtan, annatandan gen lòt frè ki vin kalifye pou yo nome yo kòm ansyen.

²⁶ Lè ansyen yo reyini ansanm, se kowòdonatè gwoup ansyen an ki prezide reyinyon an. Antanke kowòdonatè, li montre li gen imilite nan fason l kolabore ak lòt ansyen yo pou yo pran swen twoupo Bondye a (Wom. 12:10; 1 Pyè 5:2, 3). Li dwe yon frè ki gen kapasite pou l òganize e ki dirije avèk dilijans. — Wom. 12:8.

²⁷ Sekretè a kenbe dosye kongregasyon an e li fè ansyen yo konnen yon seri bagay enpòtan ki gen rapò ak kongregasyon an. Si sa nesesè, gwoup ansyen an ka deziyen yon lòt ansyen oswa yon sèvitè ministeryèl ki kalifye pou ede l.

²⁸ Siveyan sèvis la responsab pou l fè yon seri aranjman pou kongregasyon an patisipe nan travay predikasyon an e li responsab lòt bagay ankò ki gen rapò ak travay predikasyon an. Li planifye pou l vizite yon gwoup chak mwa. E li chwazi nan ki wikenn l ap fè sa. Nan ti kongregasyon kote pa gen anpil gwoup pou predikasyon, li ka pran dispozisyon pou l vizite chak gwoup de fwa nan ane a. Pandan vizit li a, li kondui reyinyon pou predikasyon, li preche kay an kay ak gwoup la e li ede pwoklamatè yo pou yo fè vizit ak etid biblik.

²⁹ Youn nan gwo privilèj ansyen yo genyen nan kongregasyon an se sèvi antanke siveyan gwoup. Men kèk responsablite siveyan gwoup la genyen: 1) Li dwe enterese anpil nan kalite relasyon chak moun ki nan gwoup la genyen ak Bondye; 2) li dwe ede chak pwoklamatè ki nan gwoup la pou yo patisipe nan travay predikasyon an regilyèman, pou yo chofe nan aktivite sa a e pou yo pran plezi ladan l; e 3) li dwe ede sèvitè ministeryèl ki nan gwoup la e li fòme yo pou yo vin kalifye pou yo jwenn plis responsablite nan kongregasyon an. Se gwoup ansyen an k ap detèmine ki frè ki pi kalifye pou yo fè tout travay siveyan gwoup yo gen pou yo fè yo.

³⁰ Parapò ak tout travay yon siveyan gwoup gen pou l fè, li pi bon pou se yon ansyen ki siveyan yon gwoup, depi sa posib. Yon sèvitè ministeryèl ki kalifye kapab responsab yon gwoup pou predikasyon, annatandan gen yon ansyen ki vin siveyan gwoup la. Yon sèvitè ministeryèl ki gen responsablite sa a, yo rele l sèvitè gwoup. Yo rele l konsa paske li pap sèvi antanke siveyan nan kongregasyon an. Se anba sipèvizyon gwoup ansyen an li ranpli responsablite li genyen antanke sèvitè gwoup.

³¹ Youn nan aspè enpòtan ki gen nan travay siveyan gwoup la se pran devan nan travay predikasyon an. Lefètke l preche regilyèman, li chofe nan travay predikasyon an e li kontan patisipe ladan l, sa ankouraje pwoklamatè ki nan gwoup la. Piske pwoklamatè yo apresye ankourajman ak èd yo jwenn lè yo ansanm, li t ap bon pou gen yon pwogram predikasyon k ap bon pou pifò moun ki nan gwoup la (Lik 10:1-16). Siveyan gwoup la bezwen asire l toujou gen ase tèritwa pou pwoklamatè yo preche. An jeneral, lè gen reyinyon predikasyon, se li ki kondui reyinyon an e se li ki òganize pwoklamatè yo pou aktivite predikasyon k ap fèt nan jounen an. Si l pa ka la, li dwe fè aranjman pou yon lòt ansyen oubyen pou yon sèvitè ministeryèl ranplase l. Si l pa jwenn yon lòt ansyen oubyen yon sèvitè ministeryèl pou ranplase l, li kapab mande yon pwoklamatè ki kalifye ranplase l, yon fason pou pwoklamatè k ap soti yo ka jwenn yon moun pou gide yo.

³² Siveyan gwoup la dwe fè preparasyon alavans pou vizit siveyan sèvis la. Li fè gwoup la konnen ki lè vizit la ap fèt e li pran tan pou l pale ak gwoup la sou byenfè y ap jwenn pandan vizit la. Si tout moun nan gwoup la byen enfòme sou vizit la, y ap kapab soutni l ak kè kontan.

³³ Gwoup predikasyon yo pa gen anpil pwoklamatè ladan yo, e gen rezon pou sa. Sa pèmèt siveyan gwoup la byen konnen tout moun ki fè pati gwoup la. Antanke yon bèje ki gen lanmou, li enterese anpil nan chak moun ki nan gwoup la. Li chèche ede chak moun e li ankouraje yo pou yo preche e pou yo asiste reyinyon ki gen nan kongregasyon an epi patisipe ladan yo. Anplis de sa, li fè tout sa l kapab pou l ede chak moun ki nan gwoup la kontinye gen bon relasyon ak Bondye. Si gen moun nan gwoup la ki malad oswa ki dekouraje, li pase vizite yo. Bonjan konsèy li bay moun nan gwoup la kapab motive kèk ladan yo pou yo chèche jwenn plis privilèj nan kongregasyon an, sa k ap pèmèt yo anmezi pou yo sèvi frè ak sè yo plis toujou. Nòmalman, yon siveyan gwoup ap fè plis efò pou l ede moun ki fè pati gwoup li a. Men, antanke ansyen e bèje, li gen sousi ak lanmou pou tout moun ki nan kongregasyon an e li dispoze ede kèlkeswa moun ki bezwen pou yo ede l. — Tra. 20:17, 28.

³⁴ Youn nan responsablite siveyan gwoup la genyen se ranmase rapò sèvis moun ki nan gwoup li a. Apre sa, li remèt sekretè a rapò sa yo. Pwoklamatè yo ede siveyan gwoup la fè travay sa a lè yo pa pran tan pou yo remèt li rapò pa yo. Yo ka fè sa lè yo remèt li rapò yo nan fen chak mwa, oubyen lè yo depoze rapò yo nan yon bwat ki la pou sa nan Sal Wayòm nan.

³⁵ Gen kèk bagay se komite sèvis kongregasyon an ki regle yo. Se kowòdonatè gwoup ansyen an, sekretè a ak siveyan sèvis la ki fòme komite sa a. Pa egzanp, komite sa a bay pèmisyon pou yo fè maryaj ak antèman nan Sal Wayòm nan e li deside nan ki gwoup pou predikasyon l ap mete chak pwoklamatè. Mete sou sa, li apwouve demann pwoklamatè yo fè pou yo sèvi kòm pyonye oksilyè, pyonye pèmanan e pou yo antre nan lòt fòm sèvis ankò. Komite sèvis la travay anba direksyon gwoup ansyen an.

³⁶ Biwo filyal la detèmine travay frè sa yo gen pou yo fè, ansanm ak travay frè ki kondiktè etid Toudegad la, frè ki siveyan reyinyon Lavi nou ak travay nou fè a ak travay lòt ansyen ki fè pati gwoup ansyen an fè yo.

³⁷ Nan chak kongregasyon, gwoup ansyen yo reyini ansanm regilyèman pou yo pale sou kesyon ki gen rapò ak pwogrè frè ak sè yo nan sèvis y ap bay Jewova a. Anplis reyinyon ansyen yo genyen ak siveyan sikonskripsyon an pandan l ap vizite kongregasyon an, ansyen yo reyini anviwon twa mwa apre chak vizit. Nòmalman, ansyen yo kapab reyini ansanm nenpòt lè sa nesesè.

³⁸ Siveyan yo se pechè menm jan ak tout moun, sepandan, tout moun nan kongregasyon an jwenn lòd pou yo soumèt devan yo paske aranjman pou gen siveyan nan kongregasyon an soti nan Jewova. L ap fè siveyan yo rann kont pou aksyon yo. Siveyan yo reprezante ni Jewova ni pouvwa li genyen antanke Sila a k ap dirije òganizasyon l lan. Men sa Bib la di nan Ebre 13:17: “Obeyi moun k ap dirije nou yo, e soumèt devan yo, paske yo toujou ap veye sou nou antanke moun ki gen kont pou yo rann, dekwa pou yo fè sa ak kè kontan, pou yo pa fè l nan plenyen, paske sa t ava mal pou nou.” Menm jan Jewova itilize lespri sen pou l nome yon frè siveyan, se konsa tou l ap itilize lespri sen pou l diskalifye yon siveyan si siveyan sa a pa demontre fwi lespri a e li vin ap viv yon fason ki depaman ak sa Bib la egzije yo.

³⁹ Èske nou pa apresye toutbon fason siveyan yo travay di nan kongregasyon an ak bon egzanp yo ban nou? Nan youn nan lèt apot Pòl te ekri frè ak sè nan kongregasyon Tesalonik lan, men sa l te di yo: “Frè nou yo, nou mande nou pou nou montre respè pou moun k ap travay di pami nou, moun k ap dirije nou nan Seyè a e k ap ban nou avètisman. Se pou nou renmen yo anpil e se pou nou gen anpil konsiderasyon pou yo pou travay y ap fè a.” ​(1 Tes. 5:12, 13). Pifò nan travay di siveyan yo fè nan kongregasyon an se pou pèmèt nou pi alèz nan sèvis n ap bay Bondye a e pou nou jwenn plis jwa ladan l. Nan premye lèt Pòl te ekri Timote a, Pòl te pale tou de fason moun nan kongregasyon an dwe trete siveyan yo. Li te di: “Ansyen k ap byen dirije yo merite yon onè doub, sitou sa yo k ap travay di nan pawòl la ak nan ansèyman an.” — 1 Tim. 5:17.

⁴⁰ Pafwa, gen kèk ansyen yo nome pou yo fè pati Gwoup pou vizite malad yo. Gen lòt ki gen privilèj pou yo fè pati Komite lyezon ospitalye yo e yo vizite lopital ak doktè pou ankouraje yo itilize tretman ki pa mande pou yo sèvi ak san pou yo trete Temwen Jewova yo. Gen lòt siveyan ankò ki travay nan enterè Wayòm nan lè yo patisipe nan bati Sal Wayòm ak Sal asanble, lè yo patisipe nan fè antretyen nan bilding sa yo, oswa lè yo sèvi kòm manm Komite kongrè. Tout moun nan òganizasyon an apresye travay di frè sa yo fè e lefètke yo dispoze bay tout yo menm nan sèvis y ap bay Jewova a. Vrèmanvre, nou “kontinye bay moun konsa anpil valè”. — Flp. 2:29.

⁴¹ Se Kolèj santral la ki nome yon seri frè kalifye pou yo sèvi kòm siveyan sikonskripsyon. Se filyal la ki fè frè sa yo konnen ki sikonskripsyon y ap desèvi. An jeneral, yo vizite kongregasyon yo de fwa nan ane a. Detanzantan, y al vizite pyonye ki nan tèritwa ki lwen. Yo fè yon lis tout kongregasyon yo gen pou y al vizite e yo enfòme kongregasyon yo alavans yon fason pou frè ak sè yo ka byen pwofite vizit la.

⁴² Se kowòdonatè gwoup ansyen an ki pran devan nan òganize tout bagay yon fason pou vizit la ka ankourajan pou tout moun (Wom. 1:11, 12). Lè kowòdonatè a resevwa enfòmasyon ki fè l konnen ki lè vizit la ap fèt ak ki sa siveyan an ak madanm li ap bezwen (si l marye), l ap fè aranjman pou siveyan an jwenn yon kote pou l desann ak lòt bagay k ap nesesè. Kowòdonatè a kapab mande diferan frè ede l nan aranjman l ap fè yo. L ap veye pou tout moun konnen aranjman ki fèt yo, san wete siveyan an.

⁴³ Siveyan sikonskripsyon an ap kontakte kowòdonatè gwoup ansyen an konsènan jou reyinyon yo ak lè reyinyon yo, san wete reyinyon pou predikasyon yo. Tout reyinyon yo ap fèt sou baz sijesyon siveyan sikonskripsyon an bay e selon enstriksyon ki soti nan biwo filyal la. Tout moun dwe jwenn enfòmasyon alavans konsènan ki lè reyinyon kongregasyon yo ap fèt ak ki kote y ap fèt, san wete reyinyon ak pyonye yo, reyinyon ak ansyen yo ak sèvitè ministeryèl yo. Tout moun dwe jwenn enfòmasyon alavans tou konsènan ki lè reyinyon pou predikasyon yo ap fèt ak ki kote y ap fèt.

⁴⁴ Nan madi aprèmidi, siveyan sikonskripsyon an egzamine dosye Aktivite pwoklamatè yo, rapò sou asistans reyinyon yo, rapò sou asiyasyon tèritwa yo ak kont kongregasyon an. Sa ede l wè ki bezwen kongregasyon an genyen e ki jan l kapab ede frè ki responsab dokiman sa yo. Kowòdonatè gwoup ansyen an dwe fè siveyan an jwenn dokiman sa yo alavans.

⁴⁵ Pandan vizit la, siveyan an pran tan pou l pale ak frè ak sè yo otank posib anvan e apre reyinyon yo, nan predikasyon, nan moman repa yo ak nan lòt okazyon ankò. Mete sou sa, li rankontre ak ansyen yo ak sèvitè ministeryèl yo, li ba yo konsèy ki chita sou prensip ki nan Bib la ak ankourajman k ap ede yo pran swen twoupo ki sou kont yo a (Pwo. 27:23; Tra. 20:26-32; 1 Tim. 4:11-16). Anplis de sa, li rankontre ak pyonye yo pou l ankouraje yo nan travay y ap fè antanke pyonye a e pou l ede yo ak kèlkeswa pwoblèm yo genyen ki gen rapò ak sèvis y ap bay Jewova a.

⁴⁶ Si gen kèk pwoblèm ki prezante, siveyan sikonskripsyon an ap ede ansyen yo rezoud pwoblèm nan pandan semèn vizit la. Si yo pa gentan rezoud pwoblèm sa yo pandan semèn vizit la, li kapab ede ansyen yo oswa moun ki konsène yo fè rechèch pou yo jwenn enstriksyon ki baze sou Bib la ki gen rapò ak sitiyasyon an. Si li menm ak ansyen yo wè biwo filyal la ap bezwen fè suivi sou sitiyasyon an, y ap prepare yon rapò detaye pou yo voye bay filyal la.

⁴⁷ Pandan siveyan sikonskripsyon an ap vizite kongregasyon an, li asiste tout reyinyon yo. Pafwa, biwo filyal la kapab bay enstriksyon pou gen ajisteman ki fèt nan reyinyon yo. Siveyan an ap bay diskou nan entansyon pou l ankouraje frè ak sè yo, pou l motive yo, pou l anseye yo e pou l fòtifye lafwa yo. Li fè efò pou l fè frè ak sè yo vin pi renmen ni Jewova, ni Jezi, ni òganizasyon an.

⁴⁸ Youn nan objektif siveyan sikonskripsyon an genyen pandan vizit la se ankouraje frè ak sè yo pou yo chofe nan travay predikasyon an epi ba yo konsèy k ap ede yo nan domèn sa a. Li posib pou anpil moun nan kongregasyon an fè ajisteman nan pwogram yo pou yo ka patisipe plis nan travay predikasyon an pandan semèn nan. Petèt yo kapab pran sèvis pyonye oksilyè nan mwa siveyan sikonskripsyon an ap vizite kongregasyon an. Nenpòt moun ki ta renmen preche epi fè vizit ak siveyan an oswa ak madanm li kapab chwazi ki jou ak ki lè y ap fè sa. Nou kapab jwenn anpil byenfè lè nou preche ak siveyan an oswa ak madanm li epi nou fè vizit ak yo. Siveyan an ak madanm li ap vrèman apresye tout efò w fè pou w soutni travay predikasyon an pandan semèn vizit la. — Pwo. 27:17.

⁴⁹ Chak ane, gen de asanble sikonskripsyon ki fèt nan chak sikonskripsyon. Se siveyan sikonskripsyon an ki responsab pou l fè tout aranjman ki gen pou fèt pou asanble sa yo. Li nome yon siveyan asanble ak yon siveyan asanble adjwen. Yo travay avè l nan tèt ansanm pou yo ede l òganize asanble yo. Sa pèmèt siveyan sikonskripsyon an konsantre sou pwogram asanble a. Siveyan an chwazi lòt frè ankò ki kapab pou yo responsab divès sèvis ki genyen yo. Li fè aranjman tou pou gen yon odit ki fèt pou kont sikonskripsyon an apre chak asanble. Nan youn nan asanble sikonskripsyon yo ap gen yon reprezantan filyal lak ap jwe wòl oratè vizitè. Gen kèk sikonskripsyon ki divize an seksyon e ki gen asanble sikonskripsyon ki fèt nan chak seksyon paske distans pou frè ak sè yo ta vwayaje pou y al nan asanble yo t ap twò long oswa kote asanble yo t ap fèt la t ap twò piti.

⁵⁰ Siveyan sikonskripsyon an voye rapò sèvis li dirèkteman bay filyal la nan fen chak mwa. Si li te fè kèk ti depans, tankou depans pou l vwayaje, pou manje, pou l jwenn yon kote pou l rete, ak lòt depans ankò ki nesesè pou l kapab fè travay li, si kongregasyon l ap desèvi a pa kouvri depans sa yo, li kapab voye depans sa yo bay filyal la, e filyal la ap ranbouse l kòb li depanse yo. Siveyan sikonskripsyon yo gen konfyans depi yo bay travay y ap fè pou Wayòm nan premye plas, y ap jwenn tout sa yo bezwen nan domèn materyèl, jan Jezi te pwomèt sa (Lik 12:31). Kongregasyon yo dwe sonje se yon privilèj yo genyen pou yo akeyi frè sa yo k ap sèvi yo e ki devwe. — 3 Jan 5-8.

⁵¹ Nan chak filyal Temwen Jewova ki sou tè a, gen yon Komite filyal ki gen twa oswa plis frè kalifye ki gen matirite e k ap sipèvize travay predikasyon an nan peyi ki anba sipèvizyon filyal la. Se gendwa yon sèl peyi oswa plizyè peyi. Gen youn nan frè sa yo ki sèvi kòm kowòdonatè Komite filyal la.

⁵² Frè k ap sèvi nan Komite filyal la sipèvize tout sa ki gen rapò ak kongregasyon ki nan tèritwa ki sou kont yo a. Komite a sipèvize predikasyon bon nouvèl konsènan Wayòm nan nan tout tèritwa ki sou kont filyal la e li veye pou kongregasyon yo ak sikonskripsyon yo byen òganize, yon fason pou komite a ka byen jere bezwen ki genyen nan tèritwa a. Komite a responsab tou pou l veye sou travay misyonè yo, pyonye espesyal yo, pyonye pèmanan yo ak pyonye oksilyè yo ap fè. Lè gen asanble ak kongrè, komite a fè aranjman ki nesesè e li bay asiyasyon “pou tout bagay fèt yon fason ki konvnab e nan lòd”. — 1 Kor. 14:40.

⁵³ Nan kèk peyi, gen yon Komite peyi ki anba sipèvizyon yon Komite filyal ki nan yon lòt peyi. Sa pèmèt yo pi byen sipèvize travay k ap fèt nan peyi ki gen Komite peyi a. Komite sa a sipèvize Betèl la, ak biwo Betèl la, li jere korespondans ak rapò yo ak aktivite k ap fèt nan travay predikasyon an. Komite peyi a kolabore ak Komite filyal la nan enterè travay Wayòm nan.

⁵⁴ Se Kolèj santral la ki nome tout frè k ap sèvi nan Komite filyal yo ak Komite peyi yo.

⁵⁵ Detanzantan, Kolèj santral la fè aranjman pou gen frè kalifye k al vizite chak filyal ki gen sou tè a. Lè yon frè gen privilèj sa a, yo rele l reprezantan syèj mondyal la. Prensipal travay li gen pou l fè se ankouraje fanmi Betèl la epi ede Komite filyal la rezoud pwoblèm komite a kapab jwenn anrapò ak travay preche epi fè disip la oswa reponn kesyon ki gen rapò ak travay sa a. Frè sa a rankontre ak kèk siveyan sikonskripsyon yo chwazi e detanzantan, li rankontre ak misyonè ki nan tèritwa a. Lè konsa, li pale avèk yo konsènan pwoblèm yo rankontre ak bezwen yo genyen, li ba yo ankourajman anrapò ak travay y ap fè ki pi enpòtan an, anpalan de travay preche epi fè disip la.

⁵⁶ Reprezantan syèj mondyal la enterese anpil nan sa k ap fèt nan travay predikasyon an, ni nan lòt aktivite ki genyen nan kongregasyon yo. Si gen tan pou sa, li kapab al vizite biwo tradiksyon ki pa nan Betèl yo tou. Lè frè sa a ap vizite yon filyal, otank posib, li patisipe nan preche bon nouvèl Wayòm nan tou.

⁵⁷ Grasa siveyan yo ki se yon seri frè ki gen matirite, ki travay di e ki pran swen nou avèk amou, nou jwenn anpil benediksyon. Lefètke nou kontinye soumèt devan siveyan yo ki gen responsablite pou yo pran swen nou, nou rete ini ak Chèf kongregasyon an, anpalan de Kris Jezi (1 Kor. 16:15-18; Efe. 1:22, 23). Kòm rezilta, lespri sen Bondye aktif nan kongregasyon yo sou tout tè a e Pawòl Bondye a gide nou nan travay n ap fè sou tout tè a. — Sòm 119:105.