• Annou apresye wòl san parèy Jezi jwe nan objektif Bondye a
    Toudegad — 2008 | 15 desanm

    • Gran Prèt

      15. Kòman wòl Jezi jwe antanke Gran Prèt la diferan parapò ak wòl tout lòt gran prèt yo te jwe ?

      15 Nan tan lontan, te gen anpil gason ki te sèvi kòm gran prèt, poutan wòl Jezi jwe antanke Gran Prèt la vrèman san parèy. Kòman sa ? Men sa Pòl esplike : “ Li pa bezwen ap ofri chak jou yon bann bèt pou yo touye pou peche pa l’ yo anvan, epi pou peche pèp la apre sa. Li pa nan sa li menm. Li fè yon sèl ofrann fini ak sa lè li te ofri tèt li a. Dapre lalwa Moyiz la, se moun ki poko bon nèt [“ ki gen feblès ”, NW] yo te mete sèvi granprèt. Men, dapre pawòl sèman Bondye a, pawòl ki vin lontan apre lalwa a, moun Bondye mete granprèt la, se Pitit li a ki te vin bon nèt [“ ki pafè ”, NW] sou tout pwen pou tout tan. ” — Ebre 7:27, 28b.

      16. Poukisa sakrifis Jezi a se yon sakrifis ki vrèman san parèy ?

      16 Jezi te yon moun pafè, li te egzakteman menm jan Adan te ye anvan Adan te peche (1 Kor. 15:45). Antanke moun pafè, Jezi se sèl moun sou tè a ki te kapab ofri yon sakrifis ki pafè, ki konplè, yon sakrifis yo pa t ap bezwen fè ankò. Sou Lalwa Moyiz la, se chak jou yo te konn ofri sakrifis. Kidonk, tout sakrifis sa yo ak tout sèvis prèt yo te konn fè se te yon senp lonbray sa Jezi te gen pou l akonpli (Ebre 8:5 ; 10:1). Konsa, piske Jezi kapab akonpli plis bagay lontan pase sa tout lòt gran prèt yo te ka akonpli e piske l ap sèvi nètale antanke Gran Prèt, wòl li genyen kòm Gran Prèt la san parèy.