Èske w fidèl nan tout bagay ?
“ Moun ki fidèl nan sa ki toupiti fidèl tou nan sa ki anpil. ” — LIK 16:10.
1. Site youn nan fason Jewova montre li fidèl.
ÈSKE w konn remake sa k rive lonbray yon pyebwa ki reflete atè ofiramezi jounen an ap pase ? Lonbray la ap chanje gwosè e l ap chanje pozisyon. Byen souvan, efò ak pwomès lèzòm fè yo chanje menm jan ak lonbray. Jewova Dye, bò kote pa l, li pa chanje, menm lè tan ap pase. Disip Jak, apre l fin pale de Jewova kòm etan “ Papa limyè yo ki nan syèl la ”, li di : “ Nan li, pa gen varyasyon nan fason lonbray la ap vire [oubyen, varyasyon oswa lonbray ki fèt akoz wotasyon, nòt anba paj]. ” (Jak 1:17). Jewova pa ka chanje, e li diy de konfyans, menm nan mwenn ti detay. Li se “ yon Bondye ki fidèl ”. — Detewonòm 32:4.
2. a) Poukisa nou dwe egzamine tèt nou pou nou wè si nou fidèl ? b) Ki kesyon konsènan fidelite nou pral konsidere ?
2 Lefètke adoratè Bondye yo diy de konfyans, ki jan Bondye konsidere sa ? Li konsidere sa menm jan ak David. Men sa David te di : “ Je m fikse sou moun ki fidèl sou tè a, pou yo ka abite avè m. Moun ki mache yon fason entèg la, se li menm k ap vin sèvi m. ” (Sòm 101:6). Wi, Jewova pran plezi nan fidelite sèvitè l yo. Apot Pòl te gen tout rezon pou l ekri : “ Sa y ap chèche lakay entandan yo, yon nonm, se pou yo jwenn li fidèl. ” (1 Korentyen 4:2). Men, yon moun ki fidèl, ki sa sa vle di ? Nan ki domèn nan lavi a nou dwe aji ak fidelite ? Lè yon moun “ mache yon fason entèg ”, ki benediksyon l ap jwenn ?
Fidèl : sa sa vle di ?
3. Ki sa k ap montre si nou fidèl ?
3 Ebre 3:5 di : “ Moyiz, antanke sèvitè, te fidèl. ” Ki sa k fè pwofèt Moyiz te fidèl ? Toutpandan yo t ap konstwi tabènak la e nan moman yo t ap enstale l, “ Moyiz [te] fè selon tout sa Jewova te òdone l pou l fè. Se egzakteman konsa l te fè ”. (Egzòd 40:16.) Nou menm tou, antanke adoratè Jewova, n ap montre nou fidèl lè nou sèvi Jewova avèk obeyisans. Natirèlman, sa mande pou nou rete fidèl a Jewova menm lè n ap fè fas ak gwo difikilte, ak gwo eprèv. Sepandan, se pa sèlman paske nou reyisi pase gwo eprèv ki vle di nou fidèl. Jezi te di : “ Moun ki fidèl nan sa ki toupiti fidèl tou nan sa ki anpil, e moun ki enjis nan sa ki toupiti enjis tou nan sa ki anpil. ” (Lik 16:10). Nou dwe rete fidèl menm nan kesyon ki sanble piti yo.
4, 5. Lè nou montre nou fidèl “ nan sa ki toupiti ”, ki sa sa revele ?
4 Lè chak jou nou obeyi “ nan sa ki toupiti ”, sa enpòtan pou de rezon. Premyèman, sa revele ki sa souvrènte Jewova vle di pou nou. Sonje eprèv fidelite ki te devan de premye mesyedam yo, anpalan de Adan ak Èv. Sa yo te mande yo a pa t difisil pou yo ditou. Yo te tou senpleman mande yo pou yo pa manje fwi nan yon sèl pyebwa ki te nan jaden Edenn nan, “ pyebwa konesans sa ki byen ak sa ki mal la ”, alòske yo te ka manje tout lòt kalite manje ki te nan jaden an (Jenèz 2:16, 17). Si mesyedam yo te rete fidèl, yo te obeyi kòmandman senp sa a, yo t ap demontre y ap soutni dominasyon Jewova. Lè nou suiv konsèy Jewova yo chak jou nan lavi nou, sa montre nou pran pozisyon pou souvrènte Jewova.
5 Dezyèmman, konpòtman nou “ nan sa ki toupiti ” gen enfliyans sou fason n ap konpòte nou “ nan sa ki anpil ”, sa vle di lè nou devan sitiyasyon ki pi grav nan lavi a. Sou kesyon sa a, annou konsidere sa k te rive Danyèl ansanm ak twa konpayon ebre li yo ki te fidèl, anpalan de Ananya, Michayèl ak Azarya. Yo te mennen yo ann egzil nan Babilòn nan ane 617 anvan epòk nou an. Alòske kat timesye sa yo te jèn toujou, siman yo te nan adolesans yo, yo te vin twouve yo nan lakou wayal wa Neboukadnetsa. Lè yo rive la, “ nan manje rafine wa a ansanm ak diven li te konn bwè ”, yo te “ fikse yon kantite pou yo chak jou, wi pou nouri yo pandan twazan, yon fason pou nan fen ane sa yo, yo ka kanpe devan wa a ”. — Danyèl 1:3-5.
6. Ki eprèv Danyèl ansanm ak twa konpayon l yo te rankontre nan lakou wayal Babilòn nan ?
6 Sepandan, dispozisyon wa babilonyen an te pran an te mete kat jèn Ebre yo nan yon sitiyasyon ki difisil. Siman, manje rafine wa a te gen ladan l manje Lwa Moyiz la te entèdi (Detewonòm 14:3-20). Petèt yo pa t senyen bèt yo te touye yo kòrèkteman, e manje yon manje konsa, se t ap vyole lwa Bondye (Detewonòm 12:23-25). Petèt tou, se manje yo te sakrifye bay zidòl, jan adoratè babilonyen yo te konn abitye fè anvan yo pran yon repa an kominyon.
7. Ki sa obeyisans Danyèl ansanm ak twa zanmi l yo montre ?
7 Sandout, pou moun ki t ap viv nan lakou wayal wa Babilòn nan, entèdi moun manje yon seri manje se pa t yon bagay ki te gen enpòtans. Men, Danyèl ansanm ak zanmi l yo te pran rezolisyon nan kè yo pou yo pa manje manje ki te entèdi nan Lwa Bondye te bay Izrayèl la, yon fason pou yo pa t kontamine tèt yo. Se yon kesyon ki te gen rapò ak fidelite yo, ak atachman yo pou Bondye. Se poutèt sa yo te mande pou yo ba yo legim ak dlo sèlman, e yo te akòde yo sa (Danyèl 1:9-14). Pou kèk moun jodi a, sa kat jèn sa yo te fè a ka parèt san enpòtans. Men, obeyisans yo devan Bondye montre ki bò yo te kanpe nan kesyon souvrènte Jewova a.
8. a) Anba ki eprèv fidelite twa Ebre yo te pase ? b) Ki jan eprèv sa a te fini, e ki sa sa montre ?
8 Fidelite twa zanmi Danyèl yo nan bagay ki ta ka sanble pa gen gwo enpòtans te prepare yo pou yo fè fas ak pi gwo eprèv. Ouvri bib ou nan Danyèl chapit 3, epi gade ou menm kòman twa Ebre yo te reyaji devan kondanasyon amò yo te ba yo poutèt yo te refize adore imaj annò wa Neboukadnetsa te mete kanpe a. Lè yo mennen yo devan wa a, avèk konfyans, yo te fè konnen detèminasyon yo. Men sa yo te deklare : “ Si sa dwe fèt, Bondye nou an n ap sèvi a kapab delivre nou. Nan founèz dife ki byen cho a, e anba men w, o wa, l ap delivre nou. Men, si sa pa fèt, ou tou konnen, o wa, dye w yo se pa yo menm n ap sèvi, e imaj annò ou mete kanpe a, nou pap adore l. ” (Danyèl 3:17, 18). Èske Jewova te delivre yo ? Sòlda ki t al voye mesye yo anndan founèz dife a, se yo menm ki peri, men twa Ebre fidèl yo soti vivan, chalè founèz la pa t menm flanbe yo. Piske yo te toujou fidèl, sa te pèmèt yo prepare yo pou yo kenbe fidelite yo nan gwo eprèv sa a. Èske sa pa montre enpòtans pou yon moun fidèl nan bagay ki piti ?
Fidelite anrapò ak “ richès ki enjis ”
9. Nan ki kontèks Jezi te di pawòl ki nan Lik 16:10 la ?
9 Anvan Jezi te bay prensip ki di yon moun ki fidèl nan bagay ki sanble l piti fidèl tou nan kesyon ki enpòtan, li te bay moun ki t ap koute l yo konsèy sa a : “ Fè zanmi grasa richès ki enjis nou genyen yo, yon fason pou, lè richès sa yo pa la ankò, yo ka resevwa nou nan abitasyon ki etènèl yo. ” Epi, se apre sa li fè deklarasyon konsènan fidelite nan sa ki toupiti. Annapre, Jezi di : “ Kidonk, si nou pa fidèl anrapò ak richès ki enjis, kiyès ki pral konfye nou sa ki vrè a ? [...] Okenn sèvitè nan yon kay pa ka esklav de mèt. Paske, se swa l ap rayi youn e l ap renmen lòt la, oubyen l ap atache ak youn e l ap meprize lòt la. Nou pa kapab esklav Bondye e esklav richès. ” — Lik 16:9-13.
10. Ki jan nou ka demontre fidelite nou nan fason n ap sèvi ak “ richès ki enjis ” nou genyen ?
10 Ann amoni ak kontèks la, premye aplikasyon pawòl Jezi di nan Lik 16:10 la gen rapò ak fason pou nou sèvi ak “ richès ki enjis ”, sa vle di resous oswa byen materyèl nou posede. Vèsè a di yo enjis paske richès materyèl yo, patikilyèman lajan, sou kontwòl imen pechè. Anplis de sa, lè yon moun vle vin rich, sa ka fè l komèt aksyon ki enjis. Donk, lè nou demontre nou gen sajès nan fason n ap sèvi ak byen materyèl nou posede, nou montre nou fidèl. Olye pou nou sèvi avèk yo nan objektif egoyis, nou vle itilize yo pou nou fè enterè Wayòm nan avanse e pou nou ede moun ki nan bezwen. Lè nou montre fidelite nou nan sans sa a, n ap vin fè zanmi ak Jewova Dye ak Jezi Kris, yo menm ki posede “ abitasyon ki etènèl yo ”. Y ap akeyi nou kote sa yo, sa vle di y ap ban nou lavi etènèl swa nan syèl la swa nan Paradi sou tè a.
11. Poukisa nou pa dwe santi nou jennen pou nou di moun n ap preche yo n ap aksepte resevwa nan men yo yon ofrann pou travay mondyal Temwen Jewova yo ap akonpli a ?
11 Ann konsidere tou posiblite nou bay moun nou kite yon bib oubyen yon piblikasyon biblik nan men yo lè n ap pwoklame mesaj Wayòm nan. Lè nou esplike yo n ap aksepte resevwa nan men yo yon ofrann pou travay mondyal pèp Jewova a ap akonpli a, èske se pa bay nou bay moun sa yo opòtinite pou yo byen sèvi ak resous materyèl yo genyen ? Byenke premye aplikasyon Lik 16:10 la konsène fason n ap itilize resous materyèl nou genyen, prensip sa a valab tou nan lòt domèn ki gen nan lavi a.
Onètete vrèman enpòtan
12, 13. Nan ki domèn nou kapab montre nou onèt ?
12 Gade sa apot Pòl te ekri : “ Nou gen konviksyon nou gen yon konsyans ki dwat, etandone nou vle konpòte nou yon fason ki dwat nan tout bagay. ” (Ebre 13:18). Asireman, ekspresyon “ tout bagay ” la anglobe tout kesyon ki gen rapò ak fason n ap sèvi ak lajan nou. Nou peye dèt nou ansanm ak taks nou atan e nou fè sa avèk onètete. Poukisa se konsa nou fè l ? Akoz konsyans nou e sitou paske nou renmen Bondye, nou vle obeyi enstriksyon li bay (Women 13:5, 6). Ki sa nou fè lè nou jwenn yon bagay ki pa pou nou ? Nou fè efò pou nou fè vrè mèt li jwenn li. Ala yon bèl temwayaj sa vin bay lè nou esplike rezon ki pouse nou pote bagay la bay mèt li !
13 Pou nou fidèl e onèt nan tout bagay, sa mande tou pou nou onèt kote n ap travay. Lè nou onèt nan fason nou travay, sa atire atansyon lòt moun sou ki jan de Dye nou reprezante. Nou pap “ vòlè ” sou lè travay nou nan kalewès. Okontrè, n ap travay di, tankou se pou Jewova (Efezyen 4:28 ; Kolosyen 3:23). Selon yon estimasyon ki fèt nan yon peyi ann Ewòp, sou chak twa anplwaye ki fè doktè yo ba yo yon lèt pou yo jwenn konje maladi, gen youn ladan yo ki sou blòf. Vrè sèvitè Bondye yo pap envante eskiz pou yo pa al travay. Pafwa, Temwen Jewova konn menm jwenn pwomosyon nan men patwon yo poutèt onètete yo ak jan yo travay di. — Pwovèb 10:4.
Fidelite nan ministè nou antanke kretyen
14, 15. Site kèk fason nou kapab montre nou fidèl nan ministè nou antanke kretyen.
14 Kòman nou kapab montre fidelite nou nan ministè yo konfye nou an ? Men sa Bib la di : “ Annou toujou ofri Bondye yon sakrifis louwanj, sa vle di fwi ki sot nan bouch nou ki fè yon deklarasyon piblik pou non li. ” (Ebre 13:15). Meyè fason pou nou demontre fidelite nou nan ministè a se patisipe ladan l regilyèman. Poukisa pou nou ta kite yon mwa pase san nou pa bay temwayaj konsènan Jewova ak objektif li ? Epitou, lè nou patisipe regilyèman nan travay predikasyon an, sa ede nou vin pi abil e pi efikas.
15 Yon lòt bèl fason pou nou montre fidelite nou nan ministè a se lè nou aplike sijesyon nou jwenn nan Toudegad ak nan Ministè Wayòm. Lè nou prepare nou, lè nou sèvi ak prezantasyon yo sijere yo oubyen ak lòt prezantasyon ki reyalis, èske nou pa jwenn pi bon rezilta nan ministè nou ? Lè nou jwenn yon moun mesaj Wayòm nan enterese l, èske nou retounen vizite l rapidman ? E konsènan etid biblik nou gen posiblite kòmanse avèk moun ki enterese yo ? Èske nou diy de konfyans ? Èske nou kondui yo avèk fidelite ? Lè nou montre nou fidèl nan ministè nou, sa ka fè ni nou menm ni moun ki koute nou yo jwenn lavi. — 1 Timote 4:15, 16.
Rete separe ak monn nan
16, 17. Nan ki domèn nou kapab montre nou separe ak monn nan ?
16 Pandan Jezi t ap priye Bondye, men sa l te di konsènan disip li yo : “ Mwen ba yo pawòl ou a, men monn nan rayi yo, paske yo pa fè pati monn nan, menm jan mwen menm mwen pa fè pati monn nan. Sa m mande w, se pa pou w retire yo nan monn nan, men se pou w veye sou yo akoz mechan an. Yo pa fè pati monn nan, menm jan mwen menm mwen pa fè pati monn nan. ” (Jan 17:14-16). Petèt nou fèm e nou detèmine pou nou rete separe ak monn nan nan kesyon ki enpòtan tankou kesyon netralite, fèt ak koutim relijye ansanm ak imoralite. Men, e konsènan bagay ki toupiti yo ? Èske petèt fason monn nan aji enfliyanse nou, e nou gendwa pa menm rann nou kont de sa ? Pa egzanp, si nou pa fè atansyon, li fasil pou fason nou abiye vin san diyite oubyen pou l vin pa konvnab. Fidelite mande pou nou gen ‘ modesti ak bonsans ’ nan kesyon abiman ak kwafi (1 Timote 2:9, 10). Wi, “ nan okenn fason nou pap bay okenn okazyon pou moun trebiche, pou yo pa kritike ministè nou. Men nan tout domèn, nou rekòmande tèt nou kòm minis Bondye ”. — 2 Korentyen 6:3, 4.
17 Lefètke nou vle onore Jewova, nou abiye yon fason ki diy pou n al nan reyinyon kongregasyon an. Se menm bagay la tou lè nou reyini an gran nonb nan asanble nou yo. Rad nou dwe adapte ak sikonstans yo e yo dwe prezantab. Sa sèvi temwayaj pou lòt moun k ap gade. Menm zanj yo ap suiv aktivite nou, tankou yo te konn suiv aktivite Pòl ansanm ak konpayon kretyen l yo (1 Korentyen 4:9). Anfèt, teni nou dwe toujou konvnab. Si pou kèk moun, fidelite nan domèn abiman ka parèt yon kesyon ki pa gen gran enpòtans, sa enpòtan nan je Bondye.
Benediksyon pou moun ki fidèl
18, 19. Ki benediksyon moun ki fidèl yo jwenn ?
18 Yo pale de vrè kretyen yo kòm “ bon entandan bonte Bondye moun pa merite a, yon bonte ki manifeste divès fason ”. Si se sa, yo “ depann de fòs Bondye bay ”. (1 Pyè 4:10, 11.) Anplis de sa, piske nou se entandan, sa yo konfye nou yo, ministè nou ladan l tou, se pa pou nou yo ye, se bonte Bondye moun pa merite a k ap manifeste. Pou nou montre nou se bon entandan, nou konte sou fòs Bondye bay la, “ pisans ki depase sa ki nòmal la ”. (2 Korentyen 4:7.) Ala yon bèl fòmasyon n ap resevwa pou ede nou fè fas ak nenpòt ki eprèv nou ta ka rankontre alavni !
19 Men sa yon salmis te di nan yon chante : “ O, se pou nou renmen Jewova, nou tout fidèl li yo. Moun ki fidèl yo, Jewova ap prezève yo. ” (Sòm 31:23). Annou detèmine pou nou montre nou fidèl, toutpandan nou gen bonjan konfyans Jewova se “ yon Sovè pou tout kalite moun, sitou pou moun ki fidèl yo ”. — 1 Timote 4:10.
Èske nou sonje ?
• Poukisa nou dwe “ fidèl nan sa ki toupiti ” ?
• Ki jan nou ka montre nou fidèl :
nan kesyon onètete ?
nan ministè nou ?
lè nou rete separe ak monn nan ?
[Foto nan paj 13]
Fidèl nan sa ki toupiti, fidèl tou nan sa ki anpil.
[Foto nan paj 16]
“ Konpòte nou yon fason ki dwat nan tout bagay. ”
[Foto nan paj 16]
Yon bon fason pou nou montre nou fidèl se lè nou byen prepare nou pou predikasyon.
[Foto nan paj 17]
Se pou nou modès nan abiman nou ak nan kwafi nou.