Chapit en

Adore nan inite jodi a : ki sa sa siyifi ?

1, 2. a) Ki mouvman remakab k ap fèt jodi a ? b) Ki bèl espwa moun ki gen kè sensè yo genyen ?

TOUPATOU sou tè a, gen yon mouvman remakab k ap fèt pou pèmèt moun adore nan inite. Mouvman sa a ini ansanm plizyè milyon moun ki soti nan tout nasyon, nan tout tribi, nan tout lang. Chak ane, gen plis moun ki rasanble toujou. Nan Bib la, yo idantifye moun sa yo kòm “ temwen ” Jewova, e yo rele yo “ yon gwo foul ”. Y ap bay Bondye yon “ sèvis sakre lajounen kou lannuit ”. (Izayi 43:10-12 ; Revelasyon 7:9-15.) Pou ki rezon yo fè sa ? Paske yo rive konnen Jewova antanke sèl vrè Dye. Sa pouse yo konfòme vi yo ak prensip dwat Jewova yo. Yo aprann tou n ap viv nan “ dènye jou ” monn mechan sa a, yon monn Bondye pral detwi talè konsa. E se monn nouvo a, Paradi a, ki pral ranplase l. — 2 Timote 3:1-5, 13 ; 2 Pyè 3:10-13.

² Men pwomès nou jwenn nan Pawòl Bondye a : “ Nan yon tikras tan ankò, mechan an pap la ankò [...]. Men moun ki enb yo yo menm, yo pral posede tè a. E vrèmanvre, yo pral pran tout plezi yo nan abondans lapè. ” ​(Sòm 37:10, 11). “ Moun ki jis yo pral posede tè a, e sou li, y ap rete pou toutan. ” ​(Sòm 37:29). “ [Bondye] pral siye tout dlo nan je yo, e lanmò pap la ankò, ni dèy, ni rèl, ni doulè pap la ankò. Ansyen bagay yo disparèt. ” — Revelasyon 21:4.

 3. Kòman inite nan vrè adorasyon an rive reyalize ?

³ Se moun ki ini kounye a nan vrè adorasyon an k ap abite nan monn nouvo a an premye. Yo aprann sa volonte Bondye ye, e yo fè tout sa yo kapab pou yo fè l. Pou Jezi montre jan se yon bagay ki enpòtan, li di : “ Men sa lavi etènèl la siyifi : se pou yo aprann konnen w, ou menm, sèl vrè Dye a, ak sila ou te voye a, Jezi Kris. ” ​(Jan 17:3). Men sa apot Jan ekri : “ Se pase monn nan ap pase, dezi li tou, men moun ki fè volonte Bondye ap rete pou toutan. ” — 1 Jan 2:17.

Sa sa siyifi toutbonvre

 4. a) i sa rasanbleman tout moun sa yo pou adore nan inite jodi a siyifi toutbonvre ? b) Ki jan Bib la dekri rasanbleman sa a ?

⁴ Ki sa rasanbleman tout moun sa yo pou yo adore nan inite jodi a siyifi toutbonvre ? Li klè nou toupre lafen monn mechan sa a, e monn nouvo Bondye a ap kòmanse tousuit apre. Nou temwen ak je nou akonplisman pwofesi biblik yo ki te predi rasanbleman trèzenpòtan sa a. Youn nan pwofesi sa yo di : “ Li dwe rive nan dènye pati jou yo [dènye jou sa yo], mòn mezon Jewova a [vrè adorasyon pa l ki elve a] pral chita byen djanm anlè tèt mòn yo [pi wo pase nenpòt lòt fòm adorasyon], [...] e yon bann pèp dwe vini an foul nan direksyon l. E anpil nasyon prale san mank e y ap di : ‘ Vini, annou monte nan mòn Jewova a, nan mezon Bondye Jakòb la, e l ap enstwi nou konsènan wout li yo e n ap mache nan chemen li yo. ’ ” — Mika 4:1, 2 ; Sòm 37:34.

5, 6. a) Nan ki sans reyèlman nasyon yo vire bò kote Jewova ? b) Ki kesyon nou ta dwe poze tèt nou ?

⁵ Byenke pa gen nasyon kote tout moun nèt prezante tèt yo nan mezon espirityèl Jewova a pou adore l, gen plizyè milyon moun ki soti nan tout nasyon ki fè sa. Lè yo aprann objektif chaje lanmou Jewova Dye genyen ansanm ak pèsonalite atiran li genyen, sa touche yo nan fon kè yo. Avèk imilite, yo chèche konnen ki sa Bondye mande pou yo fè. Priyè yo sanble ak priyè salmis la ki te di : “ Montre m fè volonte w, paske ou se Bondye m. ” — Sòm 143:10.

⁶ Èske w wè ou menm ou pami gwo foul moun Jewova ap rasanble kounye a pou yo adore l nan inite a ? Èske reyaksyon w devan enstriksyon ou resevwa nan Pawòl li montre ou rekonèt vrèman se Jewova ki sous enstriksyon sa a ? Jis nan ki pwen w ap “ mache nan chemen li yo ” ?

Kòman inite a rive reyalize

 7. a) Finalman, jis nan ki pwen inite nan adorasyon an pral rive reyalize ? b) Poukisa li ijan pou se kounye a yon moun vin adoratè Jewova, e kòman nou ka ede lòt moun pou yo fè sa ?

⁷ Objektif Jewova se pou tout kreyati entèlijan yo ini nan vrè adorasyon an. Se pa ti tann n ap tann jou sa a avèk enpasyans, jou kote tout sa k ap viv pral adore sèl vrè Dye a (Sòm 103:19-22) ! Men, anvan sa rive fèt, Jewova dwe elimine tout moun ki refize fè volonte l, yon volonte ki jis. Avèk mizèrikòd, li bay avètisman davans sou sa l pral fè, yon fason pou moun toupatou kapab jwenn posiblite chanje fason y ap aji (Izayi 55:6, 7). Se sa k fè, jodi a, yo lanse yon apèl ijan “ pou tout nasyon, ak tribi, ak lang, ak pèp ”. Apèl sa a di : “ Krenn Bondye epi ba li glwa, paske lè pou l fè jijman an rive. Epi adore Sila a ki fè syèl la, tè a, lanmè ak sous dlo yo. ” ​(Revelasyon 14:6, 7). Èske w aksepte envitasyon sa a ? Si se sa, se privilèj pa w kounye a pou w envite lòt moun pou yo konnen vrè Dye a e pou yo adore l.

 8. Apre nou fin aprann ansèyman fondamantal ki nan Bib la, ki lòt pwogrè nou ta dwe fè efò pou nou fè seryezman ?

⁸ Se pa objektif Jewova pou moun k ap adore l yo di yo kwè nan li epoutan pou yo kontinye ap chèche pwòp enterè pa yo. Bondye vle pou moun gen “ konesans egzak sou volonte l ” e pou yo demontre sa nan lavi yo (Kolosyen 1:9, 10). Konsa, moun ki gen rekonesans, ki aprann ansèyman fondamantal ki nan Bib la, ap vle pwogrese pou yo rive gen matirite antanke kretyen. Dezi yo se pou yo konnen Jewova pi byen, pou yo vin pi byen konpran Pawòl li, pou yo apwofondi konpreyansyon sa a, epi apre sa, pou yo aplike Pawòl li pi plis toujou nan lavi yo. Yo chèche reflete kalite Papa nou ki nan syèl la, e yo chèche wè bagay yo menm jan avè l. Sa motive yo pou yo chèche mwayen pou yo patisipe nan travay sove lavi k ap fèt sou tè a jodi a. Èske w anvi fè sa tou ? — Mak 13:10 ; Ebre 5:12–6:3.

 9. Ki sa ki rann vrè inite a posib jodi a ?

⁹ Bib la montre moun k ap sèvi Jewova fèt pou yo fòme yon pèp ini (Efezyen 4:1-3). Inite sa a dwe egziste depi kounye a, menmsi n ap viv nan yon monn divize, e menmsi nou toujou ap lite kont pwòp enpèfeksyon nou. Avèk senserite, Jezi te priye pou tout disip li yo fè youn, pou yo viv nan vrè inite. Ki sa sa vle di ? Premyèman, pou yo gen bonjan relasyon avèk Jewova ansanm ak Pitit li a. Dezyèmman, pou yo ini youn ak lòt (Jan 17:20, 21). Pou Jewova atenn objektif sa a, li sèvi ak kongregasyon kretyen an antanke òganizasyon pou l enstwi pèp li a.

Ki sa ki kontribye pou bay inite a ?

10. a) Ki sa n ap devlope lakay nou, lè nou itilize Bib la pèsonèlman pou nou jwenn repons kesyon ki konsène nou ? b) Analize pwen ki kontribye pou ini nou antanke kretyen lè nou reponn kesyon ki nan paragraf sa a.

¹⁰ Gen sèt pwen kle ki mansyone pi ba a ki kontribye pou bay inite nan adorasyon an. Pandan w ap reponn kesyon ki vin apre yo, reflechi sou fason chak pwen yo touche relasyon w avèk Jewova ansanm ak kretyen parèy ou yo. Rezone sou pwen sa yo epi gade tèks yo bay kòm referans san yo pa site sa yo di yo. Sa ap kontribye pou ede w devlope sajès ki soti nan Bondye a, kapasite refleksyon ak disènman, kalite nou tout gen bezwen (Pwovèb 5:1, 2 ; Filipyen 1:9-11). Ann egzamine pwen sa yo youn pa youn.

1) Nou rekonèt Jewova gen dwa pou l etabli prensip sou sa ki byen ak sa ki mal. “ Mete konfyans ou nan Jewova ak tout kè w epi pa apiye sou pwòp entèlijans ou. Nan tout wout ou, teni kont de li, epi li menm l ap fè chemen w yo dwat. ” — Pwovèb 3:5, 6.

Poukisa nou ta dwe chèche konsèy ak direksyon nan men Jewova lè n ap pran desizyon (Sòm 146:3-5 ; Izayi 48:17) ?

2) Nou gen Pawòl Bondye a pou gide nou. “ Lè nou menm nou te resevwa Pawòl Bondye nou te fè nou tande a, nou te aksepte li non pa kòm pawòl lèzòm, men pou sa li ye vrèman an, kòm pawòl Bondye k ap travay tou nan nou menm kwayan. ” — 1 Tesalonisyen 2:13.

Ki danje ki genyen lè nou annik fè senpleman sa nou “ panse ” ki byen (Pwovèb 14:12 ; Jeremi 10:23, 24 ; 17:9) ?

Si nou pa konnen ki konsèy Bib la bay sou yon sijè, ki sa nou ta dwe fè (Pwovèb 2:3-5 ; 2 Timote 3:16, 17) ?

3) Nou tout benefisye menm pwogram nouriti espirityèl la. “ Tout pitit gason w yo se pral moun Jewova anseye. ” ​(Izayi 54:13). “ Annou voye je youn sou lòt, pou youn pouse lòt gen lanmou, pou youn pouse lòt fè bèl aksyon, san nou pa abandone reyinyon nou, jan se abitid kèk moun, men annou ankouraje youn lòt, e n ap fè sa plis toujou vin jwenn nou wè se pwoche jou a [jou destriksyon an] ap pwoche. ” — Ebre 10:24, 25.

Moun ki pwofite omaksimòm dispozisyon Jewova pran pou l bay nouriti espirityèl la, ki byenfè y ap jwenn (Izayi 65:13, 14) ?

4) Se Jezi Kris ki Kondiktè nou, se pa yon òm. “ Pa fè yo rele nou Rabi, paske se yon sèl ki anseyan nou, tandiske nou tout se frè. Anplis de sa, pa rele pèsonn papa nou sou latè, paske se yon sèl ki Papa nou, Sila ki nan syèl la. Ni nonplis pa fè yo rele nou ‘ kondiktè ’, paske se yon sèl ki Kondiktè nou, Kris. ” — Matye 23:8-10.

Èske gen youn nan nou ki ta dwe kwè li siperyè lòt yo (Women 3:23, 24 ; 12:3) ?

5) Se Wayòm nan, gouvènman Bondye a, nou wè kòm sèl espwa limanite. “ Kidonk men ki jan nou dwe priye : ‘ Papa nou ki nan syèl la, se pou non w sangtifye. Se pou wayòm ou an vini. Se pou volonte w fèt sou tè a, kou nan syèl la. ’ Kidonk, kontinye chèche wayòm nan ak jistis li an premye. ” — Matye 6:9, 10, 33.

Lefètke nou “ chèche wayòm nan an premye ”, kòman sa ede nou prezève inite nou genyen an (Mika 4:3 ; 1 Jan 3:10-12) ?

6) Lespri sen pwodui nan adoratè Jewova yo yon seri kalite ki esansyèl pou ini yo antanke kretyen. “ Fwi lespri a se lanmou, lajwa, lapè, pasyans, bonte, byenveyans, lafwa, dousè, metriz. ” — Galat 5:22, 23.

Ki sa nou dwe fè yon fason pou lespri Bondye pwodui fwi li nan nou (Travay 5:32) ?

Nan ki sans lè nou gen lespri Bondye sa gen efè sou relasyon nou ak kretyen parèy nou yo (Jan 13:35 ; 1 Jan 4:8, 20, 21) ?

7) Tout vrè adoratè Bondye yo patisipe nan predikasyon bon nouvèl Wayòm li an. “ Bon nouvèl sa a konsènan wayòm nan, yo pral preche l sou tout latè ki abite kòm temwayaj pou tout nasyon. Epi apre sa lafen an ap vini. ” — Matye 24:14.

Ki sa k ta dwe pouse nou pou nou anvi patisipe omaksimòm nan aktivite predikasyon an (Matye 22:37-39 ; Women 10:10) ?

11. Lè nou aplike verite ki nan Bib la nan lavi nou, ki efè sa genyen ?

¹¹ Adore Jewova nan inite fè nou vin pi pwòch li, e sa pèmèt nou pwofite konpayi ankourajan frè ak sè nou yo. Men sa Sòm 133:1 di : “ Gade ! Ala sa bon, ala sa agreyab pou frè ret ansanm nan inite ! ” Ala ankourajan sa ankourajan lè nou kite monn nan ak tout egoyis, tout imoralite, ak tout vyolans li gen ladan l, e nou reyini ansanm ak moun ki renmen Jewova toutbonvre e ki obeyi lwa l yo !

Evite bagay ki lakòz divizyon

12. Poukisa nou bezwen evite espri endepandans ?

¹² Pou nou pa detwi inite mondyal nou an ki gen anpil valè, nou dwe evite bagay ki lakòz divizyon. Youn ladan yo se espri endepandans parapò ak Bondye e parapò ak lwa li yo. Jewova ede nou evite espri endepandans lè l demaske Satan Ledyab, sila ki vini ak lespri sa a (2 Korentyen 4:4 ; Revelasyon 12:9). Se Satan ki te enfliyanse Adan ak Èv pou yo pa okipe sa Bondye te di a, e pou yo pran desizyon ki kontrè ak volonte Bondye. E sa lakòz kalamite ni pou yo ni pou nou (Jenèz 3:1-6, 17-19). Espri endepandans parapò ak Bondye e parapò ak lwa li yo anvayi monn sa a. Se poutèt sa, nou bezwen metrize espri sa a nan nou.

13. Ki sa k ap montre si n ap prepare nou toutbonvre pou nou viv nan monn nouvo jis Bondye a ?

¹³ Pa egzanp, egzamine pwomès estrawòdinè Jewova fè pou l ranplase monn mechan ki la kounye a ak yon syèl tounèf ansanm ak yon tè tounèf kote “ jistis ap abite ”. (2 Pyè 3:13.) Èske sa pa ta dwe pouse nou pou nou kòmanse prepare nou pou nou viv nan tan sa a, lè se jistis k ap blayi tout kote ? Sa siyifi koute konsèy klè Bib la bay lè l di : “ Pa renmen monn nan ni bagay ki nan monn nan. Si yon moun renmen monn nan, lanmou Papa a pa nan li. ” ​(1 Jan 2:15). Se sa k fè, nou rejte lespri monn sa a, sètadi atitid endepandan li genyen, egoyis li ki depase limit, imoralite ansanm ak vyolans ki ladan l. Konsa, nou pran abitid koute Jewova epi obeyi l ak tout kè nou, malgre lachè enpafè a gen tandans fè nou fè lekontrè. Tout lavi nou demontre sa ki domine panse nou ak mobil nou se fè volonte Bondye. — Sòm 40:8.

14. a) Poukisa li enpòtan pou nou pwofite posiblite nou genyen kounye a pou nou aprann chemen Jewova yo e pou nou suiv yo nan lavi nou ? b) Ki sa tèks yo site nan paragraf la siyifi pou nou pèsonèlman ?

¹⁴ Lè moman fikse a rive pou Jewova detwi sistèm de choz mechan sa a ansanm ak tout moun ki prefere aksyon l yo, li pap bay delè. Li pap ni pwolonje tan sa a, ni li pap chanje prensip li yo pou bon plezi moun ki toujou rete kole ak monn nan, pandan y ap aprann volonte Bondye ak de kè, e y ap fè l ak de kè. Se kounye a ki moman pou moun aji (Lik 13:23, 24 ; 17:32 ; 21:34-36) ! Kidonk, ala kontan nou kontan pou nou wè gwo foul la pwofite bèl posiblite sa a yo genyen pou yo chèche avèk anpresman enstriksyon Jewova bay pa mwayen Pawòl li ak òganizasyon l lan, e pou yo mache nan inite nan chemen Jewova yo k ap mennen nan monn nouvo a ! Epitou, plis nou aprann konsènan Jewova, se plis n ap renmen l e se plis n ap vle sèvi l.

Revizyon

• Anrapò avèk adorasyon, ki objektif Jewova genyen ?

• Apre nou fin aprann ansèyman fondamantal ki nan Bib la, ki lòt pwogrè nou ta dwe chèche fè seryezman ?

• Ki sa nou chak kapab fè pou nou ini ak lòt adoratè Jewova yo ?

[Foto nan paj 4]

‘ Moun ki enb yo pral posede tè a, e yo pral pran tout plezi yo nan abondans lapè. ’