Zanj yo : Ki wòl yo anrapò ak nou ?

KONSÈNAN yon vizyon Dànyèl te fè kote li te wè zanj Bondye yo, men sa li te ekri : “ Te gen mil milye [zanj] ki t ap sèvi [Bondye], e dimil fwa dimil ki te kanpe la devan l. ” ​(Dànyèl 7:10). Vèsè sa a revele nan ki objektif Bondye te kreye zanj yo : pou yo sèvi l e pou yo toujou pare pou yo egzekite enstriksyon li bay.

Bondye itilize zanj yo pou yo akonpli kèk travay anrapò ak lèzòm. Nou pral konsidere fason li itilize yo pou fòtifye sèvitè l yo e pou pwoteje yo, pou transmèt mesaj li bay lèzòm e pou egzekite jijman l sou mechan yo.

Zanj yo fòtifye moun e yo pwoteje yo

Kreyati espirityèl yo te temwen kreyasyon tè a ak premye moun yo, e depi lè sa a yo montre yo enterese anpil nan zafè lèzòm. Antanke sajès an pèsòn, men sa Jezi Kris te di anvan li te vin sou tè a : “ Bagay mwen te santi yon atachman pou yo te avèk pitit lèzòm. ” ​(Pwovèb 8:31). Epitou, Bib la fè nou konnen “ zanj yo gen dezi pou yo gade avèk atansyon ” nan bagay ki gen rapò ak Kris e ki gen rapò ak lavni, sa vle di bagay ki te revele bay pwofèt Bondye yo. — 1 Pyè 1:11, 12.

Ofiramezi tan ap pase, zanj yo te vin remake majorite moun k ap viv sou tè a pa t ap sèvi Kreyatè yo a ki plen lanmou. Ala tris sa dwe te fè zanj ki fidèl yo tris ! Tandiske, lè yon pechè repanti e li retounen vin jwenn Jewova, “ gen kè kontan pami zanj ” yo (Lik 15:10). Zanj yo gen anpil sousi pou byennèt moun k ap sèvi Bondye yo, e Jewova itilize yo souvan pou fòtifye sèvitè fidèl li yo sou tè a e pou pwoteje yo (Ebre 1:14). Annou konsidere kèk egzanp.

De zanj te ede Lòt, ki te yon nonm jis, ansanm ak pitit fi li te genyen. Yo te eskòte yo sot nan zòn kote yo te ye a pou yo te ka chape anba destriksyon vil Sodòm ak Gomò ki te gen anpil mechanstea (Jenèz 19:1, 15-26). Plizyè syèk apre sa, yo te lage pwofèt Dànyèl nan yon twou lyon, men anyen pa t rive l. Ki jan sa te fè posib ? Men sa li te deklare : “ Bondye m nan voye zanj li an, e li fèmen bouch lyon yo. ” ​(Dànyèl 6:22). Nan kòmansman ministè Jezi sou tè a, zanj yo te ba l sipò (Mak 1:13). E yon ti tan anvan lanmò Jezi, gen yon zanj ki te parèt devan l e li te “ fòtifye l ”. (Lik 22:43.) Sipò zanj yo te ankourajan pou Jezi anpil nan moman difisil sa yo nan lavi li. Epitou, se yon zanj ki te libere apot Pyè nan prizon. — Travay 12:6-11.

Èske zanj yo pwoteje nou jodi a ? Si nou adore Jewova ann amoni ak Pawòl li a, nou sèten zanj envizib li yo ki pisan ap ban nou pwoteksyon. Men pwomès Bib la fè : “ Zanj Jewova a kanpe toutotou moun ki krenn li, e li delivre yo. ” — Sòm 34:7.

Sepandan, nou dwe rekonèt zanj yo se osèvis Bondye yo ye toudabò, se pa osèvis lèzòm (Sòm 103:20, 21). Yo aji selon lòd Bondye ba yo, pa selon volonte lèzòm. Se sa k fè, se Jewova pou nou mande èd, se pa zanj yo (Matye 26:53). Natirèlman, piske nou pa wè zanj yo, nou pa ka detèmine jis nan ki pwen Bondye itilize yo pou ede moun nan divès sitiyasyon. Men nou konnen, Jewova “ montre fòs li an favè moun kè yo konplè pou li ”. (2 Kwonik 16:9 ; Sòm 91:11.) E nou gen asirans “ kèlkeswa sa nou mande selon volonte [Bondye], li tande nou ”. — 1 Jan 5:14.

Ekriti yo di nou tou, se Bondye sèl nou dwe priye e se li sèl nou dwe adore (Egzòd 20:3-5 ; Sòm 5:1, 2 ; Matye 6:9). Zanj fidèl yo ankouraje nou pou nou fè sa. Pa egzanp, lè apot Jan t apral adore yon zanj, kreyati espirityèl sa a te reprimande Jan. Li te di l : “ Atansyon ! Pa fè sa ! [...] Adore Bondye. ” — Revelasyon 19:10.

Zanj yo transmèt mesaj Bondye

Mo “ zanj ” lan vle di “ mesaje ”, e se yon lòt fason zanj yo sèvi Bondye, yo pote mesaj li bay lèzòm. Pa egzanp, “ Bondye te voye zanj Gabriyèl nan yon vil nan Galile ki rele Nazarèt ”. Poukisa ? Pou l enfòme yon jèn fi ki rele Mari, byenke l te vyèj, li t apral pote yon pitit nan matris li, e li t ap fè yon pitit gason, e yo t ap ba l non Jezi (Lik 1:26-31). Gen yon zanj ki t ale kote kèk bèje ki te nan yon savann pou enfòme yo “ Kris, Seyè a ” fèt (Lik 2:8-11). Menm jan an tou, gen zanj ki te pote mesaj Bondye bay Abraram, Moyiz, Jezi, ak kèk lòt moun Bib la mansyone. — Jenèz 18:1-5, 10 ; Egzòd 3:1, 2 ; Lik 22:39-43.

Jodi a, ki jan zanj yo sèvi kòm mesaje Bondye ? Annou konsidere travay Jezi te di disip li yo t ap gen pou yo fè anvan fen sistèm de choz sa a. Li te di : “ Bon nouvèl sa a konsènan wayòm nan, yo pral preche l sou tout latè ki abite kòm temwayaj pou tout nasyon. Epi apre sa lafen an ap vini. ” ​(Matye 24:3, 14). Chak ane, Temwen Jewova yo fè plis pase yon milya èdtan ap preche bon nouvèl Wayòm Bondye a. Men, èske w te konnen zanj yo patisipe nan travay sa a tou ? Men sa apot Jan te di li wè nan yon vizyon : “ Mwen te wè yon lòt zanj [...] e li te gen yon bon nouvèl etènèl pou l anonse kòm evanjil pou moun ki abite sou tè a, pou tout nasyon, ak tribi, ak lang, ak pèp. ” ​(Revelasyon 14:6, 7). Vèsè sa yo atire atansyon sou travay ki pi enpòtan zanj yo ap fè jodi a an favè lèzòm.

Temwen Jewova yo gen prèv zanj yo ap gide yo pandan y ap fè travay predikasyon kay an kay la. Souvan yo rankontre moun ki te fèk ap priye pou yon moun vin ede yo konprann objektif Bondye. Direksyon zanj yo bay mete sou inisyativ Temwen yo vin fè, chak ane, plizyè santèn milye moun rive konnen Jewova. Nou swete pou w tire pwofi nan travay sove lavi sa a k ap fèt anba direksyon zanj yo.

Zanj yo egzekite jijman Bondye

Byenke zanj yo pa otorize pou yo jije lèzòm, yo pa rete senpleman ap gade (Jan 5:22 ; Ebre 12:22, 23). Nan tan lontan, Bondye te konn sèvi ak zanj pou egzekite jijman l. Pa egzanp, Bondye te sèvi ak zanj nan batay li t ap mennen kont Ejipsyen ki te kenbe Izrayelit yo nan esklavaj (Sòm 78:49). E nan yon sèl nuit, “ zanj Jewova a ” te touye san katreven senk mil sòlda nan kan yon ènmi pèp Bondye a. — 2 Wa 19:35.

Alavni tou, zanj yo pral egzekite jijman kondanasyon Bondye pral fè a. Jezi ap vini “ avèk zanj pisan li yo nan yon gwo flanm dife, pou l fè vanjans vini sou moun ki pa konnen Bondye e sou moun ki pa obeyi bon nouvèl ” la (2 Tesalonisyen 1:7, 8). Toutfwa, destriksyon sa a ap vini sèlman sou moun ki pa reyaji devan mesaj y ap preche kounye a sou tout tè a, grasa sipò zanj yo. Moun ki chèche Bondye e ki aksepte ansèyman Bib la bay, anyen pap rive yo. — Sefànya 2:3.

Nou dwe montre anpil rekonesans pou zanj fidèl sa yo, ki toujou egzekite enstriksyon Bondye bay. Jewova itilize yo pou ede sèvitè fidèl li yo sou tè a e pou pwoteje yo. Sa rekonfòte nou anpil, paske gen kreyati espirityèl danjere ki rele demon ki vle fè nou mal.

Demon yo : kiyès yo ye ?

Diran 15 syèk apre Satan te fin twonpe Èv ann Edenn, zanj Bondye yo te wè kòman Satan Ledyab reyisi fè tout kalite moun vire do bay Bondye, eksepte kèk moun fidèl, tankou Abèl, Enòk ak Noye (Jenèz 3:1-7 ; Ebre 11:4, 5, 7). Kèk nan zanj sa yo te lage bay Satan tou. Se yo menm Labib di ki te espri dezobeyisan “ nan jou Noye yo ”. (1 Pyè 3:19, 20.) Ki jan dezobeyisans yo a te vin parèt aklè ?

Nan epòk Noye a, gen yon kantite zanj rebèl, yo pa di konbyen yo te ye, ki te kite plas yo nan syèl la pami zanj Bondye yo, yo te vin sou tè a, e yo te pran fòm kò moun. Ki sa k te pouse yo fè sa ? Se paske yo te devlope dezi pou yo gen relasyon seksyèl avèk fi. Konsa, yo te vin fè yon seri pitit ki te rele Nefilim, e pitit sa yo te vin tounen jeyan ki vyolan. Anplis de sa, “ mechanste lèzòm te vin anpil sou tè a e lide ki nan kè yo te toujou panche sou bagay ki mal ”. Sepandan, Jewova Dye pa t pèmèt koripsyon sa a kontinye pami lèzòm. Li te fè yon delij sou tout tè a ki te pase pran tout moun mechan yo ansanm ak Nefilim yo. Sèl moun ki te rete vivan se te sèvitè fidèl Bondye yo. — Jenèz 6:1-7, 17 ; 7:23.

Zanj rebèl yo te chape anba destriksyon nan epòk delij la. Yo te abandone kò lachè yo te genyen an, e antanke kreyati espirityèl, yo te retounen nan zòn kote espri yo abite. Depi lè sa a, yo rele yo demon. Yo fè kò ak Satan Ledyab, ki pote non “ chèf demon yo ”. (Matye 12:24-27.) Menm jan ak chèf yo a, demon yo ap chèche pou moun adore yo.

Demon yo danjere, men nou pa bezwen pè yo. Pouvwa yo limite. Lè zanj dezobeyisan yo te retounen nan syèl la, yo pa t kite yo rete pami zanj fidèl Bondye yo. Okontrè, yo te pèdi tout limyè espirityèl ki sot nan Bondye, yo sèlman vin gen yon pèspektiv sonm pou lavni. Vrèmanvre, yo fèmen nan yon fènwa espirityèl ki rele Tata (2 Pyè 2:4). Jewova kenbe yo anba restriksyon nan “ chenn etènèl ”, sa fè yo nan fènwa espirityèl. Anplis de sa, kounye a, yo pa ka pran fòm kò moun ankò. — Jid 6.

Ki sa w ta dwe fè ?

Èske demon yo toujou ap egzèse enfliyans sou moun ? Wi, pou yo fè sa, yo itilize yon seri “ manèv ” oswa “ riz ”, tankou sa chèf yo a, Satan Ledyab, itilize yo (Efezyen 6:11, 12, nòt anba paj). Sepandan, lè nou aplike konsèy ki nan Pawòl Bondye a, nou ka kenbe fèm kont demon yo. Anplis de sa, moun ki renmen Bondye vin anba pwoteksyon zanj pisan yo.

Se pa ti enpòtan sa enpòtan pou nou aprann konnen sa Bondye mande nan Ekriti yo e pou nou aji ann amoni ak sa nou aprann ! Ou ka aprann plis sou ansèyman ki nan Bib la si w kontakte Temwen Jewova nan zòn kote w ye a oswa si w ekri biwo ki pibliye peryodik sa a. Temwen Jewova yo ap kontan etidye Labib avèk ou gratis e nan yon lè k ap bon pou ou.

[Nòt anba paj]

[Kare nan paj 5]

ZANJ YO : FASON YO ÒGANIZE

Jewova gen yon gwo kantite zanj ki òganize konsa :

Zanj ki gen plis pisans ak plis otorite a se akanj Mikayèl oubyen Jezi Kris (1 Tesalonisyen 4:16 ; Jid 9). Serafen yo, cheriben yo ak lòt zanj yo anba direksyon l.

Bondye plase Serafen yo nan yon pozisyon ki elve anpil. Yo la pou yo sèvi bò kote twòn Bondye a. Asiyasyon yo a gen ladan l pou yo deklare sentete Bondye e pou yo kenbe pèp li a pwòp espirityèlman. — Izayi 6: 1-3, 6, 7.

Cheriben yo lye ak twòn Bondye a e yo egzalte majeste Jewova. — Sòm 80:1 ; 99:1 ; Ezekyèl 10:1, 2.

Gen lòt zanj ki sèvi kòm reprezantan Jewova, e y ap akonpli volonte l.

[Foto nan paj 3]

Gen zanj ki te eskòte Lòt ak pitit fi li yo pou sove yo.

[Foto nan paj 4]

Lè apot Jan t apral adore yon zanj, zanj lan te di l : “ Pa fè sa ! ”

[Foto nan paj 5]

Zanj yo egzekite jijman Bondye.