Kesyon lektè yo poze
Ki sa “ lagè [...] Bondye Toupisan an ” k ap fèt nan Amagedòn nan ye, e ki rezilta sa ap pote ? — Revelasyon 16:14, 16.
Yon fason senp, lagè Amagedòn nan se pwochen batay ki pral fèt sou tout tè a nèt, kote Jezi Kris, Wa Jewova nome a, pral detwi ènmi Bondye yo. Labib fè konnen ènmi sa yo, sètadi “ wa ki sou tout kò tè a ki abite ”, se “ pawòl demon enspire ” ki mobilize yo, e yo reyini ansanm “ pou lagè gran jou Bondye Toupisan an [...] nan zòn yo rele ann ebre Amagedòn ” nan. — Revelasyon 16:14, 16.
Andwa kote de kan k ap batay yo rankontre a se pa yon andwa literal. Non Amagedòn nan, siyifi “ montay Megido ”. (Revelasyon 16:16, nòt anba paj.) Pa t janm gen yon montay ki te pote non sa a. Mete sou sa, “ wa latè yo ak lame yo ” pa t ap ka rasanble yon sèl kote literalman (Revelasyon 19:19). An reyalite, “ andwa sa a ” fè referans ak sitiyasyon kote tout dirijan politik ki sou tè a ak moun k ap soutni yo pral twouve yo — yon sitiyasyon kote yo opoze ak Jewova ak ‘ lame ki nan syèl yo ’ ki anba direksyon “ Wa dè wa, Seyè dè seyè ” a, anpalan de Jezi Kris. — Revelasyon 19:14, 16.
Yon bagay ki enpòtan sèke ekspresyon “ Amagedòn ” nan lye ak Megido, yon vil nan Izrayèl tan lontan an. Megido te twouve l nan yon pozisyon estratejik alès mòn Kamèl, e pozisyon sa a te domine prensipal wout komèsyal ak wout militè ki te egziste nan epòk la. Anplis, se te yon zòn kote te konn gen batay desizif ki fèt. Pa egzanp, se te “ toupre dlo Megido yo ” jij Barak, yon Izrayelit, te venk yon lame kananeyen pisan jeneral Sisera t ap kòmande (Jij 4:12-24 ; 5:19, 20). Se te nan menm zòn sa a tou jij Gideyòn te venk Madyanit yo konplètman (Jij 7:1-22). Lefètke Labib fè yon lyen ant Megido ak lagè ki pral genyen an, li ban nou asirans Bondye ap venk tout fòs ki opoze avèk li yo konplètman, pa mwayen Pitit Gason l lan.
Ki rezilta sa ap pote ? Lagè Amagedòn nan pral debarase tè a ak tout kalite koripsyon e ak tout kalite mechanste. Sa pral ouvri chemen pou epòk ki pi glorye ki te ka egziste nan istwa lèzòm (Revelasyon 21:1-4). Anba direksyon plen lanmou Wayòm Bondye a, tè a pral tounen yon paradi e moun ki jis yo pral viv nan paradi sa a pou toutan. — Sòm 37:29.