Chapit venteyen
Objektif Jewova a reyalize avèk glwa
1, 2. a) Ki objektif Jewova genyen pou kreyati entèlijan li yo ? b) Kiyès ki te fè pati fanmi ini adoratè Bondye yo ?
OBJEKTIF chaje lanmou Jewova genyen se pou tout kreyati entèlijan ini pou yo adore sèl vrè Dye a e pou yo tout benefisye libète glorye antanke pitit Bondye. Se sa tou moun ki gen lanmou pou lajistis yo ta renmen sensèman.
2 Jewova te kòmanse reyalize objektif grandyoz sa a, lè l te derape travay kreyasyon an. Premye kreyasyon li te fè a, se yon Pitit Gason ki, depi l fin resisite, se ‘ reflè glwa [Bondye], reprezantasyon egzak sa l ye a menm ’. (Ebre 1:1-3.) Pitit sa a te san parèy, piske se Bondye poukont li ki te kreye l. Apre sa, se ak konkou Pitit sa a tout lòt bagay te vin egziste : toudabò zanj yo nan syèl la, ansuit lèzòm sou tè a (Jòb 38:7 ; Lik 3:38). Tout kreyati sa yo te fòme yon fanmi inivèsèl. Pou yo tout, Jewova te Dye, Souvren inivèsèl, Papa yo ki renmen yo.
3. a) Ki sa nou tout eritye nan premye paran nou yo ? b) Ki dispozisyon byenveyan Jewova te pran pou desandan Adan yo ?
3 Lè premye paran nou yo te resevwa kondanasyon amò a paske yo te peche ak fèm konviksyon, Bondye te chase yo ann Edenn e li te nye yo. Yo te sispann fè pati fanmi inivèsèl li a (Jenèz 3:22-24 ; Detewonòm 32:4, 5). Nou tout nou se desandan yo, kidonk nou fèt ak tandans peche nan nou. Men, Jewova te konnen gen nan desandan Adan ak Èv yo ki t ap renmen lajistis. Konsa, li te pran yon dispozisyon byenveyan pou moun sa yo ka vin jwenn “ libète glorye pitit Bondye yo ”. — Women 8:20, 21.
Izrayèl pèdi pozisyon privilejye a
4. Ki privilèj Jewova te bay Izrayèl tan lontan an ?
4 Anviwon 2 500 ane apre Jewova te fin kreye Adan, li te bay sèten moun privilèj pou yo gen yon relasyon espesyal avè l. Li te chwazi Izrayèl tan lontan an pou pèp li, e li te ba li Lalwa l (Jenèz 12:1, 2). Li te òganize yo antanke nasyon, e li te itilize yo anrapò ak objektif li (Detewonòm 14:1, 2 ; Izayi 43:1). Sepandan, yo te toujou esklav peche ak lanmò. Kidonk, yo pa t gen libète glorye Adan ak Èv te genyen okòmansman an.
5. Ki jan Izrayelit yo te fè pèdi pozisyon espesyal yo te genyen devan Bondye ?
5 Toutfwa, Izrayelit yo te nan yon pozisyon privilejye devan Bondye. Yo te gen responsablite tou pou yo respekte Jewova kòm Papa yo, e pou yo travay ann akò ak objektif li. Jezi te mete aksan sou enpòtans sa te genyen pou yo te ranpli obligasyon sa a (Matye 5:43-48). Sepandan, nasyon Izrayèl la pa t rive fè sa. Kwak Juif sa yo te pretann yo “ gen yon sèl Papa, se Bondye ”, Jezi te fè yo konnen aksyon yo ansanm ak etadespri yo te demanti sa yo pretann nan (Jan 8:41, 44, 47). Nan ane 33 epòk nou an, Bondye te mete yon fen nan Lalwa, e relasyon espesyal li te genyen ak Izrayèl la te pran fen. Men, èske sa te vle di moun pa t ap janm ka gen yon relasyon privilejye ak Bondye ?
Rasanbleman “ bagay ki nan syèl yo ”
6. Ki rezondèt “ administrasyon ” Pòl mansyone nan Efezyen 1:9, 10 la ?
6 Apot Pòl te montre gen sèten moun pami lèzòm ki t ap ka gen yon relasyon espesyal avèk Bondye. Pa egzanp, anrapò ak dispozisyon Jewova pran pou moun ki egzèse lafwa ka vin manm nan mezon Li a, men sa Pòl ekri : “ [Bondye] fè nou konnen sekrè sakre volonte l. Se selon bon plezi l, selon sa l te deside nan li menm pou yon administrasyon nan dènye limit tan fikse yo, sa vle di : pou rasanble tout bagay ansanm ankò nan Kris la, ni bagay ki nan syèl yo ni bagay ki sou tè yo. ” (Efezyen 1:9, 10). “ Administrasyon ” sa a santre sou Jezi Kris. Grasa li, gen moun ki vin nan sitiyasyon kote Bondye apwouve yo. Yon kantite ki limite pami yo gen posiblite pou y al viv nan syèl. Yon kantite ki pi gwo toujou pral viv sou tè a pou toutan.
7. “ Bagay ki nan syèl yo ”, kiyès yo ye ?
7 Toudabò, apati Pannkòt ane 33 epòk nou an, yo te pote atansyon sou “ bagay ki nan syèl yo ”, sila yo ki t ap gen pou yo eritye Wayòm selès la ansanm ak Kris. Bondye deklare yo jis sou baz lafwa yo nan valè sakrifis Jezi a genyen (Women 5:1, 2). Ofiramezi, vin gen Juif ak Janti ladan yo, e “ bagay ki nan syèl yo ” ta gen pou rive 144 000 (Galat 3:26-29 ; Revelasyon 14:1). Se sèlman yon rès pami yo ki sou tè a toujou.
Rasanbleman “ bagay ki sou tè yo ”
8. “ Bagay ki sou tè yo ”, kiyès yo ye e ki relasyon yo genyen avèk Jewova ?
8 Menm administrasyon an ap rasanble “ bagay ki sou tè yo ” tou. Plizyè milyon moun ap rasanble kounye la a nan objektif pou yo viv pou toutan sou tè a. Nan inite ak rès eritye Wayòm yo, yo glorifye non Jewova e yo elve adorasyon l lan byen wo (Izayi 2:2, 3 ; Sefànya 3:9). Yo menm tou yo rele Jewova “ Papa ” paske yo rekonèt li kòm sous lavi a. E yo gen yon pozisyon apwouve devan l sou baz lafwa yo nan san Jezi te vèse a (Revelasyon 7:9, 14). Men, piske yo toujou enpafè, se alavni Bondye ap rekonèt yo kòm pitit li konplètman.
9. Ki pwomès ki gen nan Women 8:21 pou limanite ?
9 Kounye a, moun ki gen esperans terès yo ap tann avèk enpasyans lè moun, antanke kreyasyon Bondye, pral “ libere anba esklavaj koripsyon ”. (Women 8:21.) Liberasyon sa a ap kòmanse apre Kris ak lame selès li yo mennen gwo tribilasyon an nan dènye bout li pa mwayen Amagedòn. Sa pral siyifi destriksyon tout sistèm de choz mechan Satan an, e benediksyon Rèy mil an Kris la nan pisans Wayòm nan ap vin apre. — Revelasyon 19:17-21 ; 20:6.
10. Ki chan louwanj sèvitè Jewova yo pral chante ?
10 Ala rejwisans ki pral genyen lè sèvitè Jewova yo ki sou tè a, nan inite, pral eksprime menm santiman ak sèvitè l yo ki nan syèl la ! Men sa y ap pwoklame avèk jwa : “ Travay ou yo gran, e yo estrawòdinè, Jewova Dye, Toupisan an. Chemen w yo jis e yo vrè, Wa letènite. Kiyès ki pap gen lakrentif pou ou vrèman, Jewova, e kiyès ki pap glorifye non w, paske se ou sèl ki fidèl ? Paske tout nasyon ap vini e y ap adore devan fas ou, paske dekrè jis ou yo parèt aklè. ” (Revelasyon 15:3, 4). Wi, tout sèvitè Jewova yo ap ini pou yo adore sèl vrè Dye a. Menm mò yo pral resisite e y ap gen posiblite leve vwa yo ansanm avèk yo pou yo louwe Jewova. — Travay 24:15.
Yon libète estrawòdinè ki toupre
11. Ki libète estrawòdinè moun ki chape nan gwo tribilasyon an pral genyen ?
11 Apre gwo tribilasyon an, ki gen Amagedòn kòm dènye faz, fin netwaye tè a anba mechanste, Satan Ledyab pap “ dye sistèm de choz sa a ” ankò. Adoratè Jewova yo pap gen pou yo lite kont enfliyans malsen Satan ankò (2 Korentyen 4:4 ; Revelasyon 20:1, 2). Pap gen fo relijyon k ap mal reprezante Jewova ankò ni pap gen fo relijyon pou simaye divizyon pami lèzòm ankò. Sila yo k ap sèvi vrè Dye a pap sibi enjistis ak eksplwatasyon anba men otorite lèzòm ankò. Ala yon libète estrawòdinè moun pral genyen !
12. Ki jan tout moun pral fè libere anba peche ansanm ak konsekans li yo ?
12 Antanke “ Timouton Bondye k ap wete peche monn nan ”, Jezi pral aplike valè sakrifis li a pou l efase peche lèzòm (Jan 1:29). Lè Jezi te sou tè a e li te padone peche yon moun, li te geri moun sa a kòm prèv peche l padone (Matye 9:1-7 ; 15:30, 31). Nan menm sans lan, antanke Wa selès Wayòm Bondye a, Kris Jezi pral opere mirak pou l geri avèg, bèbè, moun soud, moun ki andikape, moun ki fè depresyon, ak moun ki gen nenpòt lòt maladi (Revelasyon 21:3, 4). “ Lalwa peche ” a pral anile pou tout moun ki obeyisan, yon fason pou panse yo ak aksyon yo fè ni yo menm ni Bondye plezi (Women 7:21-23). Nan fen milenyòm nan, yo pral atenn pèfeksyon, y ap ‘ pòtre ak sèl vrè Dye a e y ap sanble avè l ’. — Jenèz 1:26.
13. Nan fen Rèy milenè a, ki aksyon Kris pral antreprann, e ki rezilta sa pral bay ?
13 Lè Jezi fin mennen limanite nan pèfeksyon, li pral remèt Papa a pouvwa li te ba li pou l fè travay sa a : “ Li va remèt wayòm nan bay Bondye li a, Papa li, lè l fin fè tout gouvènman, tout otorite ansanm ak tout pisans tounen anyen. Paske li dwe gouvène antanke wa jiskaske Bondye mete tout ènmi yo anba pye l. ” (1 Korentyen 15:24, 25). Rèy mil an Wayòm nan pral reyalize misyon l te genyen an konplètman. Konsa, li pap nesesè ankò pou gen yon gouvènman oksilyè ant Jewova ak limanite. E piske peche ak lanmò ap gentan elimine nèt e y ap gentan rachte limanite, fonksyon Jezi antanke rachtè a pap nesesè, l ap pran fen. Men esplikasyon Bib la bay : “ Alò Pitit Gason an li menm tou pral soumèt tèt li devan Sila a ki te fè tout bagay soumèt devan l lan, pou Bondye ka tout bagay pou tout moun. ” — 1 Korentyen 15:28.
14. Anba ki bagay yo pral kite tout moun pafè yo pase, e poukisa ?
14 Apre sa, moun pafè yo pral jwenn posiblite pou yo demontre si yo chwazi sèvi sèl vrè Dye a pou toutan. Se poutèt sa, anvan Jewova adopte yo nèt kòm pitit li, li pral kite tout moun pafè sa yo pase anba yon dènye tès. Yo pral libere Satan ak demon l yo nan abim nan. Sa pap pote domaj ki dirab pou moun ki renmen Jewova toutbonvre yo. Men, tout moun ki kite yo mennen yo dezobeyi Jewova, e konsa ki montre yo enfidèl, pral detwi pou toutan ansanm ak premye rebèl la ak demon l yo. — Revelasyon 20:7-10.
15. Ki sitiyasyon ki pral egziste yon fwa ankò nan mitan tout kreyati entèlijan Jewova yo ?
15 Lè sa a, Jewova Dye pral adopte kòm pitit li tout moun pafè ki te soutni souvrènte l pandan dènye tès sa a. Apati de moman sa a, yo pral jwi libète glorye pitit Bondye yo konplètman antanke manm fanmi inivèsèl Bondye a. Tout kreyati entèlijan yo, kit yo nan syèl la, kit yo sou tè a, pral ini yon fwa ankò pou yo adore Jewova antanke sèl vrè Dye a. Objektif Jewova pral reyalize avèk glwa ! Èske w ta renmen fè pati fanmi etènèl e inivèsèl sa a k ap viv ak kè kontan ? Si se sa w ta renmen, nou ankouraje w pou w suiv avèk atansyon sa Bib la di nan 1 Jan 2:17 : “ Se pase monn nan ap pase, dezi li tou, men moun ki fè volonte Bondye ap rete pou toutan. ”
Revizyon
• Anvan rebelyon ann Edenn nan, ki relasyon tout adoratè Jewova yo te gen avè l ?
• Ki responsablite sèvitè Bondye yo genyen ?
• Ki moun ankò ki gen pou vin pitit Bondye, e ki rapò sa genyen ak objektif Jewova pou moun adore nan inite ?
[Foto nan paj 190]
Moun ki obeyisan yo pral jwi lavi nan yon paradi k ap kouvri tout tè a.